Matta 24 - Lala NT

Yeso yǝ nkee nkaamǝra nwiinyo Hit Kaa Urshalima ka tom nwa

¹ Yeso fiɗ a hit ɓǝɗ Kaa Urshalima wa yǝn faɗ faɗa, pa emfǝɗkaa ɓisa ɓa wo ɓaa weɗa nkaamǝra ɓaa marsǝ hit ɓǝɗ Kaa Urshalima wa.

² Pa yǝɓǝ taa me, “Sǝ wǝr mbu ɓa nsaad nǝu? Nǝn nkeesǝ ɓongtǝra, ɗungara kǝra fin a pee a hamɓa a ɗuura ate ra ra, ɓaa kǝ ookǝ a putu nsaad.”

³ Pa Yeso yǝsǝ nɗa a yol Zaitun ra wa, emfǝɗkaa ɓǝsǝ ɓǝ wo a sanii a nhuukǝra, ɓaa nkee me, “Ətǝ nkee, mbu ɓa kǝ tom kamniu, ɗǝm ma mbu nhiinyanhiinya mbi ka weɗa wo nwaango ma kaa feɗefeɗe put ntaadi wa ɓau?”

⁴ Yeso yǝɓǝ kak me, “Sǝ nhii nwaa tom atike yǝsǝ nlaa ra.

⁵ Me ɓeta dem kǝ wo a ɗǝnda na, ɓǝn nkee me, ‘Nǝn Almaseho,’ ɗǝm ɓǝkǝ nlaa ɓeta dem.

⁶ Sǝkǝ kura kisa, ma maatamse a ɗuura kisa ra ɓol ɓol, pa sǝ kong nik senta saa wa ra. Tomon ɗaɗ, mbusǝsa a tomo, pa feɗefeɗe wo sundu ra.

⁷ Putu kǝ nik kito ma ate putu ya, ɗǝm kuɓsutu kǝ nik kito ma ate kuɓsutu ya. Ɓaa kǝ tom ɗoora ma nyaa putu wa a hantamse ɓol ɓol.

⁸ Nsaad susu ǝn ntiiri kongsa wa kweɗ.

⁹ “Pa kǝɓǝsǝ na a nema ɓeta sa, ɓaa sǝ na kongsa, ɓaa sǝ toɗɗo, ɗǝm putsa nsaad ɓǝ kǝsǝ mbisi me a ɗǝnda na.

¹⁰ A fer siso ɓeta dem ɓǝkǝ kǝrtǝ a na ɓongto ɓoso wa, ɓǝkǝ fang ɓaatǝ ɗǝm ɓǝ mbisi ɓaatǝ.

¹¹ Pa ɓannawanto para ɓa, ɓǝkǝ fiɗ dem ɓǝ nlaa ɓeta dem.

¹² Me tinimsa kwalakwala ma sokǝn kwang, yauta ɓeta ta kǝ tom ɗǝlɗǝl,

¹³ pa yaa yǝ nǝɗsǝ kwakwa a ko a feɗefeɗe ya, kiyǝ taa kon nkweera wa.

¹⁴ Pa ɓaakǝ nkee mara kwalari u kuɓsutu a liura wa a put ntaandi wa nsaad, me a tom mbu maa a ɓeta ni, pa feɗefeɗe a wo.

¹⁵ “Pa me sǝ wǝr tinima rumta ma, u yǝn wosǝ ma tǝblǝ ra wa, u an nawanto Daniyel yǝ nkeesǝ wa me, yǝ kǝɗ a hit ɗekɗek wa yaa yǝn kausǝn kau ya, a lee yǝ maa,

¹⁶ a fer siso, a lee ɓaa ɓǝsǝ a put Yahudiya ɓa, ɓǝ mon ɓǝ taa a yola.

¹⁷ Yaa yǝsǝ a hito ɓoti ya, yǝ ham me yǝ too mbuka a hit usu ra.

¹⁸ Yaa yǝsǝ nyaa nya, yǝ kang ɗuur me koyǝ too laulawara ira ra.

¹⁹ Mbu manyamanyato ɓa, a toona ɓaa ma kuti ɓa, ma ɓan na toota ɓa a fer usu.

²⁰ Sǝ tom kǝnara me fer siso ǝn wo a fer raraa wa ra, hana kaa nwiinya Yahudawa ɓa ra.

²¹ Me a fer siso ɓaa kǝ tom kongsa dem, u ɓaa pǝta tomoo ra wa, tǝng ntiiri kaɗo put taandi wa ɓa, a wo nga naa wa, ɗǝm ɓaa ɓaarǝ a tom kamǝra sǝra ra.

²² Me ka sem me ɓaa nɗǝm tǝro mbul ra, kama atike yǝ nɗanyǝ ra, pa me ɓaa tau ɓǝsǝ ɓa, tǝro ka wa kǝ nɗǝm mǝ.

²³ A fer siso me yaake nkee ngǝ me, ‘Sǝ sengge, Almaseho yǝ nwa,’ hana ‘yǝ suwa,’ sǝ na ɓongto ra.

²⁴ Me Almaseho para sa, ma ɓannawanto para ɓa, ɓǝkǝ wo ɓǝ tom mbusa kwang u nhiinyanhiinya u weɗara wa, me ɓǝ nlaa ɓeta hana ma ɓet ɓaa tau ɓǝsǝ ɓa, me kǝ tomo.

²⁵ Sǝ sengge, nǝ nkee sǝn nakǝn.

