Matta 14 - Lala NT

Woɗɗo Yohanna an tom baptisma ya

¹ A fer siso kuɓu Hiridus yǝ kura mara a ɗuura Yeso ra,

² pa yǝ nkee hoota ita me, “U nwa ndǝ Yohanna an tom Baptisma ya, yǝ nii a tiinan! Ndǝ siso mbu kwaasǝ yǝsǝ ma kwangto tom mbu nhiinyanhiinya ɓa wa, a sanii.”

³ Me ka Hiridus yǝ ma Yohanna yaa kaan, yaa tii a hit neu ɓeta wan, a ɗuura Hirudiya ra, toone eɗ isi Filibus ya,

⁴ me Yohanna ka yǝn nkeesǝ me, “Pam ngǝ kon Hirudiya ra.”

⁵ Hiridus kayǝn taa me kiya toɗ Yohanna, pa yǝn kura kokto ɓeta wa, me ɓǝn toosǝ yǝn an nawanto ya.

⁶ A kaa meera haa Hiridus leurǝsǝ ɓa, au Hirudiya ya toone, yǝ hirhira a tǝǝ Hiridus pin,

⁷ pa yǝ tom waawo ma kuuma me kiya na nsaad mbu yǝ taasǝ ɓa.

⁸ Pa me ka maasi weesǝ raa a mbu kiya kǝna ɓan wa, pa yǝ nkee me, “Ənǝ na ɗuura Yohanna an tom Baptisma ya a taalo wa.”

⁹ Pa kuɓu yǝ kura kuɗa tebteb ra, pa me ka yǝ wee kuuwo nǝn, ɗǝm ma waa ɓǝsǝ ke ma sase ɓa, pa yǝ nkee me a na mbu yǝ taasǝ ɓa,

¹⁰ pa yǝ tung a ndǝm ɗuura Yohanna ra a han neu ɓeta ɓa.

¹¹ Pa ɓaa wo ma ɗuura kara a taalo, a na autoone kaya, pa yaa ko maasi.

¹² Emfǝɗkaa Yohanna ɓa, ɓǝ wo ɓǝ too maabiri isi, ɓǝ hoko. Pa ɓǝ ko ɓǝ nkee Yeso.

Yeso na mbuseya ɓeta pusa pu pu wonon

¹³ Pa Yeso yǝ kurasǝ mbu tomsǝ ɓa wa, yǝ lee han sǝsa a nhuukǝra, yǝ taa kurnyaamo yǝ faɗ a han ɓeta semra ɓa. Ɓet kwausǝ dem sǝɓa kurasǝ maaso wa, ɓaa fiɗ a ura ɓolɓol ɓaa ɓǝɗ ma nata.

¹⁴ Pa Yeso yǝ fiɗsǝ a kurnyaamo wa, yǝ wǝr ɓeta kwausǝ dem, pa nyorataara a taa ma ɓosa, pa yǝ roɓ ɓaa sem kwakwa ra ɓa, a ɗaaso ɓoso.

¹⁵ Ɗikira tomsǝ wa, emfǝɗkaa ɓisa ɓǝ wo a sanii, ɓaa nkee me, “Han ɓa ɓeta sem ra, ɗǝm kaa ǝn kankana, a ti pamo ɓet kwausǝ dem ɓa, me ɓǝ ko a ura sa ko ɓǝ kǝr mbuseya nkweere ɓose ɓǝ tiri.”

¹⁶ Yeso yǝ kak me, “Tom kwalari ɓǝ faɗ ɗa, saase sǝɓǝ na mbu ɓǝkaa se ɓa.”

¹⁷ Pa ɓǝ kak me, “A han ɓa tǝ ma nkaadǝng wonon ma nsenya raɓ maɗ.”

¹⁸ Yǝ nkee me, “Sǝnǝ na a han ɓa.”

