Matta 27 - Lala NT

Yahuda yǝ tar ee usu

¹ Ma ɗenda naakǝn, nsaad kuɓsa nek mbusa sa ma wiina ɓeta ɓa, ɓǝ tǝmba ɗuura me ɓǝ toɗ Yeso.

² Pa ɓaa kaa, ɓaa saa ko a Ngomna Bilatus ni.

³ Pa Yahuda, yaa yǝ fangsǝ Yeso ya, yǝ wǝrsǝ me ɓaa ma Yeson me ko a toɗ wa, yǝ kang a senda ira me ko yǝ kang kuɓsa nek mbusa sa ma wiina ɓeta ɓa, koɓaa a patatǝn sǝsa.

⁴ Yǝ nkee me, “Nǝ tom mbu tenatena ɓan, me nǝ fang yaa yǝ tom mbuka ra ya me ɓaa toɗɗo.” Ɓaa kak me, “Mbu ntee tǝ mbiu? Ən mbu ngǝ taasǝ ɓa.”

⁵ Pa Yahuda yǝ yaɓ koɓaa kasa a hit Kaa Urshalima wa, yǝ faɗ mbusa. Pa yǝ faɗ ko yǝ tar ee usu.

⁶ Kuɓsa nek mbusa sa, ɓǝ haa koɓaa kasa ɓǝ nkee me, “Pam kwalari a nhii koɓaa sǝsa a ham nhii koɓaa a hit Kaa Urshalima wa ra. Me koɓaa kasa ndǝ u kwansǝ me a toɗ ete wa.”

⁷ Pa ɓǝ haa koɓaa kasa ɓaa tiri handa a an mar huna ya ni, me a tom ham hok waa ɓa.

⁸ Ən siso nding nga naa nwa, hansǝsa ǝn yarsǝ me, Han Monma ɓa wa.

⁹ Pa mbu an nawanto Irmiya nkeesǝ ɓa kunggun me, “Ɓǝ haa koɓaa kasa patatǝn u ɓaa Isra'ila ɓǝ fangsǝsǝ wa,

¹⁰ ɗǝm ɓǝ tom tinima ma siso ɓaa tiri handa a an mar huna ya ni, nga Ankundi nkee nǝsǝ wa.”

Yeso a wii Bilatus wa.

¹¹ Pa Yeso yǝ nǝɗ a wiiyo a Ngomna ni, pa Ngomna yaa taa me, “Ən ngase kuɓ ɓaa Yahudawa ɓa wau?” Yeso yǝ kak me, “Ee nwa, ngǝ nkeen maaso.”

¹² Pa kuɓsa nek mbusa sa ma wiina ɓeta ɓa ɓǝ tisǝsǝ kaura wa, yǝ kak mbuka ra.

¹³ Pa Bilatus ya taa me, “Ngǝ kura mbu ɓǝn nkeesǝ a ɗuura nga ɓa rau?”

¹⁴ Pa Yeso yǝ kak mbuka ra, hana mbuka fin a ɗaaso mbu ɓǝ tisǝsǝ kaura ɓa, pa Ngomna ka wa aa tom mbu weɗara ɓa.

¹⁵ Nwa ǝn mbu Ngomna yǝn tomsǝ ɓa a fer Mbukamsa wa, yǝn hik pursuna fin u ɓeta taa sǝ wa.

¹⁶ A fer usu yaa ke kǝn u ɓaa neusǝsǝ wa, ǝn yarsǝ me Barabbas.

¹⁷ Pa ɓeta kwausǝ dem wa, Bilatus yǝ ɓǝ taa me, “Ən nyamni sǝn yausǝ me nǝsǝ hikiu. Barabbas sǝu ko Yeso yaa ɓan yar sǝsǝ me Almaseho yau?”

¹⁸ Pa Bilatus yǝ maan me ndǝ rǝmara ɓǝ nasǝ Yeso wa.

¹⁹ Pa Bilatus yǝsǝ nɗa a han kaɗ kan mara ɓa wa, toonesi yaa tung mara ra me, “A lee yaa yǝ tom mbuka kwalakwala ra si ya, me naso nǝ wee kongsa dem a rotǝma a ɗuura ira.”

²⁰ Pa kuɓsa nek mbusa sa ma wiina ɓeta ɓa, ɓǝ nree ɓaa kwausǝ dem ɓa, me ɓǝ taa ɓaa ɓǝ hik Barabbas a toɗ Yeso.

²¹ Ngomna yǝɓǝ taa me, “Ɓǝsǝ raɓ wa, sǝn taa me nǝsǝ hik yamniu?” Ɓǝ kak me, “Barabbas.”

²² Bilatus yǝɓǝ taa me, “Yaa kǝnǝ tomtomni ma Yeso, yaa ɓan yarsǝsǝ me Almaseho yau?” Ɓǝ kak me, “Aa kwaakǝ!”

²³ Bilatus yǝ taa ɗǝm, “Meen mbiu? Yǝ tom mbi kwalakwalau?” Pa ɓǝ yauli ma kwaro kokro, ɓǝn nkee me, “Aa kwaakǝ!”

