Luka 18 - Lala NT

Mǝɗkǝra a ɗuura kǝnara ra wiiyo semra

¹ Pa Yeso yǝ nkee emfǝɗkaa ɓǝsa mǝɗkǝra yǝɓǝ weɗa me ɓǝ tom kǝnara pee ɓǝ kongra.

² Yǝ nkee me, “A urko an kan mara ke kǝn yǝ kuraa kokto Kaa wa ra ɗǝm yǝn ɗimma ma ɓeta ra.

³ Pa toone kiuwi ke kǝn a ur sǝso ya yǝn wosǝ a sani pee ma kǝnara me, ‘Ənǝ tom kiita ɓongtǝra wa a ɗuura ateker yaane ra.’

⁴ “A ntiiri yǝ ɓisi pa ndiira usu ya nkee ee usu me, ‘Hanaka nǝ maan me nǝn kuraa kokto Kaa wa ra ɗǝm nǝn ɗimaa ma ɓeta ra,

⁵ me hana maaso kiu tooneya yǝn rǝkǝnǝ kǝnǝ wǝr me nǝ tomsǝ ɓongtǝran me yǝnǝ rǝka ma wo usu nfee wara!’ ”

⁶ Ankundi ya nkee me, “Akura mbu an kan mara kiita semma ɓongtǝra raya nkeesǝwa.

⁷ Hankǝra Kaa ya na ɓǝn yarsǝ ɗǝnda ira pǝrta ma kaa mbu ɓǝn tasǝ ɓa rau? Kiyi ɓǝ tom mbu keke ɓa rau?

⁸ Nǝn nkeesǝ yǝkǝ wǝr me ɓǝ taa ɓongtǝra kiita wan ɗǝm noknok me fer Au Ete kiya wo wa kiya ta ɓongtǝrato a put ntaandi wau?”

Mǝɗkǝra a ɗuura eɗ farise ya ma an kon samara ya

⁹ A ɓaatani ɓa ɓǝn wǝrsǝ nga me ɓǝma ɓongtǝrato ɓa ɓǝn sengge ɓeta nsaad nga ɓǝn mbuka ra Yeso yǝ nkee mǝɗkǝra me.

¹⁰ “Ɓeta raɓ ko a Hit Kaa Urshalima wa me ɓǝ kǝna Kaa ǝndǝ Bafarise ate ndǝ an kon samraya.

¹¹ Bafarise siya ya ni kǝɗ yǝ tom kǝnara a ɗuura ira me ‘Kaa nǝ himangǝn me nǝ sem nga ɓaata ɓeta ra nkwiiya ɓa ɓǝn tomsǝ mbu kwala kwala ɓa pepeto hana nga yen kon samra yara.

¹² Nǝn lee wee mbraa wa raɓ a tǝro mbutu nǝn hik fin a mbu puu nǝ taasǝ ɓa.’

¹³ “Pa an kon samra siya ya nǝn mǝbmǝb yǝ haa nuuwa ya sengge ɓotira pa ya hob kango ya nkee me, ‘Kaa a kura nyorǝtarana nǝn yaa tentenaya.’

¹⁴ “Nǝn nkeesǝ me, eɗ ɗa sem nga ate ra yǝ kang ɗuur usu ɗekɗek a wiyo Kaa ni. Hana ndǝ yamni, yaa yǝ toosǝ ɗuura ira ya, ɓaa ka kang yǝn mbuka ra, ɗǝm yaa yǝ loosǝ ɗuura ira ya, ɓaa ka too yǝn mbuka.”

Yeso ma emba

¹⁵ Ɓeta ɓǝn wosǝ ma welta a Yeso ni me yǝɓǝ ti neme, pa emfǝɗkaa ɓǝsa wǝr ɓǝsǝ wa, ɓǝɓǝ nkwaakǝ.

¹⁶ Pa Yeso yǝ yar em ka ɓa ya nkee me, “Sǝ lee em ngeek ngeek ɓa ɓǝ wo a nani sǝɓǝ sa ra me kuɓsutu Kaa wa ndǝ ɓeta wa nga em ngeek ngeek ɓa.

¹⁷ Nǝn nkeesǝ ɓongtǝra me, yaa yǝ konsǝ kuɓsutu Kaa wa nga auwe ngeek ra ya, yǝ pǝta kano ra.”

Kuɓu yen kǝna ya

¹⁸ Anwii Yahudawa ke yaa taa yaa nkee me, “Malǝm yaa ɓong ya, kǝnǝ tombi kǝna taa huurtu pakarese yau?”

¹⁹ Pa Yeso yaa kak yaa nkee me, “Tomtomni ngǝn yarnǝsǝ me yaa kwalari yau? Yaa kwalari ke sem ra, me ǝn Kaa fin mbusa ra.

