Yohanna 11 - Lala NT

Woɗɗo Liˈazaru wa

¹ Yaa ke kǝn ǝn yarsǝ me Liˈazaru, yǝ sem kwakwa ra, yǝ yaa Betanya ya, ur ɓǝ Maryamu wa, ma ate isi Marta.

² Maryamu sisi, ǝn mɓoone Liˈazaru yaa yǝn sisi siya. Ən sase yǝ puksǝ yaro u ma nseera yaɓ wa Almaseho, ɗǝm yǝ haatǝ natsa isa ma nhii usu ya.

³ Pa toona sǝsa ɓǝ timi a Yeso ni, ɓǝ nkee me, “Ankundi, yaa ngǝn yausǝsǝ dem siya, yǝ sem kwakwa ra.”

⁴ Pa yǝ kurasǝ maaso wa, yǝ nkee me, “Siyo usu siso, yaa ti yǝ woɗ ɗa, pa me aa tom mbu too ɗǝnda Kaa ma ausi Yeso ra.”

⁵ Yeso yǝn yau Marta ma ate isi ɗǝm ma Liˈazaru.

⁶ Hana Yeso yǝ kurasǝ me Liˈazaru sem kwakwa ra wa, pa yǝ sokǝ tǝro raɓ a han yǝsǝ ɓa.

⁷ Ndiira maaso wa, Yeso yǝ nkee emfǝɗkaa ɓǝsa me, “Ndǝ kang a put Yahudiya wa.”

⁸ Pa emfǝɗkaa ɓǝsa ɓa nkee me, “Malǝm, a tǝro waso ɓaa Yahudawa ɓa ɓǝn taa me ɓǝ ngǝ muɗkǝ ma dungate, pa wa ngǝn taa me ngǝ kan kǝnso ɗǝmǝu?”

⁹ Pa Yeso yǝ ɓǝ kak me, “Sem awa puu nhaa raɓ a tuka fin dau? Pa me maaso, yaa yǝn sikisǝ a kaa ya, yǝ kwiɗɗaa ra, me yǝn wǝr ham ɗekɗekto put ntaadiwa ɓa.

¹⁰ Pa yaa usu yǝn sikisǝ a pǝrta ya, kiyǝ kwiɗɗi me yǝ wǝra handa ra!”

¹¹ Ndiira Yeso yǝ nkee mbusa maaso wa, yǝ ɓaarǝ yǝɓǝ nkee me, “Sikaanɗe Liˈazaru yaa munda, pa nǝ ko me ko naa nik a munda.”

¹² Pa emfǝɗkaa ɓǝsa ɓaa nkee me, “Ankundi, me yaa munda maɗ, ai, kiyǝ nii mbusa.”

¹³ Yeso yǝn nkee ɓǝ me Liˈazaru, yǝ woɗɗon, pa emfǝɗkaa ɓoso ɓǝn sen me ko yaa munda nwiinwii ma.

¹⁴ Pa Yeso yǝɓǝ nkee a talte me, “Liˈazaru yǝ woɗɗon.

¹⁵ Nǝn hur kuɗa me saase hana nǝ sem kǝnso ra siso me sǝ na ɓongtǝra. Pa hana maaso nɗoo a sanii.”

¹⁶ Pa Toma yaa ɓǝn yarsǝsǝ me, Em raɓ ɓa ya, yǝ nkee ɓaata ɓisa emfǝɗkaa, “Nɗoo nsaad ko ndǝ woɗ ke ma sase.”

Yeso ǝn Sase Niinyo Woɗɗa wa ma Huurtu

¹⁷ Pa Yeso yǝ kansǝ Betanya wa, ɓaa nkee me Li'azaru yǝ wee woɗɗon, yǝma tǝro kurun a tina.

¹⁸ Betanya yǝ ngwang ma Urshalima ɗǝm mǝbmǝbto usu mil raɓ maɗ,

¹⁹ ɓaa Yahudawa ɓa dem ɓǝ wo me ɓǝ too Marta ma Maryamu, me ate ɓose woɗwoɗɗo.

²⁰ Pa Marta yǝ kurasǝ me Yeso yǝn wowo wa, pa yǝ nii yǝ ko a ɗǝɗa me ko yaa kaɗɗa, pa Maryamu usu yǝ ɗuuru.

²¹ Pa Marta yǝ nkee Yeso me, “Almaseho, me kangǝ a hamɓa, kama ate yaane yǝ woɗ ɗa.

