Luka 15 - Lala NT

Mǝɗkǝra a ɗuura tǝmnka nfaa sǝra

¹ Ngawa ɓan kon samra ɓa ma ɓan tenatena ɓa ɓǝ wo me ɓǝ kura fǝɗkǝra Yeso ra.

² Pa ɓet Farisiyawa ɓa ma malǝmma masakaa sa ɓǝ nhuu ɓǝ nkee me, “Yǝɗa yǝn kon ɓan tenatena ɓa ɓǝ see mbuseya ke.”

³ Pa Yeso yǝɓǝ nkee mǝɗkǝra me,

⁴ “Me yake kǝn a ɗaaso waaso yǝma tǝmnkaa pusa puu puu u fin wa a nfaa yǝ lee u pawanakurun a nhaa wannakurn suwa a kaɗo koya kǝr u fin faasǝ suwa yǝ wǝr nhe rau?

⁵ Me yǝ wǝrsǝ kǝya see nepto, yaa too a nkoora

⁶ yaa koo ɗur, koya yar sika ma ɓanda nsaatǝra me sau, sǝnǝ kwasǝ kwalo me nǝ wǝr tǝmnkawano u faasǝ wan.”

⁷ Nǝn nkeesǝ me maaso ɓaa kǝ huur kuɗa a liura a ya tentena fin yǝ faasǝ ya a faɗ ɓaa pusa puu puu wanakurun ɓaa ɓong ɓong ɓǝ kǝra faata ra ɓa.

Mǝɗkǝra a ɗuura koɓa nfaa sǝ ra.

⁸ “A nkee me tooneke yǝma koɓa puu u fin wa a nfaa yǝ fini ara a arkumta ya kau handa ya kǝr u fin faasǝ suwa rau?

⁹ Me yǝ wǝr nǝn kiya yar sǝk ɓǝsa ma ɓanda nsaatǝra yǝɓǝ nkee me, ‘Sau sǝnǝ kwasǝ kwalo me nǝ wǝr koɓa u faasǝ wan.’

¹⁰ Nǝn nkeesǝ me maaso ɗǝm ɓa kǝ toom mbu huur kuɗa ɓa a wiiyo a ɓan timira Kaa ɓa a ete fin u yǝ konsǝ faata wa.”

Mǝɗkǝra a ɗuura au yǝ faasǝ ya.

¹¹ Yeso yǝ faɗ wiiyo yǝ nkee me, “Yake kǝn yǝsǝ ma em parata ɓa raɓ.

¹² Koɓe ya nkee papsǝ me, ‘Paane nǝ paa kǝna nwaano ngǝnǝ na.’ Papsǝ ya ɓaa kǝna suwa handa raɓ yǝ kwaɗ fin yǝ na koɓisi ya.

¹³ “Tǝr kwang ra kob siya yǝ kau kǝna usu nsaad ya faɗ a urko mǝbmǝb ko yǝ yaɓ nsaad a mbu salsal ɓa.

¹⁴ Ndiira yǝ yaɓsǝ mbusǝsǝ nsaad wa ɗoora a kana ursusu yǝ ma mbu kiya tombara.

¹⁵ Pa yǝ ko a yaakeni a ur susu me koya kǝr tinima pa kaya ya tung me koya nsee alautiya isa.

¹⁶ Yǝ kǝr me yǝ taa sau alautiya ɓǝn kǝusǝ wa, pa yaake yawa ya na mbuka yǝ se ra.

¹⁷ “Pa senda ira wosǝ wa ya nkee me, ‘Sika ɓan tinima paane ɓa ɓǝn tom fala ma mbuseya duuru, pa nwaano nǝn wod ɗorau!

¹⁸ Kǝnǝ nii nǝ ko duuru kona nkee paane me, Paapa nǝ tom Kaa ma ngiiga mbu tenatena ɓan.

¹⁹ Pam me ngǝnǝ yar me auwaange ra ǝnǝ, too nga fin a ɓan tinima ɓǝnga.’

²⁰ Pa yǝ nii yǝ ma ɗǝɗa me kiya kang a papsǝnǝ. “Yǝ mǝbmǝb pa papsǝ ya wǝr maya maya to usu yǝ nii ma mone koya ma maa kwalo.

²¹ “Au kaya ya nkee me, ‘Paapa, nǝ tom mbu tene tena ɓa Kaa ɗǝm nǝ tom ngǝn. Pam me ngǝnǝ yar me auwange ra.’

²² “Pa papsǝ yǝ yar hoota ɓǝsa ya nkee me, ‘Sausǝ ma lukta u kwalari wa naakǝn saa tungu saa tung pumra a wate ra ma taa a nata.

²³ Pa sa wo ma naa nhoorsǝ kwang suwa sǝ nǝngǝ sǝ nsaa ndǝ se nda kwala.

²⁴ Me ka auwane ya yǝ woodon pa wa yǝ nii ɗǝm ka yǝ faan pa wa ɓaa wǝrsǝn.’ Pa ɓǝ kwal dem.

²⁵ “A fer sǝso, tii auwe ya ka yǝ nyaa yǝ kansǝ ngwang ma ɗur wa paya kura ɓan pin kwam kwam ɓaa hiira.

²⁶ Pa ya yar hoora fin a tanda sǝra yaa taa me mbun tombi a tanda rau?

²⁷ Hoora sǝra ya nkee me, ‘Koɓange yǝ woon pa paage yǝ nkee me a maa naa kwang suwa a toodo a se a hir hira me koɓange yǝ woon kwakwa.’

²⁸ “Pa tii siya aa ɗaa dem yǝ yau yǝ kana a tanda sǝra ra. Pa papsǝ yǝ fiɗ yaa kǝna me yǝ kana.

²⁹ Pa au kaya yǝ kak papsi me, ‘A sengge meeta nsaad ndǝ ke nǝn tomgǝ tinima nga hoora nǝ fǝta bisi mbu ngǝ nkesǝsǝ ɓa ra, pa ngǝ fǝta nǝ naa hana au tǝmnkaaya me nǝ tod na yar sik ɓǝna ra.

³⁰ Pa auwange ya u yǝ tǝblǝ ngǝsǝ kǝna a toonaya yǝ wo woonga tod naa ɓeng wa!’

³¹ “Pa papsǝ ya nkee me, ‘Auwane pee ndǝ kee ma niina nsaad mbu nǝsǝ ɓa ǝn nwaango.

³² Pam man me ndǝ huur kuɗa pengpeng ra me koɓange ya kayǝ woodon, pa wa yǝ niin ka yǝ faan pa wa ɓaa wǝrsǝn.’ ”