MARKUS 6 - Lala NT

Ɓaa bisi Yeso a ur usu Nazarat

¹ Ndiira maaso wa, Yeso yǝ lee hansǝsǝ yǝ kang a ur usu, emfǝɗkaa ɓǝsa ɓǝ ko ke ma sase.

² Kaa nwiiya Yahudawa tomsǝ wa, pa yǝ ntii fǝɗkǝ ɓeta wa, a hit kwau Yahudawa ɓa. Ɓeta dem ɓaa kurasǝsǝ ɓa, ɓǝ tom mbu weɗara ɓa, ɓǝn nkee me, “Eɗ ɗa yǝ taa mbu ɓa nau? Ən nkaamǝra maa mbuka mbi ɓaa nasǝsǝ maasou, yǝn nkaasǝ yǝ tom mbu nhiinyanhiinya ɓau?

³ U nwa sem an ankwaakǝ mbusa siya rau? Sem maasi ǝn yarsǝsǝ me Maryamu ya rau?, ɗǝm ɓaata ɓisa ǝn Yakubu ma Yusufu Ma Yahuda ɗǝm ma Siman ya rau? Sem ɓaata ɓisa mboona ndǝsǝ ke ma ɓosa a han ɓa wa rau?” Pa ɓǝ ɗaa dem.

⁴ Pa Yeso yǝɓǝ nkee me, “An nawanto ya, yǝma mbarta hana na, pa sem a ur usu, ma haato usu ra”

⁵ Yeso yǝ nkaa yǝ tom mbu nhiinyanhiinya ɓa kǝnso ra, ndub ɓeta ngeek ɓaa sem kwakwa ra ɓa, u yǝ tii ɓǝsǝ neme ɓǝ roɓ ɓa.

⁶ Pa tomsǝ mbu nhiinyanhiinya ɓa, me ɓǝ na ɓongtǝra ra. Pa Yeso yǝ ɓaɗ a ura ngeek ngeek sa ya fǝɗkǝra.

Yeso yǝ timi emfǝɗkaa ɓǝsa

⁷ Pa yǝ yar ɓaa pu nhaa raɓ sǝɓa, yǝ ɓǝ timi raɓ raɓ, yǝ ɓǝ na kwangto a ɗuura wis kwalakwala wa.

⁸ Yǝ na ɓǝ wanto me, “Sǝ kong too mbuka a nema a siko waaso ra, hana mbuseya, hana ɓukra, hana koɓa a siɓa waaso ra, pa kwalango maɗ kǝsa ma wa.

⁹ Sǝ tung taa, pa sǝ kong too lukta raɓ ra.

¹⁰ Nsaad ɗur sǝ kansǝ wa, sǝ kaɗ kǝnso, ndub fer kǝsaa lee ur siso wa.

¹¹ Nsaad han ɓaa konsǝ ra ɓa, hana ɓǝ mbisi kura mbu sǝn nkeesǝ ɓa, me kǝsǝ nii, sǝ haatǝ tula a natsa sǝsa, me a tom mbu maa a ɓoni.”

¹² Maso ɓǝ nii, ɓǝn nkee mara kwalari Kaa ra me ɓeta ɓǝ kong nfaata.

¹³ Ɓǝ hik nsaamse dem ɓǝ punk yaro ɓaa sem kwakwa ra ɓa dem, ɓǝ roɓo.

Woɗa Yohannan an tom Baptisma ya

¹⁴ Pa kuɓu Hiridus yǝ kura mara, me ɗǝnda Yeso ra kanan hana naa. Ɓaata ɓǝn nkee me, “Ən Yohanna an tom Baptisma ya ɓaa niksǝ a tiinan, ndǝ siso kwaasǝ yǝsǝ ma kwangto tom mbu nhiinyanhiinya ɓa wa, a sanii.”

¹⁵ Pa ɓaata ɓoso ɓǝn nkee me, “Ən An nawanta ya Iliya.” Ɓaata ɗǝm ɓǝn nkee me, “Awo, ǝn an nawanto keke ɓol a ɗaaso ɓan na wanto tangtang ɓa.”

¹⁶ Pa Hiridus yǝ kurasǝ wa, pa yǝ nkee me, “Yohanna nǝ nǝngsǝ ɗuura yǝ nii sase a tina!”

¹⁷ Me ka tangtang Hiridus ma nkweera ira, yǝ ti ɓaa ma Yohanna yaa kaan, yaa tii a hit neu ɓeta wan. Hiridus yǝ tom maaso me Hirudiya toone eɗ isi ya Filibus, u sase Hiridus yǝ konsǝ wa.

