Yohanna 13 - Lala NT

Yeso Yǝ soɓ natsa Emfǝɗkaa ɓǝsa

¹ Pa fer Mbukamsa Tadko ɓa aa kana, Yeso yǝ maasǝ me fer usu kanan u kiyaa nii a put ntaadi wa yǝ kang a paapani, me yǝ yau ɓet ɓisa, ɓaa ɓǝsaa put ntaadi ɓa, yǝ yau ɓǝn tǝngre sem ra.

² Ɓaa se mbuseyaa pǝrtǝra ɓa, pa Shaitan yǝ wee kana a kuɗa Yahuda Iskariyoti au Siman ya, yaa yǝ fangsǝ Yeso ya.

³ Pa Yeso yǝ maan me, Paapa yǝ tisǝ mbusa nsaad a nem isin, ɗǝm yǝ maan me yǝ fiɗ a Kaa ni, ɗǝm a Kaa ni kiyaa kang wa.

⁴ Pa yǝ nii a se mbuseyaa suwa, yǝ ti laulawara ira, yǝ too peekǝsǝra laulawara ra yaa kaa nɗeera.

⁵ Ndiira usu yǝ ɓaɗ mbraa a taasa, yǝ ntii soɓ natsa emfǝɗkaa ɓǝsa ɓa, yǝn haatǝ ɓǝ ma mbu yǝ kaasǝ a nɗeera ɓa.

⁶ Pa yǝ kana Bitrus ni, pa usu yaa nkee me, “Ankundi, ǝn ngase kǝ ngǝ nǝn soɓ nata yau?”

⁷ Yeso yaa kak me, “Nga waso ngǝ maa mbu nǝn tomsǝ ɓa ra, pa me tomon, kǝngǝ maa.”

⁸ Bitrus yaa nkee me, “Awo, ngǝ pǝta nǝ soɓ natsa ra.” Yeso yaa kak me, “Me nǝ soɓ ngǝ natsa ra, ngǝ sem ma nsaa a nani ra.”

⁹ Bitrus yǝ kak me, “Ankundi, sem natsa sǝnǝ maɗ ra, pa ma nema ma ɗuura na nsaad!”

¹⁰ Yeso yaa kak me, “Yaa yǝ soosǝ ya, yǝ taa me yǝ soɓ hamka ɗǝm ra, ǝn natsa maɗ, me yǝ wee soɓ ee usun. Waaso sǝ ɓaa soɓsǝ ɓa, pa sǝ sem nsaad ra.”

¹¹ Me yǝ maa yaa kiyaa sa fang yan, ǝn siso yǝ nkeesǝ me, “Sem nsaad saase sǝsǝ ɗekɗek ɓa ra.”

¹² Ndiira yǝ feɗsǝ soɓ natsa ɓosa wa, yǝ kang yǝ tung luktu usu, pa yǝ kang a ham kaɗ ɓisa, yǝɓǝ nkee me, “Sǝ maa mbu nǝ tomsǝsǝ ɓa nǝu?”

¹³ “Sǝn yarnǝ me malǝm, ma ɗǝm Ankundi. Maaso keke, me nǝ maaso.

¹⁴ Waso, nǝsǝ Ankundi yaase wa, ma ɗǝm nǝ malǝm waaso, pa nǝsǝ soɓ natsa, me maaso, pam me sǝ soɓ natsa ɓaatǝ.

¹⁵ Nǝ tomsǝ mǝɗkǝta me, saase kǝn sǝ tom nga nǝ tomsǝsǝ wa.

¹⁶ Ɓongtǝra nǝn nkee sǝ, hoora yǝ faɗ ɗaa an taanda isi ra, yaa ɓa timisǝsǝ ya, yǝ faɗɗaa yaa yǝ timisǝsǝ ya ra.

¹⁷ Pa me sǝ maa mbusǝsan, sǝn tom tinima ma siso, sǝ ɓan ma saltǝra ɓa.

¹⁸ Sem ma saase nsaad nǝn sensǝ wa ra. Nǝ maa ɓaa nǝ tausǝ ɓan. Pa me aa kung mbu nsaad ɓaa nyorsǝ a likarkar ɓa me, ‘Yaa yǝn sesǝ mbuse ɓǝna ya, yǝ kǝrtǝnǝ ndiiran.’

¹⁹ Nǝn nkeesǝ mbu ɓa waso si ntii sundu ra, me ntiin, kǝsǝ na ɓongtǝra me ǝn niina sase.

