Luka 9 - Lala NT

Yeso yǝ timi emfǝɗkaa ɓǝsa

¹ Pa Yeso yǝ yar ɓaa pu nhaa raɓ sǝɓa a han fina yǝ ɓǝ na kokrokto ma kwangto me ɓǝ hik nsaamse nsaad, ɗǝm ɓǝ roɓ siyamse.

² Yǝ ɓǝ timi me ɓǝ nkee mara kuɓsutu Kaa wa ra ɓa roɓ ɓaa ɓǝsǝ sem kwa kwaara ɓa.

³ Yǝɓǝ nkee me, “Sǝ kong too mbuka a neme a siko waaso ra hana kwalango, hana ɓukra, hana mbuseya ra, hana koɓa ra, sǝ haa lukta raɓ ra.

⁴ Hana sǝ kan a ɗur nawa, sǝ kaɗ kǝnso, ndub fer kǝsaa lee ur siso wa.

⁵ Nsaad ham ɓa konsǝra ɓa me kǝsǝ nii, sǝ haatǝ tula a natsa sǝsa ɓa me a tom mbu maa a ɓoni.

⁶ Pa ɓǝ nii ɓǝ ntii siko ura ura ɓǝn nkee mara kwalari ra ɓǝn roɓ ɓaa sem kwakwa ra ɓa hana na.

⁷ Pa kuɓu Hiridus kurasǝ mbu ǝn tomsǝ ɓa nsaad wa, senta ita a nii, me yǝn kura ɓaata ɓǝn nkee me, Yohanna an tom Baptisma ya, ɓaa niksǝ a tiinan.

⁸ Ɓaata ɓǝn nkee me ǝndǝ an nawanto ya Iliya yǝ ɓaarǝ yǝ won sase ɓaata dem ɓǝn nkee me ǝndǝ ate fin a ɗaaso ɓan nawanto tang tang ɓa nisǝ wa.

⁹ Pa Hiridus ya nkee me, “Me ǝn Yohanna yen tom baptisma nya nǝ ntii ɓaa ɗǝm ɗuuran pa ndǝ yamni ɗǝm nǝn kurasǝ ɓǝsǝsa a ɗuura irau?” Yǝ kweetǝ me ya ta wǝr Yeso wa.

Yeso Nkwee Ɓeta Pusa puu Wonon

¹⁰ Pa ɓahona ɓosa ɓǝ kangsǝ wa, ɓaa nkee mbu ɓǝ tomsǝ ɓa nsaad, pa yǝ lee han sǝsa ma ɓosa seɗɗe ɓǝ faɗ a urko ǝn yarsǝ me Betsaida wa.

¹¹ Pa ɓet kwausǝ dem sǝɓa maasǝ maaso wa ɓaa ɓǝɗɗǝ yǝɓǝ nkee me nkwaata ma wo yǝɓǝ nkee mara a ɗuura kuɓsutu Kaa wa yǝ roɓ ɓaa ɓǝn taasǝ roɓo ɓa ɗǝm.

¹² Ɗikira tomsǝwa pa emfǝɗkaa ɓǝsa puu haa raɓ ɓǝ wo a sani ɓaa nkee me, “A ti pamo ɓet kwausǝ dem ɓa, me ɓǝ ko a ura sa ko ɓǝ kǝr mbuseya ma han ɓǝkǝ tǝr ɓa, me han ndǝsǝ ɓa, ɓeta sem a han ɓa ra.

¹³ Pa Yeso yǝ kak me, “Saase sǝɓǝ na mbu ɓǝkaa se ɓa.” Pa ɓǝ kak me, “Tǝ ma nkaadǝng wonon ma nsenya raɓ maɗ, ndub me tǝ ko tǝ tiri mbuseya ɓet kwausǝ dem ɓa nsaad.

¹⁴ (Parata ɓǝsǝ kǝnso ɓa, ɓǝ kan pusa pu pu wonon nǝn.) Pa Yeso ya nkee, “Emfǝɗkaa ɓǝsa me sǝɓǝ ti ɓǝ kaɗ handa handa pu wonon pu wonon.”

¹⁵ Pa emfǝɗkaa ɓǝsa ɓǝ tom maaso hana yamni yǝ kaɗ nɗa.

¹⁶ Yǝ tosǝ nkaadǝng wonon ma nsenya raɓ paya haa nuwa ya sengge ɓoti a liura ya na himara Kaa paya ɓaa yǝ na emfǝɗkaa ɓǝsa me ɓa na ɓeta.

¹⁷ Nsaad ɓeta ɓǝ kǝu ɓǝ nkwee, ɗǝm emfǝɗkaa ɓǝ kwau nyǝwǝrta pesǝ wa, a kung hote pu nhaa raɓ.

Bitrus Nkee Əndǝ Yamni Yesou

¹⁸ Kakake kǝn Yeso yǝn kǝna Kaa ham ɓeta semra ɓa pa emfǝɗkaa ɓǝsa ɓǝ ke ma sase yǝɓǝ taa me “Ɓeta ɓǝn nkee me, nǝn yamniu?”

