Matta 26 - Lala NT

Ɓan sen mbu kwalakwala ɓa a ɗuura Yeso ra

¹ Pa Yeso yǝ feɗsǝ nkee mbusǝsa nsaad wa, pa yǝ nkee emfǝɗkaa ɓisa me,

² “Ngaa sǝ maasǝ wa, Mbukamsa Tadko wa pee tǝro raɓ, ɗǝm ɓaa kǝ na Au Ete ya me ɓaa kwaakǝ.”

³ Pa kuɓsa nek mbusasa, ma wiina ɓeta ɓa, ɓǝ kwau a taanda kuɓsa nek mbusasa ni, yaa ɓan yarsǝsǝ me Kayafa ya.

⁴ Pa ɓǝ kǝr ɗǝɗa kǝɓa ma Yeso a nhuukǝra ra me ɓaa toɗɗo.

⁵ Pa ɓǝ nkee me, “Sem a fer Mbukamsa wa ra, me tom ɓeta ɓǝ nik kito ra.”

Ɓaa puk yaro Yeso Betanya

⁶ A fer Yeso yǝsǝ nding a Betanya wa, a ɗuur yaake ǝn yarsǝsǝ me Siman yǝsǝ ma siyo tǝmo ya wa,

⁷ pa toone ke yǝ wo a sanii ma yaro u ma nseera yaɓ wa, a kǝnɗa ǝn yarsǝ me alabasita ra, u ǝn tirisǝ ma koɓa dem wa, pa yǝ puk Yeso a ɗuura a fer yǝn sesǝ mbuseya wa.

⁸ Pa emfǝɗkaa ɓisa ɓǝ wǝrsǝ maaso wa, ɓǝ kung ma nfiima. Ɓǝ taa me, “Yǝ tǝblǝ mbuɓa sal men mbiu?”

⁹ “Yar wa kama kǝ fang ma koɓaa dem, ɗǝm a na koɓaa isa hanhanta.”

¹⁰ Yeso maasǝ maaso wa, yǝɓǝ nkee me, “Sǝn rǝka toone ya men mbiu? Yǝ tom nǝ mbu kwalari ɓa.

¹¹ Sǝ ke ma hanhanta nfee, pa nwano, nǝ sem nfee ma saase ra.

¹² Yǝ puknǝsǝ yaro a maabiri wa, yǝ tom maaso me yǝ sǝk hokoo nwano.

¹³ Ɓongtǝra nǝn nkeesǝ, hana a han naɓa a put taandi wa ɓa nsaad, me ɓaa kǝ nkee mara kwalari ra, mbu toone ya yǝ tom nǝsǝ ɓa, ɓaa kǝ nkee kǝn, me a ɗimma sase.”

Yahuda yǝ yauwan me kiya pang Yeso

¹⁴ Pa fin a ɗaaso emfǝɗkaa pu nhaa raɓ sǝɓa, u ǝn yarsǝ me Yahuda Iskariyoti ya, yǝ ko a kuɓ kwang nek mbusa ya ni,

¹⁵ yǝɓǝ taa me, “Sǝ kǝnǝ na mininiu, me nǝ fangsǝ a saniu?” Pa ɓǝ kau koɓaa patatǝn ɓaa na.

¹⁶ Tǝng siso, tǝng a fer siso Yahuda yǝn kǝr ɗǝɗa kiya fang Yeso ra.

Yeso se mbuseya mbukamsa tadko wa ma emfǝɗkaa ɓisa

¹⁷ A kaa ntiiri u Mbukamsa Nkaadǝng u Yisti semra wa, emfǝɗkaa ɓǝ wo a Yeso ni, ɓaa taa me, “Ngǝn taa me ko tǝngǝ werkǝ ham ngǝ ka se mbuse Mbukamsa Tadko ma nau?”

¹⁸ Yǝ kak same, “Sǝ kan a ɗaaso uru wa a atike ni, saa nkee me, ‘Malǝm yǝ nkee me, Fer nwano tomon ngwang, ko nǝ se mbuseya Mbukamsa Tadko ma ɓa, ma emfǝɗkaa ɓǝna a ɗur nwaango.’ ”

¹⁹ Pa emfǝɗkaa ka ɓa ko ɓǝ tom maaso nga Yeso nkee ɓǝsǝ wa, pa ɓǝ wǝrkǝ Mbukamsa Tadko ma kaɓa.

²⁰ Pa ɗikra tomsǝ wa, Yeso yǝn se mbuseya ma ɓaa pu nhaa raɓ ka ɓa.

