Matta 19 - Lala NT

Fǝɗkǝra Yeso ra a ɗuura pǝǝ toone wa

¹ Pa Yeso feɗsǝ nkee mbusǝsa wa, yǝ lee Galili yǝ ko a put Yahudiya u yǝ sǝ a tale aulaara Urdun wa ya.

² Ɓet kwausǝ dem ɓa, ɓaa ɓǝɗǝ, yǝ roɓ ɓaa sem kwakwa ra ɓa a ɗaaso ɓoso kǝnso.

³ Ɓaata ɓaa Farisiyawa ka, ɓǝ wo a sanii me ɓaa pǝta. Ɓǝ taasǝ me, “Pamman keke ete yǝ pǝǝ toonesi me yǝ tomsǝ mbuka nǝu?”

⁴ Pa yǝ kak me, “Sǝ pǝta kauwo a likarkar wa me, a ntiiri, yaa yǝ marsǝ put ntaandi wa ya, ‘yǝ mar ɓǝ parara ma toone rau?’

⁵ Ɗǝm yǝ nkee me, ‘Pa me maso, ete kiya lee pap ɓisi ma maasi yǝ tǝmba ma toonesi, ɓosa raɓ ɓǝ kang maabiri fin’.

⁶ Waso ɓǝ sem raɓ ɗǝm ra, pa fin. Me maaso mbu Kaa tǝmɓasǝ ɓa, atike yǝ ɓaa ra.”

⁷ Pa ɓǝ taa me, “Yaa tomtomni Musa yǝ nkeesǝ me, paraara yǝ nyor likarkar ɓaaɓaa wa, yǝ na toonesi, yaa pǝǝu?”

⁸ Yeso yǝ kak me, “Musa yǝ na sǝ ɗǝɗa me sǝ pǝǝ toona ɓǝsaa, me kuɗa kwakwa ra ɓǝsa. Pa sem maaso a ntiiri ra.

⁹ Nǝn nkeesǝ me, hana yamni yaa yǝ pǝǝsǝ toonesi ya, me sem a pepeto ra, ɗǝm yǝ kon toone ke ya, yǝn tom pepeto ma sase.”

¹⁰ Emfǝɗkaa ɓǝsǝ ɓaa nkee me, “Me mbusa maaso a ɗaaso kere ma toone wa, ete yǝ kon toone ra.”

¹¹ Yeso yǝ kak me, “Sem ɓeta nsaad kaa yau ma mara ra wa ra, pa ndub ɓet ɓaa yau ɓǝsǝ ɓa seɗɗe.

¹² Me ɓaata ɓaa haa ɓǝ, ɓǝ nkaa ɓǝ kon toone ra, ɓaata ɗǝm ɓeta kang ɓǝ maaso, ɓaata ɗǝm ɓǝ ɓisi kon toone wa me ɓǝn taa kuɓsutu a liura wa. Yaa kiya nkaa yǝ kon mara sǝra maaso ya, yǝ kono.”

Em ngeek ngeek ɓa ma Yeso

¹³ Pa ɓaa wo ma em ngeek ngeek ɓa a Yeso ni me yǝɓǝ ti neme, ɗǝm yǝɓǝ tom kǝnara. Pa emfǝɗkaa ka ɓa, ɓǝ nkwaakǝ ɓaa ɓǝ wosǝ ma em ngeek ngeek sǝɓa.

¹⁴ Yeso yǝ nkee me, “Sǝ lee em ngeek ngeek ɓa ɓǝ wo a nani, sǝɓǝ sa ra, me kuɓsutu a liura wa ndǝ u nkaamǝra ɓora wa.”

¹⁵ Ndiira yǝ ti ɓǝsǝ neme a ɗuura ɓora wa, yǝ faɗ a wiiyo.

Niinira an kǝnaa nya

¹⁶ Pa atike yǝ wo a Yeso ni yaa taa yaa nkee me, “Malǝm, ǝn mbu kwalari na ɓa kǝna tom me nǝ taa huurtu pakarese yau?”

¹⁷ Pa Yeso yaa kak yaa nkee me, “Tomtomni ngǝn taa nǝsǝ a mbu yǝsǝ kwalari ɓau? Ən Kaa fin yaa yǝsǝ kwalari ya. Me ngǝn taa me ngǝ ta huurtu, a ɓǝɗ mbu Kaa yǝ nkeesǝ me aa tom ɓa.”

¹⁸ Eɗ kaya yǝ taa me, “Ɓaa na ɓau?” Yeso yǝ kak me, ‘Ngǝ toɗ ete ra, ngǝ tom pepeto ra, ngǝ tom nkuura ra, ngǝ paa para a ɗuura ete ya ra,

¹⁹ a na mbarta paange ma maange, ɗǝm ngǝ yau anndǝnsaatǝre nyaange nga nkweerange.”

²⁰ Niinira kaya yǝ kak me, “Nsaad mbu ɓa nǝ wee tomon, mbu pee mbi ɗǝmǝu?”

²¹ Yeso yaa kak me, “Me ngǝn taa me ngǝ kaɗ kungsǝ ra, ngo ngǝ fang mbu ɓǝnga nsaad, ngǝ na hanhanta, kǝngǝ taa kǝnaa a liura. Pa ngǝ wo, ngǝ nǝ ɓǝɗɗǝ.”

²² Pa Niinira kara yǝ kurasǝ maaso wa, yǝ faɗ ma kuɗa tebtebra me yǝ ma kǝnaa dem.

²³ Pa Yeso yǝ nkee emfǝɗkaa ɓisa me, “Nǝn nkeesǝ ɓongtǝra, kǝ tom ma kongsa an ma kǝnaa nya, yǝ kana kuɓsutu a liura wa.

²⁴ Ɗǝm nǝn nkeesǝ me, kǝ tom paapa a telǝm ni yǝ kan ma lau ee libɗa ya, ma an kǝnaa nya kiya kan a kuɓsutu Kaa wa ya.”

²⁵ Pa emfǝɗkaa ka ɓa kurasǝ maaso wa, ɓǝ tom mbu weɗara ɓa, pa ɓǝ taa me, “Yaa ndǝ yamni kiya taa kon nkweera wau?”

²⁶ Yeso yǝɓǝ sengge yǝ nkee me, “A ete ni mbu ɓa a tom ra, pa a Kaa ni mbusa nsaad ǝn mbu toma.”

²⁷ Bitrus yǝ kak me, “Tǝ lee mbusan nsaad me tǝngǝ ɓǝɗǝn, pa tǝ kǝ taa mbiu?”

²⁸ Yeso yǝɓǝ nkee me, “Nǝn nkeesǝ ɓongtǝra, a fer kaare nfiinfii ka wo ya, a fer Au Ete ya kiya kaɗ a ham kuɓsutu usu u kwang wa, saase ɓaa sǝ ɓǝɗnǝsǝ ɓa kǝn, sǝ kǝ kaɗ a ham kaɗ kuɓsa pu a nhaa raɓ ɓa, sǝn kankiita tuwa pu a nhaa raɓ u Isra'ila wa.

²⁹ Ɗǝm hana nyamni yaa yǝ leesǝ ɗuursa ma ɓaata ɓisa parata ma toona ma papsi ma maasi ma emba ma nyanya meen niina ya, kiya taa ɓaarǝta mbusata a faɗ pusa pu, ɗǝm ki yǝ taa huurtu pakarese wa.

³⁰ Pa dem ɓaa ɓǝsǝ a ntiiri ɓa, ɓǝ kǝ kang a ndiira, ɗǝm ɓaa ɓǝsǝ ma ndiira ɓa ɓǝ kǝ kang a ntiiri.