Matta 22 - Lala NT

Mǝɗkǝra ma mbukamsa kon toone wa

¹ Pa Yeso yǝ ɓaarǝ yǝɓǝ nkee mara ɗǝm ma mǝɗkǝta me,

² “Kuɓsutu a liura wa, yǝ nga kuɓ ko u yǝ werkǝsǝ mbukamsa kon toone au isi wa.

³ Yǝ timi hoota ɓisa a ɓaa yǝ yar ɓǝsǝ a mbukamsa sǝɓa ya, me ɓǝ wo, pa ɓǝ yau ɓǝ wo ra.

⁴ “Yǝ ɓaarǝ yǝ timi ɓaata hoota ɓa, yǝɓǝ nkee me, ‘Kosǝ nkee ɓaa nǝ kǝna ɓǝsǝ me ɓǝ wo a hiira ɓa, me nǝ wee werkǝ mbuseya wan ɓǝ wo nakǝn. Ɓaa nǝng naa kwang wan, mbusa nsaad werkǝn, sau a hiira maɗ.’

⁵ “Pa mbusa rǝka ɓǝra, ɓǝ faɗ ɓoɓǝsa, yaa fin ya yǝ faɗ nyaa usu, yaa fin ya yǝ faɗ a lumu usu.

⁶ Ɓaata ɓǝ ma hoota ita ɓǝɓǝ na kongsa ɗǝm ɓǝɓǝ toɗɗo.

⁷ Pa kuɓ kawa yǝ nfii dem, yǝ timi nsosamse isi me ko ɓǝ toɗ ɓan toɗ ɓeta sǝɓa, ɗǝm ɓǝ kǝɗ ur ɓoso nsaad.

⁸ “Pa yǝ nkee hoota ɓisa me, ‘Mbukamsa kon toone kawa, ɓaa wee werkon, pa ɓaa nǝ yar ɓǝsǝ me ɓǝ wo ɓa, ɓǝ pam me ɓǝ wo ra.

⁹ Soo a ntoota kosǝ yar hana yamni yaasǝ taasǝ ya, yǝ wo a mbukamsa sǝsa.’

¹⁰ Pa hoota kata ɓǝ ko a ntoota, ɓǝ yar hana yamni ɓaa ɓǝ taasǝ ɓa nsaad, ɓet tena ɓa ma ɓaa kwalakwala ɓa, pa ham mbukamsa kon toone sǝsa a kung ma waa.

¹¹ “Pa kuɓu yǝ kansǝ me kiya sengge waa wa, pa yǝ wǝr atike kenso yǝ semma luktu u hiira wa ra.

¹² Pa yaa nkee me, ‘Sikane, tomtomni ngǝ wosǝ a ham ɓa ngǝ semma luktu hiira wa rau?’ Pa eɗ kaya yǝ roo nseu.

¹³ “Pa kuɓu yǝ nkee hoota ita me, ‘Saa kaa neme ma nata, saa muɗkǝ ntaandi a han tebteb ɓa, kǝnso kiya tee ma kǝu ɗǝmta wa.’

¹⁴ “Me ɓaa ɓaa yar ɓǝsǝ ɓa dem, pa ɓaa ɓaa tau ɓǝsǝ ɓa ngeek.”

Taa mbuka wa a ɗuura kwan samra wa

¹⁵ Pa ɓaa Farisiyawa ɓa, ɓǝ ko me ɓǝ kan ɗǝɗa ɓǝkaa sa tǝraa a mara ira ɓa.

¹⁶ Pa ɓǝ timi emfǝɗkaa ɓosa ke ma ɓaa Hirudus ɓa. Ɓǝ nkee me, “Malǝm, tǝ maan me ngǝ yaa ma ɓongtǝra ya, ɗǝm ngǝn fǝɗkǝ ɗǝɗa Kaa ra ma ɓongtǝra. Ngǝ sem ma yau ɗuura wa ra, me ngǝn too ɓeta nsaad keke.

¹⁷ Ətǝ nkee senta nga waso, ngǝn wǝr nga pamman me tǝ kwan samra Kaisar rǝu, ko tǝ kwan dau?”

¹⁸ Pa me Yeso wee maa senda kwalakwala ɓora wan, yǝɓǝ nkee me, “Saa ɓaa ma ɗǝlmara raɓ ɓa, mbu kwaa mbi sǝn taasǝ me sǝnǝ tǝrau?

¹⁹ “Sǝnǝ weɗa koɓaa kwan samra sǝsa.” A nii ɓaa wo ma koɓaa kasa,

²⁰ pa yǝɓǝ taa me, “Ən sakankuura yauni ra ma ɗǝm ɗǝnda yauni ra a sǝu?”

²¹ Ɓaa kak me, “Ən u Kaisar wa.” Pa yǝɓǝ nkee me, “Sǝ na Kaisar mbu Kaisar ɓa, ɗǝm sǝ na Kaa mbu kaɗsǝ me ǝn u Kaa ɓa wa.”

