MARKUS 5 - Lala NT

Yeso yǝ roɓ ya ma wis nsaamse ya

¹ Ɓǝ tal aulaara ma lau put Garasinawa nwa.

² Pa Yeso yǝ hamsǝ a kurnyaamo wa, pa eɗ ke yǝ ma siyo nsaamse wa, yǝ fiɗ a ham tinamse ɓa, pa ɓǝ pamma.

³ Eɗ kaya yǝn tǝr a ham hok wote ɓa, yaake yǝ nkaa ya kaa hana ma sakla ra.

⁴ Ka ɓan kasǝ nema ma natsa ma sakla, pa yǝn nkaa sakla kasa, pa yaake sem kokrok yǝn nkaasǝ yaa kaa ɗǝm ra.

⁵ Nfee pǝrta ma kaa yǝn siki a han hok wote ɓa, ma ɗungate yǝn yauli, yǝn nsootǝ maabiri isi ma ɗungate.

⁶ Pa yǝ wǝrsǝ Yeso mǝbmǝb wa, yǝ nii ma monee ko yǝ kwirsǝ a wii usu.

⁷ Yǝ nik kwaro ma kwakwato, yaa nkee me “Ngǝn taa mbi ma na seu, Yeso, Au Kaa Kwang Ɓoti ya?. A kwǝ ma Kaa, me ngǝ nǝ na kongsa ra.”

⁸ Me Yeso ka yǝ weesǝ nkeen me, “A ɓaa ma eɗ ɗa ngase wis nsaa nwa.”

⁹ Yeso yaa taa me, “Ən yarngǝ me miniu?” Yaa kak me, “Dem dem,” me wisa nsaamse sa kwak a sani.

¹⁰ Pa yaa kǝna Yeso ma kwalǝra mee yǝ ɓǝ pǝǝ a hansǝsǝ ra.

¹¹ Ngwang ma hiɗa yolo ra, kur alautiya wa dem, ɓǝn war wanda .

¹² Pa nsaamse kaya ɓǝ kǝna Yeso me, “Ətǝ tung a a kur alautiya nii, tǝ kanaa ɓoni.

¹³ Pa yǝɓǝ yawa, Pa wis nsaamse kaya, ɓǝ fiɗ ɓǝ kan a alautiya kasa. Kur alautiya kawa kanan pusa pupu raɓ, ɓǝ nii ma mone ɓǝ ham a aulaara, ɓǝ tum nsaad a mbraa.

¹⁴ Pa ɓan war wanda kelngǝta sǝta ɓa, ɓǝ mon ɓǝ nkee ɓǝ tomsǝ ɓa a uru, ma ura kalta sa. Pa ɓeta ɓǝ piɗ me ɓǝ sengge mbu tomsǝ ɓa.

¹⁵ Pa ɓǝ wosǝ a Yeso ni nwa, ɓǝ wǝr eɗ ka yǝsǝ ma wis nsaamse dem siya, yǝ ɗa kǝnso, yǝ tungsǝ lukta, senta ira kangan, pa ɓǝ kura kokto.

¹⁶ Ɓaa ɓǝsǝ kǝnso ɓǝ wǝrsǝ ɓa, ɓǝ nkee ɓeta mbu tomsǝ a roɓ eɗ ma siya samse ya, ma mbu tomsǝ alautiya ɓa.

¹⁷ Pa ɓeta ɓaa nree me yǝ ɓǝ lee put ɓoso.

¹⁸ Pa Yeso yǝn kansǝn kana kurnyaamo wa, yaa ɓaa hiksǝsǝ samse siya yǝ wo yǝ kǝna Yeso yǝn nkee me, a lee ndǝ ko ke ma ngase.

¹⁹ Pa Yeso yǝ yaura yaa nkee me, “A kang ɗuuru kongǝ nkee ɓet ɓǝnga mbu Kaa tomngǝsǝ ɓa, ma wǝr maya mayato a ɗuura nga wa.”

²⁰ Pa eɗ kaya ya nii yǝ faɗ yǝn ntii nkee mbu Yeso yǝ tomsǝsǝ Dikafolis ɓa. Ɓeta nsaad ɓǝn wǝr mbu wedara ɓa.

Au Yayirus ya ma toone yǝn tuksǝ moonma ya

²¹ Pa Yeso yǝ ɓaarǝsǝ yǝ talla a kira a kurnyaamo wa pa ɓeta dem ɓǝ kwau a sani sa yǝ ding a kira seno ra.

