Luka 23 - Lala NT

Ɓaa kosǝ ma Yeso a Bilatus ni

¹ Pa nsaad ɓan mara ɓa ɓǝ kwausǝ ɓa ɓǝ nii kǝɗ ɓǝ ko ma Yeso a wiyo a Bilatus ni.

² Pa ɓǝ ntii paa parawa ɓǝn nkee me, “Tǝ wǝr eɗ ɗa yǝn rǝka put waado. Yǝn nkee, ɓeta me ɓǝ kwan samra Kaisar ra yǝn nkee me yǝn Almaseho kuɓu.

³ Pa Bilatus yǝ taa Yeso me, “Əndǝ ngase kuɓ ɓaa Yahudiyawa ɓa wau?” Yeso yaa nkee me, “Ngǝ nkeen keke.”

⁴ Pa Bilatus ya nkee, winaa nek mbusa ɓa ma ɓa kausǝ ɓa me niina “Nǝ wǝr mbu eɗ ɗa yǝ tomsǝɓara.”

⁵ Pa ɓǝ ntii ɓaa haɗ ɓee ɓǝn nkee me, “Fǝɗkǝra ira ǝn nik senta ɓeta a put Yahudawa nsaad. Yǝ ntii a put Galili wa waso ɗǝm ya han ɓa.”

⁶ Yǝ kurasǝ maaso wa, Bilatus ya taa me ǝndǝ eɗ yaa Galili yau?

⁷ Pa Bilatus yǝ kurasǝ me Yeso fiɗ a put Hiridus yǝn tomsǝ kuɓsutu wa, paya tung Yeso a Hiridus ni a fersiso Hiridus yǝ Urshalima.

⁸ Pa Hiridus yǝ wǝrsǝ Yeso wa yǝ hur kuɗa me kayǝn kǝr ɗǝɗa kiyasa wǝrra me yǝ kura mbu Yeso yǝn tomsǝ nhiinyanhiinya ɓa yǝn yaume Yeso yaa tom mbu nhiinyanhiinya ɓa yǝ wǝrǝ.

⁹ Pa Hiridus yaa taa mbusa dem, Yeso yǝ kak hana fin da.

¹⁰ Pa kuɓsa nek mbusa sa, ma malǝma masakasa ɓǝ wo a wiyo ɓǝ pa para dem a ɗuura Yeso ra.

¹¹ Hiridus ma sosamse isi ɓǝ ntii nhuura ɓa binira. Ɓaa tung winee luktu ya ɓǝ ɓaarǝ ɓaa tung a Bilatus ni.

¹² A kasǝsa Hiridus ma Bilatus ɓǝ tomsǝ siktǝra wa, kaɓǝ yawaa me ɓǝ wǝr ɓaatǝra.

¹³ Bilatus yǝ kwau wiina nek mbusa ɓa ma kuɓsa ma ɓeta nsaad,

¹⁴ yǝɓǝ nkee me, “Sǝ wosǝnǝ ma eɗ ɗa me yǝn rǝka ɓeta. Panǝ taasǝsǝ a wii wasowa nǝ wǝrsǝ ma mbusǝ nkeesǝ ɓa ra.

¹⁵ Susu kwasǝ hana Hiridus yǝ tungsǝsǝ ya wo a dani wa eɗ ɗa yǝ tom mbuka u pamsǝ me aa todwara.

^16-17 Me maaso kǝnaa hobɓo naa lee ya faɗ mbusa.

¹⁸ Pa nsaad ɓǝ yauli ɓǝn nkee me, “Soosǝsǝ a wiyo sǝtǝ lee Barabbas!”

¹⁹ (Ka ɓa neu Barabas me yǝ nik kito a ur susu a tod ate ke.)

²⁰ Pa Bilatus ya ɓaarǝ yǝɓǝ nkee me yǝn yaume kǝya lee Yeso.

²¹ Pa ɓǝ ɓaarǝ ɓǝn yauli me, “Saa kwaakǝ! Saa kwaakǝ!”