²⁴ Pa Bilatus yǝ wǝrsǝ me yǝ nkaa yǝɓǝ sa ra wa, lau wa rǝkata ǝn taa me ka nii a ɓeta ni, pa yǝ paa mbraa yaa sob nema isa a wii ɓoso, yǝ nkee me, “Nwano nǝ semma nema a monma eɗ ɗa ma ra, ndǝ nkweerase!”

²⁵ Ɓeta nsaad ɓǝ nkee me, “A lee monma ima a kaɗaa ɗuura ta ma emɓǝta!”

²⁶ Pa yǝɓǝ hik Barabbas. Pa yǝ ti ɓaa hoɓ Yeso, ɗǝm yǝɓǝ na me ɓaa kwaakǝ.

Nsosamse ɓǝ nhuu Yeso

²⁷ Pa soosamse ɓa ko ma Yeso a taanda ngomna ni, u ɓan yarsǝ me “Firetoriyum.” wa, Ɓǝ kwau nsaad pepera nsosamse ta, ɓaa leurǝ.

²⁸ Pa ɓaa nkweetǝ mbusa, ɓaa mɓǝrkǝ laulawara ko welwel u kuɓsa wa,

²⁹ ɓǝ werkǝ kukǝra kǝra u kuɓsutu wa ma tǝute, ɓaa tung a ɗuura, ɓaa na kwalango a nem isi, ɓǝ kwirsǝ a wii usu ɓǝn Pa ɓaa ntii tooma u para ma, ɓǝn nkeesǝ me, “Hurtu nwaango a tom palang, Kuɓ ɓaa Yahudawa ɓa wa.”

³⁰ Ɓǝ nemsǝ mesa, ɗǝm ɓǝ too kwalango ɓǝn hoɓsǝ a ɗuura.

³¹ Ndiira ɓǝ feɗsǝ na mbarta para wa, pa ɓaa hik laulawara welwel ɓǝ tungsǝsǝ wa, ɓaa kang luktu usu ɓaasa ko me ko ɓaa kwaakǝ.

Ɓaa kwaakǝ Yeso

³² Pa ɓǝn fiɗsǝn fiɗ wa, ɓǝ pamma eɗ Sayirin ke, ǝn yarsǝ me Siman, ɓaa tii ma kwakwato me yǝ too kwaakǝra kara.

³³ Ɓǝ wo a hamka ǝn yar me, Golgota (ǝn sen me nkoo ɗuura wa).

³⁴ Kǝnso ɓǝ na Yeso mbraa emngwate inabi ma, nsautǝsǝ ma mbukake nkwaa nkwaak me yǝ wee, pa yǝ pǝtasǝ wa, yǝ yau yǝ wee ra.

³⁵ Pa ɓǝ kwaa kǝsǝsǝ wa, ɓǝ ɓaa luktaa isa ya, ɓǝ tom tawo asi.

³⁶ Ɓǝ kaɗ kǝnso ɓaa waroo usu.

³⁷ A ɗuura ɓot ɓaa kwaa kǝsǝsǝ ɓa, ɓǝ nyor nyorma ɓǝn nkee me, U NWA ƏN YESO, KUƁ ƁAA YAHUDAWA ƁA WA.

³⁸ Ɓaa kwaakǝ nkwiiya raɓ ke ma sase, fin nem seya ya, yaa fin nya a nem kwasa ya.

³⁹ Ɓaa ɓǝn talǝsǝntalǝ ɓa, ɓǝn nkeesǝ mbusa kwalakwala ɓa, ɓǝn nyaasǝ ɗuura ɓora,

⁴⁰ ɓǝn nkee me, “Ngase kǝngaa okǝ hit Kaa Urshalima wa, ɗǝm ngǝ mar a tǝro taatǝn, a kon nkweerange! A ham a kwaakǝra sǝra, me ngǝn Au Kaa ya.”

⁴¹ Maaso ɗǝm kuɓsa nek mbusa sa ma malǝmaa fǝɗkǝta Musa sa, ma wiina ɓeta ɓa, ɓaa sa nhuu.

⁴² Ɓǝ nkee me, “Yǝ kon nkweera ɓaata, pa yǝ nkaa yǝ kon nkweera ee usu ra! Yǝn kuɓ Isra'ila wa! A lee yǝ ham waso a kwaakǝra sǝra, pa kǝtǝ na ɓongtǝra ma sase.

⁴³ Yǝ ti kangngo a Kaa ni. A lee Kaa yaa konnkweera waso me yǝn yausǝn yawa, me yǝn nkee me, ‘Nǝn Au Kaa ya.’ ”

⁴⁴ Maaso ɗǝm, nkwiiya u ɓaa kwaakǝ ɓǝsǝ ke ma sase sǝɓa, ɓosa kǝn, ɓaa sǝrǝ.

Woɗɗa Yeso ra

⁴⁵ Si kaa ɗa, pa handa a tom tebteb put siso nsaad a ko a fer ɗikira wa.