²¹ Pa ɓǝn sesǝ mbuseya wa, yǝɓǝ nkee me, “Nǝn nkeesǝ ɓongtǝra, fin a ɗaaso waaso kiyǝ nǝ fang nga.”

²² Pa kuɗa ɓǝ tǝblǝ dem, pa ɓǝ ntii ɓǝn taasǝ fin fin me, “Ankundi, ndǝ niinau?”

²³ Yeso yǝ kak me, “Yaa yǝn tisǝ nema isi a nkoo ke ma niina nya, kiyǝ nǝ fang sase.

²⁴ Au Ete ya kiya ko nga ɓaa nyorsǝ a likarkar Kaa wa ya. Pa ǝn mbu manyamanyato ɓa, a eɗ kaya ni, yaa kiyaa fang Au Ete ya wa! Kama kaa tom yaɓ a sanii, me ka ɓaa haasǝ ra.”

²⁵ Pa Yahuda yaa kiya saa fang nya, yǝ nkee me, “Malǝm, ndǝ nii nau?” Yeso yǝ kak me, “Ngǝ nkeen keke.”

²⁶ Pa ɓǝn sesǝ mbuseyan se wa, Yeso yǝ too nkaadǝng, yǝ na himara, yǝ ɓaa, yǝ na emfǝɗkaa ɓisa, yǝ nkee me, “Sǝ kono sǝ kǝuwǝ, ndǝ maabiri yaane.”

²⁷ Pa yǝ too kofi u mbraa em ngwate inabi ma, yǝɓǝ na, yǝ nkee me, “Sǝ nsaad, sǝ wee.

²⁸ U nwa ndǝ monma na, u kungo waa wa, u ɓaa tuksǝ a ɗuura ɓeta dem wa ra, men u lee a senda tentenato ɓoso wa.

²⁹ Nǝn nkeesǝ, nǝ ɓaarǝ nǝ wee mbraa emngwate inabi ma ra, ndub kaa kǝna wee u nfiinfii wa ke ma sase a kuɓsutu Paane wa.”

³⁰ Pa ɓǝ kǝɗsǝ pina nyoo Kaa sa wa, ɓǝ fiɗ ɓǝ faɗ a yol Zaitun wa.

Bitrus renǝ Yeso

³¹ Pa Yeso yǝɓǝ nkee me, “Nsaad sǝkǝ kwiɗ naso a pǝrtǝra ra me niina, me ka ɓaa wee nyoron a Likarkar Kaa wa me, “ ‘Kǝnǝ hoɓ an wanda ya, ɗǝm tǝmnka kǝɓǝ yaasǝ.’

³² Pa ndiira kǝna nii wa, kǝnǝ sǝ nkaa ko a put Galili wa.”

³³ Bitrus yaa kak me, “Hana nsaad kǝɓǝ kwiɗ me ngase, niina nǝ pǝta kwiɗo ra.”

³⁴ Yeso yaa kak me, “Nǝn nkee ngǝ ɓongtǝra, a pǝrtǝra ra, meen ǝn nkee me kokra ǝn pomo u raɓte ya, kǝngǝ nǝ renǝ a kan taatǝn.”

³⁵ Pa Bitrus yaa nkee me, “Hana kama kǝnǝ woɗ ke ma ngiinga, Nǝ pǝta nkee me nǝ maa ngǝ ra ra.” Ɗǝm ɓaata emfǝɗkaa ɓǝ nkee maaso kǝn nsaad.

Yeso yǝ tom kǝnara

³⁶ Pa Yeso yǝ ko ma emfǝɗkaa ɓisa a ham ǝn yarsǝ me Gatsemani ɓa, pa yǝɓǝ nkee me, “Sǝ kaɗ a hamɓa, kǝnǝ ko nǝ tom kǝnara.”

³⁷ Yǝ too Bitrus ma em Zabadi ɓa, raɓ ke ma sase, pa yǝ ntii kura kuɗa tebteb ta ma rǝkata.

³⁸ Pa yǝɓǝ nkee me, “Huurtu nwaano yaa kongsa nga kǝnǝ woɗɗo. Sǝ kaɗ a hamɓa, sǝ tomaa waro ke ma niina.”

³⁹ Yǝ kosǝ ngeek a wiiyo wa, yǝ nwii ma ota ita a putu, yǝ tom kǝnara, yǝ nkee me, “Paane, me kǝ tomo, nǝ too kongsa sa a nani. Pa a tom mbu ngǝn yausǝ ɓa, sem mbu nǝn yausǝ ɓa ra.”

⁴⁰ Pa yǝ kang a emfǝɗkaa ɓisa ni, yǝɓǝ wo ɓaa munda. Yǝ taa Bitrus me, “Saa ɓet ɓaa, sǝ nkaa sǝ kaɗ a waro ke ma niina hana u awa fin wa rau?

