Luka 24 - Lala NT

Nii Yeso a ntiina wa

¹ A kaa ntiiri tǝro mbutu wa, nakǝn ma ɗǝnda toone ɓǝ haa yara u ma seera yabwa ɓa ko a tiina.

² Ɓǝ taa ɓaa tǝng ɗungara a ee tiina yan,

³ pa ɓǝ kansǝwa ɓǝ wǝr mabiri Ankundi Yeso wara.

⁴ Fer senda ɓora a nii nok siso parata raɓ ɓǝ nǝɗ a kal ɓoso ɓǝ tungsǝ lukta pengpeng nga weɗweɗɗo.

⁵ A kokto ɓoso toona ka ɓa ɓǝ ntii maa ɓǝ nhii oota a putu pa parata ka ɓa ɓǝ nkee me, “Tomtomni waso sǝn kǝrsǝ ya ma huurtu ya a ɗaaso ɓa ɓǝ wodsǝ ɓau?

⁶ Yǝ sem a hamɓa ra yǝ niin! Se ɗimma mbu yǝ nkesǝsǝ ɓa a fer sǝsǝ ke ma sase Galili wa yǝ nkee me,

⁷ ‘Au Ete ya ɗaɗ ɓaa ka na a nema ɓan tenatenatoɓa, ɓa ka kwaakǝ ɗǝm a ka tatǝnɓa kiya nii ɗǝm.’ ”

⁸ Pa ɓǝ ɗimma a mara ira.

⁹ Ɓǝ fiɗsǝ a ham ntiina ɓa wa ɓǝ nkee mbusǝsǝ nsaad ɓa puu haa fin sǝɓa nsaad ma ɓaata.

¹⁰ Ən Maryamu Magadaliya, Yuwana, Maryamu maa Yakubu ya, ma ɓaata ke ma ɓosa ɓǝ nkee mbusa ɓahona wa.

¹¹ Pa ɓǝ yau ma mbu toona sǝɓa nkee ɓǝsǝ ɓa ra me ɓǝ wǝr mara sǝra ǝn hautǝma.

¹² Tomsǝ maaso wa Bitrus ya ni, ya mon ya ko a ham ntiina ɓa, yǝ ntisǝ maa wa ya wǝr luktu ɓa mbǝrkǝsǝ Ankundi ɓa sedɗe. Pa ya faɗ mbusa yǝn wǝr weɗara ma mbu tomsǝ ɓa.

Emfǝɗkaa raɓ a ɗǝɗa Imawus ra

¹³ A ka sǝsa emfǝɗkaa raɓ ɓǝn koko a urko yarme Imuwasu mǝbmǝb u, kansǝ kilimeta puu haa fin a kan Urshalima wa.

¹⁴ Ɓǝn kankana a ɗaaso ɓoso a mbu tomsǝ ɓa.

¹⁵ Ɓǝn kansǝnkan a ɗaaso ɓoso wa a mbu tomsǝ Yeso ɓa wa pa Yeso ma nkweera ira ya ko yǝɓǝ ntee ɓǝ siki ke.

¹⁶ Kaa yǝ ti ɓǝ maa ma sǝra.

¹⁷ Yǝɓǝ ta me, “Sǝn kan mara mbi rau a ɗaaso waaso a sikou?” Pa ɓa nǝɗ ɓǝ siwi ɓǝn sengge putu.

¹⁸ Fin a ɗaaso ɓoso ǝn yarsǝ me Kiliyobas, yaa ta me, “Nwango ngǝn wee Urshalima ngǝ maa mbu tomsǝ a tǝrma ma warau?”

¹⁹ Pa yǝɓǝ taa ka ndǝ, “Mbiu?” “A ɗuura Yeso ya Nazarat ya,” ɓǝ kakka. “Yǝn ya nawanto ya mara ira ma kwangto asi ma mbu yǝn tomsǝ ɓa a wii Kaa wa ma ɓeta nsaad.

²⁰ Wiina ɓan nek mbusa ɓa ma kuɓsa sǝta ɓǝ nasǝ me ɓa a kan kiita wadawa ɓaa kwaakǝ.

²¹ Pa tǝn ti senda me ndǝ sase kiya kang kon nkweera Isra'ila wa. Nga wa nawa tǝrma taatǝn mbu nsaad ɓa tomsǝwa.

²² Ma sokǝra ɓaata toona ɓǝ ta ɓǝ natǝ yalira. Ɓǝ ko a ham ntiina ɓa nakǝn naso ma ɗenda,

²³ pa ɓǝ ta mabiri isi ra ɓǝ wo ɓǝtǝ nkee me ɓǝ wǝr nga rotǝma ɓan timira Kaa ɓa, ɓǝ fǝɗsǝ a liura ɓa, ɓǝ nkee ɓǝ me Yeso yǝma huurtu.

²⁴ Pa ɓaata a ɗaaso waata ɓǝ ko a ham ntiina ɓa koɓǝ wǝr nga toonasǝba nkeesǝwa pa ɓǝ wǝr Yeso ra.”

²⁵ Yǝɓǝ nkee me, “Sǝn hauta sǝ naa ɓongtǝrato na kǝn ma mbu ɓan nawanto Kaa ɓǝ nkesǝwara!