²² Bilatus ya ɓaarǝ ya nkee ɗǝm nkee taatǝn wa me, “Meen mbiu? Eɗ ɗa yǝ tombiu? Niina nǝ wǝr mbu eɗ ɗa yǝ tomsǝ u masǝ wodɗa wa ra? Kǝnǝ ti ɓaa hobɓo a lee ya faɗ mbusa.”

²³ Pa ɓǝ nǝɗ kǝɗ ɓǝn nkee me aa todɗo aa todɗo, siso kwasǝ Bilatus yǝ faki senda wa.

²⁴ Pa Bilatus yǝ yau ya nǝng kiita u ɓǝ yausǝ wa.

²⁵ Yǝ ɓǝ lee u ɓǝ nkeesǝ me yǝɓǝ lee wa ka ɓaa neusǝsǝ me yǝ nik kito a ur susu a tod yaake wa. Pa Bilatus yǝɓǝ na Yeso me ɓaa tom mbu ɓǝ yausǝ me ɓǝkaa tomɓa.

Ɓaa kwaakǝ Yeso

²⁶ Pa sosamse ɓǝn kosǝnko ma Yeso wa, pa ɓa pama eɗ ke ǝn yarsǝ me Siman eɗ Sayirin ya yǝ fiɗ a urko yǝn wowo Urshalima, pa ɓaa ti ɓot kwaakǝra ɓa me yǝ to ya ɓǝɗ Yeso ndiira.

²⁷ Ɓeta dem ɓǝn ɓǝɗ Yeso ndiira wa a ɗaaso ɓoso toonǝke kǝn ɓǝn tesǝwa ɓǝn yaulisǝ me sase.

²⁸ Pa Yeso ya kǝrtǝ a ɓoni yǝɓǝ nkee me, “Toona Urshalima ɓa sǝ tee me niina ra sǝ tee me kwerasa ma emɓǝsa.

²⁹ Me ferko kǝn ka wowa u ɓeta ka nkee me, ‘Mbu hur kuɗaɓa a toona ɓǝ pǝta haa ra ɓa, ɓa ɓǝ naa toora auwe ra ɓa!’

³⁰ A fer sǝso “ ‘ɓeta ɓǝkǝ nkee ɗungate me, “Sǝ ham a ɗuura ta!” ɓǝkǝ nkee kolla me, “A pursu seeta ǝtǝ liki!” ’

³¹ Me parata ɓǝn tom ɓǝsǝsa ma pitira ɓota ra esǝra kau kiya tom niu?”

³² Pa ɓa ko ma parata ka raɓ, me ɓa ɓǝ toɗ ke ma Yeso.

³³ Ɓǝ kosǝ a han ɓan yarsǝ me, Golgota wa, ɓaa kwaakǝ kǝnso ke ma nkwiinya raɓ fin nem seya ya, yaa fin nya a nem kwasa ya.

³⁴ Pa Yeso yaa nkee me, “Paapa ǝɓǝ lee me ɓǝ maa mbu ɓǝn tomsǝ ɓa ra.” Ɓǝ ɓaa laulaura ira ɓǝn tomsǝ pala.

³⁵ Ɓeta ɓǝ nǝɗ ɓaa sengo, winaa ɓosa ɓa nhuu ɓǝn nkee me, “Yǝn hik ɓeta ya hik nkweera ira rau me ǝn sase Almaseho u Kaa yǝ tausǝ wa.”

³⁶ Sosamse ɗǝm ɓǝn nhuusǝ ma ɗǝɗa, ko sani ra koɓaa na mbraa sǝusǝu ma.

³⁷ Ɓǝn nkee me, “Me ngase kuɓ ɓaaYahudawa ɓa wa a kon nkweera nga rau?

³⁸ Nyorma kǝma kǝn a ɗuura ɓot ɓaa kwaa kǝsǝsǝ ɓa ǝn nkee me, U NWA ƏN YESO, KUƁ ƁAA YAHUDAWA ƁA WA.

