Luka 10 - Lala NT

Yeso yǝ timi emfǝɗkaa ɓǝsa paa mbutu nhaa raɓ

¹ Pa tomsǝwa Ankundi Yeso ya tau ɓeta emfǝɗkaa ɓǝsa ɓol paa mbutu nhaa raɓ ɗǝm yǝɓǝ timi raɓ raɓ mee ɓa ko a wiyo ura ham yǝ sensǝ me kǝya ko ɓa.

² Pa Yeso yǝ ɓǝ nkee me, “Tinima heren, pa ɓan tinima ɓa ngeek. Sǝ kǝna Ankundi tinima ya, yǝ tung ɓan tinima ɓa a nyaanyo.”

³ Soo! Nǝn timisǝ nga em tǝmnkaa ɓa a ɗaaso kurkutaa wa.

⁴ Sǝ kong too koɓa, hana ɓukra, hana mbuseya, hana taa ra, sǝ kira too ɓeta wa a ɗǝɗa ra.

⁵ “Ɗur sǝ kansǝ wa kong, sǝ ntii sa nkee me, ‘Hurhurto ya kaɗa ɗur wa.’

⁶ Me yaa hurhur ya kǝn a ɗur siso, a lee hurhurto waaso a kaɗ ke ma sase. Me ɗǝm sem ra, hurhurto waaso a kang a sani.

⁷ Sǝ kaɗa ɗur wa, sǝ se, sa wee mbu ɓǝ nasǝsǝ ɓa nsaad, an tinima ya pamman me a kwana. Sǝ ɓǝɗ ɗur sa.

⁸ “Ur sǝ kansǝwa kong me ɓaa konsǝ, sǝ see mbu ɓaa wosǝ mee sa se ɓa.

⁹ Sǝ roɓ ɓa ɓǝsǝ ma siya a ur siso ɓa, ɗǝm sǝ nkee ɓeta mee, ‘Kuɓsutu Kaa wa yǝ won ngwang ma saase.’

¹⁰ Pa ur kǝsa kan wa kong, me ɓaa mbisisǝn, sǝ ɓǝɗ ntoota ntoota, sǝ nkee me,

¹¹ ‘Hana tula ur waaso ra u masǝ nasǝtaa wa tǝ kukun ndiiran a ɗuura sa, pa sa ma me Kuɓsutu Kaa wa yǝ won ngwang.’

¹² Nǝn nkeesǝ, para ɓet Sodom ɓa a kaa sǝsa, a ɗuura ur siso ra.

¹³ Yǝ nkee me, “Saase ɓet Korasin ɓa, ǝn mbu mayamaya ɓa a sani. Saa ɓet Betsaida ɓa, ǝn mbu manyamanyato ɓa a saani. Me ka mbu nhiinyanhiinya ɓaa tomsǝ a saani ɓan, ɓaa ka tom a ɓet Taya ɓa ma ɓet Sidon ɓa nǝn, kama ɓǝ kon nfaatan tangtang, ɓǝ kaɗsǝ a tuksukta ɓaa puk arma a maabiri ɓose nǝn.

¹⁴ Pa para ɓet Taya ɓa ma ɓet Sidon ɓa a kiita, ma saase.

¹⁵ Pa saase ɓet Kafarnahum ɓa, ɓaa kǝsǝ too ɓoti a liurau? Sem ra, ɓaa kǝsǝ muɗkǝ a Hades.

¹⁶ “Yaa yǝ kurasǝsǝ ya, yǝ kuranǝn, ɗǝm yaa mbisǝsǝ ya, yǝ mbisinǝn. Pa yaa yǝ mbisinǝsǝ ya, yǝ mbisi yaa yǝ tungnǝsǝ ya.”

¹⁷ Emfǝɗkaa ɓǝsa ɓet puu mbutu nhaa raɓ sǝɓa ɓa kang ma kwalo ɓaa nkee me, “Ankundi, nsaad ma nsaamse ɓǝn natǝ mbarta mee tǝ yar ɗǝnda ngaa.”

¹⁸ Pa Yeso yǝɓǝ nkee me, “Nǝ wǝr Kuɓ nsaawa yǝ hama liura ngaa weɗweɗo

¹⁹ Sǝ kura, nǝ nasǝ kwangto u kǝsa noo nsaamse ma neneya wa, ɗǝm sǝ win ate kere Mbuka sem ɗǝm kǝya tom ma sase wara.

²⁰ Hana maaso, sǝ kwal mee nsaamsen kurasǝn ra, sǝ kwal mee ɓaa nyor ɗǝnta saa a liura.”

²¹ A fer siso Yeso, kungsǝ ma kuɗa pengpengra ma Wis Kaa wa yǝ nkee me, “Nǝn nyoo ngǝ, Paapa, Ankundi a liura ma putu ya, me ngǝ nhuukǝ mbu ɓa ɓaa ɓǝ weesǝ nuuwa ɓa, ma ɓaa ɓǝ maasǝ mbuka ɓa, pa ngǝ weɗa a em ngeek ngeek ɓa ni. Ee nwa, Paapa, mbu ɓa ǝn mbu tom ngǝsǝ yaɓ me ngǝ tom ɓa.

