Matta 5 - Lala NT

Nkee mara Kaa ra a Yolo

¹ Pa Yeso yǝ wǝrsǝ ɓeta dem wa, yǝ taa ɓoti a yolo yǝ kaɗa. Emfǝɗkaa ɓisa ɓǝ wo a sani,

² pa yǝɓǝ ntii fǝɗkǝra yǝn nkee me,

³ “Saltǝra yǝ kaɗan a ɓaa ɓǝ maasǝ hanoo ɓoso a Wiso ɓa, me kuɓsutu a liura wa ndǝ ɓoso.

⁴ Saltǝra yǝ kaɗan a ɓan kuɗa teb ra ɓa, me kǝ ɓǝ taa na'nkwiiti wa.

⁵ Saltǝra yǝ kaɗan a ɓaa ɓǝn yausǝ ee ɓa ni, me put ntaandi wa ndǝ ɓoso.

⁶ Saltǝra yǝ kaɗan a ɓaa ɓǝn kurasǝ ɗoora ma mbraa sima a tom mbu yǝsǝ yaɓ a wiiyo a Kaa ni ɓa, me ɓǝkǝ nkwee.

⁷ Saltǝra yǝ kaɗan a ɓaa ɓǝ sǝ ma manyamanyato ɓa, me ɓaa kǝ ɓǝ weɗa manyamanyato kǝn.

⁸ Saltǝra yǝ kaɗan a ɓaa ɓǝsǝ ma kuti ɗekɗek ɓa, me kǝɓǝ wǝr Kaa.

⁹ Saltǝra yǝ kaɗan a ɓaa ɓǝn tisǝ ɓaa a kaɗ hurhur ɓa, me ɓaa kǝɓǝ yar me em Kaa ɓa.

¹⁰ Saltǝra yǝ kaɗan a ɓaa ɓǝ weesǝ kongsa a tom mbu yǝsǝ yaɓ a wiiyo a Kaa ni ɓa, me kǝɓǝ taa kuɓsutu a liura wa.

¹¹ “Saltǝra yǝ kaɗan a sani me ɓeta ɓǝn sirsǝ, ɓǝn nasǝ kongsa, ɗǝm ɓǝn nkeen nsaad mbu kwalakwala ɓa a ɗuura sa, u para wa men niina.

¹² Sǝ hurkuɗa sǝ kwala, me sǝkǝ kon nsaa kwalari wa ɓoti a liura, me a ɗǝɗa finda ɓǝ nasǝ kongsa ɓannawanto tang ɓa.

Tuma ǝn mbu yaɓ ɓa

¹³ “Saase sǝ tuma put ntaandi wa ɓa. Pa me tuma ɓaa ma songsongto usun, kiyǝ tomtomni kiya tom songsong ɗǝmǝu? Sem yaɓ ɗǝm a mbuka ra, ndub ɓaa kǝ tuk ndiira a noo ma natsa.

¹⁴ “Saase sǝ nga tuma put taandi wa ɓa. Ur ɓaa marsǝ a kola wa yǝ nkaa yǝ tomma a nhuukǝra ra.

¹⁵ Ɗǝm ɓaa nekaa arkumta a liki ma talo ra. Me maaso ɓaakǝ ɗangrǝ ɓoti a mbu ti ɓisa me yǝ na han ɗekɗek ɓa ɗuur siso nsaad.

¹⁶ Maso ɗǝm, sǝ lee ɗekɗek to waaso yǝ too handa a wii ɓeta wa, me ɓǝ wǝr tinimse yaɓ yaɓ waaso, me ɓǝ nyoo Paase yǝ sǝ a liura wa.

Kung masaka Musa wa

¹⁷ “Sǝ sen me nǝ wo me nǝ haarǝ mbu Masaka Musa ɓa, ma fǝɗkǝra Ɓannawanto ɓa ra, nǝ wo sem me nǝ ɓǝ haarǝ ra, pa nǝ wo me nǝ ɓǝ kunggu.

¹⁸ Nǝn nkeesǝ ɓongtǝra, ndub me liura ma putu ɓǝ nɗiitǝ, nyorma kǝma sem fin hana ngeekelek u Masaka Musa wa ka nfaa wa ra, ndub me ɓaa kunggun nsaad.

