Matta 7 - Lala NT

Fǝɗkǝra Yeso ra a ɗuura ti mara ɓaatǝ ra

¹ “Sǝ kan kiita ɓaatǝ ra, me tom ǝsǝ ti mara kǝn da.

² Me ma ɗǝɗa sǝ kansǝ kiita ɓaatǝ ra, ɓaa kǝsǝ kan maaso kǝn, ɗǝm ma taasa sǝ maasǝ ɓaata wa, ma siso ɓaa kǝ sǝn maa wa.

³ “Tomtomni ngǝn sengǝsǝ au ntaangǝra a nuu ate nyaange wa, pa ngǝ sengge ma kulura yǝsǝ a nuu nwaago wa rau?

⁴ Kǝ ngǝ tomtomni ngaa nkee ate nyaange me, ‘A lee nǝ ngǝ hik au ntaangǝra a nuu nwaago ya,’ si nwaago nfee ngǝ ma kulura a nuu nwaagou?

⁵ Ngase an ma ɗǝlmara raɓ ya, ngǝ ntii ngǝ hik kulura a nuu nwaago ra nhe, pa kǝ ngǝ wǝr ɗekɗek ngǝ hik au ntaagǝra a nuu ate nyaange wa.

⁶ “Sǝ na empa mbu yǝ sǝ ɗekɗek ɓa ra, sǝ na kelgǝra dungate weɗɗee yaase ra. Me ɓǝ kǝ noo ma natsa ɓosa, ɗǝm ɓǝ kǝ kǝrtǝ ɓǝ sǝ nsaatǝ.

Sǝ kǝna, Sǝ kǝrǝ, Sǝ hob inntii

⁷ “Sǝ kǝna, ɓaa kǝ sǝ na. Sǝ kǝrǝ, sǝ kǝ taa. Sǝ hoɓ inntii, ɓaa kǝ sǝ wili.

⁸ Me hana yamni yaa yǝ kǝnasǝ ya, kaa na, yaa yǝ kǝrsǝ ya, ki yǝ taa; ɗǝm yaa yǝ hobsǝ inntii ya, kaa wili.

⁹ “Ən yamni a ɗaaso waso me auwesi kǝna sǝ nkaadǝng, ki yaa sa na ɗungarau?

¹⁰ Hana yǝ kǝna sǝ nsenyo, ki yaa sa na nsaau?

¹¹ Me saase ɓaa kwalakwala ɓa, sǝn maa sǝ na mbusa kwalari em ɓǝsa, pa me maaso, Paase a liura ya, ki yǝsǝ na mbu yaɓ u ɓǝ kǝnasǝsǝ wa.

¹² Me maaso, a mbu nsaad sǝn yausǝ me ɓeta ɓǝ sǝ tom ɓa, saase kǝn sǝ ɓǝ tomo, me u nwa ndǝ fǝɗkǝra Musa ra ma Ɓan nawanto ɓa.

Inntii ɓong ya

¹³ “Sǝ kan ma lau inntii ɓong nya nwa. Me inntii ko a ham tumtum ɓa ya yǝ hoo, ɗǝɗa ira paapa a ɓǝɗoo, ɗǝm ɓeta dem kǝ ɓaa kan lau usu wa.

¹⁴ Pa inntii ko a ham huurtu ɓa ya, yǝ ngeek, ɗǝɗa ira yǝ ɓong, ɗǝm ɓaa kaa taa ɓa sem kwang ra.

Ɓan maa ɓota ma emɓisa

¹⁵ “Sǝ tom nlaa ma ɓannawanto para ɓa. Ɓǝn wo a sani ma lukta tǝmnkaa sa, pa ɗaan a kuti ɓose ɓǝ nga kurkutaa.

¹⁶ Kǝ sǝ ɓǝ maa ma lau tinima ɓǝn tomsǝ ɓa. Ɓan ndot emngwate inabi ma a ɓot tǝute ɓau? Hana a ndot em sata ɓa a longgǝrau?

¹⁷ Maaso ɗǝm, hana ɓot kwalari nawa, yǝn nsee emba kwalari, pa ɓot kwalakwala ɓa, yǝn nsee emba kwalakwala.

¹⁸ Ɓot kwalari ɓa yǝ pǝta nsee emba kwalakwala ra, ɗǝm ɓot kwalakwala ɓa, yǝ nkaa yǝ pǝta nsee emba kwalari ra.

¹⁹ Hana ɓot na ɓa, yaa yǝ nseesǝ emba kwalakwala ɓa, ɓaa ka ɗǝǝ a putu, aa mudku a ara.

²⁰ Me maaso, kǝ sǝ ɓǝ maa ma lau tinima ɓǝn tomsǝ ɓa.

²¹ “Sem nsaad yaa yǝn nkee nǝsǝ me, ‘Ankundi, Ankundi,’ kiya ta kano a kuɓsutu a liura wa ra, pa yaa yǝn tomsǝ mbu Paane a liura ya yǝn yausǝ ɓa sedɗe

²² Pa ɓeta dem a kaa sǝ sa ɓǝ kǝ nǝ nkee me, ‘Ankundi, Ankundi, tǝ tom nawaanto wa ma ɗǝnda nga rau, ɗǝm ma ɗǝnda nga tǝ hiksǝ nsaamse wa, ɗǝm tǝ tom mbu nhiinyanhiinya ɓa dem wa rau?’

²³ Pa kǝnǝ ɓǝ nkee a talte me, ‘Nǝ maasǝ ra. Sǝ ɓaa ma niina, saase ɓan tom mbu kwalakwala ɓa wa!’

Ɓeta raɓ ɓan mara

²⁴ “Pa maso, hana yamni yaa yǝn kurasǝ mara na nya, yaa tom tinima ma siso ya, yǝ nga eɗ yǝ weesǝ nuunwa ya, yaa yǝ marsǝ hit usu a ham tel ɓa ya.

²⁵ Pa tiwo rosǝ wa, serserta a kung dem, ɗǝm yoro ya wo yǝ sak hit kawa, pa hit ka wa nwii ra, me ɓaa mar hit kawa a ham tel ɓa.

²⁶ Pa nsaad yaa yǝ kurasǝ mara na nya, pa yǝ tomsǝ tinima ra ya, yǝ ngaa haura ete ra, yaa yǝ marsǝ hit usu a nsera ya.

²⁷ Pa tiwo roosǝ wa, serserta a kunggu, ɗǝm yoro kokrok yǝ wosǝ wa, yǝ sak hit kawa, pa yǝ nwii yǝ ookǝ kwalakwala.”

²⁸ Fer Yeso yǝ feɗsǝ nkee mbusǝsa wa, pa ɓaa ɓǝ kwausǝ dem ɓa wa, ǝɓǝ tom mbu weɗara ɓa ma fǝɗkǝra ira,

²⁹ me yǝn tom fǝɗkǝra ngaa yaa yǝ sǝ ma kwangto ya, ɗǝm sem ngaa malǝmaa ɓosa u fǝɗkǝra Masaka Musa wa ra.