¹⁸ Me Yohanna ka yǝ pǝta nkee Hiridus wan me, “Pam me ngǝ kon toone eɗ ɗange ya ra,”

¹⁹ Mara sǝra ti Hirudiya yǝn nfee Yohanna a kuɗa, yǝn kǝr ɗǝɗa kama kiya toɗ Yohanna ra yǝ taa ra,

²⁰ me Hiridus yǝn kura kokto Yohanna wa. Yǝ maan me yǝ yaa ma ɓongtǝra ya, yaa ɗekɗek ya, siso kwaasǝ Hiridus yǝ maasǝ Yohanna yaɓ wa. Senta ita ǝn nii me Yohanna yǝn nkeesǝ mara, hana maaso yǝn yau yǝ kura mara Yohanna ra.

²¹ A peɗe peɗe yǝ taa ɗǝɗa. A kaa haa Hiridus ɓa, yǝ yar hira me wiina ɓǝsa tinima ɓa ma ɓa kwang kwang a nsosame ɓa ma wiina a put Galili ɓa.

²² Pa au Hirudiya ya toone yǝ wo yǝ hirhira, a tǝǝ Hiridus ma sik ɓisa pin. Pa kuɓu yǝ nkee autoone kaya me, “Ngǝ nǝ taa nsaad mbu ngǝn taasǝ ɓa, ɗǝm kǝ nǝ ngǝ na.”

²³ Kuɓu yǝ kuu autoone kaya yaa nkee me, Nsaad mbu ngǝ taasǝ ɓa kǝnǝ ngǝ na hana ɓaakǝra kuɓsutu nwaano ra.

²⁴ Pa yǝ fiɗ yǝ taa maasi me, “Kǝnǝ kǝna mbiu?” Maasi yaa nkee me, “Duura Yohanna an tom Baptisma ya ra.”

²⁵ Nok kǝnso autoone kaya, yǝ mon yǝ kanga a kuɓu ni ma kǝnara, yǝ nkee me, “Nǝn yau me ngǝnǝ na ɗuura Yohanna an tom Baptisma ya waso a taalo wa.”

²⁶ Pa kuɓu yǝ kura kuɗa tebteb ra dem, pa me ka yǝ wee kuuwo nǝn, ɗǝm ma waa ɓǝsǝ ke ma sase ɓa, pa yǝ yau me yaa ɓisi ra.

²⁷ Pa nok kǝnso yǝ timi nsosa me koya wo ma ɗuura Yohanna ra. Nsosa kawa yǝ ko koyǝ ndǝm ɗuura Yohanna ra a han neu ɓeta ɓa,

²⁸ pa yaa wo ma ɗuura kara a taalo, yǝ na autoone kaya, pa autoone kaya yǝ na maasi.

²⁹ Emfǝɗkaa Yohanna ɓa, ɓǝ kurasǝ wa, ɓǝ wo ɓǝ too maabiri isi, ɓǝ hoko.

Yeso yǝ nkwee ɓeta pusa pu puu wonon

³⁰ Pa tomsǝ wa ɓahona u Yeso yǝ timi ɓǝsǝ wa ɓǝ kang a sani, ɓaa nkee nsaad mbu ɓǝ tomsǝ ɓa, ma mbu ɓǝ fǝɗkǝsǝ ɓa.

³¹ Pa ɓeta dem ɓaa ko ma wo ɓohona ɓǝ taa ɗǝɗa me ɓǝ se mbuseya ra, pa yǝ ɓǝ nkee me, “Sau ndǝ ko a han ɓeta semra ɓa me sǝ nwii.”

³² Pa ɓǝ kana kurnyaamo ɓǝ ko a han ɓeta semra ɓa, ǝn ɓosa seɗe.

³³ Pa ɓǝn leesǝ hansǝsǝ wa, ɓeta dem ɓǝ wǝrǝ ɓǝ maa meen ɓosa, ɓǝ ntii moone a kira seno ra ma nata a ura ɓol ɓol ɓǝ fiɗsǝ wa ɓǝ nkaa kano.

³⁴ Pa Yeso yǝ hamsǝ wa, yǝ wǝr ɓeta kwausǝ dem, pa yǝ kura nyorataara ɓora, me yǝn wǝr ɓǝ nga tǝmnkaa an wanda semra ya. Pa yǝ ɓǝ ntii fǝɗkǝ mbusa wa ɓol ɓol.

³⁵ Kwang kaa kǝ kana pa emfǝɗkaa ɓǝsa ɓǝ wo a sani ɓaa nkee me, “Han ɓa ɓeta sem ra, ɗǝm kaa ǝn kankana.

³⁶ A ti pamo ɓet ɓa, me ɓǝ ko a ura sa ko ɓǝ kǝr mbuseya nkweere ɓose ɓǝ tiri.”