¹⁹ Pa yǝ nkee ɓeta ɓǝ kaɗ a pitira kiyo ra. Yǝ too nkaadǝng wonon ma nsenya raɓ sǝɓa, yǝ nik ɗuura ɓoti a liura, yǝ tom himara Kaa, pa yǝ ɓaakǝ nkaadǝng kawa, pa yǝ na emfǝɗkaa ɓisa, ɓosa kǝn ɓǝ ɓaa ɓeta.

²⁰ Nsaad ɓeta ɓǝ kǝu ɓǝ nkwee, ɗǝm emfǝɗkaa ɓǝ kwau nyǝwǝrta pesǝ wa, a kung hote pu nhaa raɓ.

²¹ Ɓaa ɓǝ kǝusǝ ɓa, ɓǝ kanan pusa pu pu wonon, pa toona ma emba ɓǝ sem ɗaan da.

Yeso siki a mbraa

²² Pa Yeso yǝ ti emfǝɗkaa ɓisa nok ɓǝ kan a kurnyaamo, me ɓaa nkaa talo a kira mara, me usu kiya ti pamra ɓeta nhe.

²³ Ndiira yǝ ti ɓǝsǝ pamra wa, pa yǝ taa a yolo fin mbusa me ko yǝ tom kǝnara. Pa ɗikira a kana, yǝ nding fin mbusa kǝnso,

²⁴ pa kurnyaamo kawa yaa ɗaaso aulaara wa, kokrokto mbraa wa ǝn nasǝ kongsa me yoro ǝn tǝngsǝ.

²⁵ A pǝrta karfe taatǝn Yeso yǝ ko a ɓoni, yǝn sikinsiki a ɗuura aulaara ra.

²⁶ Pa emfǝɗkaa ka ɓa ɓǝ wǝrsǝsǝ yǝn sikinsiki a ɗuura mbraa aulaara wa, kokto ɓǝ ma, ɓǝ yauli, ɓǝn nkee me, “U nwa ndǝ simo.”

²⁷ Pa nok Yeso yǝɓǝ nkee me, “Sǝ taarǝ ra, ǝn niina, sǝ kura kokto ra!”

²⁸ Bitrus yǝ kak me, “Ankundi, me ndǝ ngiinga, ǝnǝ nkee nǝ wo a ngani a ɗuura mbraa ra.”

²⁹ Yaa nkee me, “Ngawo.” Pa Bitrus yǝ ham a kurnyaamo, yǝ siki a ɗuura mbraa ra, yǝ ko a Yeso ni.

³⁰ Pa yǝ wǝrsǝ yoro kokrok wa, yǝ kura kokto, pa yǝ ntii tumoo, yǝ paa pomra, yǝ nkee me, “Ankundi, ngǝ nǝ kono!”

³¹ Nok Yeso yǝ mal nem isi, yaa ma, yaa nkee me, “Ngase yaa ma na ɓongto ngeek ya, ngǝ pǝn me mbiu?”

³² Pa ɓǝ kansǝ a kurnyaamo wa, yor kawa yǝ nǝɗǝ.

³³ Pa ɓaa ɓǝsaa kurnyaamo ɓa, ɓaa nyoo, ɓǝ nkee me, “Ɓongtǝra ngǝ Au Kaa ya.”

³⁴ Pa ɓǝ talsǝ aulaara wa, ɓǝ kan a put Janisarat wa.

³⁵ Pa ɓet a put siso ɓa ɓǝ maa me ǝn Yeso, pa ɓǝ tung a nkee a ura a put siso wa nsaad, ɓeta ɓaa wo ma ɓaa sem kwakwa ra ɓa nsaad, a sani,

³⁶ ɓaa kǝna me yǝ lee ɓaa sem kwakwa ra ɓa, ɓǝ ntee hana laulawara ira maɗ, ɗǝm nsaad ɓaa ɓǝ nteesǝsǝ ɓa, ɓǝ roɓɓon.