JAS 3 - Lala NT

Ɓǝɗɗo ma ɗǝlmara

¹ Ɓaata ɓǝna, sǝ sem nsaad kǝsǝ tom ɓan fǝɗkǝra ɓa ra, me sǝ maan taase tǝn tomsǝ fǝɗkǝsǝ ɓa, ɓaa kǝtǝ kan kiita a faɗ ɓeta nsaad.

² Nsaad ndǝn nwii a ɗǝta ɓolɓol. Me yaake yǝ nkaa yǝ tǝblǝ ee usu ma lau mbu yǝn nkeesǝ ɓa ra, yǝn sem ma mbu yǝ tǝbla ra, ɗǝm kiya nkaa yǝ ɓǝɗ ma maabiri isi nsaad.

³ Nɗǝn tung sakla piro me ndǝ sa wiin ni, maaso ndǝn nkaasǝ ndǝ kǝrtǝ maabiri piro ya wa.

⁴ Hana ndǝ too kurnyaamo a mbu mǝɗkǝra ɓa. Hana ka yǝsǝ kwang siso ɗǝm yǝn moon ma winne yoro ya, ɓaa kǝrtǝsǝ ma ɓot nyaa kurnyamo ɓa a han nsaad ǝn taasǝ me kǝ ko ɓa.

⁵ Maso ɗǝm ɗǝlmara yǝ ngeek a maabiri, pa yǝ kungsǝ ma nheeura. A sengge kuklu ma kwangto usu nsaad mbu wara fin kiya ma nsaad.

⁶ Ɗǝlmara ǝn ara, a put ntaadi wa. Yǝn ti kwanatiro a maabiri ete ya nsaad, yǝn ti ara a mbu nsaad ete yǝ tom sǝ ɓa, ar ɗǝlmara ɓa ma nkweera ira fiɗ a Shetan.

⁷ Ete yǝn nkaa yǝ ma nsaad emnama ma rǝmɓa, ma mbu ɓǝn wiinsǝ ma kuti ɓa nga nsaamse, ma nsenya a mbraa sa

⁸ pa ete yǝ nkaa yǝ ma ɗǝlmara ira ra. Ən nkoora nsaara, kungsǝ ma kana u woɗɗa.

⁹ Nɗǝn tom tinima ma ɗǝlmara nda nyoo Ankundi yaande ma Paade, ma siso ɗǝm nɗǝn sǝrsǝ ɓeta wa, ɓaa ɓa werkǝ ɓǝsǝ nga Kaa wa.

¹⁰ Ma ɗǝlmara sǝra ndǝn nyoo da sǝrǝ. Ɓaata ɓǝna, ɓǝsa pam me a tom maaso ra.

¹¹ Ngǝ nkaa ngǝ wiin mbraa neb neb ma u nkwaankwaak wa a ɓundu fin niu?

¹² Ɓaata ɓǝna, ɓot sata ɓa kiya nkaa yǝ nsee em zaitun ɓau, hana ɓot emngwate inabi ma yǝ nkaa yǝ nsee em sata ɓau? Maaso ɗǝm ɓundu yǝ fiɗsǝ mbraa nkwaankwaak ma yǝ fiɗ ma mbraa neb neb ma ra.

Maa mbuka u fiɗsǝ a liura wa

¹³ Yamni weesǝ nuuwa ma pǝro mbuka wa a ɗaaso waasou? A lee yǝ weɗa ma kaɗo usu yaɓ wa, ma ɗǝm tinimsa u sǝ naasǝ ee waaso ma lau pǝro wa.

¹⁴ Pa me a kuɗa saa sǝn simɓa ɓaatǝ ma ɓisi ɓaatǝ wa ma waando ɗuura waso, sǝ nheu ma siso ra, ɗǝm sǝ renǝ ɓongtǝra me kaɗo waso sem a ɗǝɗa ra.

¹⁵ Kamǝra “Pǝr mbuka siso” fiɗ a liura ɓoti ra, fiɗ a put ntaadi wa, yǝ fiɗa Wis Kaa wa ra, ǝn wis Shetan wa.

¹⁶ Pa nsaad han simɓara ma waando ɗuura isi wa, a hansǝsa a taa kaɗo hurhur wa ra, ɗǝm kǝ taa kwanatiro hana kamǝra na ra.

¹⁷ Pa pǝr mbuka u fiɗsǝ a Kaa niwa, a ntiiri ǝn ɗekɗek to, pa yaa yǝsǝ ma kamǝra pǝro sǝra yǝma, yauta hurhur ta, kura handa wa, na ɗuura wa, nyorataara ma tinimsa yaɓ ma, ɗǝm sem an waando ɗuura yara, ǝn yaa tomsǝ mbuka ma ɓongto ya.

¹⁸ Me ɓaa ɓan sǝksǝ kaɗo hurhur ɓeta wa, ɓǝ rǝk kama kaɗo hurhurto wa, u kwasǝ ɓeta ɓǝ tom tinimsa a tǝǝ Kaa wa.