³⁷ Pa Yeso yǝɓǝ kak yǝ nkee me, “Saase sǝɓǝ na mbu ɓǝkaa se ɓa.” Pa ɓaa nkee me, “Ma tǝ haa koɓa ka puu antinima ya tuka pusa pu puu raɓ tǝ ɓǝn tiri mbuseya ɓǝ seu?”

³⁸ Yǝ ɓǝ nkee me, “Nkaadǝng mininiu sǝsǝ wau? So kosǝ sengge.” Ɓǝ sengge sǝ wa, ɓǝ nkee me, “Nkaadǝng wonon ma nseeya raɓ.”

³⁹ Pa Yeso ya tii emfǝɗkaa ɓǝsa me ɓǝ nkee ɓeta ɓǝ kaɗ handa handa a pitira kiyo ra.

⁴⁰ Pa ɓǝ kaɗ handa handa ɓaata pusa pu pusa pu ɓaata pa wonon pa wonon.

⁴¹ Yǝ tosǝ nkaadǝng wonon suwa ma nseeya raɓ sǝɓa. Pa yǝ nik ɗuura ɓoti yǝ na himara Kaa, ya ɓaa yǝ na emfǝɗkaa ɓǝsa ɓǝn kosǝ ɓeta. Ya ɓaa ɓeta nsaad nseeya raɓ sǝɓa.

⁴² Nsaad ɓeta ɓǝ kǝu ɓǝ nkwee,

⁴³ ɗǝm emfǝɗkaa ɓǝ kwau nyǝwǝrta nkaadǝng ma nsenya pesǝ wa, a kung hote pu nhaa raɓ.

⁴⁴ Ɓet ɓǝ se sǝ mbuse sǝsǝ ɓa parata pusa pu pu wonon.

Yeso yǝ siki a mbraa ɓoti

⁴⁵ Pa Yeso yǝ ti emfǝɗkaa ɓisa nok ɓǝ kan a kurnyaamo, me ɓaa nkaa talo ɓǝ ko Betsaida, me usu kiya ti pamra ɓeta nhe.

⁴⁶ Ndiira yǝ ti ɓǝsǝ pamra wa, pa yǝ taa a yolo me ko yǝ tom kǝnara.

⁴⁷ Pa ɗikira a kana, kurnyaamo kawa ya ɗaaso aulaara wa, Yeso ɗǝm yaa han kira ɓa yǝ fin mbusa.

⁴⁸ Yǝ wǝrsǝ ɓǝn kweetǝ ma nyaawa me yoro ǝn tǝngsǝ. A pǝrta karfe taatǝn, pa yǝ ko a ɓoni, yǝn sikinsiki a ɗuura aulaara ra. Pa yǝ tom ngaa kiyǝ ɓǝ talǝ,

⁴⁹ pa ɓǝ wǝrsǝsǝ yǝn sikinsiki a ɗuura mbraa aulaara wa, pa ɓǝ wǝr nga yǝn simo, ɓǝ yauli,

⁵⁰ me ɓǝ nsaad ɓǝ wǝrsǝn ɓǝ maɗki. Nok kǝnso yǝ ɓǝ nkee me, “Sǝ taarǝ ra, ǝn niina, sǝ kura kokto ra!”

⁵¹ Pa yǝ kansǝ a kurnyaamo kawa ma ɓosa wa, pa yoro kawa yǝ nǝɗǝ. Pa nhiinyanhiinya to ɓǝ ma dem,

⁵² me ɓǝ maa mbu nhiinyanhiinya yǝ nasǝ mbuseya ɓeta pusa pu woon suwa ra, mee kuɗa ɓora ma mbu yǝn sensǝn sen ɓa ra.

Yeso yǝ roɓ ɓaa sem kwakwa ra ɓa Janisarat

⁵³ Pa ɓǝ talsǝ aulaara wa, pa ɓǝ talsǝ wa, ɓǝ kan a put Janisarat wa, ɓǝ kaa kurnyaamo kawa a kira aulaara ra.

⁵⁴ Pa nok kǝnso ɓǝ fiɗsǝ a kurnyaamo a mbraa wa, ɓeta ɓǝ maa me ǝn Yeso.

⁵⁵ Ɓǝ ɓat a ur siso nsaad ɓǝn haa ɓa sem kwakwa ra ɓa, a ɗikra ɓa ko a han ɓǝ kurasǝ me yǝsǝ ɓa.

⁵⁶ Nsaad han yǝ kosǝ ɓa, hana kuɓ kwang uru ya, hana ur ngeek wa, hana a talte ɓǝn ti ɓaa sem kwakwa ra ɓa, a ee lumu ya. Ɓaa kǝna me yǝɓǝ ɓǝ lee ɓǝ ntee hana kal laulauwara usu maɗ, ɗǝm nsaad ɓaa ɓǝ nteesǝsǝ ɓa, ɓǝ roɓɓon.