²⁰ A ɓongtǝra nǝn nkeesǝ, yaa nsaad yǝ konsǝ yaa nǝ tungsǝ ya, yǝ konnaa niina. Yaa yǝ konnǝsǝ ya, yǝ kon yaa yǝ timinǝsǝ ya.”

²¹ Ndiira Yeso yǝ nkeesǝ mbusa maaso wa, yǝ kura lǝklǝkto a huurtu usu, pa yǝ nkee a talte me, “A ɓongtǝra nǝn nkeesǝ, fin a ɗaaso waaso kiyǝ nǝ fangga.”

²² Pa emfǝɗkaa ɓǝ sengǝ ɓaatǝ, me ɓǝ maa yaa yǝn kansǝ a ɗuura ira ya ra.

²³ Pa fin a ɗaaso emfǝɗkaa ɓisa, u Yeso yǝn yausǝsǝ kwang ya, yǝ kaɗsǝ ngwang ma Yeso.

²⁴ Pa Bitrus yaa kak ma weɗa nema wa, yǝn nkee me, “Ətǝ nkee, yǝn kan ma yamniu?”

²⁵ Pa aufǝɗke siya yǝ fǝɗ ngwang ma Yeso, yaa taa me, “Ankundi, ǝn yamniu?”

²⁶ Pa Yeso yǝ nkee me, “Kǝnǝ tung nkaadǝng wa, a nkoo. Yaa nǝ nasǝsǝ ya, ǝn sase.” Yǝ tungsǝ nkaadǝng ka wa a nkoo wa, pa yǝ na Yahuda, au Siman Iskariyoti ya.

²⁷ Tǝng yǝ konsǝ nkaadǝng kawa wa, Shaitan yǝ kana kuɗa ira. Pa Yeso yaa nkee me, “A tom mbu kǝngaa tom ɓa naakǝn naakǝn.”

²⁸ Pa a ɓaa ɓǝn sesǝ mbuseyaa ɓa ɓǝ maa mbu kwasǝ Yeso yǝ nkeesǝsǝ maaso ɓa ra.

²⁹ Ɓaata ɓǝn sen me ko Yeso yǝn nkeesǝ me ko yǝɓǝ tiri mbu tom Mbukamsa ɓa, hana minda ko yǝ na mbuka hanhanta, me Yahuda yǝn an nhii koɓaa ɓosa ya.

³⁰ Pa yǝ konsǝ nkaadǝng ka wa wa, yǝ fiɗi, ɗǝm ǝn pǝrta.

Mara Nfiinfii ra

³¹ Ndiira yǝ fiɗsǝ wa, pa Yeso yǝ nkee me, “Waso ɓaa toosǝ Au Ete ya wa, ɗǝm ɓaa too Kaa ma lau usu.

³² Me ɓaa too Kaa ma lau usu, Kaa ɗǝm kiyaa too Au isi ma lau nkweera usu, ɗǝm nok nok kiyaa taa too.

³³ “Em ɓǝna ngeek ngeek ɓa, pee ngeek ndǝ ke. Kǝ sǝnǝ kǝrǝ pa nga nǝ nkee sǝ ɓaa Yahudawa ɓa wa me, ‘Han nǝ kosǝ ɓa sǝ nkaa sǝ wo ra,’ maaso nǝn nkeesǝsǝ waso wa.

³⁴ “Mara nfiinfii ra nǝn nasǝsǝ wa me, sǝ yau ɓaatǝ. Ngaa nǝ yausǝsǝ wa, maaso tomon ɗaɗ, saase kǝn se yau ɓaatǝ.

³⁵ Ma lau siso ɓaa kǝ maa me sǝ emfǝɗkaa ɓǝna, me sǝn tom yauta ɓaatǝ.”

³⁶ Pa Bitrus yaa taa me, “Ankundi, ngǝ ko nau?” Yeso yaa kak me, “Han nǝ kosǝ ɓa ngǝ nkaa ngǝnǝ ɓǝɗ nga waso ra, pa ma ndiira usu, kǝngǝ nǝ ɓǝɗɗǝ.”

³⁷ Bitrus yaa nkee me, “Ankundi, mbu kǝ tom mbi na nkaa nǝ ngǝ ɓǝɗ ngaa waso rau? Ai, kǝnǝ na huurtu nwaano a ɗuura nga.”

³⁸ Yeso yaa kak me, “Waso kǝ ngǝ na huurtu nwaango a ɗuura nau? Nǝn nkee ngǝ ɓongtǝra, men ǝn nkee kokra yǝn pa pomra, kǝngǝ nǝ renǝ a kan taatǝn.”