³⁹ Fin a ɗaaso nkwiiya wa u ɓaa kwaakǝ ɓǝsǝ ke ma sase wa yǝ nkee mara kwalakwala me, “Namko ngǝ nkee me ngase Almaseho? Yaa a kon nkweera yaage ma tase nsaad rau!”

⁴⁰ Pa ya fin ya yaa kwaakǝ ya nkee me, “Ngase ngǝ kuraa kokto Kaa wa rau kiita waado keke ma usuu?

⁴¹ Waado keke ma mbu ndǝ tomsǝɓa pa eɗ ɗa kau yǝ tom mbu kwalakwala ɓa ra.”

⁴² Pa yaa nkee me, “Yeso a ɗimma niina me ngǝ woon a kuɓsutu nwaangon.”

⁴³ Pa Yeso yaa nkee me, “Nǝn nkee ngǝ me naso wa ndǝ kee ma ngiinga a liura.”

Woɗ Yeso wa

⁴⁴ Si kaa ɗa, pa handa a tom tebteb put siso nsaad. A ko a fer ɗikira wa.

⁴⁵ kaa yǝ too handa ɗekɗek ɗǝm ra. Luktu ɗaan a Hit Kaa Urshalima wa a nsaatǝ handa raɓ.

⁴⁶ Pa Yeso yǝ nik kwaro ma kwakwato yǝ nkee me, “Paapa, nǝn na huurtu nwaano a nem yaage.” Yǝ nkeesǝ maaso wa yǝ lee huurtu usu.

⁴⁷ Ya kwang sosa yǝsǝ kǝnso wa, yǝ wǝrsǝ mbu tomsǝ ɓa wa pa ya nyoo Kaa ya nkee me, “Ɓongtǝra eɗ ɗa ǝn ya ɗekɗek ya.”

⁴⁸ Pa ɓeta nsaad ɓa ɓǝ kausǝ me ɓa sengge ham mbusǝsa tomsǝɓawa, ɓǝ hob kango ɓa kang ɓobɓǝsa.

⁴⁹ Pa ɓaa ɓǝ masǝsǝ ɓa nsaad, emba ma toona fiɗsǝ Galili ɓaa ɓǝɗ wa ɓǝ nǝɗ mǝbmǝb ɓǝn sengge mbusǝsa.

Hok Yeso wa

⁵⁰ Nawa atike kǝn ǝn yarsǝ me Yusufu, ya ɗaaso ɓan kan mara a kuɓu Yahudawa ɓa ni ɓa ndǝ ete kwalari an kura kokto Kaa wa ya,

⁵¹ Ɓa yǝ yau ma mbu ɓǝn taasǝ me ɓǝ tomwara. Yǝ fiɗ a ur Ɓaa Yahudiyawa ɓa, ǝn yarme Arimatiya ɗǝm yǝn war kuɓsutu Kaa wa.

⁵² Yǝ ko a Bilatus ni me ko yǝ kǝna maabiri Yeso ya.

⁵³ Pa yaa ham ma mabiri Yeso ya, ya mbǝrkǝ a luktu hok woɗawa, ya ti ɗaan a tina u nsaasǝ ɗaan a ɗungara u ɓa fǝtǝsǝ ti yaage ra wa.

⁵⁴ Ndǝ ka waro nga, wiiya Yahudawa ɓa kǝk a ntii.

⁵⁵ Toonaka ɓǝ wo ke ma Yeso fiɗ Galili ɓǝ ɓǝɗ Yusufu ɓǝ wǝr tiina ma mabiri tisǝ ɗaan wa.

⁵⁶ Pa ɓǝ kang ɗuuru, ɓǝ werkǝ yar puk puk nseera yabwa. Pa ɓǝ wii ka nwiiya Yahudawa ɓa me ɓǝn na mbarta masaka Musa wa.