Luka 2 - Lala NT

Haa Yeso wa

¹ A tǝrma sǝma, Kaisar Augustus yǝ nawanto me a kau ɓeta nsaad ɓaa ɓǝsa put Kuɓsutu Roma wa.

² Unwa ndǝ ntiiri kau ɓeta wa u ɓaa tomsǝ a fer Kiriniyus yǝsaa ngwamna Suriya wa.

³ Ɓeta nsaad ɓa kang hana yamni a ur usu me ɓaa ɓǝ kawa.

⁴ Pa Yusufu ya lee ur Nazarat wa a put Galili wa, ya faɗa ur Baitalami wa a put Yahudiya wa, ur ɓaa haasǝ Kuɓu Dauda tangtang wa, me yǝ fiɗa tuwa Dauda wa.

⁵ Ɓǝ ko ke ma Maryamu, u ɓaa waasǝsǝ me kǝya nsaa wa, me ɓaa ɓǝ kawa. Fer usu yǝ ma kudɗa.

⁶ Pa ɓǝsǝ Baitalami wa fer haa usu a kana.

⁷ Maryamu ya haa au isi ntiiriya auwe parara, yaa liki ma ntaa kaa auwe wa, yaa ti a pelo me ɓǝ taa hito a ham ham waaɓara.

Ɓan wanda ɓa ma ɓaa Kaa yǝn timsǝ a liura ɓa

⁸ A kal ur susu wa ɓanwanda ɓa kǝn, ɓǝn tǝra a talte ɓǝn war tǝmkaa ɓosa a pǝrtǝra.

⁹ Pa an timira Kaa ya yǝɓǝ fiɗ semma maa ɓoso ra, kwangto Kaa wa ya too ham ɓǝsǝ ɓa kong, kokto ǝɓǝ ma nhiinyanhiinya.

¹⁰ Pa an timira Kaa ya yǝɓǝ nkee me, “Kokto sǝn mara, nǝ wosǝ ma mara kwalari ra u ɓeta nsaad kǝɓaa tom ma kuɗa pengpengra wa.

¹¹ Naso wa a ur Dauda wa, ɓaa haasǝ an kon nkweera yan, Krisiti Ankundi.

¹² Mbu kaati sǝ maa ɓa wa sǝkǝ wǝr auwe likisi ma ntaa kaa auwe wa a pelo.”

¹³ Semma maa ɓoso ra, ɓǝ wǝr ɓan timira Kaa ɓa, ɓǝ ɗǝm haman ɓoti ɓa tǝmba ma ya Kaa yǝ timsǝ a ntiiriya ɓǝn kǝɗ pina nyoo Kaa sa ɓǝn nkee me,

¹⁴ “Too ɗǝnda Kaa wa ya tom ɓoti a liura, pa a put ntaandi wa a lee hurhurto Kaa wa a kaɗ ke ma ɓa Kaa yǝn sesǝ nepto ɓoso ɓa.”

¹⁵ Pa, ɓan timira Kaa ɓa, lee ɓǝsǝ ɓa faɗa liura wa, ɓanwanda ɓa, ɓǝ nkee ɓaatǝ me, “Do Baitalami da wǝr mbu tomsǝ ɓa, u Ankundi nkee ndǝsǝ wa.”

¹⁶ Ɓa nii ɓa faɗ ma haɗe, ɓa ko ɓa wǝr Maryamu ma Yusufu, ɓa wǝr au kaya ɗuk a pelo.

¹⁷ Pa ɓanwanda ka ɓa wǝrsǝsǝwa, ɓǝ nkee ɓeta mbu ya Kaa yǝn timsǝ a liura ya yǝ nkee ɓǝsǝ a ɗuura au sisi ra.

¹⁸ Ɓeta nsaad kurasǝ mbu ɓanwanda ɓa nkeesǝwa, ǝɓǝ tom mbu weɗara ɓa.

¹⁹ Maryamu ya ma mbusǝsa nsaad yǝn tau senta.

²⁰ Ɓanwanda ɓa ɓǝ kang ɓobɓǝsa ɓǝn kǝɗ pin nyoo Kaa sa, me mbu ɓǝ kurasǝ ɓa nsaad ma mbu ɓǝ wǝrsǝ ɓa, mbu tomsǝ ɓa kong wo a faɗ keke ma mbu ya Kaa yǝn timsǝ a liura ya yǝ nkee ɓǝsǝ ɓa.

Yeso ɓaa kosǝsǝ a Hit Kaa Urshalima wa

²¹ Tǝrsǝ kurkurun wa, ɓaa firi, a ti ɗǝnda mee Yeso, ɗǝnda u an timira Kaa ya yǝ weesǝsǝ tiyoo pa a too kuɗa ira wa.

²² Pa kansǝ me Maryamu ma Yusufu kǝɓa sǝk mbu masakaa Musa nkeesǝ a sob ɗekɗek to wa, ɓa too Yeso ɓaa faɗ Urshalima me ɓa weɗe Ankundi,

²³ ngaa yorsǝ a masakaa Ankundi wa me, “Au parara ntiiri ya Kaa sa wo a weɗe Ankundi, a yar me an ɗekɗek u Kaa yǝ tausǝwa Ankundi ya.”

²⁴ Pa a na mbu nǝnga ngaa masakaa Ankundi nkeesǝwa me, “A haa nkweera tǝlka raɓ hana em mukta ɓa raɓ.”

²⁵ A fersiso yaake kǝn Urshalima yarsǝ me Simiyon, ndǝ ete ya ma ɓongtǝra ya, yǝn too ɗǝnda Kaa ra, yǝn kaɗ war fer Kaa kiya hik Isra'ila wa. Wis Kaa wa ke ma sase.