⁴¹ Sǝ kaɗ a waro, saa tom kǝnara, me tom sǝ kan a han pǝtara ɓa ra. Wiso yǝ yauwan, pa maabiri kǝrǝɓ.”

⁴² Yǝ kang raɓte ko yǝ tom kǝnara, yǝ nkee me, “Paane, me tomon ɗaɗ me nǝ wee kongsa sa, a lee mbu ngǝn yausǝ ɓa, a kaɗ maaso.”

⁴³ Pa yǝ kangsǝ wa, wo yǝɓǝ wo ɗǝm ɓaa munda, me nuunwa ɓosa tomon lǝklǝk.

⁴⁴ Pa yǝ ɓaarǝ yǝɓǝ lee, yǝ faɗ ɗǝm me ko yǝ tom kǝnara tatǝnte wa, yǝn ɓaarǝ yǝn nkee mbu fin ɓa.

⁴⁵ Pa yǝ kang a emfǝɗkaa ɓa ni, yǝɓǝ nkee me, “Sǝ nding a munda ɗǝm sǝ nwiinwii mbasau? Sǝ sengge, fer usu kanan, u ɓaa ka fang Au Ete ya wa a nema ɓaa ma tentenato ɓa ni.

⁴⁶ Sǝ nii ndǝ faɗa, yaa yǝ fangnǝsǝ ya, yǝ won!”

Ɓaa ma Yeso

⁴⁷ Yeso yǝsǝ nding a kanmǝra wa, Yahuda fin a ɗaaso ɓaa pu nhaa raɓ sǝɓa, yǝ wo ke ma ɓeta dem, ɓǝ masǝ songgommaa ma kwalangngaa. Ɓetsǝsa ndǝ wiina kuɓsa nek mbusa sa, ma wiina ɓeta ɓa, ɓǝ tung ɓǝ ɓosa.

⁴⁸ Yahuda Iskariyoti ya kiya fang Yeso ya, yǝ wee ɓǝ weɗa mbu kiya tom ɓǝ maa men sase ya, yǝɓǝ nkee me, “Yaa kǝnǝsa maa ma nɗaa ɓaatǝwa ya, ndǝ sase Eɗ kaya, saa ma.”

⁴⁹ Wo Yahuda wa nok, yǝ ko a Yeso ni, yaa nkee me, “Malǝm nǝn too ngǝ.” Pa yaa ma, ma nɗaa ɓaatǝwa.

⁵⁰ Yeso yǝ kak me, “Sikaane, a tom mbu wo ngǝsǝ ɓa.” Pa ɓet kaɓa ɓǝ wo a wiiyo, ɓǝ ma Yeso.

⁵¹ Tomsǝ maaso wa, fin a ɗaaso ɓan ɓǝɗ Yeso ɓa, yǝ hik songgom usu yaa tiki hoora kuɓ kwang nek mbusa ya, yaa ɗat ngwee.

⁵² Pa Yeso yaa nkee me, “A kang songgom nwaango a hit usu, hana nyamni yaa yǝ hiksǝ songgom nya, ma lau songgom siso kiyaa woɗ wa.

⁵³ Sǝ maa me kǝnǝ nkaa nǝ kǝna Paane, ɗǝm nok yǝnǝ tung ɓantimira ɓa dem dem rau?

⁵⁴ Pa kama kǝ tomtomni Likarkar ka kunggu, nga u nkeesǝ me kaɗan ɗaɗ me a tom maaso wau?”

⁵⁵ A fersiso Yeso yǝ nkee ɓaa ɓǝ kwausǝ dem sǝɓa me, “Sǝ fiɗ ma songgomaa ma kwalangaa me sǝnǝ ma nga nǝ nkwii? Hana a han nweeya naɓa nǝn kaɗ a taanda hit ɓǝɗ Kaa Urshalima wa nǝn tom fǝɗkǝra, ɗǝm sǝ ma nǝ ra.

⁵⁶ Mbu ɓa nsaad tom maaso me a kung nyorma likarkaraa ɓannawanto ɓa wa.” Pa nsaad emfǝɗkaa sǝɓa, ɓaa lee, ɓaa mon.

⁵⁷ Pa ɓaa ɓǝ maasǝ Yeso sǝɓa, ɓaa too ɓaasa ko a Kayafa ni, kuɓ kwang nek mbusa ya, a ham malǝmaa fǝɗkǝta Musa sa, ma wiina ɓǝ kwau a ham fina.