²⁶ Ɗaɗ Krisiti ya wee kongsa mbu ɓa nhe pa ya kan a too Kaa wa usu rau?”

²⁷ Ntinyo ma Musa ma ɓan nawanto ɓa nsaad yǝɓǝ nkee mbu ɓa nkeesǝ a likarkar kwangwa ɓa a ɗuura ira.

²⁸ Ɓǝ kosǝ kwang ma uru ɓǝ kosǝ asi wa Yeso yǝ tom nga kǝya talǝ a wiyo.

²⁹ Pa ɓaa kǝna me a tǝr a tani, me ɗikira tomon kaa kanan, paya ko koya kaɗa ɓoni.

³⁰ Ɓǝn sesǝ mbuseyan se wa, ya too nkaadǝng, yǝ na himara Kaa yǝ ɓaa kǝ, yǝ ɓǝ na.

³¹ Pa nuwa ɓosa a wili ɓaa maa, pa ya leete a hamsǝsa.

³² Ɓǝ ta ɓaatǝ me, “Seura nda paa fer yǝn kansǝnkan ma ndase a ɗǝɗa wa yǝ wilsǝ likarkar Kwangwa rau?”

³³ Ɓǝ ni ɓǝ kang Urshalima nok siso. Kǝnso ɓǝ ta ɓa puu haa fin sǝɓa ma ɓaata ke ma ɓosa a ham fina

³⁴ ɓǝn nkee me, “Ən ɓongtǝra! Ankundi niin ɗǝm yǝ weɗa ee usu Siman.”

³⁵ Pa ɓa raɓ sǝɓa ɓǝ nkee mbu tomsǝ a ɗǝɗa ɓa ma fer ɓǝ masǝ mǝn Yeso wa ma ɓaakǝsǝ nkaadǝng yǝ tomsǝ wa.

Yeso weɗa ee usu emfǝɗkaa

³⁶ Ɓǝn kansǝ mara sǝra wa, Yeso ma nkweera ira yǝ nǝɗ a ɗaaso ɓoso yǝ ɓǝ nkee me, “Naupa a sani.”

³⁷ Pa kokto ɓǝ ma ɓǝ madki, ɓǝn nkee me ko ǝn simo.

³⁸ Yǝɓǝ nkee me, “Sǝn kura kokto mbiu, ɗǝm sǝn tom pǝnoo a senda sa mee ǝn mbiu?

³⁹ Sǝ sengge nemasǝna ma nasǝna. Ndǝ niina! Sǝna ntee sǝ sengge simo yǝ semma solta ma tǝute nga sǝn wǝrsǝ nǝsǝ ma siyo wara.”

⁴⁰ Yǝ nkeesǝ mbusǝsa maaso wa, yǝɓǝ weɗa nema isa ma natsa isa.

⁴¹ Pa ɗǝm ɓǝ na ɓongtǝra ra me kuda hur ɓǝn ma yalira, yǝɓǝ ta me, “Sǝma mbuseya a ham ɓau?”

⁴² Ɓaa na yoosǝra nseyara,

⁴³ paya kono ya kǝuwǝ a wii ɓoso.

⁴⁴ Yǝɓǝ nkee me, “Mbu ɓa ǝn mbu nǝ nkesǝsǝ ɓa fer nɗǝsǝ ke ma sasewa me mbusǝsa nsaad kǝ kungu a ɗuura mbu ɓa nyorsǝ a Masaka Musa wa, ɓan nawanto Kaa ɓa ma Zabura.”

⁴⁵ Pa yǝɓǝ wil senda me ɓǝ maa likarkaraa.

⁴⁶ Yǝɓǝ nkee me, “Ən mbu nyorsǝ ɓa: Krisiti kiya wee kongsa ɗǝm kiya nii a woda ira a ka tǝrma tatǝnɓa,

⁴⁷ ɗǝm konpatawa ma lee a senda mbu tenatenato ɓa, ɓaakǝ nkee ɓeta a ɗǝnda ira a put ntaadiwa nsaad kǝ ntii Urshalima.

⁴⁸ Sase sǝkǝ wǝr mbu tomsǝɓa nsaad kosǝ nkee ɓaata kǝn mbu tomsǝ ɓa.

⁴⁹ Kǝnǝ ko nǝsǝ tung mbu Paane yǝ nkeesǝ, me kǝyǝsǝ tung ɓa pa sǝ kaɗ a uru ndub me ɓaa nasǝ kwangto Kaa wan.”

Ɓaa too Yeso a ko a liura

⁵⁰ Pa yǝɓǝ to yǝben a kal uro ǝn yar me Betaniya, yǝ nik nema sisa ɓoti yǝɓǝ na saltǝra.

⁵¹ Yǝn na ɓǝsǝ saltǝrawa, yǝɓǝ lee ɓa too asa ko ɓoti a liura.

⁵² Pa ɓaa nyoo ɓǝ kang Urshalima ma kuda pengpengra.

⁵³ Nfee ɓǝn kaɗ a Hit Kaa Urshalima wa ɓǝn nyoo Kaa.