²⁶ Wis Kaa wa weɗesǝ me ya wod kweɗ ɗa, me kiya wǝr Krisiti u Ankundi nkeesǝ me kiya timi wa nhe.

²⁷ Wis Kaa ra niksǝsǝwa, ya nii ya kana Hit Kaa Urshalima wa keke a fer winaa Yeso ɓǝ wosǝ ma Yeso a Hit Kaa Urshalima wa me ɓaa sǝk mbu masakaa nkeesǝ ɓa.

²⁸ Pa Simiyon ya kon au kaya a nemsisa, ya tom himara Kaa, ya nkee me,

²⁹ “Ngawa, Ankundi, a lee hora nga ya faɗ huru huru ngaa ngǝ nkeesǝwa,

³⁰ Me nuusǝna wǝr an kon nkweera yan,

³¹ kon nkweera ngǝ werkǝsǝ a nuu tǝna nsaad wa,

³² ɓongtǝra kǝ piɗ a kan tǝna ɓa ɓǝsǝn Yahudawa ra ɓa, pa ɗǝm ya wo ma kwangto ɓet ɓǝnga Isra'ila.”

³³ Winaa au kaya ɓa ɓǝ ma ee ɓǝn wǝr mbu weɗara ɓa a mbu ɓaa nkeesǝ a ɗuura au kaya ra.

³⁴ Pa Simiyon yǝɓǝ kǝna saltǝra Kaa ra, ya nkee Maryamu maa au kaya me, “Kaa yǝ tau au ya me ya tom mbu ɓaata ka nwii ɓa, ma mbu ɓaata ka nii laalaa a Isra'ila ɓa. Kiya tom mbu maa u piɗsa a Kaa niwa, u ɓeta laalaa ɓaa yaura wa.

³⁵ Me mbu nhuukǝr senta ɓota ra a pidi, mbu ɓa kǝ ngǝ wo ma kudɗa teptep ra ngaa pee sebnga seura.”

³⁶ Kaaka ke ya Kaa yǝn timsǝ a liura ya kǝn yarsǝ me, Hannatu, ndǝ au Fanuwel ya, ee Ashiru ya, yǝ nsaa kere meera mbutu maɗ,

³⁷ pa kerisi ya woɗo. Yǝ nsaa kere ɗǝm ra, ngawa mweeta ita puu kurkurun a haa kurun yǝn kǝna Kaa pǝrta ma Kaa, ma mbisi mbraa wa kafera.

³⁸ Keke a fer susu ya kana yǝn weɗe himara Kaa, pa ɗǝm ya kana a ɗuura au sisi ra a wii ɓeta wa nsaad ɓaa ɓǝn warsǝ fer Kaa kǝǝ kon nkweera Urshalima wa.

³⁹ Pa Yusufu ma Maryamu ɓǝ pedsǝ mbu Masaka Ankundi nkeesǝ nsaad wa, pa ɓa kanga ur ɓoso Nazarat a put Galili wa.

⁴⁰ Au kaya yǝ mbraa, yǝ tom kwakwa ma maa mbuka wa, saltǝra Kaa ra ke ma sase.

Auwe Yeso a Hit Kaa Urshalima wa

⁴¹ Kaata kaata, winaa Yeso ɓa ɓǝn ko Urshalima a mbukamsa me ɓǝn ɗim fer Kaa yǝ hik ɓǝsǝ a ur Masar wa.

⁴² Yeso yǝ kansǝ mweeta puu haa raɓ wa, ɓa faɗa nkee a mbukamsa.

⁴³ Pa ɓǝ feɗsǝ mbukamsa tadkoma wa, ɓa ma ɗǝɗa me kǝɓa kang ɗuuru, pa au kaya Yeso ya tǝng ndiira Urshalima, winaa ɓǝsa ɓǝ ma ra.

⁴⁴ Ɓǝn nkee me ya ɗaaso ɓeta wa, ɓa siki tuuka finding, pa ɓaa ntii kǝro a ɗaaso ɓaata ɓosa ma sik ɓosa wa.

⁴⁵ Ɓǝ wǝrsǝ ra, pa ɓa kang Urshalima me koɓaa kǝrǝ.

⁴⁶ Tǝrsǝ taatǝn wa, ɓa ko ɓaa wǝr a Hit Kaa Urshalima wa, a ɗaaso win malǝma wa, yǝn kura ɓǝ yǝn taa ee ɗǝm.

⁴⁷ Nsaad ɓa ɓǝ kurasǝsǝ ɓa, ɓa ma ee ɓǝn wǝr mbu weɗara ɓa, a wǝr maa mbuka usu ma yauma yǝn na ɓǝsǝ ma.

⁴⁸ Winaa ɓǝsa wǝrsǝsǝwa, ǝɓǝ tom mbu weɗara ɓa. Pa maasi ya nkee me, “Auwane, ngǝ tomtǝ mbi maasou? Nase ma paa nge tǝn kǝr ngǝn kǝrǝ senta semra.”

⁴⁹ Yǝɓǝ kak ya nkee me, “Sǝn kǝrnǝ mbiu? Sǝ ma me pama na toma ɗuur Paane warau?”

⁵⁰ Ɓǝ ma mbu yǝ sensǝ ma mbu yǝ nkee ɓǝsǝ ɓa ra.

⁵¹ Pa ya nii yǝɓǝ ɓǝɗ ɓa kang ɗuur Nazarat, yǝn yauɓǝ ee. Maasi ya ma mbusǝsa nsaad a senda ira.

⁵² Yeso ya toma sookǝ mbarta wa ma maa mbu kawa, ya tom ma oota ɓaata a Kaa ni ma tǝna nsaad.