MARKUS 4 - Lala NT

Mǝɗkǝra a ɗuura rǝkora

¹ Ɗǝm Yeso yǝ ntii fǝɗkǝra a kira aulaara Galili ra. Pa me ɓeta ntiisǝ kwauwo dem kwang wa, kwaasǝ yǝ kana kurnyaamo a aulaara, yǝ kaɗ ɗaan, ɓeta ɗǝm ɓǝ nǝɗ a kira aulaara ra.

² Pa yǝɓǝ fǝɗkǝ mbusa dem ma lau mǝɗkǝta wa. A fǝɗkǝra ira yǝ nkee me,

³ “Sǝ kura! An waa nyaanyo ke yǝ ko a rǝko.

⁴ Yǝsaa rǝkoo wa, nkaama peera ma a roo a ɗǝɗa, pa rǝmɓa ɓǝ wo ɓǝ tiki ndiira.

⁵ Peera a roo a ham ɗungate ɓa, a ham putu sem ɓong ra ɓa. Pa ɓǝ nhaa naakǝn, me putu sem ɓong a ham sǝsa ra.

⁶ Pa osa tomsǝ wa, ɓǝ lukanyǝ ɓǝ ee, me ɓǝ sem ma hinti ra.

⁷ Nkaama peera ma a roo a tǝute, pa tǝute kaya yǝ mbar yǝ ɓǝ sartǝ, pa ǝɓǝ saa nseenyo.

⁸ Maaso ɗǝm, peera nkaama a roo a ham putu yaɓ ɓa. Pa ɓǝ nsee emba, ɓaata peera pataatǝn pataatǝn, peera pamindike pamindike, peera kan pusa puu pusa puu, a mbu yǝ rǝksǝ ɓa.”

⁹ Payǝ nkee me, “Yaa yǝsǝ ma ngwee kura kura ya, a lee yǝ kura.”

Mbu mǝɗkǝra ǝn sensǝ ɓa wa,

¹⁰ Fer Yeso yǝsǝ ɗaa fin mbusa wa, pa emfǝɗkaa puu nhaa raɓ sǝɓa ma ɓaata a kala ira, ɓaa taa a ɗuura mǝɗkǝta sǝra.

¹¹ Pa Yeso yǝ ɓǝ nkee me, ɓaa weesǝ yauwon me sǝ maa mbu a nhuukǝra u kuɓsutu Kaa wa ɓan, pa pepera ɓeta ya, mbusa nsaad ɓaa kǝɓǝ nkee ma mǝɗkǝta,

¹² me maaso, “ ‘Ɓǝkǝ tomaa wǝro, pa ɓǝ pǝta maa ra, ɓǝkǝ pira ngwee ɓǝ kura, pa ɓǝ pǝta maa ra. Pa me ka sem maaso ra, ɓǝkǝ kǝrtǝ ɗǝm ɓaa ɓǝ lee tentento ɓoso!’ ”

Mbu ǝn sǝnsǝ a mǝɗkǝra rǝko kawa wa

¹³ Pa Yeso yǝɓǝ nkee me, “Hankǝra kasǝ maa ɗaanto mǝɗkǝra wa rau? Yaa pa waso sǝkǝ maa mǝɗkǝra narau?

¹⁴ Nkaama an rǝko siya ma, ǝn mara Kaa ra.

¹⁵ Nkaama ɓǝ rosǝ a ɗǝɗa sǝ ma ɓa, ǝn ɓaa ɓǝ kurasǝ ɓa pa shaitan wo yǝ kon mara u ɓaa tisǝ a ɓonii wa.

¹⁶ Nkaama rosǝ a ham ɗungate ɓa, ǝn mǝɗkǝ ɓaa ɓǝ kurasǝ mara Kaa ra ɓa, ɓǝ kon ma hurhurto.

¹⁷ Pa me ɓǝ sem ma hinti ra, ɓǝ tǝr kwang ra. Me ɓǝ taa rǝkata, hana kongsa a ɗuura mara Kaa ran, ɓǝn kwiɗ ɓǝ nwii.

¹⁸ Nkaama rosǝ a tǝute ma, ǝn ɓaa ɓǝ kurasǝ mara ira ɓa,

¹⁹ pa a tǝr a nii, senta mbu kaɗo ntaandi wa ɓa ma kǝr kǝna wa ma yau kura nebto wa, ɓǝ nhem mara kara, pa yaa ti yǝ tom sal.

²⁰ Pa nkaama rosǝ a put yaɓ ɓa wa, ǝn mǝɗkǝ ɓaa ɓǝ kurasǝ mara ɓǝ kon ɓa, pa ɓǝ nsee emba, ɓaata pataatǝn pataatǝn, ɓaata pamindike pamindike, ɓaata ɗǝm hana pusapu pusapu.”