²² Pa hana waso, nǝ maan me mbu ngǝ kǝnasǝ a Kaa ni ɓa, kiyǝngǝ na.”

²³ Yeso yaa nkee me, “Ate yaange ki yǝ nii ɗǝm.”

²⁴ Marta ya nkee me, “Nǝ maan me kiya nii a kaa niinyo a tiina ɓa, a kaa feɗefeɗe ɓa.”

²⁵ Yeso yaa nkee me, “Niina nǝ niinyo a tiina wa, niina nǝn huurtu siso ɗǝm. Yaa yǝ nasǝ ɓongtǝra ma niina ya, hana yǝ woɗɗon, kiya nɗanyǝ.

²⁶ Yaa yǝsǝ ma huurtu ya, ɗǝm yǝn na ɓongtǝra ma niina ya, yǝ fǝta woɗɗo ra. Ngǝ na ɓongtǝran maaso nǝu?”

²⁷ Pa Marta ya kak me, “Ankundi, ee nwa, nǝ na ɓongtǝran me ngǝ Almaseho, Au Kaa ya, yaa yǝn wosǝn wo a put ntaadi wa ya.”

Yeso yǝ tee

²⁸ Ndiira yǝ nkeesǝ maaso wa, yǝ ko koyǝ yar ate isi Maryamu, yaa nkee me, “Malǝm yǝ won, yǝn taangǝn ta.”

²⁹ Pa Maryamu yǝ kurasǝ maaso wa, yǝ nii ma moone, yǝ ko a sanii.

³⁰ Yeso yǝ kana ɗaaso ɗuuru sundu ra, pa yaa han ɓǝ pamsǝ ma Marta ɓa kweɗ.

³¹ Pa ɓaa Yahudawa ɓa ɓǝsǝ ke ma Maryamu ɓǝn toosǝn too ɓa, ɓǝ wǝrsǝ Maryamu yǝ nii ma haaɗe yǝ fiɗ wa, ɓaa ɓǝɗǝ ɓǝn sen me ko yǝ ko a han tina ɓa me koyǝ tee kǝnso.

³² Pa Maryamu yǝ kosǝ a han Yeso sǝ ɓa wa, yaa wǝrǝ, pa yǝ nwii a wii usu yaa nkee me, “Ankundi, mee ka ngǝ a hamɓa kama ate yaate yǝ woɗ ɗa.”

³³ Pa Yeso yǝ wǝrsǝsǝ yaa oro wa, ɗǝm ɓaa Yahudawa ɓǝ ɓǝɗsǝsǝ ɓa, ɓaa oro kǝn, pa senta ita aa nii.

³⁴ Pa yǝ ɓǝ taa me, “Sǝ woksǝ nau?” Ɓaa nkee me, “Ankundi, ngau ngǝ wǝrǝ.”

³⁵ Pa Yeso yǝ tee.

³⁶ Pa ɓaa Yahudawa ɓa, ɓǝ nkee me, “Sǝ sengge yǝn yausǝsǝ wa!”

³⁷ Pa ɓaata ɓǝ nkee me, “Yaa yǝ wilsǝ nuuwa ntaara siya, yǝ nkaa yǝ saa eɗ ɗa woɗɗo rau?”

Yeso yǝ nik Li'azaru a woɗɗa

³⁸ Yeso senta ita aa ɓaarǝ aa nii ɗǝm, yǝ ko a han tina ɓa. Tina kawa ǝn fero, ma ɗungara kǝra, u ɓaa likisǝ inntii fer siso wa.

³⁹ Pa Yeso yǝ nkee me, “Sǝ wil ɗungara sǝra ndiira.” Pa Marta mɓoone yaa yǝ woɗsǝ siya, yaa nkee me, “Ankundi, nga waso ko yǝ nhoon, me naso tǝro kurkurun ma woɗɗo usu.”

⁴⁰ Pa Yeso yaa nkee me, “Sem nǝ nkeengǝ me, me ngǝ na ɓongtǝran, kǝ ngǝ wǝr too Kaa wa rau?”

⁴¹ Pa ɓǝ wil ɗungara kara ndiira. Yeso yǝ nik ɗuura ɓoti, yǝ nkee me, “Paane, nǝ hima ngǝn me ngǝn kuranǝsǝ wa.

⁴² Nǝ maan me ngǝn kuranǝ nfee, pa nǝ nkee maaso me, ɓaa ɓǝsa kǝɗ kǝɗ a hamɓa wa, me ɓǝ na ɓongtǝra me ngǝ timinǝ ngiinga.”

