Matta 17 - Lala NT

Maabiri Yeso ya paki ɓol

¹ Ndiira tǝro mindike wa, Yeso yǝ too Bitrus, ma Yakubu, ma ate isi Yohanna, yǝ ɓǝn taa a yolko ɓoti a han ɓǝ kaɗsǝ seɗe ɓobɓǝsa ɓǝsa ɓa.

² Pa maabiri isi a paaki a wii ɓoso. Ota ita weɗ a tom pengpeng nga kaa, ɗǝm luktaa isa a kang hursǝ pengpeng.

³ Nok kǝnso, pa ɓǝ wǝr Musa ma Iliya a wii ɓoso, ɓǝn kankan ma Yeso.

⁴ Bitrus nkee Yeso me, Ankundi, tomon yaɓ ndǝsa a ham ɓa wa, me ngǝ yawan, kǝnǝ werkǝ pilang taatǝn, fin nwaango, fin u Musa wa, fin ɗǝm u Iliya wa.”

⁵ Yaa kanmǝra nding, pa liuta pengpeng a ham ɓǝ liki, ɗǝm kwaro fiɗ a liuta, yǝn nkee me, “U nwa ndǝ auwane, yaa nǝn yausǝsǝ ya, ɗǝm nǝn hur kuɗa dem ma sase. Saa kura!”

⁶ Pa emfǝɗkaa ɓisa kurasǝ maaso wa, ɓǝ nwii a putu me kokto maɓǝn dem.

⁷ Pa Yeso yǝ wo yǝɓǝ ntee, yǝ nkee me, “Sǝ nii kokto sǝ ma ra.”

⁸ Ɓǝ niksǝ ɗuura wa, ɓǝ wǝr atike ra, ndub Yeso fin mbusa.

⁹ Ɓǝn hamsǝn ham a yol kawa wa, Yeso yǝɓǝ wiin ngwee me, “Sǝ nkee yaake mbu sǝ wǝrsǝ ɓa ra, ndub me ɓaa nik Au Ete ya, a tiinan nhe.”

¹⁰ Emfǝɗkaa ka ɓa ɓaa taa me, “Yaa tomtomni malǝmmaa masaka sa, nkeesǝ me Iliya kiya nkaa wo saseu?”

¹¹ Yeso yǝ kak me, “Maaso ɓongtǝra Iliya kǝ yǝ wo, ɗǝm kiya werkǝ mbusa nsaad.

¹² Pa nǝn nkeesǝ me Iliya yǝ wee won, ɗǝm ɓǝ maasǝ ra. Pa ɓǝ tomsǝ nsaad mbu ɓǝn yausǝ ɓa. A ɗǝɗa finda Au Ete ya kiyǝ wee kongsa a nema ɓosa wa.”

¹³ Pa emfǝɗkaa ɓisa ɓǝ maa me yǝn kan a ɗuura Yohanna an tom baptisma nya.

Yeso roɓ au ke ma siyo nsaa nwa

¹⁴ Ɓǝ wosǝ a han ɓeta kwausǝ dem ɓa wa, eɗ ke yǝ wo ngwang ma Yeso, yǝ kwirsǝ a wii usu.

¹⁵ Yaa nkee me, “Ankundi, a kura nyorataara auwane ra, yǝma mǝrkǝm ɗǝm yǝn wee kongsa dem. Nfee yǝn nwii a ara hana a mbraa ɗaan.

¹⁶ Nǝ wosǝ a emfǝɗkaa ɓǝnga nii, pa ɓǝ nkaa ɓaa roɓ ra.”

¹⁷ Yeso yǝ kak me, “Saa ɓaa kaareyase ɓa, ɓaa semma na ɓongto ra ɓa, tǝro miniu kǝnǝ kaɗ ma saaseu? Kǝnǝ sǝm ma saase tǝro miniu? Nga woma au sisi a nani a ham ɓa.”

¹⁸ Yeso yǝ kwaakǝ nsaa ka wa, pa yǝ fiɗ a maabiri au sisi ya, ɗǝm yǝ roɓ a fer siso nok.

¹⁹ Pa emfǝɗkaa ɓǝ wo a Yeso ni a nhuukǝra ɓaa taa me, “Tomtomni tǝ nkaa tǝ hik rau?”

^20-21 Yeso yǝ kak me, “Mbu kwaasǝ ɓa sǝma na ɓongto wa ngeek. Nǝn nkeesǝ ɓongtǝra, me sǝma na ɓongto wa ngeek nga nkaama karaɓa ma, sǝ kǝ nkaa sǝ nkee yol wa me, ‘A pǝɗ a ham ɓa, ngǝ ko kǝna’ ɗǝm kiya pǝɗǝ. Mbu saa nkaa sǝ tom ra ɓa sem ra.”

²² Pa ɓǝ wosǝ Galili ke wa, Yeso yǝɓǝ nkee me, “Ɓaa kǝ fang Au Ete ya a nema ɓeta sa.

²³ Ɓǝ ka toɗɗo, ɗǝm a kaa tǝro taatǝn ɓa, ɓaa ka nik ma huurtu.” Pa emfǝɗkaa ka ɓa, ɓǝ kung ma kuɗa tebteb ta.

Kwan samra a hit Kaa Urshalima wa

²⁴ Pa Yeso ma emfǝɗkaa ɓisa wosǝ Kafarnahum nwa, ɓan kon samra a hit Kaa wa ɓa, ɓǝ wo a Bitrus ni ɓaa taa me, “Malǝm waaso yǝ kwanaa samra u hit Kaa Urshalima wa rau?”

²⁵ Yǝ kak me, “Ee nwa yǝn kwana.” Pa Bitrus wosǝ ɗuuru wa, Yeso yǝ ntii yaa nkee me, “Siman, ngǝn sen mbiu? A ɓauniniu Kuɓsa put ntaandi wa sa, ɓǝn konsǝ samrau, a emɓosa niu hana a ɓaatani ɓolǝu?”

²⁶ Bitrus yǝ kak me, “A ɓaata ni ɓol.” Pa Yeso yaa nkee me, “Nwa, em ɓosa ɓǝ kwana ra.

²⁷ Pa kǝnǝsǝ weɗa me sǝ tǝblǝ kuɗa ɓet ɓa ra, ngo a aulaara ngǝ yaɓ langtanga nwaango, nsenyo ngǝ ntiisǝ ngǝ ma wa, ngǝ will ee isi kǝngǝ wǝr koɓaa asin, ngǝ haa ngǝ ɓǝn ko, me samra na ma nwaango.”