Luka 6 - Lala NT

Emfǝɗkaa ɓǝsa kau ɗuuti muuma ya a kaa nwiiya Yahudawa ɓa

¹ A kaa nwiiya Yahudawa ɓa, Yeso ma emfǝɗkaa ɓisa ɓǝn talǝntalǝ ma lau nyaanyo muuma wa, pa emfǝɗkaa ɓisa ɓǝ ntii kau ɗuuti muuma wa, ɓǝ huurtǝ a nema ɓosa, ɓǝ kǝuwǝ.

² Pa ɓaata Farisiyawa ɓa ɓǝ taa me, “Tomtomni sǝn tomsǝ mbu pam me kama a tom a kaa nwiiya Yahudawa ɓa rau?”

³ Yeso yǝɓǝ kak me, “Yǝ kak me, “Sǝ pǝta kauwo mbu Dauda yǝ tomsǝ a fer sase ma sik ɓisa ɓǝ kurasǝ ɗoora wa rau?

⁴ Yǝ kana hit Kaa wa, yǝ too nkaadǝng u ɗekɗek wa yǝ kǝuwǝ, u pamsǝ me kuɓsa nek mbusa sa seɗɗe ɓǝkaa kǝu wa. Pa yǝ na pera sik ɓisa.”

⁵ Pa Yeso yǝɓǝ nkee me, “Au Ete ya ǝn sase Ankundi Kaa nwiinya Yahudawa ɓa ya.”

Eɗ ma neme portǝsǝ ya

⁶ A kaa nwiinya ka ɓol ɗǝm, Yeso yǝ kana hit kwau Yahudawa ɓa yaa fǝɗkǝra, pa atike kǝn kǝnso ma nem seya sǝrsǝ.

⁷ Ɓaa Farisiyawa ɓa ma malǝma masaka Musa sa, ɓǝn kǝr ɗǝɗa kǝ ɓaasa ma ra, pa ɓaa nhii nuunwa ɓǝ wǝr ko kiyaa roɓ a kaa nwiinya ɓau.

⁸ Pa Yeso yǝ ma mbu ɓǝn sensǝ ɓan, ya nkee ya ma neme portǝsǝ siya yaa nkee me, “A nii kǝɗ nga nǝɗ wii ɓeta wa kong.” Eɗ kaya ya nii ya wo ya nǝɗ kǝɗ.

⁹ Pa Yeso yǝɓǝ nkee me, “Nǝn taasǝ, u nawa pamsǝ me a tom a kaa nwiinya Yahudawa ɓau? A tom mbu kwalari ɓau? Hana a tom mbu kwalakwala ɓau? A kon nkweera huurtu? Hana a toɗ huurtu?”

¹⁰ Yǝɓǝ sengge nsaad yaa leurǝ, pa ya nkee eɗ kaya me, “A mal nem nyaange.” Pa yǝ mal nem isi, nem kaya a roɓɓo.

¹¹ Pa ɓaa Farisiyawa ɓa, ma malǝma masaka Musa sa ɓa kung ma nfiima, ɓa ntii kanno a ɗaaso ɓoso mbu kǝɓaa tom Yeso ɓa.

Yeso tau ɓahona puu haa raɓ

¹² A tǝrma sǝma Yeso piɗ ya faɗa a yolo mee ko ya kǝna Kaa, yǝ peɗ pǝrtǝra kong yǝn kǝna Kaa.

¹³ Handa nweesǝwa ya yar emfǝɗkaa ɓǝsa ya tau puu haa raɓ a ɗaaso ɓoso yǝɓǝ yar me ɓahona,

¹⁴ nwa ndǝ ɓosa, Siman u Yeso wosǝ yaa yar mee Bitrus wa, ma kobɓisi Andarawus, ma Yakubu, ma Yohanna, ma Filibus ma Bartalamawus,

¹⁵ ma Matta ma Toma ma Yakubu au Halfa ya, ma Siman yaa ma rǝmara put usu ya,

¹⁶ ma Yahuda au Yakubu ya ma Yahuda Iskariyoti yaa yǝ kangsǝ yaa fang nya.

¹⁷ Pa Yeso ya ham ma ɓahona sisa, ya nǝɗ talte ke ma emfǝɗkaa ɓǝsa ma ɓeta dem, u ɓǝ piɗsǝ nsaad a put Yahudiya ma Urshalima wa ma put Taya ma Sidon wa, u ɓǝsa ee aulaara ya wa.