²² “Mbusa nsaad Paane yǝ nanǝn. Yaake yǝ maa ǝn yamni Au kaya ra, ndub Paapa, ɗǝm yaake yǝ maa ǝn yamni Paapa ra ndub Au kaya, ma ɓaa Au kaya yǝ tau ɓǝsǝ me kiyaa weɗa ɓa.

²³ Pa ya kǝrtǝ ya nkee emfǝɗkaa ɓǝsa a nhuukǝra mee “Saltǝra yǝ kaɗan a nuunwa ɓǝ wǝrsǝ mbu sǝ wǝrsǝ ɓan.

²⁴ Nǝn nkeesǝ, ɓannawanto ɓa, ma kuɓsa dem ɓǝn taa me ɓǝ wǝr mbu sǝn wǝrsǝ ɓa, pa ɓǝ wǝr ra, ɗǝm ɓǝn yau me ɓǝ kura mbu sǝn kurasǝ ɓa, pa ɓǝ kura ra.”

Annɗǝsaatǝre yaane ndǝ yamniu?

²⁵ Kaaka ke, yaa yǝ maasǝ masaka Musa ya, yǝ nii kǝɗ me yǝ pǝta Yeso. Yaa taa me, “Malǝm, kǝnǝ tombi kǝna taa huurtu pakarese yau?”

²⁶ Yeso ya nkee me, “Ɓaa nyor me miniu a likarkar masaka Musa wau? Ngǝn kau miniu?”

²⁷ Eɗ kaya yaa kak me, “A yau ma Ankundi Kaa ɓǝnga ma kuɗa nga nsaad, ma huurtu nwaango nsaad, ma kokrokto nwaango nsaad ɗǝm ‘ngǝ yau anndǝnsaatǝre nyaange nga nkweerange.’ ”

²⁸ Yeso ya nkee me, “Ngǝ nkeen keke. Yaa, a sǝk maaso kǝnga ɗanyǝ.”

²⁹ Maa malǝm masaka suwa yǝn yau me ya weɗe me yǝ ma mbusǝsan nsaad. Ya taa Yeso ya nkee me, “Sika, annɗǝsaatǝre yaane ndǝ yamniu?”

³⁰ Yeso yaa nkee me, “Kakake eɗ ke nii Urshalima yǝn ham hama me yǝ ko Yeriko. Pa ya pam ma nkwiiya a ɗǝɗa. Ɓa ɓaa hob kwala kwala ɓaa nkweetǝ mbusa a mabiri, ɓaa lee kǝk woɗa.

³¹ Pa tomsǝwa, firis ko yǝn talǝntalǝ a ɗǝɗa sǝra kǝn. Yǝ wǝrsǝ yasiya ɗuk maaso wa, ya par ma kala ya faɗ mbusa.

³² Eɗ Lawi ya wo ya wǝr ɗuk maaso, ya par ma kala ya faɗ mbusa.

³³ Pa eɗ Samariya ya wo a ham yǝsǝ ɗuk ɓa. Yǝ wǝrsǝsǝwa, manya mayato a ma.

³⁴ Ya wo ya kwasi, ya puk yar zaitun wa ma mbraa inabi ma a hundi isi, ya kaa hundi sisi, ya too a kwaarǝra ya faɗa ɗuur han hamwaa ɓa, ya sengge hundi isi.

³⁵ Handa nwee suwa, ya haa ɓaa dinari raɓ ya na eɗ yǝn sengǝsǝ han ham waaɓa ya, ya nkee me, ‘Ənǝ sengge eɗ ɗa, me ngǝ toɗ mbukan a faɗ mbu nǝ na ngǝsǝ ɓan, me nǝ won kǝnǝ ngǝ puu.’

³⁶ Yeso ya taa maa malǝm masaka Musa wa ya nkee me, “A ɗaaso ɓeta taatǝn suwa, yamniu ndǝ annɗǝsaatǝre ya nkwiiya hobsǝsa a ɗǝɗa siyau?”

³⁷ Maa malǝm masaka Musa ya nkee me, “Eɗ yǝ wǝrsǝ manya manyato usu siya.” Yeso ya nkee maa malǝm siya ya nkee me, “Ya, ngo ngǝ toma sǝko maaso kǝn.”

Yeso ko ɗuur Marta ma Maryamu wa

³⁸ Yeso ma emfǝɗkaa ɓǝsa ɓaa sikoo ɓa ko urko, a ham toonǝke kǝn yarsǝsǝ mee Marta ɓa, pa ya kana ɗuur usu.

³⁹ Marta yǝma koɓe yarsǝ mee Maryamu, u yǝ kaɗsǝ ngwang ma Ankundi wa yǝn kura mara ira.

⁴⁰ Pa tinima a hersǝ Marta wa, pa ya ko a Yeso ni yaa taa mee, “Ankundi mbuka nteegǝ ma mbu koɓaane yǝ leenǝsǝ tinima fin mana wa rau? Aa nkee ya wo yǝnǝ kwasi rau.”

⁴¹ Pa Ankundi, yaa kak ya nkee me, “Marta, Marta, sendǝngaa niin, ɗǝm mbusa nɗaa ngǝ kwang.

⁴² Mbuka fin ɓan taasǝwa, Maryamu yǝ wee tau mbuka kwalari wan u a nkaa a kon ndiira rawa.”