Matta 20 - Lala NT

Mǝɗkǝta a ɗuura ɓan tinima nyaanyo ɓa

¹ “Me Kuɓsutu a liura wa, yǝ nga an ma nyaanyo ke, yaa yǝ fiɗsǝ ma ɗenda me ko yǝ kǝr ɓaa kǝ ɓǝsaa tom tinima a nyaanyo usu ɓa.

² Yǝ yauwan me kiyǝ ɓǝ kwan dinari fin a tuka, pa yǝɓǝ tung a nyaanyo usu.

³ “Ma palekaure ɗǝm yǝ ko yǝ taa ɓaataka a lumu, ɓaa kaɗo sal wa.

⁴ Yǝɓǝ nkee me, ‘Saase kǝn, so ko sǝnǝ tom tinima a nyaanyo nwano, kǝ nǝsǝ kwan mbu pamsǝ me nasǝ kwan ɓa.’

⁵ Pa ɓǝ nii ɓǝ faɗa. “Pa yǝ ɓaarǝ yǝ fiɗ ma kaa ɗaa, ma ɗǝm kaa kawan, yǝ haa ɓan tinima ɓa.

⁶ A ɗikira yǝ fiɗ yǝ wǝr ɓaata kǝɗkǝɗ ɓobɓǝsa ɓǝsa. Yǝɓǝ taa me, ‘mbu kwa mbi sǝ nǝɗsǝ a ham ɓa sǝ tuka sǝ tomaa tinima rau?’

⁷ “Ɓǝ kak me, ‘Mbu kwaasǝ ɓa atike too tǝ a tinima ra.’ “Pa yǝɓǝ nkee me, ‘Saase kǝn, so ko sǝnǝ tom tinima a nyaanyo nwano.’

⁸ “Ɗikira tomsǝ wa, an nyaanyo kaya yǝ nkee yaa yǝn sengǝ sǝ nyaanyo usu ya me, ‘A yar ɓan tinima ɓa ngǝ ɓǝ kwan koɓaa tinima ɓosa, ngǝ ntii ma ɓa ɓǝ wosǝ ma ndiira ɓa, pa ngǝ ko a ɓaa ɓǝ wosǝ a ntiiri ɓa.’

⁹ “Ɓan tinima ɓǝ wosǝ a ɗikira ɓa, ɓaa ɓǝ kwan dinari fin fin.

¹⁰ Ɓan tinima ɓǝ wosǝ a ntiiri sǝɓa ɓǝn sen me kǝ ɓǝ taa dinari a faɗ ɓaa ɓǝ wosǝ a ɗikira ɓa. Pa ɓosa kǝn yǝɓǝ kwan dinari fin fin.

¹¹ Pa ɓǝ konsǝ wa, ɓǝ ntii nhurunhuru ma an nyaanyo siya.

¹² Ɓǝ nkee me, ‘Ɓaa ngǝ wo ɓǝsǝ ma ɗikira ɓa ɓǝ tom tinima kwang ra, pa ngǝ kwantǝ keke ma ɓosa ma taase tǝ weesǝ kongsa a osa ɓau?’

¹³ “Pa yǝ kak yaa fin ɓose yǝ nkee me, ‘Sikaane, nǝ fǝk ngǝ ra. ‘Ngǝ yau a ntiiri me kǝ ngǝ tom tinima a dinari fin dau?

¹⁴ A kon koɓaa sǝnga ngǝ faɗa. Nǝ yau niina me kǝnǝ kwan yaa yǝ wosǝ a ndiira ya keke nga nǝ kwan ngǝ sǝ wa.

¹⁵ Nǝ nkaa nǝ tom mbu nǝn taasǝ ɓa ma koɓaa sǝna rau? Hana ngǝn simɓa me nǝ neme hoou?’

¹⁶ Me maso ɓaa ɓǝsǝ a ntiiri ɓa, ɓǝ kǝ kang a ndiira, ɗǝm ɓaa ɓǝsǝ ma ndiira ɓa ɓǝ kǝ kang a ntiiri.

