Matta 15 - Lala NT

Mbu ɗekɗek ɓa ma mbu sem ɗekɗek ra ɓa

¹ Pa ɓaata ɓaa Farisiyawa ka, ma malǝmaa masaka sa, ɓǝ fiɗ Urshalima ɓǝ wo a Yeso ni, ɓaa taa me,

² “Tomtomni emfǝɗkaa ɓǝnga ɓǝn tomsǝ mbu wiina ɓǝnda nkeesǝ me ǝn tom ra ɓau? Ɓǝ soɓaa nema ɓosa pa ɓǝ se mbuseyaa ra!”

³ Yeso yǝɓǝ kak me, “Pa waso tomtomni sǝ kausǝ mbu Kaa yǝ nkeesǝ me aa tom ɓa, me sǝ ɓǝɗ mbu wiina ɓǝsaa nkeesǝsǝ ɓau?

⁴ Me Kaa yǝ nkee me, ‘A na mbarta paange ma maange,’ ɗǝm ‘hana yamni yaa yǝ sǝrsǝ pap ɓisi hana maasi ya, aa toɗɗo.’

⁵ Pa saase sǝn nkee me, ‘Hana yamni yǝ nkee pap ɓisi hana maasi me, “Nsaad mbu kama kǝsaa taa a nani ɓa, nǝ na Kaan,’ nwa sem ɓongɓong yǝ na mbarta pap ɓisi ra.’

⁶ Me, sǝ ɓǝɗ mbu wiinaa ɓǝsaa nkeesǝsǝ ɓa. Pa sǝ lee u Kaa wa, me sǝn ɓǝɗ mbu wiina ɓǝsaa nkeesǝ ɓa

⁷ Saa ɓaa ma ɗǝlmara raɓ ɓa, tomon keke Ishaya yǝ nasǝ waanto a ɗuura saa wa me,

⁸ “ ‘Ɓet ɓaa ɓǝn nanǝ mbarta ma tǝrmǝta ɓota maɗ, pa senta ɓota mǝbmǝb ma niina.

⁹ Ɓǝn nyoo nǝ sal, fǝɗkǝta ɓota ǝn masaka ɓeta wa maɗ.’ ”

¹⁰ Yeso yǝ yar ɓet kwausǝ dem ɓa a sani yǝ ɓǝ nkee me, “Sǝ pira ngwee ɗǝm sǝ maa.

¹¹ Sem mbu ǝn kansǝ ete a ee isi ɓa, ǝn kwasǝsǝ yǝ tom ‘sem ɗekɗek ra wa, pa mbu ǝn fiɗsǝ a ee isi ɓa, ǝn siso ǝn kwasǝsǝ yǝ tom ‘sem ɗekɗek wa’ ra.”

¹² Pa emfǝɗkaa ɓisa ɓǝ wo a sani ɓaa taa me, “Ngǝ maan me ɓaa Farisiyawa ɓa, ɗaa ɓǝn ma mbu ɓǝ kurasǝ ɓa nǝu?”

¹³ Yǝ kak me, “Nsaad mbu turkǝsǝ ɓa, me Paane a liura ya yǝ turkǝ sase ra, ɓaa kǝ npuu ma hinti kong.

¹⁴ Əɓǝ lee. Ɓǝn ɓan ma kwalanga ntaata ɓa. Me ntaara yǝ ma kwalango ate ntaara ya, ɓǝkǝ nwii a npoo kong.”

¹⁵ Bitrus yaa nkee me, “Ətǝ nkee mbu mǝɗkǝta ta ǝn sensǝ ɓa.”

¹⁶ Yeso yǝɓǝ taa me, “Nding waso kasǝ maa rau?

¹⁷ Sǝ maa me mbu kansǝ a ee ɓa, ǝn ko ɗaan a kuɗa, pa ɗǝm yǝ fiɗ a maabiri rau?

¹⁸ Pa mbu fiɗsǝ a ee ɓa, fiɗ a seura ɗaan, ɗǝm ǝn siso tisǝsǝ yǝ tom ‘sem ɗekɗek ra’ wa.

¹⁹ Me mbu ǝn fiɗsǝ ɗaan a seura ɓa, ǝn senta kwalakwala ta, ma toɗ ete wa, ma tǝr toone ete wa, ma pepeto, ma tang mbusa wa, ma nkee para mara a ɗuura ete ra, ma tǝblǝ ɗǝnda ete wa.

