Yohanna 14 - Lala NT

Yeso yǝ ɗǝɗa ko a Paapani ra

¹ “Sǝ taarǝ ra. Sǝ na ɓongtǝra ma Kaa, sǝ ɗǝm na ɓongtǝra ma niina.

² A ɗuur a paane ni, han kaɗaa kǝn dem. me ka sem maaso ra, kama nǝ nkee sǝn. Nǝn koko konǝsǝ werkǝ handa.

³ Me nǝ kon konǝsǝ werkǝ handan, pa kǝnǝ kang wonǝsǝ kono, me hannǝsǝ ɓa, saase kǝn sǝ tom kǝnso.

⁴ Han nǝ kosǝ ɓa sǝ maa ɗǝɗan.”

⁵ Pa Toma yaa nkee me, “Ankundi, tǝ maa han kǝ ngaa ko ɓa ra, pa kǝ tǝ tomtomni kǝta maa ɗǝɗau?”

⁶ Yeso yaa kak me, “Niina nǝn ɗǝɗa, niina nǝn ɓongtǝra, niina ɗǝm nǝ huurtu. Yaa ke sem kǝn kiyaa ko a Paapa ni ra ndub ma lau nwaano.

⁷ Me ka sǝ maa nǝn, kama sǝ maa paanen. Pa hana waso, sǝ maasǝn, sǝ ɗǝm wǝrsǝn.”

⁸ Pa Filibus yaa nkee me, “Ankundi, ǝtǝ weɗɗa paapan maɗ peɗɗen.”

⁹ Pa Yeso yǝ nkeesǝ me, “Filibus, nǝ kaɗɗan dem ma saase, pa nding waso sǝ maanǝ rau? Nsaad yaa yǝ wǝrnǝsǝ ya, yǝ wǝr Paanen. Pa tomtom ni sǝ nkeesǝ me, ‘Tǝ weɗɗa paapau’?

¹⁰ Nwa sǝ na ɓongtǝra me nǝ ɗaan a Paapa ni, Paapa ɗǝm yǝ ɗaan a naa ni rau? Mara nǝn nkeesǝsǝ ra, sem me ǝn u ngwerane wa nǝn nkeesǝ wa ra, ǝn Paapa yǝsǝ ɗaan a kuɗa naa ya yǝn tomsǝ tinima ima wa.

¹¹ Sǝ na ɓongtǝra ma niina, me nǝ nkeesǝ me nǝ ɗaan a Paapa ni wa, Paapa ɗǝm yǝ ɗaan a nani, ko hana sǝ na ɓongtǝra ma niina me a tinimsa u nhiinyanhiinya nǝ tomsǝ wa.

¹² Ɓongtǝra nǝn nkeesǝ, nsaad yaa yǝ nasǝ ɓongtǝra ma niina ya, kiyǝ tom tinima nǝn tomsǝ ma. Kiyǝ nkaa hana yǝ tom tinimsa u faɗsǝ u nwa wa, me nǝ ko a Paapa ni.

¹³ Nsaad mbu sǝ kǝnasǝ ma ɗǝnda na ɓa, kǝnǝ tomo, me aa too Paapa ma lau Auwe wa.

¹⁴ Mbu nsaad sǝ kǝnasǝ ma ɗǝnda naa ɓa, kǝnǝ tomo.

Yeso yǝ nkee wo Wis Ɗekɗek wa

¹⁵ “Me sǝn yau ma niinan, sǝkǝ ɓǝɗ mbu nǝ nkeesǝ ɓa.

¹⁶ Niina kǝn kǝnǝ kǝna Paapa, kiyǝsǝ na Ankwasira ya, yǝ kaɗ ke ma saase pakarese ya.

