Yohanna 10 - Lala NT

An wanda ya ma kur tǝmnka usu

¹ “Nǝn nkeesǝ ɓongtǝra, yaa yǝ kansǝ a kuru ma inntii ra ya, pa yǝ taa ma lau nkaara wa ya, yǝn nkwii, ɗǝm yǝn tang mbusa.

² Yaa yǝ kansǝ ma inntii ya, ǝn sase an wanda tǝmnkaa ya.

³ An ware yǝn wil inntii an wanda tǝmnkaa ya, tǝmnkaa ɗǝm ɓǝn kura kwar usu. Yǝn yar tǝmnkaa isa ma ɗǝnda, ɗǝm yǝɓǝ kwak ɓǝ fiɗ ntaadi.

⁴ Me yǝ hik ɓǝn ntaadin nsaad, yǝkǝ ko a wii ɓoso, tǝmnkaa isa ɓaa ɓǝɗǝ, me ɓǝ maa kwar usun.

⁵ Pa ɓǝ fǝta ɓǝɗ weeke ra, ɓong, ɓǝkǝ moon ndiira me ɓǝ maa kwar wee wa ra.”

⁶ Yeso yǝ nkee ɓeta mǝɗkǝrasǝra, pa ɓǝ maa mbu yǝ sensǝ ɓa ra.

⁷ Me maaso Yeso yǝ ɓaarǝ yǝ nkee ɗǝm me, “Nǝn nkeesǝ ɓongtǝra, nǝn inntii han kan tǝmnkaa ɓa ya.

⁸ Nsaad ɓaa ɓǝ nkaanǝsǝ kano ɓa ya, pa ɓǝn nkwiiya ma ɓan ngwel ɗǝɗa ɓa.

⁹ Nase nǝn inntii sisi. Yaa yǝ yausǝ yǝ kan ma lau waano ya, kiya taa kon nkweera wa.

¹⁰ Nkwii usu yǝn wo me yǝ tang mbusa, yǝ toɗ ɓeta ɗǝm yǝ tom tǝblǝra. Pa waano nǝ wo me ɓǝ taa huurtu, ɗǝm ɓǝ taa kungsǝ kungsǝ.

¹¹ “Nǝn an wanda u yaɓ wa ya. An wanda u yaɓ wa ya, yǝn na huurtu usu me tǝmnkaasǝsa.

¹² Yaa ɓaa toosǝsǝ too me yǝ war wanda ya, ǝn an tǝmnka ya ra. Me maaso, me yǝ wǝr kurkutu ǝn wowo, kiya moon, yǝ lee tǝmnkaasǝsa, yǝ faɗ mbusa. Kurkutu siso, kiya ma tǝmnkaasǝsa yǝɓǝ nsaatǝ.

¹³ Yaa ɓaa toosǝsǝ too sisi, yǝ mon yaa faɗ ɓisa me mbuka nteesǝ ma tǝmnkaasǝsa ra.

¹⁴ “Nǝn an wanda u yaɓ wa ya, nǝ maa tǝmnkaa sǝnan ɗǝm tǝmnkaa sǝna ɓǝ maanǝn,

¹⁵ nga paane yǝ maanǝsǝ wa, nase kǝn nǝ maa paanen. Nǝ na huurtu waano me tǝmnkaasǝsa.

¹⁶ Nǝ ma ɓaata tǝmnkaa ɗǝm u ɓǝ sem a kur wa ra wa. Tomon ɗat, nǝ ɓǝn wo a ham ɓa kǝn. Ɓosa kǝn, ɓǝkǝ kura kwar nwaano, kǝɓǝ tom kuru fin, an wanda ya fin.

¹⁷ Mbu kwasǝ paane yǝn yaunǝsǝ ɓa, yǝn yaunǝ me nǝ na huurtu waano, ɗǝm nǝ ɓaarǝ nǝ too a kang a nani.

¹⁸ Yaake sem kǝn kiya too wa ra, pa nǝ na ma yauwo waano. Nǝ ma kwangto kǝna tii wa, ɗǝm nǝ ma kwangto kǝna too wa. U nwa ndǝ mbu Paane yǝ nkeesǝ me nǝ tom ɓa, ɗǝm nǝ konon.”

¹⁹ A ɗuura mara Yeso yǝ nkeesǝ sǝra, ɓaa Yahudawa ɓa ɗuuti ɓose aa ɓaarǝ aa ɓaa ɗǝm.

²⁰ Ɓaata dem ɓǝ nkee me, “Yǝ ma wis nsaamse wa ɗǝm yǝ paran. Ndǝn kurasǝ men mbiu?”

²¹ Ɓaata ɗǝm ɓǝn nkee me, “U nwa ǝn kanmǝra yaa yǝsǝ ma wis nsaamse wa ya ra. Yaa yǝsǝ ma wis nsaamese wa ya, kiyǝ nkaa yǝ wil nuuwa ntaarau?”