Yeso ɓaarǝ yǝ nkee nkaamǝra ɗǝɗa kiyaa woɗɗa

¹⁷ Pa Yeso yǝn kosǝn ko Urshalima wa, yǝ haa emfǝɗkaa ɓisa pu a nhaa raɓ a kala yǝɓǝ nkee me,

¹⁸ “Nwa ndǝ ko Urshalima, ɓaakǝ na Au Ete ya a nema kuɓsa nek mbusa sa ma malǝmaa fǝɗkǝra Musa sa, ɓǝ kaa kankiita toɗɗo wa, ɓaa kaa na a nema ɓaa ɓǝ maa Kaa ra ɓa,

¹⁹ ɓǝ kaa na a ɓaa ɓǝ maa Kaa ra ɓa, ɓaa nhuu ɗǝm ɓaa hoɓɓo, ɗǝm ɓaa kwaakǝ. A kaa tǝrma taatǝn ma, kiya nii ma huurtu.”

Kǝnara u maa Yakubu ma Yohanna yǝ tomsǝ wa

²⁰ Pa maa em Zabadi ɓa yǝ wo a Yeso ni ma emɓisa, yǝ kwirsǝ, yǝn taa mbuka a Yeso ni.

²¹ Yǝ taa me, “Ngǝn taa mbiu?” Yǝ nkee me, “Nǝn taa me ngǝ yau me emɓǝna raɓ ɓa, ate yǝ kaɗaa nem seyaa nyaange ate fin ɗǝm yǝ kaɗaa nem kwasaa nyaange a kuɓsutu nwaango.”

²² Yeso yǝɓǝ nkee me, “Sǝ maa mbu sǝn taasǝ ɓa ra. Kǝsǝ nkaa sǝ wee nkoo u kongsa kǝnaa wee sau? Ɓǝ kak me, “Kǝtǝ nkaa.”

²³ Yeso yǝɓǝ nkee me, “Tumo, sǝ kǝ nkaa sǝ wee a nkoo nwaano, pa kaɗɗo a nem seyaa ɓǝna, hana nem kwasaa ya, ǝn niina nǝsǝ ma kwangto nana wa ra. Hamsǝsa ǝn u ɓet paane yǝ wee ɓǝsǝ werko ɓa.”

²⁴ Pa ɓaata emfǝɗkaa puu sǝɓa kurasǝ maaso wa, nfiima ɓǝ ma ma ɓaa raɓ sǝɓa.

²⁵ Yeso yǝɓǝ yar a ham fina, yǝɓǝ nkee me, “Sǝ maan me kuɓsa u ɓaa ɓǝn Yahudawa ra ɓa, ɓǝn weɗa kwangto kuɓsutu wa a ɗuura ɓaa ɓǝn tom ɓǝsǝ kuɓsutu ɓa, ɗǝm ɓaa kwang kwang ɓosa ɓǝn weɗa ɓǝ kwangto a ɗuura ɓora.

²⁶ Pa waaso a tom maaso a ɗaaso waaso ra, yaa yǝn taasǝ me yǝ tom kwang a ɗaaso waaso ya, tomon ɗaɗ, yǝ kaɗ hoora sa,

²⁷ ɗǝm yaa yǝn taasǝ me yǝ kaɗ a ntiiri ya, tomon ɗat yǝ kaɗ hoora saa.

²⁸ Ɗǝm nga, Au ete ya yǝ wo me ɓaa tom hooto ra, pa yǝ wo me yǝ tom hoora, ɗǝm yǝ na huurtu usu me ɓeta dem ɓǝ taa konnkweera wa.”

Ntaata raɓ ɓǝ taa wǝr handa wa

²⁹ A fer Yeso ma emfǝɗkaa ɓisa ɓǝn leesǝ Yariko wa, ɓeta dem ɓaa ɓǝɗǝ.

³⁰ Ntaata kǝta raɓ ɓǝ ɗaaɗaa a kal ɗǝɗa wa, pa ɓǝ kurasǝ me Yeso yǝn talǝntalǝ wa, ɓǝ nik kwaro ɓǝ nkee me, “Ankundi, Au Dauda ya, a kura nyorataara ta!”

³¹ Ɓet kwausǝ dem sǝɓa, ɓǝɓǝ nkwaakǝ, me ɓǝ roo nseu, pa ɓǝ sookǝ nik kwaro wa, ɓǝn nkee me, “Ankundi, Au Dauda ya, a kura nyorataara ta!”

³² Yeso yǝ nǝɗǝ, yǝɓǝ yara. Yǝɓǝ taa me, “Sǝn taa me nǝsǝ tom mbiu?”

³³ Ɓǝ kak me, “Ankundi, tǝn taa me tǝ taa wǝr handa wa.”

³⁴ Yeso yǝ kura nyorataara ɓora yǝ ntee nuuwa ɓosa. Nok kǝnso ɓǝ wǝr handa, pa ɓǝ ɓǝɗǝ.