MARKUS 8 - Lala NT

Yeso yǝ nkwee ɓeta pusa puu kurun

¹ Kakake ɓol ɓeta ɓǝ kwau dem ɗǝm, me ɓǝ sem mbu ɓǝka see ɓa ra, Yeso yǝ yar emfǝɗkaa ɓisa yǝɓǝ nkee me,

² “Nǝn kura nyorataara ɓet ɓa ra, me naso ɓǝma tǝro taatǝn ke ma niina, ɗǝm ɓǝ sem ma mbuseya ra.

³ Me nǝ ti ɓǝ pamra me ɓǝ ko ɗuuru ma ɗoora maso, tom pa ɓǝ nwii a ɗǝɗa, me ɓaata ɓǝ fiɗ mǝbmǝb.”

⁴ Emfǝɗkaa ɓisa ɓǝ kak me, “Yaa a sanglo wa, kǝ ndǝ taa nkaadǝng na, u kǝ ka maa ɓet dem ɓa wau?”

⁵ Yeso yǝɓǝ taa me, “Sǝ ma nkaadǝng mininiu?” Ɓǝ kak me, “Tǝsǝ mbutu.”

⁶ Pa yǝ nkee ɓet kwausǝ dem sǝɓa me ɓǝ kaɗ a putu. Yǝ toosǝ nkaadǝng mbutu suwa wa, yǝ tom himara a Kaa ni, pa yǝ ɓaa yǝ na emfǝɗkaa ɓisa me ɓǝ na ɓeta, pa ɓǝ tom maso.

⁷ Pa ɓǝ ma nseeya ngeek ɗǝm, yǝ na himara a ɗuura ira ɗǝm, yǝ nkee ɓaa ɓeta.

⁸ Ɓeta ɓǝ kǝu ɓǝ nkwee. Ndiira maso wa, emfǝɗkaa ɓǝ kwau nyǝwǝrta a kung hote mbutu.

⁹ Ɓeta kansǝ pusa pu kurun. Pa yǝɓǝ ti pamra me ɓǝ faɗa.

¹⁰ Pa yǝ kan a kurnyaamo ma emfǝɗkaa ɓisa ɓǝ faɗ a put Dalmanuta wa.

¹¹ Pa ɓaa Farisiyawa ɓa, ɓǝ wo ɓǝ ntii rǝkata ma sase. Ɓǝn pǝta sǝ, me ɓǝn taa me ɓaa maa ɓǝ taasǝ me yǝ ɓǝ weɗa mbu nhiinyanhiinya ɓa, me a weɗa me mbu ngǝn tomsǝ ɓa fiɗ a liura.

¹² Pa yǝ sen ɗaan ɗaan, yǝ nkee me, “Tomtomni ɓet kaareyase ɓa, ɓǝn taa me ɓǝ weɗa mbu nhiinyanhiinya ɓau? Nǝn nkeesǝ ɓongtǝra, mbu nhiinyanhiinya ka sem kǝn ka weɗa ɓet ntaandi wa ɓa ra.”

¹³ Pa yǝɓǝ lee, yǝ kana kurnyaamo yǝ tal a kira aulaara ra ma kal war.

Yǝsti Farisiyawa ma Hiridus wa

¹⁴ Emfǝɗkaa ɓǝ hura ɓǝ wo ma nkaadǝng ra, lee fin maɗ u ɓǝsǝ ma siso a kurnyaamo suwa wa.

¹⁵ Yeso yǝɓǝ wiin ngwee, yǝ nkee me, “Sǝ nhii nwaa, Sǝ tom nlaa ma yisti ɓaa Farisiyawa ɓa ma ɓet Hiridus ɓa.”

¹⁶ Pa emfǝɗkaa ɓǝ ntii kan mǝra a ɗaaso ɓoso ɓǝn nkee me, “Mbu kwausǝ ɓa me ndǝ sem ma nkaadǝng ra.”

¹⁷ Yeso yǝ maasǝ mbu ɓǝn kansǝ ɓa wa, pa yǝɓǝ taa me, “Sǝn kan mbi a ɗaaso waaso me sǝ sem ma nkaadǝng rau? Nding waso sǝ wǝr ɗǝm sǝ maa rau? Kuti yaase kaasǝu?

¹⁸ Sǝma nuuwa sǝ wǝrarau? Sǝma ngweeme pasǝ kura rau? Pa sǝ ɗim ra kwasau?

¹⁹ A fer nǝ kausǝ nkaadǝng wonon u ɓeta pusa pu pu wonon ɓǝ kǝusǝ wa rau? Ɗǝm sǝ kwau hote minini kungsǝ ma nyǝwǝrtau? Ɓǝ kak me, “Pu nhaa raɓ.”

