Luka 22 - Lala NT

Yahuda yawan me kiya fang Yeso

¹ Ngawa Tadkoma u nkaadǝng yisti semra wa, ɓaa Yahudawa ǝn yarme hiira Tadko ǝn wowo,

² Winna nek mbusǝsa ɓǝn kǝr ɗǝɗa ɓǝkaa tom ɓa ma Yeso ra, pa ɓǝn kura kokto ɓeta wa.

³ Pa Kuɓ Nsaa wa yǝ kanaa Yahuda Iskariyoti ni, ya ɓan yarsǝsǝ me , ya fin a ɗaaso emfǝɗkaa puu nhaa raɓ ɓa.

⁴ Pa Yahuda yǝ ko a kuɓ nek mbusasa ma ɓan sengge Hit Kaa wa ɓa yǝ kan ma ɓosa mbu yǝka tom ya fang Yeso ɓa.

⁵ Ɓǝ kura maa nepto ya ɓǝ yauwan me ɓekaa na koɓa.

⁶ Yahuda yǝ yawan yǝ ti senda yǝn kǝrsǝ ɗǝɗa yǝkaa tom yǝɓǝ na Yeso a nema ya a fer ɓeta kaura wa.

Mbuseya a feɗefeɗe ɓa

⁷ Pa ka nkaadǝng yisti semra ɓa wosǝ wa u ɓan todsǝ tǝmnka ɓǝ se ɓa tom tadko wa.

⁸ Yeso ya timi Bitrus ma Yohanna yǝɓǝ nkee me, “So kosǝdǝ sǝk ham kǝɗa se mbuseya tadkoɓa.”

⁹ “Ngǝn ta me kotǝ sǝk hamsa nau?” Ɓa taa.

¹⁰ Ya kakka, “Me sǝ kan a urun pararakǝra kiya wo ma sǝɗaa a ɗuura me yǝ won sa ɓǝɗɗǝ a hit kiya kan wa,

¹¹ sǝ nkee An taanda ya me, ‘Malǝm nkee me, ham ham waa ɓa nau, ham kǝna se mbu tadki ya ma emfǝɗkaa ɓǝna ɓa?’

¹² Kǝyǝsǝ weɗa wiine hito ɓoti ya sǝksǝ kwalari. Sǝ kǝn kǝnso.”

¹³ Ɓǝ ko sǝwa, koɓǝ ta mbusa nga Yeso nkee ɓǝsǝ wa, pa ɓǝ wǝrkǝ Mbukamsa Tadko ma kaɓa.

¹⁴ Fer usu kansǝwa Yeso ma ɓahona sisa ɓǝ kaɗ me ɓǝkǝ se mbuseya.

¹⁵ Pa yǝɓǝ nkee me, “Nǝn ta me nǝ se mbuseya tadko ɓa ma sase pa nǝ wee kongsa.

¹⁶ Nǝn nkeesǝn nkee, na se ɗǝm ra me fer maar tadko sǝra kunggun a kuɓsutu Kaa wara.”

¹⁷ Yǝ tosǝ kofi wa yǝ na himara Kaa yǝɓǝ nkee me, “Sǝ kono sǝ ɓaa a ɗaaso waso.

¹⁸ Nǝn nkeesǝ me nǝ ɓaarǝ nǝ we em ngwate ɓa ra me ka kuɓsutu Kaa ɓa wosǝra wa.”

¹⁹ Yǝ too nkaadǝng yǝ na himara yǝ ɓaa yǝɓǝ na yǝn nkee me, “Nwa ndǝ maabiri yaane u nǝ nasǝ wa. Sǝ tom maaso me sa ɗim ma niina.”

²⁰ Maso ɗǝm a ɗǝɗa finda yǝ feɗsǝ ma se mbuseya wa ya too kofi ya nkee me, “Kofi wa ǝn kofi nfiinfii waa a monma na u tuksǝ me ǝn sase wa.

²¹ Pa ya kǝyǝ nǝsǝ nfang ya yǝn se mbuseya kee ma niina.

²² Au Ete ya kiya ko nga kaa yausǝ wa, pa mbu manyamanyato ɓa, a yaa yǝ pangsǝsǝ ya.”

²³ Ɓǝ tii ta ɓaatǝwa me yakǝ tom mbusa niu?

²⁴ Pa renǝta a nii a ɗaaso emfǝɗkaa me ndǝ yamni kiya kaɗ ya kwang yau.

²⁵ Yeso yeɓǝ nkee me, “Kuɓsa ɓaa ɓǝn Yahudawa ra ɓa, ɓǝn weɗa kwangto kuɓsutu wa a ɗuura ɓaa ɓǝn tom ɓǝsǝ kuɓsutu ɓa, ɗǝm ɓaa kwang kwang ɓosa ɓǝn yar nkweera ɓora me, ‘ɓǝn ɓen kwasira ɓeta ɓa.’