⁵⁸ Pa Bitrus yǝ ɓǝɗ Yeso ndiira mǝbmǝb, yaa ɓǝɗ ɓaa ko a talte taanda kuɓ kwang nek mbusa ya. Yǝ kansǝ wa, yǝ kaɗ ke ma ɓan war taanda ɓa, me yǝ wǝr mbu kaa tom Yeso ɓa.

⁵⁹ Kuɓsa nek mbusa sa ɓa ma wiina ɓan kan mara Yahudawa ɓa ɓǝn kǝr para u ka ti a toɗ Yeso ɓa, pa ɓǝ taa mbuka ra.

⁶⁰ Pa ɓǝ taa hana fin nda, hana ka ɓan paa para ɓa fiɗsǝ dem wa. A feɗefeɗe ɓeta raɓ ɓǝ wo a wiiyo,

⁶¹ ɓǝ nkee me, “Eɗ ɗa, yǝ nkee me, Kǝnǝ nkaa nǝ ookǝ hit Kaa Urshalima wa, yǝ ɓaarǝ yǝ mar a tǝro taatǝn.”

⁶² Pa kuɓ kwang nek mbusa ya, yǝ nii kǝɗ, yǝ nkee Yeso me, “Ngǝ sem ma mbu ngǝ ka kak ɓa rau?” Ən mbi ɓet ɓa ɓǝn nkeesǝ a duura nga masou?”

⁶³ Pa Yeso yǝ roo nseu. Kuɓ kwang nek mbusa ya, yaa nkee me, “Nǝn tǝmɓa ngǝ ma Kaa yaa ma huurtu ya, Ətǝ nkee me ngǝ Almaseho Au Kaa ya.”

⁶⁴ Yeso yaa kak me, “Ngǝ nkeen maaso, pa nǝn nkeesǝ nsaad me, wo a wiiyo wa, sǝkǝ wǝr Au Ete ya ɗa a nem seya Yaa Kwang ya, ɗǝm yǝn hamham a liuta.”

⁶⁵ Pa kuɓ kwang nek mbusa ya, yǝ nsaatǝ luktu usu, yaa nkee me, “Yǝ kan mara u kwalakwala wa a ɗuura Kaa ra! Ən mbi ndǝn kǝrsǝ a ɗuura ira ɗǝmǝu? Sǝ kura nkee mbuka kwalakwala a ɗuura Wis Kaa wa ran.

⁶⁶ Sǝ wǝr miniu?” Ɓǝ kak ɓǝ nkee me, “Tomon ɗaɗ yǝ woɗɗo.”

⁶⁷ Pa ɓaa tuu mesa a ota, ɓaa hoɓɓo, ɓaata ɓaa ɗaktǝ,

⁶⁸ ɓaa nkee me, “Almaseho, ǝtǝ nkee waanto, yaa hoɓ ngǝ niu?”

Bitrus yǝ renǝ me yǝ maa Yeso ra

⁶⁹ Bitrus yǝ nɗa a taanda sǝra, pa hoora autoone ke yǝ wo a sanii yǝ nkee me, “Ngase kǝn ngǝ ke ma Yeso yaa Galili ya.”

⁷⁰ Pa yǝ renǝ a wii ɓoso nsaad, yǝ nkee me, “Nii na nǝ maa mbu ngǝn nkeesǝ ɓa ra.”

⁷¹ Pa yǝ nii yǝ ko a inntii ke ɓol ma ntaandi, a hansǝsa autoone ke ɓol ɗǝm yǝ wǝrǝ, yǝ nkee ɓeta me, “Eɗ ɗa, yǝ ke ma Yeso yaa Nazarat ya.”

⁷² Yǝ ɓaarǝ yǝ renǝ ɗǝm ma kuuma, yǝn nkee me, “Nǝ maa eɗ sisi ra!”

⁷³ Tomsǝ singǝ wa, ɓaa ɓǝ nǝɗsǝ kǝnso ɓa, ɓǝ ko a Bitrus ni, ɓaa nkee me, “Ɓongtǝra ngǝ fin a ɗaaso ɓoso, me kanmǝra nga weɗan.”

⁷⁴ Pa yǝ ntii tom meto ee usu, ɗǝm yǝn kuu ɓǝn kuu me, “Nǝ maa eɗ kaya ra!” Nok kǝnso kokra yǝ paa pomra.

⁷⁵ Pa Bitrus yǝ ɗim ma mbu Yeso nkeesǝsǝ ɓa me, “Meen nkee me kokra kiya paa pomra, kǝ ngǝ nǝ renǝ a kan taatǝn.” Pa yǝ fiɗ ntaandi yǝ tee kwalakwala.