¹⁹ Me maaso yaa yǝ kausǝ hana fin a mbu Kaa yǝ nkeesǝ me aa tom ɓa ya, ɗǝm yǝ fǝɗkǝ ɓaata me ɓǝ tom maaso ya, ɓaa ka yar me yaa ngeekelek ya a kuɓsutu liura wa. Pa yaa yǝ ɓǝɗsǝ Masaka Musa ya ɗǝm yǝ fǝɗkǝ ɓaata me tom maaso ya, ɓaa ka yar me yaa kwangya a kusutu a liura wa.

²⁰ Pa me nǝn nkee sǝ ɓongtǝra, ndub me sǝ tom mbu yǝsǝ yaɓ a wiiyo a Kaa ni ɓa, a faɗ u ɓaa Farisiyawa ɓa ma malǝmaa Masaka Musa sa wa ra, sǝ kan a kuɓsutu a liura wa ra.

Fǝɗkǝra Yeso ra a nfiima

²¹ “Sǝ kuran, ɓaa nkee sirta ɓǝnda me, ngǝ toɗ ete ra, ɗǝm yaa yǝ toɗsǝ ete ya, ɓaa kaa kankiita”

²² Pa nǝn nkeesǝ me yaa yǝ nfiisǝ ate isi ya ɓaa kaa kankiita. Maso ɗǝm yaayǝ nkeesǝ ate isi me haura ya ɓaa kasa ko a han kwauwo u ǝn yarsǝ me Sanhendrin ɓa. Ɗǝm yaa yǝ nkeesǝ ate isi me, “Ngǝ yaa salya ya” yǝ pam me yǝ kana ara.

²³ Maso ɗǝm, me ngǝn na himara a bagadi, pa ngǝ ɗim me ate nyaange yǝ ma rǝkata ma ngase,

²⁴ a lee na himara sǝra a wii bagadi wa. Ngo ntiiri kongǝ kon nfaata a ate nyaange ni nhe, pa ngǝ wo ngǝ na himara nga.

²⁵ A kon nfaata naakǝn ma atekere yaange yaa yǝn taasǝ me kiyǝ ngǝn ko a han kankiita ɓa ya. A sǝk ma sase a fer sǝsa ɗǝɗa wa, pa me sem maaso ra, atekere yaange kiyǝ ngǝ na a nem an kan kiita ya, ɗǝm an kan kiita ya kiyǝ ngǝ na a nem ya kwang neu ɓeta ya, sase ɗǝm kiyǝ ngǝ mudkǝ a ham neu ɓeta ɓa.

²⁶ Nǝn nkee ngǝ ɓongtǝra, ngǝ kong fiɗaa ham sǝsa ra, ndub me ngǝ kwan nsaad mbu ɓan ɓǝɗ ngǝsǝ ɓan.

Fǝɗkǝra Yeso ra a ɗuura Pepeto ra

²⁷ “Sǝ kuran, ɓaa nkee me, ‘Ngǝ tom pepeto ra.’ ”

²⁸ Pa nǝn nkeesǝ me yaayǝ sengǝsǝ toone ma ɗeura ya, yǝ wee tom pepeto ma sasen a kuɗa ira.

²⁹ Me nuu nwaango a seya ya, yǝn kwaa ngǝ ngǝ tom tentenato, aa hik ngǝ mudkǝ ndiira. Para ngǝ nyam fin a ɗaaso kakta mabiri nyaange wa, a u nsaad maabiri nyaange kaa mudkǝ a ara wa.

³⁰ Ɗǝm me nem nyaange a seya ya, yǝn kwaa ngǝ ngǝ tom tentenato, a nɗǝm ngǝ muɗkǝ ndiira. Para ngǝ nyam fin a ɗaaso kakta maabiri nyaange wa, a u nsaad maabiri nyaange kaa mudkǝ a ara wa.