¹⁹ Ɓǝ kak me, “Ɓaata ɓǝn nkee me, Yohanna an tom Baptisma nya, ɓaata ɓǝn nkee me, ǝn Iliya, ɓaata ɓǝn nkee me, fin a ɗaaso ɓannawanto tang ɓa nii sase.”

²⁰ “Pa waso kau? Sǝn nkee me nǝn nyamniu?” Pa Bitrus yǝ kak me, “Ngǝn Almaseho Kaa ya.”

²¹ Pa Yeso yǝɓǝ wiin ngwee me ɓǝ nkee yaake ra.

²² Paya nkee me, “Au Edteya kiya wee kongsa ɓolɓol a wiina, nek mbusa ɓa firisa kwang kwang sa ma malǝma masaka sa kaa ɓisi ɗaɗ ɓaa kaa todɗo pa a tǝrma taatǝn ma ɓaa ka niki ya tomma huurtu.”

²³ Pa yǝɓǝ nkee nsaad me, “Yaa yǝn taasǝ me yǝnǝ ɓǝɗ ya, tomon ɗaɗ yǝ mbisi nkweera ira, pa yǝ too kwaakǝra ira nfee, yǝnǝ ɓǝɗǝ.

²⁴ Me hana yamni yaa yǝn taasǝ me yǝ noo ma huurtu usu ya, kaa leetǝ, pa hana yamni yaa yǝ leetǝsǝ huurtu usu men niina ya, kiya taa.

²⁵ Ən mbi ete kiya na me kon nkweera huurtu pa karese wau?

²⁶ Me yake yǝn kura ɗuura waarana ma mara na Au Edteya kiya kura ɗuura waara ira me yǝ wo a kwangto usu ma kwangto u Papsiwa ma ɓan timira Kaa ɓa wan.

²⁷ Nǝn nkeesǝ ɓongtǝra, ɓaataka kǝn kǝɗ kǝɗ a han ɓa, ɓǝ pǝta woɗɗa ra, ndub me ɓǝ wǝr kuɓsutu Kaa wa, wo ma kwangton.”

Weɗa Kwangto Yeso wa

²⁸ Tǝro kurkurun nɗiira Yeso nkeesǝ ɓǝsǝsa wa ya too Bitrus, Yohanna ma Yakubu ke ma sase ɓa ko ɓoti a yolo me ɓǝ ko a kǝnara.

²⁹ Yǝsa kǝnara wa pa ota ira aa faki pa luktu a mabiri isǝ ra a kang peng peng nga mbu wedsǝnweɗ ɓa.

³⁰ Ɓeta raɓ Musa ma Iliya,

³¹ Ɓǝ weɗa nkweera ɓora kwangto ɓǝ liki ɓǝn kan kan ma Yeso. Ɓǝn kan ɗaaso yǝkaa faɗ ɓǝsa wa mara ira kǝya kongo ya woɗo me Urshalima.

³² Bitrus ma sik ɓǝsa ɓaa muda pa ɓǝ kumasǝ wa ɓa wǝr too kwangto Yeso wa ma ɓeta raɓ parata ke ma sase.

³³ A fer ɓet sǝsa ɓǝn taasǝ me ɓǝ faɗ ɓǝ lee Yeso wa, pa Bitrus yǝ nkee Yeso me, An taanda ya, tomon yaɓ ndǝsa a ham ɓa wa, a lee ndǝ werkǝ pilang taatǝn, fin nwaango, fin u Musa wa, fin ɗǝm u Iliya wa. (Yǝ maa mbu yǝn nkeesǝ ɓa ra.)

³⁴ Bitrus yǝn kansǝn kan wa, pa liuta a fiɗ ɓǝ liki, kokto ɓǝ ma.

³⁵ Pa kwaro a fiɗ a liuta yǝn nkee me, “U nwa ndǝ Auwane u nǝ tausǝsǝ wa, saa kura.”

³⁶ Fer kwaro feɗsǝ wa, ɓǝ wǝr Yeso fin mbusa. Ɓǝ nkee atike mbu ɓǝ wǝrsǝ a fer susu wa ra.

Roɓ Auke Yǝsǝ Ma wis Saamse wa

³⁷ Handa nweesǝwa ɓǝ fiɗsǝ a yolo ɓa ham wa, ɓet kwausǝ dem ɓa, wo ɓaa wo.

³⁸ Atike a ɗaaso ɓaa ɓǝ kwausǝ ɓa, yǝ nik kwaro yǝ nkee me, “Malǝm nǝn kǝnǝ ngǝ a kura nyorata auwane ra, me ǝndǝ auwane fin susu.

³⁹ Wis nsaa wa, ǝn toosǝ ǝn tisǝ ɗǝm yǝ yauli semma yawo usu ra, ɗǝm ǝn fangsǝ maabiri usu a maɗki ee isi hik mɓukmɓuka ka, yǝn rimbi ɗǝmta ita, yǝn nasǝ kongsa dem.

⁴⁰ Nǝ kǝna emfǝɗkaa ɓǝnga me ɓaa hiki, pa ɓǝ nkaa ra.”