²⁶ “Me maaso, hana yaake nkeesǝ me, ‘Yǝ suwa a sanglo,’ sǝ fiɗ ɗa. Hana ɓǝ nkee me, ‘Yaa ham ɓa, ɗaan a hito,’ sǝ na ɓongto ra.

²⁷ Nga weɗweɗɗo ǝn weɗsǝ ma ɓoti ra a wǝr sorot a kunda wa, kǝ tom maaso ma wo Au Ete ya wa.

²⁸ A han mbuka woɗsǝ ɓa, ǝn han pensa ɓǝn kwausǝ ɓa.

²⁹ “Nok a ndiira tǝromse u wee kongsa siso wa, “ ‘kaa kǝ kang tebteb, ofe ɗǝm yǝ too handa ɗekɗek ra, seklǝmeta liura ta kǝ roo a putu, ɗǝm ɓaa kǝ nyaa mbu kwang kwang a liura ɓa.’

³⁰ “A fer siso sǝkǝ wǝr mbu nhiinyanhiinya ɓa u Au Ete ya wa a liuta, pa ɓet a put ntaandi wa ɓa nsaad ɓǝkǝ tee men kokto. Ɓǝkǝ wǝr Au Ete ya yǝn hamham a liuta, ma kwangto ma too dem.

³¹ Ɗǝm kǝ yǝ tung ɓantimira ɓisa ɓǝ hur pamra, ɓǝ ɗǝm kwau ɓet ɓǝsa u yǝ tausǝ ɓa, fiɗaa ɓotira ma kundara, ma seyara ma kwasara u put ntaandi wa nsaad.

³² “Sǝ fǝɗkǝ mbuka a ɓot sata ɓa. Me sǝ wǝr ɓǝn ntii tom nwaama nwa, sǝ maa me raara kanan ngwang.

³³ Pa maaso ɗǝm me sǝ wǝr nsaad mbu ɓan nsaad, sǝ maa me tomon ngwang, yǝ kǝk ma inntii.

³⁴ Nǝn nkeesǝ ɓongtǝra, ɓaa kaareyase ɓa, a talǝra ndub me mbu ɓa nsaad wo tomon.

³⁵ Liura ma put ntaandi wa kǝ talǝ, pa mara na a pǝta talo ra.

Yaake sem kǝn yǝ maasǝ kaa ɓisa wa ra

³⁶ “Pa yaake sem kǝn yǝ maasǝ fersiso ma kaa ɓisa wa ra, hana ɓantimira a liura ɓa, hanan Au kaya ra, pa ǝn Paapa fin maɗ.

³⁷ Nga yǝsǝ a fer Nuhu wa, maaso kaa tom a wo Au Ete ya wa.

³⁸ A fer mbraa tufana wo sundu ra wa, ɓeta ɓaa seyo ma weeyo, ɓǝn kon toona, ɗǝm ɓǝn na toona ɓaa ɓǝ kono, a wo a kaa Nuhu yǝ kansǝ a kurnyaamo wa,

³⁹ pa ɓǝ maa mbu ka ra, ndub a fer mbraa tufana wosǝ wa, ǝɓǝ too nsaad yaa faɗsǝ. Maaso ka tom wa, a fer Au Ete ya kiya wo wa.

⁴⁰ Ɓeta raɓ ɓǝkǝ tom a nyaanyo, ɓaa kǝ too ya fin ya, a lee ate.

⁴¹ Toona raɓ ɓǝkǝ tom a nsoo numu wa, ɓaa kǝ too ya fin ya, a lee ate.

⁴² “Me maaso, sǝ tom a waroo, me sǝ maa a kaa na ɓa Ankundi yaase kiya wo ɓa ra.

⁴³ Pa sǝ maa mbu ɓa. Me ka An taanda ya kiyǝ maa fer nkwii kiyaa wo a pǝrtǝra wa, kama kiya kaɗ a waroo, yǝ yau yǝ lee ɓaa a kan a haa mbusa ra.

⁴⁴ Me maaso, sase kǝn sǝ kaɗ ma waroo, me Au Ete ya kiya wo, a fer sǝ ti senda ra wa.

⁴⁵ “Ən yamni hoora ma ɓongtǝra ya u An taanda isi yǝ yausǝ ma sase, yǝsǝ ma maa mbuka wa, yaa na ma taanda ira wa, yǝ tom wiine a ɗuura ɓaata hoota ta, me yǝɓǝ na mbuseya ɓosa a fer tomsǝ keke wau?

⁴⁶ Kǝ tom mbu kwalari ɓa a hoora kara ni, me An taanda isi yǝ kang wo yaa taa yǝn tom maaso ya.

⁴⁷ Nǝn nkeesǝ ɓongtǝra, kiyǝ ti yǝ kaɗ wiine a ɗuura mbu yǝsǝ ma siso ɓa nsaad.

⁴⁸ Pa me ka hoora kara yǝ kwalakwala, kiyǝ nkee ee usu me, ‘An taanda yaane yǝ faɗan, yǝ wo waso ra,’

⁴⁹ pa yǝ ntii hoɓ ɓaata ɓisa hoota, ɗǝm yǝ se, yǝ wee ma ɓaata ɓan wee mbusa ɓa.

⁵⁰ Pa me yǝ tom maaso, an taanda hoora sǝra ya, kiyaa wo a kaa yǝ maa ra ɓa, ɗǝm a fer yǝ ti senda ra wa.

⁵¹ Pa an taanda isi kǝyaa hoɓ dem, yaa nkee me koyǝ kaɗ ke ma ɓaa ma ɗǝlmara raɓ ɓa, a ham kǝɓaa tee oro ma kǝu ɗǝmta wa.