Luka 21 - Lala NT

Koɓa kiu tooneya yǝ nasǝ a Hit Kaa Urshalima wa

¹ Yeso yǝ nǝk ɗuura ɓoti wa ya wǝr ɓan kǝnaa ɓa ɓǝn nhii koɓa a mbu nhii koɓa a Hit Kaa Urshalima wa kǝna Kaa ɓa.

² Paya wǝr hanhanda toone kerisi wodsǝke yǝ nhii koɓa ngeek isi sa nsaad.

³ Yǝɓǝ nkee me, “Nǝn nkeesǝ ɓongtǝrato hanhanda kiu toone ya yǝ nhii mbu kwang faɗsǝ ɓa nsaad ɓa.

⁴ Ɓet ɓa nsaad ɓǝ na mbu ɓǝkǝ na ɓa a ngǝnǝ ɓǝsǝ ma sisowa; pa usu yǝ na nsaad mbu yǝsǝ ma sisoɓa.”

Yeso yǝ fǝɗkǝ mbuka tom a wiiyo ɓa

⁵ Ɓaata emfǝɗkaa ɓǝsa Yeso ɓa ɓǝn kan mara mbu ɓa werkǝsǝ kwalari a Hit ɓǝɗ Kaa wa ɓa ma ɗungate u yabwa ma mbusa u ɓa kosǝ Kaa wa. Pa Yeso ya nkee me,

⁶ “A mbu sǝn wǝrsǝ a ham ɓa wa, tǝro kǝ wo, u hana ɗungara kǝra fin a pee a ɗuura ate ra ra, ɓaa kǝ ookǝ ɗungate sisi fin fin a putu nsaad.”

⁷ Pa ɓaa taa me, “Malǝm, mbu ɓa kǝ tom kamniu? Ən mbu nhiinyanhiinya mbi ka weɗa me mbusǝsa ɓǝ tomon ngwang ma tommou?”

⁸ Ya kak ya nkee me, “Sǝ ti senta me atike yǝsǝ nlaa ra. Ɓeta dem kǝɓǝ wo ma ɗenda na, ɓǝn nkee me, ɓosa ‘Nǝn sase,’ ɗǝm fersusu, ‘Tomon kwang.’ Sǝɓǝ mɓǝɗ ɗa.

⁹ Sǝ kura kokto ra, me sǝ kura maatamse kisa ya ɗǝm ma rǝkatamse. Tomon ɗaɗ mbusǝsa a tom nhe, pa feɗefeɗe wo sundu ra.

¹⁰ Pa yǝɓǝ nkee me, Putu kǝ nik kito ma ate putu ya, ɗǝm kuɓsutu kǝ nik kito ma ate kuɓsutu ya.

¹¹ Putu kǝ nyaa, siyamse ma ɗoora a handa ɓolɓol, ma mbu na kokto ɓa ma mbusa nhiinyanhiinya a liura.

¹² “Fer mbusǝsa ka tom wa, ɓǝ kǝsǝ ma ɓǝsǝn na kongsa. Ɓǝ kǝsǝn ko a hitsa kwau Yahudawa sa, ɓǝsǝ liki a hitsa liki ɓeta sa, ɗǝm ɓǝ kǝsǝn wo a wii a kuɓsa ni, ma ngwammase, nsaad susu me a ɗǝnda na.

¹³ U nwa kǝsǝ ti sǝ nkee mara kwalari ra a ɗuura na a wii ɓoso.

¹⁴ Pa sǝ kong taarǝ a ɗǝɗa kǝsa kon nkweerase ra me sǝ kon.

¹⁵ Nǝkǝsǝ na mara ma maa mbuka wa u ɓaa ɓǝn yausara ɓa ɓa taa kwangto ɓǝka nǝɗ ma sase me ɓa tom renǝta wara.

¹⁶ Pa hana paapamse yaase, ma ɓaata ɓǝsaa, ma haato waaso, ma sik ɓǝsa, ɓǝ kǝsǝ fanga, ɓaata a ɗaaso waaso ɓaa kǝɓǝ toɗɗo.