⁴¹ Yeso yǝ kak me, “Saa ɓaa kaareyase ɓa, ɓaa semma na ɓongto ra ɓa, tǝro miniu kǝnǝ kaɗ ma saaseu? Kǝnǝ sǝm ma saase tǝro miniu? Nga woma au sisi a ham ɓa.”

⁴² Au kaya yǝ wosǝ wa pa nsaa yaa mudku a putu ya ntii maɗɗo. Pa Yeso yǝ nkwaakǝ nsaa suwa, yǝ roɓ au kaya ya na pap isǝ.

⁴³ Weɗara ǝɓǝ ma nsaad ma too kwangto Kaa wa. Ɓeta ɓǝn kura weɗara ma mbu Yeso yǝn tomsǝntom ɓa pa ya nkee emfǝɗkaa ɓǝsa,

⁴⁴ “Sǝ fira ngwee a mbu kǝna nkee ɓa. Ɓaa kǝ fang Au Ete ya a nema ɓeta sa.”

⁴⁵ Pa ɓǝ ma mbu yǝn nkee ɓǝsǝ ɓa ra ɗǝm ndǝ mbu a nhukura ɓa a ɓoni me ɓa mara ɓǝ kura kokto ɗǝm ɓaa taa mbuka asi ra.

Yamni Kiya Tom Kwang ngǝu?

⁴⁶ Pa emfǝɗkaa ɓǝsa ɓǝ ntii renǝta a ɗaaso ɓoso me ndǝ yamni faɗsǝ kwangto a ɗaaso ɓosou?

⁴⁷ Pa Yeso yǝ ma mbu ɓǝn sensǝ ɓan, payǝ too auke ngeek yaa ti yǝ nǝɗ a kal usu.

⁴⁸ Pa yǝɓǝ nkee me, “Nsaad yaa yǝ nkeesǝ kwaata auwe ngeek yaa a ɗenda na ya, yǝ kona niina, ɗǝm nsaad yaa yǝ nkee nǝsǝ kwaata ya, yǝ nkee kwaata yaa yǝ tungnǝsǝ ya. Me yaa yǝsǝ ngeek a ɗaaso waaso nsaad ya, yǝn yaa kwang nya.”

⁴⁹ Yohanna ya nkee me, “Ya kwangya tǝ wǝr atike yǝn hik saamse a ɗenda nga pa tǝ kweetǝ me ya lee me yǝ sem a ɗaaso waɗo ra.”

⁵⁰ Yeso yǝɓǝ nkee me, “Saa sa ra me hana yamni yayǝ ɓǝsǝsa ra ya yǝ ke ma sase.”

Ɓaa Samariya Ɓa Ɓǝ Nkee Yeso Kwaata ra

⁵¹ Pa fer Yeso kiya kang ɓoti a liura wa kansǝwa ya nkee me kiya ko Urshalima.

⁵² Pa ya timi ɓantimira ɓa a wiiyo ɓǝ ko a em ura eɗ Samariya ya me ko ɓaa sǝk handa kweɗ.

⁵³ Pa ɓaa ɓǝsǝ kǝnso ɓa ɓǝ nkeesǝ kwaata ma wo ra me yǝ nǝɗ kǝ ɗuura ira yǝ ko Urshalima.

⁵⁴ Pa emfǝɗkaa ɓǝsa Yakubu ma Yohanna wǝrsǝ maaso wa ɓaa taa, “Ankundi ngǝn ta me ta kǝna Kaa ya hamma ara a liura ɓoti yǝɓǝ kǝɗɗǝu?”

⁵⁵ Pa Yeso yǝ kǝrtǝ yǝ kwakǝ ya nkee me, “Awo sem kwalari ra.

⁵⁶ Pa ɓa faɗ a au uura ke ɗǝm.

Kongsa A Ɓǝɗ Yeso wa

⁵⁷ Ɓaa sikoo a ɗǝɗa wa, pa atike yǝ nkee Yeso me, “Kǝ nǝ ngǝ ɓǝɗǝ a ham ngǝ kosǝ ɓa nsaad.”

⁵⁸ Yeso yaa kak me, “Tukɗaata ɓǝma npoomse ɓǝn kansǝya, ɗǝm rǝmɓa ɓǝ ma hitsa, pa Au Ete ya yǝ sem ma ham ki yaa tǝr ɓa ra.”

⁵⁹ Pa yǝ nkee eɗ ke me, “Ənǝ ɓǝɗǝ.” Pa eɗ kaya yaa kak me, “Ankundi, a lee ko nǝ hok paane nhe.”

⁶⁰ Yeso yaa nkee me, “A lee wote ɓǝ hok wote a ɓoso, pa nwaago ngo ko ngǝ nkee mara kuɓsutu Kaa wa ra.”

⁶¹ Atike ɗǝm same, “Kǝnǝ ngǝ ɓǝɗɗǝ, Ankundi pa a lee nǝ kang konǝ ti pamra ɗur nwaano.”

⁶² Yeso ya kak me “Hanna yamni me yǝ nhii sǝ nema a ɗore me kiya nwaa nyanyo ya me yǝ sengge nɗiira yǝ maa yǝ tom tinima Kaa ma ra.”