²⁰ Mbu ɓa ndǝ mbun kwaasǝ ete yǝ tom ‘sem ɗekɗek ra’ wa, pa se mbuseya nema soɓ ra wa, a kwaa ete yǝ tom ‘sem ɗekɗek ra’ ra.”

Na ɓongto toone put Kan'ana ke

²¹ Yeso yǝ lee hansǝsa yǝ faɗ a put Taya ma Sidon wa.

²² Toone a put Kanˈana ke, yǝ wo a Yeso ni, yǝ nik kwaro, yǝ nkee me, “Ankundi, Au Dauda ya, a kura nyorataara na! Au waane toone yǝn wee kongsa ma wis nsaamse wa.”

²³ Yeso yǝ nkeesǝ hana mbuka fin da. Pa emfǝɗkaa ɓisa ɓǝ wo a sani ɓaa kǝna, ɓaa nkee me, “A nkee yǝ faɗa, me yǝn ɓǝɗ ndǝ, yǝn rǝka ndǝ ma oro.”

²⁴ Yǝ kak me, “Ɓaa timinǝ a tǝmnkaa Isra'ila u leetǝsǝ wa maɗ!”

²⁵ Toone kaya yǝ wo yǝ kwirsǝ a wii usu, yǝ nkee me, “Ankundi, ǝnǝ kwasi!”

²⁶ Yǝ kak me, “Pam me a too nkaadǝng emba wa, a na empaa ra.”

²⁷ Yǝ nkee me, “Ee nwa, Ankundi, pa hana empaa ɓǝn se nyǝwǝrta u rosǝ a ham se mbuseya An taanda ɓose ɓa.”

²⁸ Pa Yeso yǝ kak me, “Toone, ngǝ ma na ɓongtǝra wa kwang! Mbu ngǝn kǝrsǝ ɓa ngǝ taan.” Pa nok kǝnso au isi toone yǝ roɓ a fer siso.

Yeso yǝ na mbuseya ɓeta pusa pu pu kurun

²⁹ Yeso yǝ lee hansǝsa, yǝ ɓǝɗ ma kal aulaara Galili wa. Pa yǝ taa a yolo yǝ kaɗ kǝnso.

³⁰ Ɓeta dem ɓǝ wo a sani, ɓǝn wosǝsǝ ma ɓaa natsa sǝrsǝ ɓa, ma ntaata, ma puuta, ma kwaata, ɗǝm ma ɓaata dem, ɓaa ɓǝ nhii a kunda natsa isa, ɗǝm yǝ ɓǝ roɓɓo.

³¹ Ɓeta ǝɓǝ tom nhiinyanhiinyato, ɓǝ wǝrsǝ kwaata ɓǝn kan nwa, puuta ɓǝ roɓɓon, ɓaa natsa sǝrsǝ ɓa ɓǝn siki, ɗǝm ntaata ɓǝn wǝrǝ. Pa ɓǝ nyoo Kaa Isra'ila ɓa.

³² Yeso yǝ yar emfǝɗkaa ɓisa yǝɓǝ nkee me, “Nǝn kura nyorataara ɓet ɓa ra, me ɓǝ ke ma niina tǝro taatǝn ɗǝm ɓǝ se mbuka ra. Nǝn taarǝ me nǝ ti ɓǝ pamo ma ɗooran, tom pa ɓǝ nwii a ɗǝɗa ra.”

³³ Emfǝɗkaa ɓisa ɓǝ kak me, “Pa ndǝ kǝ taa nkaadǝng dem na a sanglo wa, u ka maa ɓeta dem nga wau?”

³⁴ Yeso yǝɓǝ taa me, “Sǝ ma nkaadǝng mininiu?” Ɓǝ kak me, “Tǝsǝ mbutu, ma nsenya ngeek.”

³⁵ Pa yǝ nkee ɓet kwausǝ dem sǝɓa me ɓǝ kaɗ a putu.

³⁶ Pa yǝ too nkaadǝng mbutu suwa ma nsenya kasa, yǝ tom himara, pa yǝ ɓaa yǝ na emfǝɗkaa ɓisa, ɓosa kǝn ɓǝ na ɓeta.

³⁷ Nsaad ɓǝ kǝu ɓǝ nkwee. Ndiira maaso wa, emfǝɗkaa ɓǝ kwau nyǝwǝrta a kung hote mbutu.

³⁸ Ɓaa ɓǝ kǝusǝ ɓa, ɓǝ pusa pu pu kurun, sem ma toona ma emba ra.

³⁹ Pa Yeso tisǝ pamo ɓeta wa, pa yǝ kan a kurnyaamo yǝ ko a put Magadan wa.