⁴³ Ndiira yǝ nkeesǝ maaso wa, yǝ nik kwaro ma kwakwato, yǝ nkee me, “Liˈazaru, aa fiɗɗi!”

⁴⁴ Pa woɗɗa kara, yǝ fiɗɗi, natsa ma nema kaasǝ ma luktu hok woɗɗa wa, oota ita ɗǝm ɓǝrkǝsǝ ma wiiyara. Pa Yeso yǝɓǝ nkee me, “Saa kee, yǝ faɗɗa.”

⁴⁵ Me maaso, ɓaa Yahudawa dem ɓǝ wosǝ a Maryamu ni wa, ɗǝm ɓǝ wǝr mbu yǝ tomsǝ ɓa wa, ɓǝ na ɓongtǝra ma sase.

⁴⁶ Pa ɓaata ɓǝ ko a ɓaa Farisiyawa ɓa ni, ɓǝɓǝ nkee mbu Yeso yǝ tomsǝ ɓa.

⁴⁷ Pa kuɓsa nek mbusa sa ma ɓaa Farisiyawa ɓa, ɓǝ yar kaɗɗo wiina ɓan kan mara ɓaa Yahudawa ɓa. Pa ɓǝ taa ɓaatǝ me, “Si ndǝn tom mbiu? Eɗ ɗa, yǝn tomsǝ mbu nhiinyanhiinya ɓa dem wa.

⁴⁸ Me ndǝ leesǝ maaso, ɓeta nsaad ɓǝkǝ na ɓongtǝra ma sase, pa ɓaa Romawa ɓa ɗǝm, ɓǝkǝ wo ɓǝnɗǝ kon put waando ɗǝm ɓǝ haa ɓet ɓǝnɗaa.”

⁴⁹ Pa yaake fin a ɗaaso ɓoso, ǝn yarsǝ me Kayafa, yǝn kuɓ kwang nek mbusasa a mera sǝra, yǝɓǝ nkee me, “Saase sǝ maa mbuka ra.

⁵⁰ Sǝ sen yaɓ ra, ai, para ete fin yǝ woɗɗo a ɗuura ɓeta ra, aa u ɓeta nsaad ka tum wa.”

⁵¹ Sem a senda ira yǝ nkeesǝ mbusa maaso wa ra, pa me yǝn kuɓ kwang nek mbusa a meera sǝra, yǝ tom nawanto wa me, Yeso kiyǝ woɗ a ɗuura put ɓaa Yahudawa ɓa,

⁵² ɗǝm sem a ɗuura put ɓaa Yahudawa ɓa seɗɗe ra, pa me yǝ kwau nsaad em Kaa ɓǝ yaasǝsǝ a ura ɓolɓol sa, yǝɓǝ tǝmba ɓǝ tom fin.

⁵³ Tǝng kaasǝsa wa, ɓǝ ntii kǝr ɗǝɗa kǝ ɓaa sa toɗ ɓa.

⁵⁴ Me maaso, Yeso yǝ ɓaarǝ yǝ siki a talte a ɗaaso ɓaa Yahudawa ɓa ra, pa yǝ nii kǝnso yǝ faɗ a ur ko u kwang ma sanglo wa, yǝ kan a urko ǝn yarsǝ me Ifraimu. Kǝnso yǝ kaɗsǝ ma emfǝɗkaa ɓǝsa wa.

⁵⁵ Pa a fer Mbukamsa Tadko ɓa ɓaa Yahudawa ɓa tomsǝ kwang wa, ɓeta dem a ura ura ɓǝ faɗ Urshalima me ko ɓǝ soɓ ee ɓoso, pa fer Mbukamsa Tadko ɓa aa wo.

⁵⁶ Ɓǝ tomaa kǝr Yeso wa, ɓǝ nǝɗsǝ kǝɗ kǝɗ a Hit ɓǝɗ Kaa Urshalima wa, ɓǝn nkee ɓaatǝ me, “Sǝ wǝr miniu? Kiyǝ wo a Mbukamsa ɓau?”

⁵⁷ Pa kuɓsa nek mbusa sa ma ɓaa Farisiyawa ɓa, ɓǝ wee nkee mara wan me, nsaad yaa yǝ maasǝ han Yeso yǝsǝ ɓa ya, yǝ wo yǝ nkee, me ɓaa ma.