Matta 3 - Lala NT

Yohanna an tom Baptisma ya yǝ werkǝ ɗǝɗa

¹ A tǝrma sǝma Yohanna an tom baptisma nya yǝ wo, yǝn nkee mara kwalari ra a sanglo u put Yahudiya wa,

² yǝn nkee me, “Sǝ kon nfaata, me kuɓsutu a liura wa yǝ won ngwang.”

³ U nwa ndǝ sase an nawanto Ishaya yǝ nkeesǝ mara a ɗuura ira wa me, “Kwaro yaa yarma a sanglo yǝn nkee me, ‘Sǝ sǝk ɗǝɗa meen Ankundi, Sǝ nǝɗkǝ ɗǝta kǝɗ meen sase.’ ”

⁴ Luktu Yohanna yǝ tungsǝ wa werkǝ ma ntaa telǝm wa, ɗǝm yǝ kaa nɗera ira ma ntaa. Mbuseya ɓisa ndǝ mormoraa ma mbraa nsinya ma.

⁵ Pa ɓet Urshalima ɓa ma nsaad ɓaa ɓǝsa a put Yahudiya ɓa, ma nsaad ura ɓisa kal sen Urdun wa ɓa, ɓǝ ko a sanii,

⁶ ɓǝn nkee tentenato ɓoso, yǝɓǝ tom baptisma a sen Urdun wa.

⁷ Pa yǝ wǝrsǝ ɓaa Farisiyawa ɓa ma ɓaa Sadukiyawa ɓa dem ɓǝn wowo a ham yǝn tomsǝ baptisma ɓeta ɓa wa, yǝ ɓǝ nkee me, “Saa hurtaa! Yaa nkeesǝ ni me sǝ mon nfiima ka wo a sani ɓau?

⁸ Sǝ tom tinima u kaa weɗa me sǝ kon nfaatan nwa.

⁹ Ɗǝm sǝ sen me kǝsǝ nkee nkweerase me, ‘Ibrahim ndǝ paate ra.’ Nǝn nkeesǝ me hana a dungate ya Kaa kiya nkaa yǝ hik emba Ibrahim.

¹⁰ Ɓaa wee ti kate wa a kunda ɓota ran, ɗǝm nsaad ɓot yǝ nsee emba yaɓ ra ɓa, ɓaa ka ɗǝǝ a putu a ti a ara.

¹¹ “Nase nǝn tomsǝ baptisma ma mbraa u kon nfaata wa. Pa ndiira nwano atike kiyǝ wo u yǝ faɗ nǝsǝ kwangto wa, u hana taa isa nǝ nkaa nǝ kee ra. Kiyǝ sǝ tom baptisma ma Wis Kaa wa ma ara.

¹² Yǝma nkoo ree usu a nem isi, ɗǝm kiya ree koma, yǝ kwau nse isi a pindo ɗǝm yǝ kǝɗ sangsangta ma ara u loo ra wa.”

Ɓaa tom Yeso Baptisma

¹³ Pa Yeso yǝ fiɗ Galili yǝ wo Urdun me Yohanna yaa tom baptisma.

¹⁴ Pa Yohanna yǝn taa me yǝ ɓisi yǝn nkee me, “Nǝn taa me ngǝnǝ tom baptisma ngiinga, pa ngǝ wo a naniu?”

¹⁵ Pa Yeso yǝ kak me, “A lee a tom maaso, tomon keke me ndǝ tom maaso me a kung mbu yǝsǝ yaɓ a wiiyo a Kaa ni ɓa.” Pa Yohanna yǝ yauwa.

¹⁶ Ɓaa tomsǝ Yeso baptisma nok wa, yǝ nii yǝ fiɗ a mbraa. Pa a fer siso liura a wili, pa yǝ wǝr Wis Kaa wa ǝn hamham nga tǝlko, yǝ kaɗ a sanii.

¹⁷ Pa kwarko fiɗaa liura, yǝ nkee me, “U nwa ndǝ auwane, yaa nǝn yausǝsǝ ya, nǝn hur kuɗa ma sase dem.”