Luka 12 - Lala NT

Tad tado

¹ Fer ɓeta dem kwausǝ wa ɓǝn noo ɓaatǝ, pa Yeso ya nkee emfǝɗkaa ɓǝsa ma ntiiri yǝɓǝ nkee me, “Sǝ tomma pǝro ma yisti ɓaa Farisiyawa ɓa, ma sem ɗaurato ɓoso.

² Mbukake sem kǝn a nhuukǝra, u a hik ntaandi wa ra, hana mbukake likisǝ u ɓaa maasǝ wa ra.

³ Mbu sǝ nkeesǝ a ham teɓteɓ ɓa, ɓaa kǝ kura a talte ɗǝm mbu nseusǝsǝ a ngwee a hito ɗaan ɓa, ɓaa kǝ na ee a talte.

⁴ “Nǝn nkeesǝ sik ɓǝna, sǝ kong kura kokto ɓaa ɓǝn toɗsǝ maabiri ɓa ra, me ɓǝ toɗɗon ɓǝ nkaa ɓǝ tom mbuka ɗǝm ra.

⁵ Pa kǝnǝsǝ nkee yaa sǝka kura kokto usu ya. Sǝ kura kokto Kaa wa, yaa usu me yǝ toɗɗon yǝ ma kwangto kiya muɗku a ar feɗefeɗe sem ra wa. Ɓongtǝra nǝn nkeesǝ kura kokto usu.

⁶ Ɓaa fanga muktaa wonon a koɓa raɓ rau? Yaa hana maaso fin a ɗaaso ɓoso, Kaa yaa hura ra.

⁷ Hana maaso nǝn nkeesǝ me nhiinyo a ɗuura sawa nsaad ɓaa kawan. Yaa sǝ kong kura kokto ra, sǝ faɗ muktaa dem mɓartan.

⁸ “Nǝn nkeesǝ me, yaa yǝ weɗasǝ me yǝ maa nǝn a wiiyo a ɓeta ni nya, Au Ete ya kiya nkee me yǝ maasǝn a wiiyo ɓan timira Kaa ɓa ni.

⁹ Pa yaa yǝ weɗasǝ me yǝ maanǝ ra a wiiyo a ɓeta ni nya, ɓaa ka weɗa me maasǝ ra a wiiyo a ɓan timira Kaa ɓa ni.

¹⁰ Ɗǝm nsaad, yaa yǝ nkeesǝ mara kwalakwala ra a ɗuura Au Ete ya wa, ɓaa kaa lee a senda, pa yaa yǝ nkeesǝ mara kwalakwala ra a ɗuura Wis Kaa wa ra, ɓaa a pǝta lee a senda ra.

¹¹ “Me ɓa wosǝsǝ a wiiyo a hitsa kǝna Kaa san, hana a wii kuɓsa wa, ma ɓan kan kiita ɓa, sǝ kong taarǝ ma ɗǝɗa kǝsa kon nkweerase ra, hana mbu kǝsa nkee ɓa ra,

¹² me Wis Kaa wa, kǝsǝ fǝɗkǝ a fer siso mbu kǝsaa nkee ɓa.”

Mǝɗkǝra a ɗuura haura an kǝna ya

¹³ Pa yake a ɗaaso ɓeta kwausǝ wa ya nkee Yeso me, “Malǝm a nkee ntii yaane yǝtǝ ɓaa kǝna u pate yǝ wodsǝ yǝtǝ lee wa.”

¹⁴ Yeso yaa kakka, “Ngase sikane yayǝ tinǝniu an kiita ya me nǝsǝ ɓaa kǝna a ɗaaso wasou?”

¹⁵ Pa yǝ nkee ɓeta me, “Sǝ pǝrǝ! Sǝ tom mǝbmǝb ma ɗeura mbusa ra sem taa mbusa kwang wa siso taa huurtu wa ra.”

¹⁶ Pa yǝɓǝ na mǝɗkǝra “Me ɓa pǝta tom an kǝna kǝn u nyanyo usu yǝ taasǝ mbusa dem wa.

¹⁷ Yǝ ti senda a kuɗa ira ya nkee me, ‘Nǝ semma pindara kǝnǝ tomtomniu?’

¹⁸ “Ya nkee ee usu me, ‘Nǝ ma mbu kǝna tomɓan kǝna ookǝ pinda sǝna nsaad nǝ mar u kwang wa na nhii mbu ɓǝna nsaad ɗaan.

¹⁹ Pa kǝnǝ nkee ngwerane me, “Ngǝ ma mbusa dem u kǝnga kwal meta dem wa. A lee nga nwii, ngǝ se, ngǝ wee ngǝn kura nepto nwaago.” ’

²⁰ “Pa Kaa yǝ nkee me, ‘Ngase haura! A pǝrtǝrara ɓaakǝ taa huurtu nwaago pa ya kiya se mbu ngǝ kwausǝ sisa niu?’