²⁰ Pa nǝ kwausǝ nkaadǝng mbutu suwa u ɓeta pusa pu pu kurun kǝusǝ wa, ɗǝm sǝ kwau nyǝwǝrta hote miniu? Ɓǝ kak me, “Mbutu.”

²¹ Pa Yeso yǝ ɓǝ nkee me, “Nding waso sǝ maa mara narau?”

Yeso yǝ roɓ ntaara Betsaida

²² Pa ɓǝ wo Betsaida, ɓaa wo ma ntaara kǝra a Yeso ni ɓaa kǝna me yǝ tee ntaara kara.

²³ Yǝ ma nem ntaara ya, ya sa ko a ndiira uru ra. Yaa nem mesa a nuuwa ya ntee eɗ kaya, Yeso ya taa mee, “Ngǝn nkaa ngǝ wǝr mbu kau?”

²⁴ Pa yǝ nik ɗuura yaa nkee me, “Nǝn wǝr ɓeta; ɓǝ nga ngwate ɓaa siko.”

²⁵ Pa Yeso yǝ ɓaarǝ yǝ ntee nuuwa eɗ kaya sa ɗǝm. Pa nuuwa isa a wiil ɓaa, nuuwa isa a kang, yǝn wǝr mbusa ɗekɗek.

²⁶ Pa Yeso yaa nkee me, “A kang ɗuuru, ngǝ ko a ɗaaso uru wara.”

Bitrus yǝ nkee me Yeso yǝn Almaseho

²⁷ Yeso ma emfǝɗkaa ɓǝsa ɓǝ faɗa, ɓǝ kana em ura Kaisariya Filibi ɓa, A ɗǝɗa ɓǝn kosǝn kowa yǝ taa me, “Ɓeta ɓǝn nkee me nǝ yamniu?”

²⁸ Ɓǝ kak me, “Ɓaata ɓǝn nkee me, Yohanna an tom Baptisma nya, ɓaata ɓǝn nkee me, ǝn Iliya, ɗǝm ɓaata ɓǝn nkee me, fin a ɗaaso ɓannawanto ɓa.”

²⁹ Pa yǝɓǝ taa me, “Pa waso kau? Sǝn nkee me nǝn nyamniu?” Pa Bitrus yǝ kak me, “Ngǝn Almaseho.”

³⁰ Pa Yeso yǝɓǝ wiin ngwee me ɓǝ nkee yaake me yǝ yauniu ra.

Yeso yǝ nkee ɗǝɗa kiya wodɗa

³¹ Yeso yǝ ntii yǝɓǝ fǝɗkǝ mara me, tomon ɗaɗ Au Ete yǝ wee kongsa ɓolɓol ɗǝm wiina ɗaaso ɗur ɓa, ɓaa mbisi ma kuɓsa nek mbusa sa, ma malǝma fǝɗkǝra masakasa, me tomon ɗaɗ a todɗo, ɗǝm ndiira tǝro taatǝn wa, kiyǝ nii ma huurtu ɗǝm.

³² Yǝ nkee ɓǝ ɓongtǝra maarara a mbu kasa tom ɓa. Pa Bitrus yaa yar a kala, yaa ntii nkwaako.

³³ Yeso yǝ kǝrtǝ yǝ sengge emfǝɗkaa, yǝ kwaakǝ Bitrus yaa nkee me, “A pǝɗ a kal nwaano Shaitan!, Ngǝ tomaa mbu Kaa yǝn taasǝ ɓa ra, ngǝn tom u ɓeta wa.”

³⁴ Pa yǝ yar ɓeta kwang ma sase ma emfǝɗkaa ɓǝsa, yǝ ɓǝ nkee me, “Yaa yǝn taasǝ me yǝnǝ ɓǝɗ ya, tomon ɗaɗ yǝ mbisi nkweera ira, pa yǝ too kwaakǝra ira, yǝnǝ ɓǝɗǝ.

³⁵ Me hana yamni yaa yǝn yausǝ huurtu usu ya, kaa leetǝ, pa hana yamni yaa yǝ leetǝsǝ huurtu usu men niina ya, hana mara kwalari na nya, kiya noo.

³⁶ Ən mbi yaɓ ɓǝu me ete yǝ taa mbu ntaandi ɓa nsaad, pa yǝ leetǝ huurtu u pakarese wau?

³⁷ Ən mbi ete kiya na me kon nkweera huurtu pa karese wau?

³⁸ Nsaad yaa yǝn kurasǝ ɗuura waara na ma mara na a put ntaandi kwalakwala ma tentento wa, Au Ete ya kiya kura ɗuura waara ira fer kiya wo ma kuɓsutu papsiwa ma ɓan timira ɗekɗek ɓa wa.”