JAS 5 - Lala NT

Wiin ngwee wa ɓan kǝnaa ɓa

¹ Sǝ kura waso, saa ɓan kǝnaa ɓa, sǝ pomo sǝ tee me kongsa ǝn wosǝn wo a ɗuura saa ra.

² Kǝnaa waaso nhoon, ɗǝm lǝkǝmta ɓǝ kǝu lukta sǝsan.

³ Zinariya ma Azurfa waaso ran ngan. Rango usu yǝn weɗa me maabiri yaase kiya rang maaso maabiri yaa ngǝ yǝ kǝɗ nga ara. Sǝ kwau kweerase koɓa a feɗefeɗe tǝro ya.

⁴ Sǝ sengge! Ɓaa ɓǝ waasǝsǝ nyaayo u sǝ waando sǝ ɓǝ kwan da ɓa, ɓǝn tete ndiira waaso. Or ɓaa ɓǝ tomsǝsǝ tinima nyaayo ɓa kana a ngwee a yaa kwang ya Ankundi yaande ya nin.

⁵ Sǝ kaɗa put ntaadiwa ma kura nepto wa. Sǝn se sǝn wee mbu tǝsǝsǝ ɓa, yaa sǝ nsee nkweerasen nga naa, wa sǝn war kaa kǝ sǝn nǝng ɓa.

⁶ Sǝn kankiita ɓaa ɓǝ tom mbuka ra ɓa, ɗǝm sǝ tod ɓeta, ɓaa ɓǝn bisisǝ ee ra ɓa.

Sǝ sǝmo ma kǝnara

⁷ Ɓaata ɓǝna, sǝ sǝmǝ, sǝ war wo Ankundi yaande wa. Sǝ wǝr sǝmo an nyaanyo ya yǝn warsǝ nyaanyo usu a tom ya, yǝn war ma sǝmo tiwo a ntiiri wa ma u feɗefeɗe wa.

⁸ Saase ɗǝm, sǝ sǝmǝ sǝ nǝɗ kwakwa a ɓongtǝra waaso, me wo Ankundi yaande wa, tomon nkwang.

⁹ Ɓaata ɓǝna, sǝ tom nhurunhuru ɓaatǝ ra, me tom ɓaa sǝ kan kiita ra. An Kankiita ya yǝ kǝɗ a inntii!

¹⁰ Ɓaata ɓǝna, sǝ too mǝɗkǝra sǝmo kongsa wa u ɓan nawanto ntiiri ɓa, ɓǝ kansǝ a ɗǝnda Ankundi yaande ra wa.

¹¹ Nga sǝ masǝ wa, tǝn nkee ɓeta me ɓaa ɓǝ sǝmsǝ ɓaa naɓǝ saltǝran. Sǝ kura sǝmo Ayuba tomsǝ wan, ɗǝm sǝ wǝr mbu Ankundi yaande yǝ tomsǝsǝ a feɗefeɗe wan. Ankundi yaande yǝ kungsǝ ma mayamayato ma nyorataara.

¹² Mbu faɗsǝ nsaad ɓa, ɓaata ɓǝna, sǝ kong kuu hana ma liura ra, hana ma put ntaandi wa ra, hana mbuka ɓol ra. A lee “Ee” yǝ tom Ee, “Awo” yǝ tom “Awo” Me sem maaso ra, Kaa kǝ sǝ kan kiita sǝ kaɗ mbu sala.

Sǝ kǝna ma na ɓongto wa

¹³ Yaake kǝn a ɗaaso waaso yǝ kansǝ a kongsa wau? Yǝ tom kǝnara. Yaake kǝn a ɗaaso waaso yǝsǝ ma hur kuɗa wau? A lee yǝ kǝɗ pin nyoo Kaa wa.

¹⁴ Yaake kǝn yǝsǝ sem kwakwa ra wau? A lee yǝ yar wiina hit ɓǝɗ Kaa ɓa, ɓǝ wo ɓa tom kǝnara a ɗuura ira, ɗǝm ɓaa puk yaro a ɗǝnda Ankundi ra yaande.

¹⁵ Kǝnara u tomsǝ ma na ɓongtǝra wa ki ya roɓ yaa sem kwakwa ra ya. Ankundi yaande ki ya niki. Me ka yǝ tom mbu tenatena ɓan, Kaa ka lee a senda.

¹⁶ Pa me maaso, sǝ nkee tentenato waaso ɓaatǝ, ɗǝm sǝ tom kǝnara ɓaatǝ me sǝ roɓɓo. Kǝnara yaa yǝsǝ keke a wiiyo a Kaa ni ya, yǝma kwangto ɗǝm ǝn tom tinima.

¹⁷ Iliya yǝn ete nga ndase. Kakake yǝ tom kǝnara ma na ɓongtǝra wa, me ǝn roo tiwo ra, pa tiwo roo a put siso ra meeta taatǝn ma pekǝra.

¹⁸ Ɗǝm yǝ tom kǝnara, pa liuta yǝ na tiwo, ɗǝm putu yǝ na mbuseya.

¹⁹ Ɓaata ɓǝna, me yake kiya lee ɗǝɗa ɓongtǝra ra, a lee yaake yaa sa kang a ɗǝɗa.

²⁰ Sǝ ɗim ma mbu ɓa. Yaa yǝ kangsǝ ya ma tentenato ya fin a ɗǝɗa yaɓ ra ya, ka ti yǝ noo woɗɗa, ɗǝm a liki tentenato usu dem.