Matta 16 - Lala NT

Taa mbu weɗa me ɓǝ maa wa

¹ Pa ɓaa Farisiyawa ɓa, ma Sadukiyawa, ɓǝ wo a Yeso ni me ɓaa pǝta, ɓǝ kǝnasǝ me yǝɓǝ tom mbu nhiinyanhiinya ɓa, me a weɗa me mbu yǝn tomsǝ ɓa fiɗ a liura.

² Yǝɓǝ kak me, “Me ɗikra tomon, sǝn wǝr handa kwaran hub, sǝn nkee me, ɗene osa kǝ nwee,

³ ɗǝm a ɗenɗa me sǝ wǝr tom welwel ma liuta dem, sǝn nkee me tiwo kǝ roo. Sǝn nkaa sǝ maa mbu ka tom a liuta ɓa ɓol ɓol, pa sǝ pǝta maa mbu ǝn tomsǝ ɗaan a kaareyase ɓa ra.

⁴ Ɓet kaareyase ɓa, ɓǝ ma kwanatiro, ɗǝm ɓǝ kuraa ee Kaa ra, ɓǝn kǝr me ɓǝ wǝr mbu nhiinyanhiinya ɓa! Pa ɓaa ɓǝ weɗa mbu nhiinyanhiinya ka ra, ndub u Yunana wa.” Pa Yeso yǝɓǝ lee yǝ faɗ mbusa.

Yisti ɓaa Farisiyawa ɓa ma u ɓaa Sadukiyawa ɓa

⁵ Emfǝɗkaa ɓǝ talsǝ kira aulaara wa, ɓǝ hura ɓǝ too nkaadǝng ra.

⁶ Yeso yǝɓǝ nkee me, “Sǝ nhii nwaa ma yisti ɓaa Farisiyawa ɓa, ma u ɓaa Sadukiyawa ɓa.”

⁷ Pa ɓǝ ntii kano a ɗaaso ɓoso ɓǝn nkee me, “Mbu kwaasǝ ɓa, me ndǝ wo ma nkaadǝng ra.”

⁸ Yeso yǝ maasǝ mbu ɓǝn kansǝ ɓa wa, pa yǝɓǝ taa me, “Saa ɓet ma na ɓongto ngeek ɓa, sǝn kan mbi a ɗaaso waaso me sǝ sem ma nkaadǝng rau?

⁹ Nding waso sǝ mara kwasau? Sǝ ɗim ma nkaadǝng wonon u ɓeta pusa pu pu wonon ɓǝ kǝusǝ wa rau? Ɗǝm sǝ kwau hote mini niu?

¹⁰ Hana nkaadǝng mbutu suwa u ɓeta pusa pu pu kurun kǝusǝ wa, ɗǝm sǝ kwau nyǝwǝrta hote miniu?

¹¹ Tomtomni sǝ nkaa sǝ maa me sem a ɗuura nkaadǝng ra, nǝn kansǝ ma sase wa rau? Pa nǝ nkeesǝ me, sǝ nhii nwaa ma yisti ɓaa Farisiyawa ɓa, ma u ɓaa Sadukiyawa ɓa.”

¹² Pa ɓǝ maa me yǝ kanaa a ɗuura yisti u werkǝsǝ nkaadǝng wa ra, pa yǝn nkee me ɓǝ nhii nwaa ma fǝɗkǝra ɓaa Farisiyawa ɓa, ma u ɓaa Sadukiyawa ɓa.

Nkee nyo Bitrus wa a ɗuura Yeso ra

¹³ Pa Yeso yǝ wosǝ a put Kaisariya Filibi wa, yǝ taa emfǝɗkaa ɓisa me, “Ɓeta ɓǝn nkee me, Au Ete ya ndǝ nyamniu?”

