Luka 1 - Lala NT

Mbu kwasǝ Luka yǝ nyorsǝ likarkar wa ɓa

¹ Ɓeta dem ɓǝn taa me ɓǝ nyor mbu tomsǝ a ɗaaso nwaado ɓa nga nkeesǝ wa.

² Ɓǝ nyor mbu ɓǝ kurasǝ a ee ɓa, ɓǝ wǝrsǝ mbusǝsa ma nuwa ɓosa a ntiiri wa, pa ɓǝn hoota mara sǝra wa, ɗǝm ɓǝ tomaa nkee mara Kaa ra wa.

³ Tiyafulus yaa kwang, tomsǝ maaso wa niina ma nkweera na, nǝ sengge mbusǝsa nsaad a ntiiri tom keke nǝ nyor mbu ɓa fin fin,

⁴ me ngǝ ma ɓongtǝrato mbu ɓaa fǝɗkǝ ngǝsǝ ɓa.

Ɓa na ee me ɓaakǝ haa Yohanna an tom Baptisma ya

⁵ A fer Hiridus yǝsa a kuɓsutu Yahudiya wa, an nek mbusa ke kǝn ǝn yarsǝ me Zakariya, u yǝsa a ɓan nek mbusa a tuwa Abiya ra wa. Toonesi ǝn Alisabatu sase ɗǝm yǝ fiɗ a tuwa Haruna wa.

⁶ Ɓǝ nsaad raɓ kou ɓǝ tom kaɗo yabwa a wiiyo a Kaa ni ɓǝn ɓǝ masaka Ankundi wa nsaad nga yǝ nkeesǝ a tom wa.

⁷ Pa ɓǝ sem ma emba ra me Alisabatu yǝ haara ɗǝm ɓǝ nkoon nsaad.

⁸ Kakake fer Zakariya yǝn tom tinima nek mbu seera kwalari ɓa a wiiyo a Kaa ni,

⁹ ɓaa tausǝ a ɗǝɗa ǝn tomsǝ a tau an nek mbusaya wa me yǝ ko a Hit Kaa Urshalima wa me ya nek mbu sera yaɓa.

¹⁰ Pa fer nek mbusǝsa kansǝwa ɗǝm ɓan ɓǝɗ Kaa ɓa ɓǝ kau ntaandi ɓaa kǝnara.

¹¹ Pa an timira Kaa ya yǝ weɗa ee usu a sani yǝ nǝɗ a kal nem seya ya a han nek mbu nsera ya ɓa.

¹² Pa Zakariya yǝ wǝrsǝ an timira Kaa ya wa kango aa paa kokto aa ma.

¹³ Pa an timira Kaa ya ya nkee me, “Ngǝ kura kokto ra Zakariya. Kaa yǝ kura kǝnara ngaan, ɗǝm toonage Alisabatu kǝyǝngǝ haa auwe parara, kǝ ngaa ti ɗǝnda me Yohanna.

¹⁴ Yǝ kǝngǝ tom mbu kuɗa pengpengra ɓa ma kwalo ɓeta dem ɓǝkǝ kwal ma haa usu,

¹⁵ kiya tom kuɓ kwang kwangya a wii Ankundi ni. Ya fǝta wee mbraa inabi ma wa ra, hana mbu kasa ti aa taa ɓa ra. Ɓaa ka kung ma Wis Kaa wa a kuda a maasini.

¹⁶ Ɓeta dem Isra'ila yǝ kǝɓǝsǝn kang a Ankundi Kaa ɓosa ni.

¹⁷ Yǝkǝ ko a wiyo Ankundi ni ɗaan a Wiso ma kwangto Iliya wa, yǝkǝ kǝrtǝ senta paapamse a ko a emɓǝsani, yǝkǝ kǝrtǝ ɓeta ɓa ɓǝ kurara ɓa, ɓǝ nfaa, ɓǝ ntii ɗǝm ngaa ɓaa ɓǝn nasǝ kwangto kaa ɓa kiya wǝrkǝ ɓeta u Ankundi wa.”

¹⁸ Pa Zakariya yǝ taa an timira Kaa ya, “Kǝnǝ maa mini miniu mee mbu ngǝ nkeesǝ ɓa kǝ tom maa sou? Lawa nǝ nkoon ɗǝm toonane meeta ita heren.”

¹⁹ An timira Kaa ya kakka, “Nǝn Jibrailu ya yǝ nǝɗsǝ a wii Kaa wa ya. Kaa yǝ timinǝ me nǝ wonǝ ngǝ nkee mbu kwalari ɓa.

²⁰ Nga wa kǝ ngǝ tom kwaara, ngǝ nkaa ngǝ kanda me ǝn kaa mbu ɓa ka kung ɓa ra, me ngǝ yau ma mara ra u kiya kaɗ ɓongtǝrato me tǝro usu kanan wara.”

²¹ Ɗǝm ɓeta ɓǝn war fiɗo Zakariya wa ɓa senta me mbu kwa mbi yǝ kaɗsǝ dem a Hit Kaa Urshalima wau.