¹⁷ Ən sase Wis ɓongtǝra wa. Put ntaadi wa ɓǝ nkaa ɓaa konda, me ɓǝ wǝrsǝ ra, ɗǝm ɓǝ maasǝ ra. Pa waaso sǝ maasǝn, me yǝn kaɗ ma saase, kiyǝ ɗǝm kaɗ a kuɗa saa.

¹⁸ Nǝsǝ lee nga em wiina sem ra ɓa ra, kǝnǝ wo a saa ni.

¹⁹ Pee ngeek put ntaadiwa ɓǝ ɓaarǝ ɓǝnǝ wǝr ra, pa waaso kǝsǝ wǝrǝ. Me niina nǝma huurtu, saase kǝn sǝkǝ tom ma huurtu.

²⁰ A kaa sǝsa sǝkǝ ma me nǝ ɗaan a Paapa ni, saase kǝn sǝ ɗaan a nani, niina kǝn nǝ ɗaan a saani.

²¹ Hana Yamni yaa yǝ maasǝ mbu nǝ nkeesǝ ɓa ya, ɗǝm yǝn ɓǝɗ ya, ǝn sase yǝn yaunǝsǝ ya. Yaa yǝn yaunǝsǝ ya ɗǝm, Paane kiya yauwa, niina kǝn kǝnaa yauwa, ɗǝm nǝ weɗɗa nkweerane a saani.”

²² Pa Yahuda, sem Yahuda Iskariyoti ra, yaa nkee me, “Ankundi, tomtomni ngǝn yausǝ me ngǝ weɗɗa ee nwaango a taani, sem a put ntaadi wa rau?”

²³ Yeso yaa kak me, “Hana yamni yaa yǝn yaunǝsǝ ya, kiyǝ ɓǝɗ mbu nǝ fǝɗkǝsǝ ɓa. Paane ɗǝm kiya yau wa, kǝtǝ wo a sani tǝ kaɗ ke ma sase.

²⁴ Hana yamni yaa yǝ yaunǝsǝ ra ya, yǝn ɓǝɗɗaa mbu nǝ fǝɗkǝsǝ ɓa ra. Matamse sǝn kurasǝ ra, sem nwaano ra, ǝn u Paapa wa, yaa yǝ timinǝsǝ ya.

²⁵ Nsaad mbu ɓa nǝ nkeesǝ si ndǝ ke ma saase.

²⁶ Pa Ankwasira ya, Wis Ɗekɗek u Paapa kiyaa tung ma ɗǝnda naa wa, ǝn sase kiyǝsǝn fǝɗkǝ mbusa nsaad ya, ɗǝm yǝ sǝ ɗim nsaad mbu nǝ nkeesǝ ɓa.

²⁷ Nǝ leesǝ ma hurhurto. Hurhurto nwaano nwa, nǝ nasǝn. Nǝ nasǝ sem nga put ntaadi wa ɓǝn nasǝsǝ wa ra. Sǝ lee kuɗasa a taarǝ ra, ɗǝm sǝ kura kokto ra.

²⁸ Sǝ kuran nǝ nkeesǝ me, kǝna faɗ wa, ɗǝm nǝ ɓaarǝ nǝ kang a saani. Me ka sǝn yaunǝ, kama kǝsǝ hur kuɗa me nǝ ko a Paapa ni, me Paapa yǝ faɗ nǝn.

²⁹ Nǝ nkeesǝ mbu ɓa si tom sundu ra, pa me mbusǝsǝ tomon, sǝ na ɓongtǝra.

³⁰ Nǝ ɓaarǝ nǝsǝ kan mara kwang ɗǝm ra, me an kuɓsutu put ntaadi wa ya, yǝn wowo. Yǝ sem ma kwangto a ɗuura na ra,

³¹ pa pamman me ɓet a put ntaadi wa ɓa, ɓǝ maa me nǝn yau Paapa, ɗǝm ǝn tom mbu Paapa yǝ nkeenǝsǝ me nǝ tom ɓa. Sǝ ndǝ nii, ndǝ lee ham ɓa.”