Mǝɗkǝra a ɗuura Arkumta ra

²¹ Pa yǝɓǝ nkee me, “Sǝ pǝta wǝr yaake kǝn kiya nek arkumta pa yǝ too talo ya liki ma siso, hana ya ti a kunda han tǝra rau? Me maaso ɓan ɗangra ɓoti a ɓǝ ti ɓisa rau?

²² Me nsaad mbu likisǝ ɓa, ɓaakǝ hik ntaandi, mbu a nhuukǝra ɓa, ɗǝm ɓaa kǝ wil ntaandi.

²³ Hana yamni yaa yǝsǝ ma ngwee kura kura ya, a lee yǝ kura.”

²⁴ Pa yǝ ɓǝ nkee me “Sǝ kura yaɓ, ma taasa sǝ maasǝ ɓaata wa, ma siso ɓaa kǝ sǝn maa wa, a kung a pee.

²⁵ Yaa yǝsǝ ma mbuka ya, ɓaa ka sookǝ me a kwii, ɗǝm yaa semma mbuka ra ya, hana u yǝ sǝ ngeek wa, ka kon a sanii.

Mǝɗkǝra kama yǝ nhaasǝ ma

²⁶ Pa Yeso yaa nkee me, “Kuɓsutu Kaa wa yǝ nga ete yaa yǝ rǝksǝ koma nyaanyo usu ya.

²⁷ Tǝro a nii koma sǝma yǝ nhaa yǝ mbraa eɗ sisi yǝ ma ɗǝɗa yǝ tomsǝ yǝ mbar ɓa ra.

²⁸ Putu ma nkweera ira yǝn nsee sase, a ntiiri yǝn tom kǝɗa, ndiira usu ya hik ɗuura a ɗuura sǝra pa emba ɓǝ nsee.

²⁹ Fer koma sǝma weesǝ wa pa yǝ ti kwaa ya ngǝ me fer nǝǝngǝ usu kanan.”

Mǝɗkǝra a ɗuura em karaɓa ra

³⁰ Pa Yeso taa me, “Kuɓsutu Kaa wa yǝ nga mbiu? Kǝ ndǝ tom tinima ma mǝɗkǝra naara pa ndaa mǝɗ kǝu?

³¹ Yǝn nga nkaama karaɓa ma, u yǝsǝ ngeekǝlek ɓan rǝksǝ a putu wa. pa hana maaso, me ɓaa rǝkǝn, yǝn mbar yǝ kang winne ɓota yǝ faɗsǝ ngwate a ɓabra ya nsaad, ɗǝm ma parme kwang kwang u rǝmɓa ɓǝn nkaasǝ ɓǝ nsaa hitsa a si wa.

³² me rǝksǝ a nyaayo yǝn mbar yǝ faɗ mbu rǝksǝ a ɓabra ɓa nsaad yǝn tom kakta dem rǝmba ɓǝn nsaa hitsa asi.”

³³ Ma iring mǝɗkǝta sisi dem Yeso nkeesǝ mara Kaa ra wa, keke me a maa ɓoso.

³⁴ Yǝ nkee ɓǝ mbuka ra ndub ma mǝɗkǝra. Pa me ɓǝ nkee ma emfǝɗkaa ɓǝsa seɗe ɓobɓǝsa, yǝn nkee ɓǝ mbusa nsaad a talte.

Yeso yǝ kwaakǝ tiwo

³⁵ A kaa sǝsa fer kaan kansǝn kan nwa, Yeso yǝ nkee emfǝɗkaa ɓǝsa, “Ndǝ tal ma kal war.”

³⁶ Pa ɓǝ lee ɓaa kwausǝ ɓa, pa ɓǝ faɗ ke ma sase ɗaan a kurnyaamo u yǝsǝ ɗa ɗaan wa. Pera kurnyaama kǝn ke ma ɓosa.

³⁷ Pa wiine yoro ke a nii a aulaara kara, mbraa ǝn takli a kana kurnyaamo ɗaan. Kurnyaamo kawa ngwang a kungu.

³⁸ Sase Yeso yǝ ndiira kurnyaamo ra ya munda a ɗikra. Emfǝɗkaa ɓisa ɓaa niki, ɓaa nkee me, “Malǝm, ngǝ wǝr rau? Kǝndǝ tumu.”

³⁹ Pa Yeso yǝ nii kǝɗ, yǝ nkwaakǝ yoro, pa yǝ nkee mbraa a aulaara ma me, “A kura, ngǝ roo nseu!” Pa yor kawa yǝ lee nyaa, handa nsaad a roo nseu.

⁴⁰ Pa yǝ nkee emfǝɗkaa ɓisa, “Sǝn kura kokto me ǝn mbiu? Nding waso sǝ semma na ɓongto rau?”

⁴¹ Pa ɓǝ kura kokto dem, ɓǝn taa ɓaatǝ me, “Sika nwa, ǝn nyamni nwau? Hana yoro ma kokrokto mbraa nwa, ɓǝn na sǝsǝ mbartau!”