Luka 17 - Lala NT

Fǝɗkǝra Yeso ra a tentenato, ɓongtǝrato, tom tima wa

¹ Yeso yǝ nkee emfǝɗkaa ɓǝsa, “Me mbu kwaasǝ ɓeta ɓǝ tom tentenato ɓa kǝ wo, ɓa kǝ tom mbu nyorataara ɓa a eɗ kǝ wosǝ a lau usu ya.

² Para a sanii ɓaa muɗkǝ a aulaara ma ɗungara nsoo numu ra kaasǝ a nkweera ira, me yǝ kwaa fin a ɗaaso em ngeek ngeek ɓa, ɓǝ tom tenatenato.

³ Sǝ sengge eewaaso. “Me ate nyaange tomngǝ tentenato, aa nkee yǝ lee, me ɗǝm yǝ kon faatan, a lee a senda.

⁴ Me yǝ tomgǝ tentenato ya ɓaarǝ mbutu mbutu kaa fin, paya ni ya wo mbutu mbutu nkaa fin, me ‘nga lee,’ aa lee a senda.”

⁵ Ɓahona ɓǝ nkee Ankundi, “Ngǝ tǝ sooko ɓongtǝrato!”

⁶ Yeso kak me, “me sǝma na ɓongto wa ngeek nga nkaama karaɓa ma, sǝ kǝ nkaa sǝ nkee ɓot ɓa me, ‘A puu a han ɓa, kongǝ turku a aulaara,’ ɗǝm kǝyǝ tom mbu sǝ nkeesǝ ɓa.

⁷ “Me ate fin a ɗaaso waso yǝma hoora ira yǝn waasǝ nyayo hana war tǝmkaa wa. Me yǝ kanga a wandan yǝkaa nkee me, ‘Ngawo ngǝ kaɗ ngǝ se mbuseya rau’?

⁸ Paman ngaa nkee me, ‘Ənǝ ruu mbuseya ɗikira ɓa, ngǝnǝ wara nǝ se nǝ wee, pa ngǝ se ngǝ wee wango kǝn dau’?

⁹ Yǝkǝ na himara hoora ira me yǝ tom mbu ɓa nkesǝsǝ me yǝ tom ɓau?

¹⁰ Hanan sase kǝn, me sǝ tom mbusa nsaad mbu ɓa nkesǝsǝ me sǝ tomɓa, kǝ nkee me, ‘Tǝn hoota maɗ tǝn tom mbu tomsǝ yaɓ me tǝ tomɓa.’ ”

Yeso yǝ roɓ ɓeta puu ɓaa ma siyo tǝmo ɓa

¹¹ Ngawa Yeso ya ɗǝɗa Urshalima ra, ya siko a ɗaaso Samariya ma Galili wa.

¹² Yǝn kosǝnko a au uru kewa, ɓan siyo tǝmo ka kǝn puu ɓaa ntee. Ɓa nǝɗ mǝbmǝb

¹³ ɓǝ nik kwaro ɓa nkee me, “Yeso, ya Kwangya ǝtǝ kura nyorataara!”

¹⁴ Yǝ wǝr ɓǝsǝ wa, yǝɓǝ nkee me, “So, kosǝ weɗa ɗuura sa a an nek mbusa ya.” Ɓǝn kosǝnko wa, ɓǝ roɓo.

¹⁵ Ya finya, yǝ wǝrsǝ me yǝ roɓon wa, yǝ kang a Yesoni, yǝn nik kwaro yǝn nyoo Kaa.

¹⁶ Yǝ wo woya kwirsǝ a wiyo a Yesoni yǝn nik kwaro yǝn nyoo Kaa, yǝn eɗ Samariya ya.

¹⁷ Yeso ya taa, “Me ɓaa roɓ ɓeta puu rau? Ɓa pesǝ wanakurun ɓa ɓǝ nau?

¹⁸ Tomtomniu leesǝ weeya mbusa fin yǝ wo me ya nyoo Kaau?”

¹⁹ Pa Yeso ya nkee ya Samariya siya, “A nii ngǝ faɗa ɓongtǝra nga roɓ ngǝn.”

Wo Kuɓsutu Kaa wa wa

²⁰ Kaaka ɓa Farisiyawa ka ɓǝ ta Yeso fer kuɓsutu Kaa wa kiya wo wa, Yeso ya kak ya nkee me, “Kuɓsutu Kaa wa ya wo ma mbu kǝsa wǝr ɓa ra.

²¹ Ɓeta ɓǝ nkee me, ‘Han ɓa wa’ hana ‘Kǝna’ mara ra me kuɓsutu Kaa wa ya ɗaaso waso.”

²² Pa ya nkee emfǝɗkaa ɓǝsa, “Fer usu ǝn wowo kaa sǝka yau me sǝkǝ wǝr hana kaa fin u Au Edteya kiya tomwa, pa sǝ wǝrra.

²³ Ɓa kǝsǝ nkee, ‘Sǝ sǝnge kǝna. ‘Hana han ɓa ra sǝ!’ Mon sǝ ko ndiira ɓoso ra.

²⁴ A fer Au Ete ya kiyaa ɓaarǝ yǝ wo wa, kǝyǝ wo nga weɗweɗɗo u yǝn weɗsǝ ma ɓotira a ko sorot a kunda wa.

²⁵ Pa a ntiiri kǝya wee kongsa ɓolɓol ɗǝm ɓaa kaa ɓisi a put ntaandi wa.

²⁶ “Nga isa fer tǝrma Nuhu wa, maaso kaa tom a tǝrma Au Ete ya wa.

²⁷ Ɓeta ɓaa seyo ma weeyo, ɓǝn kon toona ɗǝm ɓǝn na ɓaa kono awo a kaa Nuhu yǝ kansǝ a kurnyaamo ɓa, pa mbraa ya wo yǝɓǝ tod nsaad.

²⁸ “Keke nga fer tǝrma Lutu wa ɓeta ɓǝn se ɓǝn wee ɓǝn tiri ɓǝn fanga ɓǝn rǝkkǝ ɓǝn mar hitsa.

²⁹ Pa a tǝrma Lutu leesǝ Sodom wa ara a ham a liura nga tiuwo ǝn roo roo a tod ɓeta nsaad.

³⁰ “Kiya tom maaso a kaa Au Ete ya kiya wo wa.

³¹ A kasǝsa yake sem a ɗuura hito ira ma mbu ɓisa ɗaan kiya ham ya haa ɓa ra. Maso ɗǝm yake sem kǝn a talte kiya kang ya too mbuka wa ra.

³² A ɗimmi ma mbu tomsǝ ma toone Lutu ya!

³³ Hana yamni yaa yǝn kweetǝsǝ me yǝ noo ma huurtu usu ya, kaa leetǝ, ɗǝm hana yamni yaa yǝ leetǝsǝ huurtu usu ya, yǝn ti huurtu usun ti.

³⁴ Nǝn nkeesǝ, a pǝrtǝra sǝra ɓeta raɓ ɓǝkǝ tom a hantǝra fin ɓaa kǝ too ya fin ya, a lee ate.

^35-36 Toona raɓ ɓǝkǝ tom a nsoo koma wa kee, ɓaakǝ too yafin ya, a lee ate.”

³⁷ “Nau Ankundi?” Ɓǝ taa. Yǝ kakka, “Ham wodɗa yǝsǝɓa, ǝn han pensa ɓǝn kwausǝ ɓa.