⁴⁶ Ma ɗikra kara, pa Yeso yǝ nik kwaro dem yǝ nkee me, “Eloi, Eloi lama sabatani?” ɗaanto usu me, “Kaa ɓǝna, Kaa ɓǝna, tomtomni ngǝ lee nǝsǝu?”

⁴⁷ Pa ɓaa ɓǝ nǝɗsǝ kǝnso ɓa, ɓǝ kurasǝ wa, ɓǝ nkee me, “Yǝn yar Iliya.”

⁴⁸ Pa nok fin a ɗaaso ɓoso yǝ moon koya wo ma mbu sob nkwaa ɓa, yǝ rii ma mbraa sǝusǝu ma u emngwate inabi ma wa, yǝ pak a kwalango yaa na Yeso me yǝ wee.

⁴⁹ Ɓaata ɓǝ nkee me, “A lee ndǝ wǝr me Iliya kiyǝ wo, yaasa kon nkweera.”

⁵⁰ Pa Yeso yǝ ɓaarǝ sǝ yǝ nik kwaro dem wa, pa yǝ lee huurtu usu.

⁵¹ A fersiso luktu u ɓaa kasǝ a hit Kaa Urshalima wa, yǝ saatǝ handa raɓ, ntii ɓoti a ham a kunda. Putu a nyaa dungate ɗǝm ɓǝ okǝ.

⁵² Pa tinamse a wili, maabiri ɓaa ɗekɗek ɓǝ woɗsǝ ɓa, ɓǝ nii ma huurtu.

⁵³ Ɓǝ fiɗ a tinamse ɓose, ndiira Yeso yǝ niisǝ wa, ɓǝ kang a ur ɗekɗek wa Urshalima, ɓǝ weɗa ee ɓoso ɓeta dem.

⁵⁴ Pa kuɓ kwang nsoosa ya, ma ɓaa ɓǝsǝ ke ma sase ɓǝn wǝrsǝ Yeso ɓa, ɓǝ wǝrsǝ nyaa putu wa, ma mbu nsaad tomsǝ ɓa wa, pa kokto ɓǝ ma, ɓǝ nkee me, “Ɓongtǝra yǝ Au Kaa ya!”

⁵⁵ Toona dem ɓǝ kǝnso, ɓǝn sengensenge mǝbmǝb. Ɓaa ɓǝ ɓǝɗ Yeso a fer ɓǝsǝ Galili wa huun ɓǝn tomsǝsǝ tinima wa.

⁵⁶ A ɗaaso ɓoso ndǝ Maryamu Magadaliya ma Maryamu maa Yakubu ya ma Yusufu ya, ma ɗǝm maa em Zabadi ɓa.

Ɓaa hok Yeso

⁵⁷ Pa ɗikira tomsǝ wa, an ma kǝnaa ke yǝ fiɗ Arimatiya, ǝn yarsǝ me Yusufu, sase kǝn yǝn aufǝɗke Yeso ya.

⁵⁸ Yǝ ko a Bilatus ni, yǝ kǝna me ɓaa na maabiri Yeso ya. Pa Bilatus yǝ nkee me ɓaa na.

⁵⁹ Yusufu yǝ too maabiri ka ya, yǝ mɓǝrkǝ a luktu ɗekɗek u hok woɗɗa wa,

⁶⁰ pa yǝ ti a nfiinfiira tina u yǝ werkǝsǝ ma ɗungara men usu wa. Pa yǝ tǝng kuɓ kwang ate ɗungara ya, yaa liki inntii tina ya, yǝ faɗ mbusa.

⁶¹ Maryamu Magadaliya ma ate fin Maryamu ya, ɓǝ nɗa a wii tina ka ɓa wa.

Ɓan war tina ɓa

⁶² Handa weesǝ wa, u yǝsǝ kaa nwiiya Yahudawa ɓa, tǝro fin ndiira werko wa, kuɓsa nek mbusa sa ma ɓaa Farisiyawa ɓa, ɓǝ ko a Bilatus ni.

⁶³ Ɓaa nkee me, “Yaa kwang ya, tǝ ɗimin me an paara ya yǝ nkee a fer yǝsǝ ma huurtu wa me, ‘Ndiira tǝro taatǝn wa kǝnǝ nii a tina.’

⁶⁴ Pa me maaso, a ti ɓaa war tina ka wa nhe ndub me tǝro taatǝn talǝn. Me sem maaso ra, emfǝɗkaa ɓisa kǝ ɓǝ wo ɓǝ tang maabiri isi ɓǝ nkee ɓeta me yǝ niin a tina. Nlaa ɓeta a feɗefeɗe siso kǝ tom a faɗ u ntiiri wa.”

⁶⁵ Bilatus yǝɓǝ kak me, “Sǝ haa nsosamse kosǝ war tina kawa nga sǝn yausǝ wa.”

⁶⁶ Maaso ɓǝ ko ɓǝ war tina ka wa, ɓǝ ti sakakura kuɓu ra asi.