MARKUS 16 - Lala NT

Yeso yǝ niin

¹ Pa kaa nwiinya Yahudawa ɓa tallǝsǝ wa, Maryamu ma Magadaliya, ma Maryamu ma Yakubu ya ma ɗǝm Solomi, ɓǝ tiri yar seera yabwa me ko ɓǝ puk Yeso a maabiri.

² A ntiiri tǝro lumu wa a ɗǝnda naakǝn ɓǝ ko a han tinaɓa

³ ɓǝsa ɗǝɗa wa ɓǝ nkee ɓaatǝ, “Yaa kiyǝ ɓǝ tǝng ɗungara a ee tina ya niu?”

⁴ Pa ɓǝ kansǝ kǝnso wa, ɓǝ nik ɗuura ɓǝ wǝr wee tǝng nkoora ɗungara a ee tina karan, lee ee isi hoo.

⁵ Ɓǝ kansǝ a tina kawa wa, ɓǝ wǝr au parara ke ɗa a kal nema seya wa ma lukta pengpeng a maabiri isi, kokto ɓǝ ma.

⁶ Au parara kaya yǝɓǝ nkee me, “Sǝ kura koktora,” sǝn kǝr Yeso Banazarat yaa ɓaa kwaakǝsǝsǝ ya. Ai, yǝ niin! Yǝ sema ham ɓa ra. Han ɓa tisǝsǝ ɓa wa.

⁷ Waso soo, Kosǝ nkee emfǝɗkaa ɓisa ma Bitrus me, ˈYǝn koko Galili a wii waso. Kǝnso kǝɓǝ saa wǝr nga yǝ nkee ɓǝsǝ wa."

⁸ Toona kaɓa ɓǝ fiɗ ma moone a tiina, ma kokto ɓǝn madkin madki. Ɓǝ nkee yaa ke mbuka ra, me ɓǝn kura kokto.

Ɓaata ɓan nyor ra a ntiiri ɓa u ɓan yausǝ dem wa, ɓǝ nyor Markus 16.9-20 ra. Yeso yǝ weɗa ee usu Maryamu Magadaliya

⁹ Pa Yeso yǝ nisa a tinawa naakǝn a ɗenda ka ntiiri lumu ɓa, yǝ ntii yǝ weda ee usu Maryamu Magadaliya, toone Yeso yǝ hiksǝsǝ nsaamse mbutu siya.

¹⁰ Sase kǝn yǝ ko koyǝ nkee emfǝɗkaa ɓǝsa ɓaa kaɓǝsǝ ke ma Yeso ɓa ɓaa oro ma kuɗa teptep ra.

¹¹ Pa ɓǝ kurasǝ me Yeso yǝma huurtu wa, ɗǝm yǝ wǝrsǝn ɓǝ na ɓongtǝra ra.

Yeso yǝ weɗa ee usu emfǝɗkaa raɓ

¹² Ndiira maaso wa Yeso yǝ faki maabiri isi yǝ weɗa ee usu emfǝɗkaa a fer ɓǝn kosǝnko a uru kowa.

¹³ Pa ɓaa raɓ emfǝɗkaa sǝɓa ɓǝ kang ɓǝ nkee ɓaata emfǝɗkaa ɓa ɗing siso ɓǝ yau ma mbu ɓǝ nkee ɓǝsǝ ɓa ra.

¹⁴ Ndiira usu Yeso yǝ weɗa ee usu emfǝɗkaa puu nhaa fin a fer ɓǝn sesǝ mbuseya wa. Pa yǝ kwakǝ a mbu ɓǝ nasǝ ɓongtǝra ra ɓa ma ɗuura kwakwa ɓora me ɓǝ na ɓongto ma ɓaa ɓǝ wǝrsǝsǝ a fer yǝ niisǝ wara ɓa.

¹⁵ Pa yǝ ɓǝ nkee me, “Soo a put taandi wa nsaad, sǝ nkee ɓeta mara kwalari kaa ra.

¹⁶ Nsaad yaa yǝ nasǝ ɓongtǝra ya, aa tom baptisma ya kiya ta huurtu. Pa ya usu yǝ yau yǝ na ɓongtǝra raya ɓaa ka kan kiita.

¹⁷ Ɓaa ɓǝ nasǝ ɓongtǝra ɓa kǝɓǝ na kwangto ɓa tom mbu nhiinyanhiinya ɓa kǝɓǝ hik samse ma ɗǝnda na kǝɓǝ kan ma eeme ɓol ɓol u kaɓǝn kanara wa.

¹⁸ Ɓǝkǝ too nsaa ma nem ɓose. Hana ɓǝ wee kana ɓǝ tom mbuka ra. Ɓǝkǝ ɗǝm tii nema ɓosa ɓaa sem kwakwaraɓa ɓǝ roɓo.”

Ɓaa too Yeso a ko a liura

¹⁹ Ndiira Ankundi Yeso yǝ nkee sǝ ɓǝsǝsǝ emfǝɗkaa ɓǝsa wa, ɓaa too sǝ a faɗ ɗaan a liura, yǝ kaɗ a nem seya Kaa ya.

²⁰ Pa emfǝɗkaa ɓǝsa ɓǝ piɗ ɓǝn nkee mara kwalari kaa ra hana na. Ankundi yǝ ke ma ɓosa, yǝn wede ɓongtǝra mara ira ra ma lau mbu nhiinyanhiinya yǝ tisǝ ɓǝn tomsǝ ma mara ira wa.