Fǝɗkǝra Yeso ra a ɓaa ma toone wa

³¹ “Ɓaa wee nkeen me, ‘Hana yamni yaa yǝ pǝǝsǝ toonesi ya, tomon ɗaɗ yǝ nyor likarkar ɓaaɓaa wa, yaa na.’ ”

³² Pa nǝn nkeesǝ me, hana yamni yaa yǝ pǝǝsǝ toonesi ya, me sem a pepeto ra, yǝn tisǝ yǝ tom pepeto, ɗǝm yaa yǝ konsǝ toone ɓaa pǝǝsǝsǝ ya wa, yǝn tom pepeto ma sase.

Fǝɗkǝra Yeso ra a ɗuura Kwǝma ra

³³ “Ɗǝm, sǝ kuran me ɓaa nkee ɓet tang ɓa me, ‘Ngǝ kuu a mbu para ɓa ra, pa ngǝ kung mbu ngǝ kwǝsǝ Ankundi ɓa wa.’ ”

³⁴ Pa nǝn nkeesǝ me, sǝ kong kuuwo ra, hana ma liura, me ǝn ham kuɓsutu Kaa ɓa,

³⁵ hana ma put ntaandi wa ɓa, me ǝn ham nhii natsa ɓisa, hana ma Urshalima me ǝn Ur Kuɓ kwang wa.

³⁶ Ɗǝm ngǝ kwǝ ma nkweerange ra, me ngǝ nkaa ngǝ kang ma nhiinyo fin, pengpeng hana tebteb ra.

³⁷ Pa a lee ‘Ee’ yǝ tom ‘Ee’ ɗǝm ‘Awo’ a tom ‘Awo’ pa mbu faɗsǝ u nwa ɓa, fiɗ a ya kwalakwala ya ni.

Fǝɗkǝra a ɗuura holo ra

³⁸ “Sǝ kuran ɓaa nkee me, ‘Holo nuu nwa a nuu, ɗǝm holo ɗǝmta wa a ɗǝmta.’

³⁹ Pa nǝn nkeesǝ, sǝ ɓisi yaa yǝsǝ kwalakwala ya ra. Me yaake ɗaktǝngǝ a laura seya ra, aa kǝrtǝ kwasa ɗǝm.

⁴⁰ Ɗǝm me yaake taa me yǝ ngǝ ti kaura me yǝ kon luktu nwaago, aa na laulauwara nga ɗǝm.

⁴¹ Me yaake ti ngǝ me ngǝ siki ma sase noonata wa pusapu pu, so ma sase noonata wa pusapu pu raɓ.

⁴² A na hana yamni me yǝ kǝna ngǝ mbuka, nga na, ɗǝm yaa yǝn taasǝ me yǝ kon kwano a ngani ya, ngǝn sa ra.

Sǝ Yau Ɓaatakera

⁴³ “Sǝ kuran ɓaa nkee me, ‘Ngǝ yau anndǝnsaatǝre nyaange ɗǝm ngǝ ɓisi ateker nyaange.

⁴⁴ Pa nǝn nkeesǝ me, sǝ yau ɓaataker ɓǝsa, ɗǝm sǝ tom kǝnara ɓaa ɓǝn nasǝsǝ kongsa ɓa,

⁴⁵ me sǝ kaɗ em Paase yǝsǝ a liura ya. Yǝn ti osa yǝ nwee a ɓaa kwalakwala ɓa ni, ma ɗǝm ɓaa ɓǝ sǝ kwalari ɓa, ɗǝm yǝ tung tiwo a roo a ɓaa ɓǝn tomsǝ mbu yǝ sǝ yaɓ a wiiyo a Kaa ni ɓa, ma ɗǝm ɓaa ɓǝn tomsǝ mbu sem yaɓ ra ɓa a wiiyo a Kaa ni.

⁴⁶ Me sǝn yau ɓaa ɓǝn yausǝsǝ ɓa maɗ, ndǝ nsaa mbi kǝsaa taau? Hanan ɓan kon samra ɓa ɓǝ toma maaso rau?

⁴⁷ Ɗǝm me sǝn too ɓaata ɓisa seɗɗe, sǝn tom mbi u faɗsǝ ɓaatau? Hanan ɓaa ɓǝ maa Kaa ra ɓa, ɓǝ toma maaso rau?

⁴⁸ Me maaso, saase sǝ tom kungsǝta nga Paase a liura yǝsǝ kungsǝra ya.