²⁰ Ngǝ maa masaka Musa wan, yǝ nkee me, ‘Ngǝ tom pepeto ra, ngǝ toɗ ete ra, ngǝ tom nkuura ra, ngǝ paa para a ɗuura ete ya ra, a na mbarta paange ma maange.’ ”

²¹ Yǝ nkee me, “Nsaad mbu ɓa nǝ wee tomon tǝng nǝsǝn auwe ngeek wa.”

²² Yeso kurasǝ maaso wa, yaa nkee me, “Pee ngǝ mbuka fin maɗ, ngo ngǝ fang mbu ngǝsǝ ma siso ɓa nsaad, ngǝ na hanhanta, kǝngǝ taa kǝnaa a liura, pa ngǝ wo, ngǝ nǝ ɓǝɗɗǝ.”

²³ Yǝ kurasǝ mbusǝsa wa kuɗa ira aa tǝblǝ me yǝma kǝnaa dem.

²⁴ Yeso yaa sengge ya nkee me, “Kǝ tom ma kongsa dem eɗ ma kǝnaa nya, yǝ taa kano kuɓsutu Kaa wa!

²⁵ Pa kǝ tom paapa a telǝm ni yǝ kan ma lau ee libɗa ya, ma an kǝnaa nya kiya kan a kuɓsutu Kaa wa ya.”

²⁶ Ɓeta kurasǝ mbusǝsa wa ɓǝ taa, “Yaa ndǝ yamni kiya taa kon nkweera wau?”

²⁷ Yeso yǝ kakka, “Mbu a tom a ɓetani ra ɓa a Kaa ni kǝ tomo.”

²⁸ Bitrus nkee Yeso me, “Tǝ lee mbu nsaad tǝsǝ ɓan me tǝngǝ ɓǝɗǝn.

²⁹ Yeso yǝ nkee me, “Ɓongtǝra nǝn nkeesǝ me, yaake yǝ lee ɗuur usu ma toone ma ɓaata ɓisa parata ma wina ɓisa ma emba me a ɗuura kuɓsutu Kaa ya wa, pa yǝ taa ɓaarǝta mbusata a faɗ pusa pu a kaɗo ntaandi waso ya ra, ɗǝm a taadi ǝn wosǝnwo wa, ki yǝ taa huurtu pakarese wa.

³⁰ Ya yam kon mbusa kwaak nawa ma kaa fin ka a kuɓsutu Kaa wa ra.”

Yeso yǝ ɓaarǝ yǝ nkee mara a ɗǝɗa kiya wodɗa

³¹ Yeso yǝ haa emfǝɗkaa puu haa raɓ sǝɓa a kala, yǝɓǝ nkee me, “Ndǝ koo Urshalima, ɗǝm nsaad mbu ɓan nawanto nyorsǝ a ɗuura Au Ete ya wa, kǝ kungu.

³² ɓaa kaa na a nema ɓaa ɓǝ maa Kaa ra ɓa, ɓǝ kaa nhuu, ɓaa sǝrrǝ, ɓaa nem mesa, ɓaa hoɓɓo ɗǝm ɓaa toɗɗo.

³³ A kaa tǝrma taatǝn ma, kiya nii ɗǝm.”

³⁴ Pa emfǝɗkaa ɓǝsa ɓǝ ma mbu ka a mbu ɓara me ɓǝ ma mbu yǝn kansǝ ɓa ra.

Yeso yǝ roɓ taara an kǝnara ya

³⁵ Yeso tomsǝ kwang ma Yeriko wa ntaara kǝra yǝ nɗaa a kal ɗǝɗa wa yǝn kǝna mbusa.

³⁶ Yǝ kurasǝ kanmǝra ɓeta ra ǝn talǝsǝntalǝwa ya taa me mbun tombiu.

³⁷ Ɓaa nkee me, “Yeso eɗ Nazarat ya yen talǝntalǝ.”

³⁸ Ya yar ma kwaro ya nkee me, “Yeso au Dauda ya nǝ kura nyorataara naa!”

³⁹ Ɓa ɓǝsǝ a ɗǝɗa ɓa ɓaa nkwaakǝ ɗǝm ɓaa nkee me yǝ roo nseu, pa yǝ ɓaarǝ yǝ nik kwaro kwang kwang, yǝn nkee me, “Au Dauda ya, a kura nyorataara na!”

⁴⁰ Pa Yeso yǝ nǝɗǝ, yaa nkee me, aa wo ma eɗ sisi a sanii. Yǝ wosǝ ngwang wa, Yeso yaa taa me,

⁴¹ “Ngǝn taa me nǝ ngǝ tom mbiu? Yǝ kak me, “Ankundi, nǝn taa me nǝ taa wǝr handa wa.”

⁴² Yeso yaa nkee me, “Aa kon wǝr handa wa na ɓongto nwaango roɓ ngǝn.”

⁴³ Nok nok yǝ kon wǝr handa wa ɗǝm yǝ ɓǝɗ Yeso yǝn nyoo Kaa ɓeta nsaad ɓǝ wǝr sǝwa ɓosa kǝn ɓǝ nyoo Kaa.