²¹ “Kǝ tom maaso ma yayǝ kwausǝ ngwerisǝ mbusa ya pa a wiyo a Kaa ni yǝ semma kǝna ra.”

Sǝ taarǝ ra

²² Pa Yeso yǝ nkee emfǝɗkaa ɓǝsa me, “Me maaso nǝn nkeesǝ, sǝ ntaayǝ ma nɗanyo waaso ra, a mbu kǝsaa se ɓa ra, hana a maabiri yaase, mbu kǝsaa tung ɓa ra.

²³ Me huurtu yǝ faɗ mbuseyan, ɗǝm maabiri yǝ faɗ luktaan.

²⁴ Sǝ sengge nkwaakǝ rau, ɓǝ rǝkaa ra, ɓǝ ɗaɗɗa ra, ɓǝ sem ma ham nhii mbuseya ɓa ra, hanan pindo ra, ɗǝm Kaa yǝn nsee ɓǝ. Saase sǝ faɗ rǝmɓan.

²⁵ Ən yamni a ɗaaso waaso me ntaayo usu kiyǝ nkaa yǝ sokǝ hana tǝro fin a palangto nɗanyo usuwau?

²⁶ Ya me sǝ nkaa sǝ tom mbu ngeek ɓa ra pasǝn taarǝ mbiu a pepera mbusa yau?

²⁷ “Sǝ sengge hurta ɓǝn mbarsǝ wa. ɗǝm ɓǝ tomaa tinima hana ntaawo ra. Pa nǝn nkee sǝ, hanan kuɓu Sulemanu ma too usu nsaad, yǝ pǝta tom tung mbusa u faɗsǝ fin a ɗaaso ɓoso ra.

²⁸ Me pa Kaa yǝn sengge kiiya a sanglo sa maaso, u yǝsaa sanglo naso nwa, ɗǝm ɗene a mudkǝ a ara wa, para saase yǝ kǝ sǝ sengge a faɗ ɓoso. Saase ɓan ma na ɓongto ngeek ɓa!

²⁹ Ɗǝm saase, sǝ ti kuɗasa a ɓǝ kǝsaa se ɓa ra, hana kǝsaa wee ɓa ra. Sǝ ntaayǝ a ɗuura ɓora ra.

³⁰ Me ɓaa ɓǝ maa Kaa ra ɓa, a put ntaadiwa ɓa, ɓǝn kǝr mbusǝsa nsaad, pa saase, Paase yǝ maan me sǝn taa ɓǝ.

³¹ Pa sǝ kǝr kuɓsutu usu, ɗǝm mbusǝsa ɓaa kǝ sǝ sokǝ ɗǝm.

³² “Sa ɓa sǝsa kur ngeek ɓa sǝ kura kokto ra me pase yǝn kura nepto me kǝyǝsǝ na kuɓsutu usu.

³³ Pasǝ pang mbusǝsǝ ma siso ɓa nsaad sǝ na hanhanta koɓa isa, sǝ kǝr nkweerase mbuk ra nhii koɓaa u yaa nkoo ra wa, kǝnaa u a tǝblǝrawa a liura a ham nkwii ya kan ya tangra ɓa kaklata ɗǝm ɓǝ ntee ɓǝ tǝblǝ ra.

³⁴ Me ham kǝnaa waaso yǝ sǝ ɓa, kǝnso ɗǝm kuɗa sa yǝ sǝ wa.

Sǝ kaɗ ma waro

³⁵ Yeso yǝ faɗ wiiyo yǝn nkee me, “Sǝ kaa nɗeera sa sǝ toma waro ma arkumta sa neksǝ,

³⁶ sǝ tom nga hota ɓǝn warsǝ An taanda ɓose me yǝ fiɗ a han hira kon toone ɓa me yǝ won yǝ hob inntii noknok ɓǝ nii ɓa wili.

³⁷ Kǝ tom mbu hur kuɗaɓa a hota sǝsani u An taanda ya yǝ wosǝ woyǝ ɓǝ tee ɓǝn warsǝn warwa nǝn nkeesǝ ɓongtǝrato kiya tung luktu usu hora wa yǝ kaɗa ham se mbuseya ɓa pa ya yar hota sǝta me ɓǝ ko ɓǝ se mbuseya.

³⁸ Kǝ tom mbu kwalari ɓa a hota sǝta u An taanda ɓose yǝ wosǝ a pam pǝrte hana handa weera woyǝ ɓǝ wo ɓa wara.

³⁹ Pa sǝ maa mbu ɓa. Me ka An taanda ya kiyǝ maa fer nkwii kiyaa wo a sa ni wa, yǝ yau yǝ lee ɓaa a kan a haa mbusa ra.

⁴⁰ Maaso, sase kǝn sǝ kaɗ ma waroo, me Au Ete ya kiya wo, a fer sǝ ti senda ra wa.”