¹⁷ Ɓeta nsaad kǝsǝ mbisi me a ɗǝnda na.

¹⁸ Pa hanan nhinyoo fin a ɗuura sawa a tǝblǝ ra.

¹⁹ Me sǝ sǝm a ham fin haa nǝ sǝkǝ ta hemǝra.

²⁰ “Me sǝ wǝr Urshalima sosamse leurǝ sǝsǝ sǝ ma me wo usu kanan.

²¹ pa a lee ɓaa ɓǝsǝ a put Yahudiya ɓa, ɓǝ mon ɓǝ taa a yola, ɓaa ɓǝsǝ a ɗaaso uru ɓa, ɓǝ fiɗi, a lee ɓaa ɓǝsǝ a ndiira uru ra ɗǝm, ɓǝ kan a ɗaaso uru wa ra.

²² Me nwa ǝn fer kongsa wa u ka kung mbu ɓa yorsǝɓa nsaad.

²³ Mbu manyamanyato ɓa, a toona ɓaa ma kuti ɓa, ma ɓan na toota ɓa a fer usu. Kǝ tom mbu kongsa ɓa a put susu mbu nfiima ɓa a ɗuuti ɓeɗsǝsa ɓa.

²⁴ Kǝɓǝ wii a ɗuura kǝɗara ɓa kǝɓǝ haa nga pursunamse ɓǝ kosǝ a put wa nsaad. Ɓaakǝ noo Urshalima ndub kaa ɓa ɓǝ sem Yahudawara ɓa kungsǝ ɓa.

²⁵ “Ɓaa kǝ wǝr mbu nhiinyanhiinya ɓa a ɗuura kaa ra ma ofe ma seklǝmǝta. A kaɗo taandi wa ɗǝm ɓeta kǝ tom ma rǝkata me kokto yaulira aulaara wa.

²⁶ Ɓeta kǝ haa hemǝra horot me kokto senda mbu ka wo kaɗo ntaadiwa ɓa, me ɓaa kǝ nyaa mbu kwang kwang a liura ɓa.

²⁷ A fer siso sǝkǝ wǝr Au Ete ya yǝn hamham a liura ma kwangto ma too dem.

²⁸ Me mbu ɓa ntii tomon, sǝ ni ɓoti sǝ nik ɗuti ɓoti me kon nkweera waso won kǝk.”

²⁹ Yǝɓǝ nkee mǝɗkǝra me, “Sǝ sengge ɓot sata ɓa ma ngwate nsaad.

³⁰ Me ɓǝ tǝu nwaman, sǝkǝ wǝr ma nkweerayase sa me rara tomon nkwang.

³¹ Hana maaso me sǝ wǝr mbu kwala kwala ɓa ǝn her her, sǝ maa me kuɓsutu Kaa wa won kwang.

³² Nǝn nkeesǝ ɓongtǝra, ɓaa kaareyase ɓa, a talǝra ndub me mbu ɓa nsaad wo tomon.

³³ Liura ma put ntaandi wa, kǝ talǝ pa mara na a pǝta talo ra.

³⁴ “Sǝ nhii nwa sǝ yau we mbusa wa ma see mbusa wa ma kaɗo kura nepto ntaadiwa ɓǝsǝ too sendara pa kaasǝsa kǝ liki a sani sem ma maa nwaasora nga mbu ɓa tǝrasǝɓa.

³⁵ Me kǝ wo a sani nsaad ɓa sisa kaɗo ntaadiwa ɓa.

³⁶ Sǝ kaɗ a waroo nfee ma kǝna Kaa wa me sǝ nkaa sa noo mbu kǝ wo ɓa, me ɗǝm sǝ nkaa sǝ nǝɗ a wii Au Edteya wa.”

³⁷ Nfee Yeso yaa fǝɗkǝra a Hit Kaa Urshalima wa ɗikira nfee yǝn ko taadi koya tǝr a kolla ǝn yarsǝ me Yol Zaitunwa.

³⁸ Pa ɓa ɓǝn kurasǝ sǝ ɓa nsaad ɓǝn wo a ɗenda me ɓǝ kura mara ira a Hit Kaa Urshalima wa.