²² Pa yǝ fiɗsǝ wa yǝ nkaa yǝ kan ma ɓosa ra pa ɓǝ maa me yǝ wǝr mbu weɗara ɓan a Hit Kaa Urshalima wa payǝn kan ɓǝ mara ma nema yǝ nkaa yǝ kan ma ee isi ra.

²³ Pa fer tom tinima usu feɗsǝ wa yǝ kang ɗuuru.

²⁴ Ndiira usu pa toonesǝ Alisabatu yǝ too kuɗa, paya nfaa ofe wonon.

²⁵ Alisabatu yǝ nkee, “A feɗefeɗe me Ankundi yǝ kura nyorataara nan. Yǝ hik nǝ a ɗuura waran a ɗaaso ɓeta wa.”

Ɓa nkee haa Yeso wa

²⁶ A ofe mindike ya Kaa yǝ timi an timira Kaa ya Jibrailu Nazarat a put Galili wa,

²⁷ yǝ koo a autoone ke ni u ɓaa waasǝsǝ me kaa nsaa wa eɗ kaya ǝn yarsǝ me Yusufu ya tuwa Dauda wa. Ɗenda autoone kara ǝn Maryamu.

²⁸ An timira Kaa ya yǝ koo a sani yaa nkee me, “Nkwaata ngase Kaa yǝ tigǝ nem isin! Kaa yǝ ke ma ngiinga.”

²⁹ Pa Maryamu yǝ kurasǝ tooma ira wa maa senda ira aa nii yaa senta me wa ndǝ kamǝra tooma mbi wau.

³⁰ Pa an timira Kaa ya, yaa nkee me, “Maryamu, kǝ kura kokto ra, ngǝ taa ti neme wa a Kaa nin.

³¹ Nwa kǝ ngǝ too kuɗa, ngǝ haa auwe parara, kǝ ngaa ti ɗǝnda me Yeso.

³² Yǝ kǝ kaɗ wiine kwangya ɗǝm ɓaa kaa yarme Au Kaa ɓoti ya. Ankundi Kaa kiya na han kaɗ kuɓsutu papsi Dauda wa.

³³ Yǝ kǝ tom kuɓsutu tanda Yakubu ra feɗo semra, kuɓsutu usu ɗǝm a feɗɗa.”

³⁴ Maryamu yǝ taa an timira Kaa ya, “Pa kǝ tomtomniu si nanǝ ma parara rau?”

³⁵ An timira Kaa ya yaa kak yǝ nkee me, “Wis Kaa wa kǝ ham a ngani, kwangto Kaa Ɓoti wa ɗǝm kǝyǝ ngǝ liki. Pa ya sem ma tenatenato raya kiya haa aa yarme Au Kaa ya.

³⁶ Hana Alisabatu eɗ ɗange kiya taa auwe a nkooto usu hana yǝ haara siso nawa yǝma kuɗa ofe mindike.

³⁷ Mbu Kaa ya nkaa yǝ tomra ɓa semra.”

³⁸ Maryamu ya kakka, “Ya waano nǝn hoora Ankundi ra, a lee a kaɗ maaso nga ngǝ nkeesǝwa.” Pa an timira Kaa ya ya faɗ ya lee.

Maryamu yǝ koo a Alisabatu ni

³⁹ A fersiso Maryamu yǝ haɗ me yǝ koo a urko a ɗaaso ɗungate put ɓaa Yahudiya ɓa,

⁴⁰ payǝ kana a ɗuur Zakariya wa ya too Alisabatu.

⁴¹ Pa Alisabatu yǝ kurasǝ tooma Maryamu ra wa, auwe yǝ nyaa a kuɗa sani. Pa Alisabatu yǝ kung ma Wis Kaa wa.

⁴² Yǝ nik kwaro kwang ya nkee me, “Saltǝra a ɗaaso toonawa ɗǝm saltǝra a au kǝnga haa ya!

⁴³ Tomtomni maasou, nǝ taasǝ yauma a maa Ankundi yaane ya yǝ wosǝ a naniu?

⁴⁴ Ni kurasǝ tomanga wa au a kuɗa a nani ya yǝ nyaa me ndǝ kuɗa pengpengra.

⁴⁵ Saltǝra ǝn sase yayǝsǝ ma ɓongtǝrato ya me mbu Ankundi nkeesǝ ɓa kǝ kungu!”

Pin nyo Kaa Maryamu wa

⁴⁶ Pa Maryamu yaa nkee me, “Hurtu nwaano too ɗǝnda Ankundi ra

⁴⁷ ɗǝm huurtu nwaano ǝn kwal ma Kaa au Kon Nkweera yaane,

⁴⁸ me yǝ ɗimma nase hoora ira hana nǝsǝ hoora ira Waso nǝ mbukake ra. Nii nga waso kaata kaata ɓeta nsaad a put ntaadiwa ɓǝkǝ nǝ yar mee an saltǝra ya,

⁴⁹ me Ya Kwang ya tomnǝ mbu kwang kwang ɓan, ɗǝnda ira me yaa kwang Ɓoti ya.