²⁶ Pa waaso sǝ kaɗ maaso ra, me maaso a lee yaa yǝsǝ kwang a ɗaaso waaso ya, yǝ kang nga yaa ngeek ya. Pa yaa yǝn tomsǝ kuɓsutu ya, yǝ kang nga hoora.

²⁷ Pa ndǝ yamni yǝsǝ kwang ngǝu yayǝ kaɗsǝ a ham se mbuseya ɓau hana yayǝn nasǝ mbuseya yau? Ən ya yǝ kaɗsǝ a ham se mbuseya ɓa rau? Pa na ɗaaso waso nga yayǝn nasǝ mbuseya ya.

²⁸ Ən saase sǝ nǝɗsǝ a ndiira na a fer mǝkǝta naa wa.

²⁹ Nga paane yǝ nanǝsǝ kuɓsutu nǝn nasǝ maaso kǝn.

³⁰ Me sǝ se sǝ wee a ham kaɗɗa kuɓsutu waano ɓa sǝ kǝ kaɗ a ham kaɗ kuɓsa ɓa, sǝn kankiita tuwa pu a nhaa raɓ u Isra'ila wa.

³¹ “Siman, Siman Kuɓ Nsaa wa yǝ ta me yǝsǝ ree nga alkama.

³² Pa nǝ tom kǝnaran a ɗuura ngaan Siman me ɓongtǝra yange ǝn tom ngeek ra. Pa me ngǝ kangan ngǝ kwasi ɓaata ɓǝnga.”

³³ Pa yǝ kakka, “Ankundi, nǝ yauwan me nǝ ko a kurung hana woɗa.”

³⁴ Yeso yaa kak me, “Nǝn nkee ngǝ Bitrus, naso, me ǝn nkee me kokra ǝn pa pomra ya, kǝngǝ nǝ renǝ a kan taatǝn, me ngǝ maa nǝ ra.”

³⁵ Pa Yeso yǝɓǝ taa, “Nǝ timi sǝsǝ koɓa, taa, hana ɓukra semra wa, ǝn mbi sǝ ta rau? Ɓǝ kak me. “Ən mbuka ra.”

³⁶ Yǝɓǝ nkee me, “Pa nawa me sǝma ɓukra sǝ too hana koɓa ɗǝm me sǝ sem ma empaame ra sǝ fang lukta sǝsa saa tiri fin.

³⁷ Nyorsǝ me, ‘Ɓaa kwasǝ ke ma ɓan tǝblǝ mara ɓa,’ pa nǝn nkeesǝ me mbu ɓa me kugun a nanin. Ee nwa mbu ɓaa nyorsǝ a ɗuura nara ǝn kan kana a fer kungkung usu.”

³⁸ Emfǝɗkaa ɓǝsa ɓǝ nkee me, “Ankundi empaame raɓ wa.” Yǝ kak me, “Usu maan.”

Yeso tom kǝnara a Yol Zaitun wa

³⁹ Yeso fiɗ taadi nga u nfee wa a Yol Zaitun wa, pa emfǝɗkaa ɓǝsa ɓaa ɓǝɗɗǝ.

⁴⁰ Yǝ kansǝ a ham ka ɓa wa yǝɓǝ nkee me, “Sǝ toma kǝnara me tom sǝ kan a han pǝtara ɓa ra.”

⁴¹ Yǝɓǝ lee ngeek nga ɓa mudkǝ kudara a wii ɓoso yǝ kwǝrsǝ yǝ toma kǝnara,

⁴² “Paapa me ngǝ yauwan a too kongsa a nani ɗǝm a tom mbu ngǝn yausǝ ɓa, sem mbu nǝn yausǝ ɓa ra.”

⁴³ An timira Kaa ya yǝ wo a sani yǝn kwasisǝ.

⁴⁴ Me ya kongsa ya ɓaarǝ yǝ tom kǝnara ɓong ɓong, pa yalma ima ǝn roo nga roo modma wa a putu.

⁴⁵ Yǝ nisǝ a kǝnara wa ya kan a emfǝɗkaa ɓǝsa ni yǝɓǝ woɓa munda me kuɗa tǝblǝ ɓǝn.

⁴⁶ Yǝɓǝ ta me, “Sǝn tǝr munda me ǝn mbiu? Sǝ ni sǝ tom kǝnara me tom sǝ kan a han pǝtara ɓa ra.”

Ɓa ma Yeso

⁴⁷ Yeso yǝsǝ nding a kanmǝra wa, ɓeta dem ɓǝ wo, pa eɗ ke yarsǝ me Yahuda fin a ɗaaso emfǝɗkaa puu nhaa raɓ sǝɓa, ya wiiyo ya wo kwang ma Yeso ya ma kwektek.