²² Pa an wii fin a ɗaaso wiina hit kwau Yahudawa ɓa, ǝn yarsǝ me Yayirus yǝ wo kǝnso. Pa yǝ wǝrsǝ Yeso wa, yǝ kwǝrsǝ a wii usu,

²³ yaa kǝna ma ɓongto me, “Auwane autoone yǝn woɗwoɗɗo, komkom, ngau nga ti nema sǝngaa a ɗuura ira me yǝ roɓɓo, ɗǝm yǝ nii ma huurtu.”

²⁴ Pa Yeso yǝ ko ke ma sase. Ɓeta kwausǝ dem ɓǝ ɓǝɗsǝ, ɓǝn nheemsǝ.

²⁵ Kǝnso toone ke u yǝsǝ ma siyo tuk monma wa meeta pu nhaa raɓ.

²⁶ Yǝ wee kongsan a ɓan na matǝma ɓa ni yǝ toɗ kǝna usun nsaad siyo kawa roɓara ǝn sokǝn sokǝ kwasa.

²⁷ Yǝ kurasǝ mara a ɗuura Yeso ra wa, pa yǝ wo ma lau ndiira usu a ɗaaso ɓeta kwausǝ dem wa, yǝ ntee kal luktu usu.

²⁸ Me yaa senta a kuɗa ira me, “Me nǝ ntee luktu usu maɗ, kǝnǝ roɓɓo.”

²⁹ Nok kǝnso tuk moonma usu a nǝɗǝ yǝ kura a maabiri isi me ɓaa roɓa sǝn.

³⁰ Pa Yeso yǝ nkee me, “Yaa tee luktu nwaano niu?” Me nǝ kura kwangto fiɗa a maabiri yaanen.

³¹ Pa emfǝɗkaa ɓǝsa ɓǝ nkee me, “Antaanda ya maa ɓan tǝngsǝ ya kǝngǝ ma, yaa tee ngǝsǝ ya nau?”

³² Pa Yeso yǝ sengge me yǝ wǝr ya yǝ tomsǝ mbusa ya.

³³ Toone kaya yǝ wǝrsǝ mbu ɓaa tomsǝsǝ ɓa wa yǝ wo ma kokto ma madko ya nwii a nwiiyo a sani yaa nkee ɓongtǝra nsaad.

³⁴ Pa yaa nkee me, “Autoone, na ɓongto nwaango roɓ ngǝn, ngo kwakwa, ɗǝm ngǝ ɓaa ma kongsa nga .”

³⁵ Yǝsa kanmǝra wa, pa ɓaa taka ɓǝ fiɗ a ɗuur Yayirus wa an nwii hit kwau Yahuda wa ɓaa nkee me, “Ai auwange yǝ wodon,” ɓǝ nkee me, “Ngǝ ti malǝm yǝ kong salra.”

³⁶ Yeso yǝ ma mbu ɓǝn nkeesǝ ɓan, pa yǝ nkee an wiiyo hit kǝna Kaa suwa “Ngǝ kura koktora, a na ɓongtǝra.”

³⁷ Yǝ lee yaake yaa ɓǝɗ ɗa, meen Bitrus ma Yakubu ma Yohanna ate Yakubu ya ra.

³⁸ Ɓǝ kansǝ ɗuur Yayirus wa an wii hit kwau Yahudawa ɓa wa, Yeso yǝ wǝr ɓeta taarǝsǝ ɓaa oro ɓǝn yaulisǝ.

³⁹ Yǝ kana yǝ ɓǝ nkee me, “Sǝn tee mbiu sa yauli maasou? Au kaya yǝ woɗ ɗa, yaa munda.”

⁴⁰ Pa ɓaa nhuu u binira wa. Pa yǝ hik ɓeta nsaad ntaandi yǝ yar pap autoone kaya ma maasi ma emfǝɗkaa ɓǝsa ke ɓǝ kana a han autoone kaya yǝsǝ ɓa.

⁴¹ Yǝ ma autoone kaya a neme, yaa nkee me, “Talita kumi,” u ǝn sensǝ me, “Autoone, a nii kǝɗ.”

⁴² Nok kǝnso, autoone kaya yǝ nii kǝɗ, yǝ ntii siko, meeta autoone kara ta pu nhaa raɓ, mbusa kwaaɓǝ, ɓǝ wǝr nhiinyanhiinya to dem.

⁴³ Pa Yeso yǝɓǝ wiin ngwee, yǝɓǝ nkee me, sǝ yau yaake yǝ kura mbu tomsǝ ɓa ra. Yǝɓǝ nkee me saa na mbuseya.