²² Pa ɓǝ kurasǝ maaso wa, ɓǝ tom mbu weɗara ɓa, ɓaa lee ɓǝ faɗ ɓoɓɓǝsa.

Taa mbuka wa a ɗuura niinyo a tina wa

²³ A kaa ɓisa ɓaa Sadukiyawa ɓa, ɓaa ɓǝ nkeesǝ me niiyo a tina wa semra ɓa, ɓǝ wo a Yeso ni, ɓaa taa me,

²⁴ “Malǝm, Musa yǝ nkeetǝ me, me ete woɗ yǝ semma emɓa ra, koɓɓisi kiyǝ kon kiu kaya, me yǝ haa emba tii isi.

²⁵ Waso ɓaataka kǝn mbutu a ɗaaso waato, ɓǝn tiiyaa ma koɓɓa. Yaa ntiiri ya, yǝ kon toone yǝ woɗɗo, yǝ semma emɓa ra, yǝ lee toone isi koɓɓisi.

²⁶ Tom maaso ɗǝm ma kobɓisi raɓte ya ma u taatǝnte wa, a ham maaso a ko a ɗuura yaa mbututi ya.

²⁷ A feɗefeɗe nsaad, toone kaya yǝ woɗɗo.

²⁸ Ya waso a kaa niinyo put taandi wa ɓa, toone sisi kǝyǝ kaɗ toone yamni ya a ɗaaso ɓaa mbutu sǝɓau? Me nsaad ɓaa mbutu sǝɓa, ɓǝ konsǝn.”

²⁹ Yeso yǝɓǝ kak me, “Sǝ nfaan, me sǝ maa mbu ɓaa nyorsǝ a likarkar Kaa wa ra, ɗǝm sǝ maa kwangto Kaa wa ra.

³⁰ A fer niinyo a tina wa, parata ɓǝ kon toona ra, toona ɗǝm ɓaa ɓǝ tung a kera ra, pa ɓǝkǝ kang nga ɓantimira Kaa a liura ɓa.

³¹ Pa mara niinyo a tina wa ra, hankǝra sǝ pǝta kauwo mbu Kaa nkeesǝsǝ ɓa rau? U nyorsǝ me,

³² ‘Nǝn Kaa Ibrahim ya, Kaa Ishaku ya, ɗǝm Kaa Yakubu ya.’ Yǝn Kaa wote ɓa ra, pa yǝn Kaa ɓan ma huurtu ɓa ya.”

³³ Pa ɓaa kwausǝ dem sǝɓa ɓǝ kurasǝ wa, ɓǝ kung ma weɗara a fǝɗkǝra ira.

Masaka u faɗsǝ kwangto wa

³⁴ Pa ɓaa Farisiyawa ɓa kurasǝ me Yeso yǝ nkaa ɓaa Sadukiyawa ɓa wan, ɓǝ kwau a han fina.

³⁵ Ate fin a ɗaaso ɓoso yaa yǝ maasǝ masaka Musa ya, yǝ pǝta Yeso, yaa taa me,

³⁶ “Malǝm, ǝn masaka nawa faɗsǝ kwangto a mbu Kaa yǝ nkeesǝ me aa tom ɓa?”

³⁷ Yeso yaa kak me, “ ‘A yau Ankundi Kaa ɓǝnga ma kuɗa nga nsaad, ma huurtu nwaango nsaad, ma ɗǝm senda nga nsaad.’

³⁸ U nwa ndǝ ntiiri, ɗǝm ndǝ sase mbu Kaa yǝ nkeesǝ me aa tom ɓa.

³⁹ Ɗǝm u raɓte wa yǝ nga siso, ‘A yau anndǝnsaatǝre nyaange nga nkweerange.’

⁴⁰ Masakasa nsaad ma ɓan nawanto ɓa ɓǝ tar a mbu Kaa yǝ nkeesǝ me aa tom ɓa.”

Krisiti ndǝ Au nyamni yau?

⁴¹ Pa ɓaa Farisiyawa ɓa, ɓǝ kwausǝ a han fina wa, Yeso yǝɓǝ taa me,

⁴² “Ən mbi senda sa a ɗuura Almaseho rau? Yǝ au nyamni nyau?” Ɓǝ kak me, “Ndǝ Au Dauda ya.”

⁴³ Pa yǝɓǝ nkee me, “Yaa tomtomni Dauda ma lau kwangto Wis ɗekɗek wa, yǝ yarsǝsǝ me, ‘Ankundiu’? Dauda nkee me,

⁴⁴ “ ‘Ankundi nkee Ankundi yaane me, “A kaɗ a nem seya yaane ndub me nǝ ti ɓaataker ɓǝnga a faɗa natsa sǝngan.’

⁴⁵ Pa me Dauda yarsǝ me, ‘Ankundi,’ yaa kiyǝ tomtomni yǝ kaɗ au isiu?”

⁴⁶ Atike kak mara kǝra ra, tǝng kaa ɓisa wa, yaake ɓaarǝ yaa taa mbuka ɗǝm ra.