⁵⁰ Kaata kaata, mayamayato usu ǝn koo a ɗuura ɓaa ɓǝn kurasǝ kokto usu ɓa.

⁵¹ Yǝ tom mbu kwang kwang ɓa ma kwakwato nema isa wa, yǝ nwee ɓa ɓǝn tomsǝ ɗuura ɓora ɓa me nsaad ɓaa ɓǝn heusǝ a senta ɓota ɓa.

⁵² Yǝ ham kuɓsa a kuɓsutu ɓoso, pa yǝn too ɓa ɓǝsǝ sem mbuka ra ɓa.

⁵³ Yǝ nkwee ɓa ma ɗoora ɓa mbu kwalari ɓa pa yǝn tung ɓa ma kǝna ɓa nema sal.

⁵⁴ Yǝ kwasi hoora ira Isra'ila, ya dimma maya mayato usu

⁵⁵ yǝ tomsǝ Ibrahim wa ma sirta ɓǝsa pakarese wa, nga yǝ nkeesǝ paapamse yaande wa!”

⁵⁶ Maryamu ɓǝ kaɗ ma Alisabatu ofe taatǝn paya kang ɗuuru.

Haa Yohanna an tom Baptisma ya

⁵⁷ Pa tǝrma haa usu kungsǝ wa pa Alisabatu yǝ haa auwe parara.

⁵⁸ Pa ɓanda nsaatǝra ɓǝsa ma haato usu ɓǝ kurasǝ me Ankundi yǝ kura nyorataara iran nwa, pa ɓaa kwasi huur kuɗa wa.

⁵⁹ A tǝrma kurkurun ma ɓaa saa wo me aa firi, ɓǝn taa me ɓǝkaa ti ɗǝnda papisi ra Zakariya,

⁶⁰ pa maasi ya nkee me, “Awo! Kaa yar me Yohanna.”

⁶¹ Pa ɓa nkee me, “Yake semma ɗǝnda sǝra a haato waaso ra.”

⁶² Pa ɓǝ taa papisi ma nema me yǝ nkee ɗǝnda kaa yar au sisi ra.

⁶³ Ya taa mbu nyora, pa ya nyor, “Ɗǝnda ira me Yohanna.” Ɓeta nsaad ɓǝ tom mbu nhiinyanhiinya ɓa.

⁶⁴ Nok kǝnso ee isi a wili, yǝ tii kanmǝra yǝn nyoo Kaa.

⁶⁵ Ɓanda nsaatǝra nsaad ɓǝ kung ma kokto a ɗaaso dungate put Yahudiya wa, ɓaa kanmǝra mbusǝsa ra nsaad.

⁶⁶ Nsaad ɓa kurasǝ mbu sa wa, ɓǝ ta me, “Au ya kiya kaɗ eɗ mbiu?” Me kwangto Ankundi wa, ke ma sase.

Pin Zakariya wa

⁶⁷ Papisi Zakariya yǝ kungsǝ ma Wis Kaa wa, paya nawanto:

⁶⁸ “Əndǝ nyoo Ankundi, Kaa Isra'ila, ya me yǝ wo woya hik ɓet ɓǝsa,

⁶⁹ yǝ ndǝ a tuwa hoora ira Dauda wa, yǝn kon nkweera ra me ndaase.

⁷⁰ Nga yǝ nkeesǝ lau ɓan nawanto ɓisa tangtang wa.

⁷¹ Kon nkweera wa a ɓataker ɓǝnda ni a nema ɓa nsaad ɓǝ mbisisi ndǝ ɓa

⁷² me a weɗa nyorataara pap ɓǝnda a ɗǝm ɗimma ɗekɗek to waa wa,

⁷³ yǝ waa yǝ kwee ma paade Ibrahim,

⁷⁴ yǝ kǝndǝ kon ɗuura a nema ɓaatakera ɓǝnda ni, me nda tom tinima ima kokto semra

⁷⁵ nda kaɗ yaɓ nda tom tinima kaa tǝ Kaa ma a tǝro nwaando nsaad.

⁷⁶ “Ngase ɗǝm auwane, ɓaa kǝ ngǝ yar me an nawanto Kaa Ɓoti ya, me kǝ ngǝ ko a wiyo a Ankundi ni ngaa wǝrkǝ ɗǝɗa ira,

⁷⁷ kǝ ngǝ na ɓet ɓǝsa maa konkweera wa ma lau kon faata a tenatenato ɓoso wa,

⁷⁸ lau yauta Kaa ta wa, weɗweɗɗo usu kǝ ham a dani nga wosa ǝn nweesǝ a liuta wa, kiya wo a dani a Kaa ni

⁷⁹ a dani ɓaa ɓǝn kaɗsǝ a ham tebteb kuu woɗa ɓa, weɗweɗɗo wa kǝ wed me ǝndǝ weɗa ɗǝɗa naupa ra.”

⁸⁰ Pa au kaya yǝ mbraa yǝ tom kwakwa a huurtu ya kaɗ a sanglo ndub fer yǝ fiɗsǝ a talte a ɓaa Isra'ila ni ɓa wa.