¹⁴ Ɓǝ kak me, “Ɓaata ɓǝn nkee me, Yohanna an tom Baptisma nya, ɓaata ɓǝn nkee me, ǝn Iliya, ɗǝm ɓaata ɓǝn nkee me, ǝn Irmiya hana fin a ɗaaso ɓannawanto ɓa.”

¹⁵ Pa yǝɓǝ taa me, “Pa waso kau? Sǝn nkee me nǝn nyamniu?”

¹⁶ Siman Bitrus yǝ kak me, “Ngǝn Almaseho, Au Kaa ya, yaa ma huurtu ya.”

¹⁷ Yeso yǝ kak me, “Saltǝra a ngani Siman au Yunusa ya, mbu ɓa ete nkee ngǝ sase ra, pa ǝn Paane a liura ya.

¹⁸ Pa nǝn nkee ngǝ me ngǝn Bitrus, ɗǝm a ɗungara ra, kǝnǝ mar wiina ɓan ɓǝɗ Kaa ɓa, ɗǝm hana kwangto woɗɗa wa yǝ nkaa yǝ tom mbuka a ɗuura ira ra.

¹⁹ Kǝ nǝngǝ na mbu will inntii kuɓsutu a liura wa, nsaad mbu sǝ kaasǝ a put ntaandi wa ɓa, kǝ tom kaasǝ maaso a liura, ɗǝm mbu sǝ keesǝ a put ntaandi wa ɓa, kǝ tom keesǝ maaso a liura.”

²⁰ Pa yǝ wiin ngwee emfǝɗkaa ɓisa me, ɓǝ nkee yaake me ǝn sase Almaseho ra.

Yeso weɗa ɗǝɗa kiyaa woɗɗa

²¹ Tǝng a fer siso wa, Yeso yǝ ntii nkee emfǝɗkaa ɓisa me, tomon ɗaɗ yǝ ko Urshalima koyǝ wee kongsa ɓol ɓol a nema a wiina ni, ma kuɓsa ɓan nek mbusa sa, ma malǝmma masaka sa, ɗǝm ɓaa kaa toɗɗo, pa a tǝro taatǝn nwa, ɓaa ka nik ma huurtu.

²² Pa Bitrus yaa yar a kala, yaa ntii nkwaako me, “Awo, Ankundi, mbusa a pǝta tomo ma ngiinga ra!”

²³ Yeso yǝ kǝrtǝ yǝ nkee Bitrus me, Shaitan! A pǝɗ a kal nwaano, ngǝ mbu kwiɗ kwiɗ ɓa a nani. Ngǝ tomaa mbu Kaa yǝn taasǝ ɓa ra, pa ngǝn tom u ɓeta wa.”

²⁴ Pa Yeso yǝ nkee emfǝɗkaa ɓisa me, “Yaa yǝn taasǝ me yǝnǝ ɓǝɗ ya, tomon ɗaɗ yǝ mbisi nkweera ira, pa yǝ too kwaakǝra ira, yǝnǝ ɓǝɗǝ.

²⁵ Me hana yamni yaa yǝn taasǝ me yǝ noo ma huurtu usu ya, kaa leetǝ, pa hana yamni yaa yǝ leetǝsǝ huurtu usu men niina ya, kiya taa.

²⁶ Ən mbi yaɓ ɓǝu, me ete yǝ taa mbu a put taandi ɓa nsaad, pa yǝ leetǝ huurtu u pakarese wau? Ən mbi ete kiya na me kon nkweera huurtu u pakarese wau?

²⁷ Me Au Ete ya, kiya wo a kwangto Pap ɓisi wa, ma ɓantimira ɓisa, pa kiya pu hanan yamni ma nsaa a mbu yǝ tomsǝ ɓa.

²⁸ Nǝn nkeesǝ ɓongtǝra, ɓaataka kǝn kǝɗ kǝɗ a han ɓa, ɓǝ pǝta woɗɗa ra, ndub me ɓǝ wǝr Au Ete ya, yǝn wowo a kuɓsutu usu.”