Ɓaa Yahudawa ɓa ɓǝ ɓisi Yeso

²² Ən fer songra wa, a fer ɓan tomsǝ Mbukamsa ɗimoo kaa ɓaa soɓsǝ hit Kaa Urshalima wa me a tom ɗekɗek wa.

²³ Yeso yǝn leurǝ a filang Sulemanu wa, ɗaan a taanda hit ɓǝɗ Kaa Urshalima wa.

²⁴ Pa ɓaa Yahudawa ɓa ɓǝ leurǝ, ɓaa taa me, “Kǝngǝtǝ lee a teptepto ndub kauni? Me ngǝ Almaseho ǝtǝ nkee a talte.”

²⁵ Pa Yeso yǝɓǝ kak me, “Ai, nǝ weesǝ nkeesǝn, pa sǝ na ɓongtǝra ra. Mbu nsaad nhiinyanhiinya nǝn tomsǝ ma ɗǝnda Pane ra ɓa, yǝn weɗɗa me nǝn yamniu.

²⁶ Pa sǝ na ɓongtǝra ra, me sǝn tǝmnka sǝna ra.

²⁷ Tǝmnka sǝna ɓǝn kura kwar waano. Nǝ maa ɓǝn, ɗǝm ɓǝn ɓǝɗ nǝ.

²⁸ Nǝn na ɓǝ huurtu pakarese wa, ɗǝm ɓǝ pǝta woɗɗo ra, ɗǝm yaake yǝɓǝ kon a nem yaane ra.

²⁹ Paane, yaa yǝ nanǝsǝ tǝmnkaa ya, yǝ faɗ nsaad kwangton, yaake sem kǝn kiyaa kon a nem Paane ya ra.

³⁰ Niina ma Paane tǝ fin.”

³¹ Pa ɓaa Yahudawa ɓa, ɓǝ ɓaarǝ ɓǝ haa ɗungate me ɓaa muɗkǝ.

³² Pa Yeso yǝɓǝ kak me, “Nǝ weɗɗasǝ mbu nhiinyanhiinya ɓa dem, ɗǝm fiɗ a Paapa ni, yaa a ɗuura u nawa ra sǝn muɗkǝ nǝsǝu?”

³³ Ɓaa Yahudawa ɓa, ɓaa kak me, “Sem me a tinima yaɓ kǝma ngǝ tomsǝ wa ra, tǝn taasǝ me tǝngǝ muɗkǝ wa ra, pa me ngǝ tom tǝblǝra a ɗuura Kaa ra, ngase ngǝsǝn ete ya maɗ, pa ngǝn weɗɗa ɗuura ngaa keke ma Kaa.”

³⁴ Yeso yǝɓǝ kak me, “Sem nyorsǝ a Masaka waaso me, ‘Nǝ yarsǝ me sǝ em Kaa ɓa’?

³⁵ Ndǝ maan me likarkar mara Kaa ra yǝ paapara ra. Me Ankundi yǝ yar ɓaa ɓǝ kurasǝ mara ira ya me, ‘em Kaa ɓa,’

³⁶ to, yaa nase yaa Paapa taunǝsǝ ya, ɗǝm yǝnǝ timi a put ntaadi wa ya, waso nǝ kan mara tǝblǝra rau a ɗuura Kaa ra, me nǝ nkeesǝ me, ‘Nǝ Au Kaa ya wau’?

³⁷ Me sem tinimsa Paane yǝn tomsǝ ma ndǝ siso nǝn tomsǝ wa ra, sǝ na ɓongtǝra ma niina ra.

³⁸ Pa me ndǝ siso nǝn tomsǝ wa, hana kasǝ na ɓongtǝra ma niina ra, yaa sǝ na ɓongtǝra ma tinimsa, me sǝ maa me, Paane yǝ ɗaan a nanii, nase kǝn, nǝ ɗaan a sanii.”

³⁹ Pa ɓǝ kǝr ɗǝɗa ɗǝm u kǝ ɓaa ma ra, pa yǝ fiɗ a nem ɓose.

⁴⁰ Pa Yeso yǝ kang a talle kira aulaara Urdun ra, a han Yohanna an tom baptisma ya, yǝ ntiisǝ yǝ tom baptisma ɓa, yǝ kaɗ kǝnso,

⁴¹ pa ɓeta dem ɓǝ wo a sanii. Ɓǝ nkee me, “Yohanna yǝ pǝta tom mbu nhiinyanhiinya ka ra, pa nsaad mbu Yohanna yǝ nkeesǝ a ɗuura eɗ sisi ɓa ra, ǝn ndǝ ɓongtǝra.”

⁴² Kǝnso ɓeta dem ɓǝ na ɓongtǝra ma Yeso.