¹⁸ Ɓǝ wo mee ɓaa kura, pa ɗǝm ɓa taa roɓo a siya ɓosa, ɓaa a roɓ ɓa ɓǝsǝ ma wis nsaamse ra ɗǝm.

¹⁹ Hana nyamni taa mee yaa ntee, me kwangto fiɗa maabir isi yǝɓǝ roɓ nsaad.

²⁰ Yeso yaa sengge emfǝɗkaa ɓǝsa yǝɓǝ nkee me, “Saltǝra yǝ kaɗan a sani ɓaa sǝ maasǝ hanoo waaso ɓa, me Kuɓsutu Kaa wa ndǝ waaso

²¹ Saltǝra yǝ kaɗan a sani ɓaa ɓǝsǝ ɗoora waso ɓa, me kǝsǝ nkwee. Saltǝra yǝ kaɗan a sani sase ɓaa ɓǝsa a oro waso ɓa, me kǝsǝ nhuu.

²² Saltǝra yǝ kaɗan a sani me ɓeta mbisǝsǝ, me ɓǝ werǝsǝ, ɗǝm me ɓǝ sǝrsǝn, me ɓǝ ɓisi ɗǝnda sa nga mbu kwalakwala ɓa men Au Ete ya.

²³ “Sǝ hurkuɗa kaasǝsa, sǝ pur me kwalo, me sǝkǝ kon nsaa kwalari wa ɓoti a liura. maaso sirta ɓota ɓǝ tomsǝ ɓannawanto ɓa wa.

²⁴ Pa kǝ tom mbu maya maya ɓa, saa ɓa ma kǝnaa ngawa ɓa, sǝ se nepto waason,

²⁵ kǝ tom mbu maya maya ɓa, saa ɓa nkweesǝ ɓa, ɗoora kǝsǝ si, kǝ tom mbu maya maya ɓa, ɓa ɓǝn huusǝ ngawa ɓa, kǝsǝ tǝblǝ kuɗa sa tee oro,

²⁶ Kǝ tom mbu maya maya ɓa saa ɓa tǝnaa ǝn nyoosǝsǝ ɓa, winaa ɓosa tang ɓa nyoo pa ara ɓan nawanto Kaa tang ɓa maaso.

Sǝ yau ɓaataker ɓǝsa

²⁷ “Pa nǝn nkee sǝ, saa ɓa sǝn kura nǝsǝ ɓa, sǝ yau ɓaataker ɓǝsa, se tom mbu yaɓ ɓa ɓaa ɓǝn bisisǝsǝ ɓa,

²⁸ Sǝ ti saltǝra ɓaa ɓǝn tomsǝsǝ meeto ɓa, sǝ tom kǝnara ɓaa ɓǝn hansǝsǝ ɓa.

²⁹ Me yaake ɗaktǝngǝ a laura seya ra, aa kǝrtǝ kwasa ɗǝm. Me yaake kon ngǝ laulauwara, ngǝn sa kon luktu nwaago wa ra ɗǝm,

³⁰ A na hana yamni yaa yǝ kǝna ngǝsǝ mbuka ya, ɗǝm me yaake too mbu ɓǝnga, ngǝ kong taa me yǝ ngǝ kang ra.

³¹ Sǝ tom ɓaata ngaa sǝn taasǝ me ɓǝ sǝ tom ɓa.

³² “Me sǝn yau ɓaa ɓǝn yausǝsǝ ɓa maɗ, ndǝ minira mbi kǝsaa taau? Hana ɓan ma tenatento ɓa ɓǝn yau ɓaa ɓǝn yauɓǝsǝ ɓa.

³³ Ɗǝm me sǝn tom mbu yaɓ ɓa ɓaa ɓǝn yausǝsǝ ɓa seɗɗe, ndǝ minira mbi kǝ saa taau? Hana ɓan tentenato ɓa, ɓǝn tom maaso.

³⁴ Me sǝ na kwano ɓa kǝɓaa nkaa ɓǝsǝ puu ɓa maɗ, pa sa tom ma saltǝrau? Hana ɓan ma tenatenato ɓa, ɓǝn na kwano ɓet tenatenato ɓa a ɓoso me kǝɓǝ puu keke!