⁴¹ Bitrus ya taa ya nkee me, “Ankundi ngǝn nkee mǝɗkǝra ra taseu ngǝn nkee ɓeta nsaad ɗǝu?”

⁴² Ankundi ya kakka, “Ən yamni hoora ma ɓongtǝra ma mabuka wau, u An taanda isi yǝ tisǝsǝ me ya sengge ɗuur usu yaa ɗǝm na ɓaata hotata mbuseya a fer keke pamsǝwa?

⁴³ Kǝ tom mbu kwalari ɓa a hoora kara ni, u An taanda isi yǝ kang, wo yǝ taa yǝn tom maaso ya.

⁴⁴ Nǝn nkeesǝ ɓongtǝra, kiyǝ ti yǝ kaɗ wiine a ɗuura mbu yǝsǝ ma siyo ɓa nsaad.

⁴⁵ Pa me ka hoora kara yǝ nkee ee usu me, ‘An taanda yaane yǝ kirin, yǝ wo ra,’ pa yǝ ntii hob hoota toona ɓa ma hoota parata ɓa ya, ɗǝm yǝ kana se ma weeyo ndub me taasǝn.

⁴⁶ Pa me yǝ tom maaso, an taanda hoora sǝra ya, kiyaa wo a kaa yǝ maa ra ɓa, ɗǝm a fer yǝ ti senda ra wa.

⁴⁷ Pa an taanda isi kǝyaa hoɓ dem, ɗǝm yaa kan kiita ke ma ɓaa ɓǝ na ɓongtǝra ra ɓa.

⁴⁸ Pa ya usu yǝ ma mbu An taanda isi yǝn taasǝ me ya tomɓaraya paya tom mbu pamsǝ me aa hob ɓa ka hob ngeek nsaad ya ɓa nasǝsǝ mbuka kwangya ɓaakǝ taa mbuka kwang a sani ya ɓa nasǝsǝ mbuka ngeek ya ɓaakǝ taa mbuka ngeek a sani.

Yeso yǝ wo ma ɓa ɗuuti wa

⁴⁹ “Nǝ wo me kǝnǝ kan kiita nga ara a put tadiwa me ǝn yauwo waano kama nekken!

⁵⁰ Pa nǝma baptisma u kongsa wa naa rǝkata me mbusa faɗen!

⁵¹ Sǝn sen nga nǝ wosǝ ma kaɗo hurhurto a put ntaandi wau? Nǝn nkeesǝ me, sem ra. Nǝ wo ma ɓaawo.

⁵² Niinyo waso a ɗuur fin ɓeta wonon kǝɓǝ ɓaa a ɗaaso ɓosa ɓa taatǝn ɓa ɓǝn simba ɓa raɓ ɓa ɓa raɓ ɓa ɓǝn simba ɓa taatǝn ɓa.

⁵³ Ɓaa kǝɓǝ ɓaa, paapa kiyǝ simba au isi, ɗǝm auwe kiyǝ simba papisi, ɗǝm maa kiyǝ simba au isi toone ya, ɗǝm autoone kiyǝ simba maasi, ɗǝm maa toone ya kiyǝ simba maa toone au isi ya, ɗǝm maa toone au isi ya kiyǝ simba maa ker isi ya.”

Maa fer usu wa

⁵⁴ Yeso yǝ nkee ɓa kausǝ ɓa me, “Me sǝ wǝr liuta nisǝ ma kunda noknok sǝkǝ nkee me, ‘Tiwo kǝ roo’ ɗǝm a roo.

⁵⁵ Me ɗǝm sǝ kura nyora ǝn taa taare sǝn nkee me, ‘Handa kǝ nkwaa,’ pa handa a nkwaa.

⁵⁶ Sa ɗǝlmara raɓ ɓa! Sǝn nkaa sǝ maa mbu ka tom a Putu ma liuta ɓa, pa sǝ pǝta maa mbu ǝn tomsǝ ɗaan a kaareyase ɓa ra.

⁵⁷ “Tomtomniu sǝn kana kiita kwalari wa ma ngwerase rau?

⁵⁸ Me sǝn koko ma atekere yaange a kuɓ kwang an kan kiita ya ni wa, a kweetǝ sǝ sǝk ma sase a fer sǝsa ɗǝɗa wa, pa me sem maaso ra, atekere yaange kiyǝ ngǝ win yaa ko a an kan kiita ya ni, ɗǝm an kan kiita ya kiyǝ ngǝ na a nem ya kwang neu ɓeta ya, sase ɗǝm kiyǝ ngǝ mudkǝ a ham neu ɓeta ɓa.

⁵⁹ Nǝn nkee ngǝ, ngǝ kong fiɗaa ham sǝsa ra, ndub me ngǝ kwan nsaad mbu ɓan ɓǝɗ ngǝsǝ ɓan.”