⁴⁸ Pa Yeso yaa ta, “Yahuda kǝn fang Au Edteya ma maa kwektek wau?”

⁴⁹ Emfǝɗkaa Yeso ɓa ɓǝ wǝrsǝ mbu ɓa kasa tom ɓa wa ɓǝ nkee me, “Ankundi tǝ haa empaame tǝɓǝ tikkiu?”

⁵⁰ Pa fin a ɗaaso ɓoso ya tiki hoora wiine nek mbusa ya, yaa ɗat ngwee a seya ya.

⁵¹ Pa Yeso ya kakka, “Sem maaso ra!” Pa ya ntee ngwee eɗ kaya ya yaa roɓo.

⁵² Pa Yeso ya nkee wina nek mbusa ɓa, ma ɓan sengge Hit Kaa Urshalima wa ɓa ma ɓaa kwang kwang u ɓǝ wosǝ me sasewa, “Nǝn an tang mbusa yau sǝ wosǝ ma empaame ma kwalanga wa?

⁵³ A handa weeya nǝ ke ma sase a tanda Hit Ɓet Kaa Urshalima wa, pa sǝ manǝra. Pa ngawa ǝn fer waso fer ham tebteb ɓa yǝsa kuɓsutu wa.”

Bitrus ɓisi Yeso

⁵⁴ Pa ɓǝsa kosǝ a hit wiine nek mbusasa. Bitrus yaa ɓǝɗ ndiira.

⁵⁵ Pa ɓǝ neksǝ ara a ɗaaso taandawa ɓǝ kaɗ a ham fiina pa Bitrus yǝ kaɗ ke ma ɓosa.

⁵⁶ Nhora autoone ke yaa wǝrǝ kǝnso a ham ɓa neksǝ ara sǝɓa ya ko kwang ma sase. Yaa sengge ya nkee me, “Eɗ ɗa kayǝ ke ma sase.”

⁵⁷ Pa ya renǝ, yaa nkee me, “Toone niina nǝ masǝra.”

⁵⁸ Kaɗsǝ ngeek wa atike ɓol yaa wǝrǝ ya nkee me, “Ngase kǝn ngǝ ke ma ɓosa.” Bitrus ya kak ya nkee me, “Ete nǝ nasera.”

⁵⁹ Kaɗsǝ singǝ wa atike woya sengge ya nkee me, “Ɓong eɗ ɗa yǝ ke ma sase me yǝn yaa Galili ya.”

⁶⁰ Bitrus ya kakka, “Ete, nǝ ma mbu ngǝn nkesǝnke ɓa ra!” Nga yǝn kansǝnkan wa, kokra ya pa pomra.

⁶¹ Ankundi ya kǝrtǝ ya sengge Bitrus a nuuwa. Pa Bitrus yǝ ɗim ma mbu Yeso nkee sǝsǝ ɓa me, “Meen nkee me kokra kiya paa pomra naaso, kǝ ngǝ nkee me ngǝ maa nǝra a kan taatǝn” Pa yǝ fiɗ ntaandi yǝ tee dem.

⁶² Pa Bitrus yǝ ko ntaandi yǝ tee kwalakwala.

Ɓan war handa ɓa ɓǝ nhuu Yeso

⁶³ Ɓaa ɓǝn warsǝ wanda Yeso ɓa ɓaa ntii nhuura ɓǝ hobsǝ.

⁶⁴ Ɓǝ kaasǝ mbuka a ota ɓaa nkee me, “A nawanto ya hoɓ ngǝ niu?”

⁶⁵ Ɓaa nkee mbu tenatena ɓa ma sǝrma.

Yeso a wii Bilatus ma Hiridus wa

⁶⁶ Handa weesǝwa ɓa kau wina ɓeta ɓa nsaad ma wiina kuɓ nek mbusasa ma malǝma masakasa ɓǝ fama, pa ɓa ko ma Yeso a wiyo ɓoni.

⁶⁷ Ɓaa nkee me, “Me ngǝn Almaseho tǝn nkee.” Yeso ya kakka, “Menǝ nkeesǝ sǝ na ɓongtǝra ma mbu nǝ nkesǝsǝ ɓa ra.

⁶⁸ Pa menǝ tasǝ sǝnǝ kak ra.

⁶⁹ Pa waso ma ko a wiyo, Au Ete ya kiya kaɗ a nem seya Yaa kwang ya Kaa.”

⁷⁰ Ɓǝ ta nsaad, “Ya ngǝn Au Kaa yau?” Ya kakka, “Sǝ nkeen keke me nǝn nase.”

⁷¹ Pa ɓǝ nkee me, “Ya Ən mbi ndǝn kǝrsǝ a ɗuura ira ɗǝmǝu? Ndǝ kuran a ee isi.”