³⁵ Sǝ yau ɓaataker ɓǝsa, sǝɓǝ tom mbu yaɓ ɓa, sǝɓǝ na kwano semma senda me ɓǝsǝ kang ra. Pa taa mbuka kongsǝsaa wa kǝ tom kwang, pa ɗǝm sǝkǝ tom em Kaa a liura ɓoti ɓa, me yǝn weɗe mayamayato ɓa ɓǝsǝ tentena ɓa.

³⁶ Sǝ tom ma manyamanyato, nga Paase yǝ sǝ ma manyamanyato wa.”

Sǝ tom kiita ɓaatǝ ra.

³⁷ “Sǝ kan kiita ɓaatǝ ra, me saase kǝn ǝsǝ ti mara ra. sǝ nǝng kiita ɓaatǝ ra me ɓaa ǝnsǝ nǝng kiita ra, sǝ lee ɓaatǝ a senda, me ɓaa ǝnsǝ lee a senda kǝn.

³⁸ Sǝ na saase kǝn ɓaa kǝsǝ na nkoo maa mbuka wa kungsǝ peperen roo a putu sa haa ma neme. Pa ma tasa sǝ maasǝ ɓaata wa, ma siso ɓaa kǝ sǝn maa wa.”

³⁹ Pa Yeso yǝɓǝ nkee mǝdkǝ mara wa ya nkee me, “Ntaara kiya nkaa ya win ate ntaara ya kwalagou? Ɓǝ nwii kong a npoo rau?

⁴⁰ Aufǝɗke yǝ faɗ malǝm usu ra, pa hana yamni fǝɗkǝsǝ nyorma ɓong ɓong ya, kiya tom nga malǝm usu.

⁴¹ “Tomtomni ngǝn sengǝsǝ au ntaangǝra a nuu ate nyaange wa, pa ngǝ sengge ma kulura yǝsǝ a nuu nwaago wa rau?

⁴² Kǝ ngǝ tomtomni ngaa nkee ate nyaange me, ‘Ate nyaane, a lee nǝ ngǝ hik au ntaangǝra a nuu nwaago ya,’ si nkweenrange ngǝ wǝraa kulura u a nuu nwaago wa rau? Ngase an ma ɗǝlmara raɓ ya, ngǝ ntii ngǝ hik kulura a nuu nwaago ra nhe, pa kǝ ngǝ wǝr ɗekɗek ngǝ hik au ntaagǝra a nuu ate nyaange wa.

Ɓan maa nkaamǝr ɓota ra ma emɓǝsa

⁴³ “Ɓot kwalari ka sem kǝn, kiyaa nsee emba kwalakwala wa ra, hana ɓot kwalakwala ka sem kǝn, kiyaa nsee emba kwalari wa ra.

⁴⁴ Hana ɓot na ɓa, ɓan maasǝ ma em ɓisa. Ɓan ɗot em sata ɓa a tǝuteu, hana emngwate inabi ɓa a longgǝrau.

⁴⁵ Eɗ yǝsǝ kwalari ya, yǝn fiɗ ma mbu kwalari ɓa a kuɗa ira, ɗǝm eɗ kwalakwala ya yǝn fiɗ ma mbu kwalakwala ɓa a kuɗa ira. Me mbu yǝsǝ a kuɗa ira ɓa, ǝn siso yǝn fiɗsǝ a ee isi wa.

Ɓeta raɓ ɓan mar mbusa ɓa

⁴⁶ “Tomtomni sǝn yarnǝsǝ me ‘Ankundi, Ankundi,’ pa sǝ sǝkaa mbu nǝ nkeesǝ me sǝ sǝk ɓarau?

⁴⁷ Nsaad yaa yǝ wosaa nani nya, yǝ kura mara na nya, yaa tom tinima ma siso ya, kǝ nǝ sǝ weɗe mǝɗkǝra ira.

⁴⁸ Yǝ ngaa eɗ yǝ marsǝ hito ya, yaa yǝ nsaasǝ npoo kututub ya, pa yǝ ntii mar hito a ham tel ɓa wa. Pa aulaara kungsǝ talar wa, yoro kokrok wa yǝ wo yǝ sak hit kawa, pa yǝ nyaasǝ ra, me ɓaa mar hit kawa a ham tel ɓa.

⁴⁹ Pa yaa yǝ kurasǝ mara na nya, pa yǝ tomsǝ tinima ra ya, yǝ ngaa ete, yaa yǝ marsǝ hito a nsera ya. A fer seno kokrok wosǝ wa, yǝ sak hit kawa yǝ nwii yǝ ookǝ kwalakwala.”