JAS 2 - Lala NT

Weɗa yauɗuura wa

¹ Ɓaata ɓǝna, sǝ weɗa ɓolɓol to a ɗaaso waaso ra, saasǝ nasǝ ɓongtǝra sa a Ankundi yaande Yeso Almaseho ni wa, u yǝsǝ Ankundi an too yaande wa.

² Me a nkee me yaake yǝ wo a han sǝn kaɗsǝ ɓa yǝ tungsǝ pumra u koɓa dem ra, ma luktaa u yaɓ wa, pa ɗǝm hanhanda kǝra kǝn yǝ wo ma luktu nkaasǝ nkaasǝ.

³ Pa me sǝ weɗa waando ɗuura wa yaa yǝ tungsǝ luktaa yaɓ siya saa nkee me, “A kon ham kaɗa yaɓ wa,” Pa sǝ nkee hanhanda sǝra me, “Nwaango a nǝɗ kǝna” hana saa nkee me, “A kaɗ a putu a kwelkete yaane,”

⁴ Sǝ weɗa waando ɗuura wa a ɗaaso waaso, sǝ kan kiita ma waando ɗuura wa rau?

⁵ Ɓaata ɓǝna u nǝn yausǝ kwang wa, sǝ kura, sem Kaa yǝ tau ɓaa ɓǝsǝ hanhanta a nuuwa put ntaandi wa me ɓǝ kaɗ ɓan kǝnaa ɓa ɗaan a ɓongtǝra, ɗǝm me ɓǝ taa kolkol kuɓsutu u yǝ waasǝ me ɓaa ɓǝn yausǝsǝ ɓa rau?

⁶ Pa sǝn sǝr hanhanta. Sem ɓan ma kǝnaa ɓa ɓǝn nasǝsǝ kongsa ɓa rau? Ən ɓosa ɓǝn kosǝsǝ a kiita ɓa rau?

⁷ Sem ɓosa ɓǝn sǝrsǝ ɗǝnda Krisiti Yeso u ɓan yarsǝsǝ ma ɗǝnda ira wa rau?

⁸ Me sǝ kǝ tom mbu yǝsǝ keke ɓa me sǝ ɓǝɗ masaka kuɓsutu wa, u nyorsǝ a Likarkar Kaa wa me, “A waando anndǝnsaatǝre nyaange nga nkweerange.”

⁹ Pa me sǝn weɗa ɓolɓol to ɓaatǝ, sǝ tom tentenato ɗǝm ɓaa kansǝ kiitan me sǝ kau masaka Kaa wan.

¹⁰ Me hana yamni yaa yǝ ɓǝɗsǝ masaka nsaad ya, pa yǝ nwii a u fin wa ya, yǝ nwiin a pepere u pesǝ wa nsaad.

¹¹ Me yaa yǝ nkeesǝ me, “Ngǝ tǝr toone ete ya ra,” Ən sase ɗǝm yǝ nkeesǝ me, “Ngǝ toɗ ete ra ya.” Me ngǝ tǝr toone ete ya ra, pa ngǝ toɗ eten, ngǝ wiin a masaka sison nsaad.

¹² Sǝ kan mara ɗǝm sǝ tom tinima a ɗǝɗa u ka weɗa ɓeta me sǝn ɓaa ɓa kǝɓǝn kankiita a ɗuura masaka u yǝn konsǝ nkweera wa,

¹³ me ete yǝ semma nyorataara a ɓaata ni ra, Kaa kiya kan kiita semma nyorataara ra. Me nyorataara faɗ kankiita wan.

Ɓongtǝra me semma tinimsa ra, ǝn woɗɗa

¹⁴ Ɓaata ɓǝna, ǝn mbi yaɓ ɓǝu, me ete yǝn nkee me yǝma na ɓongtǝra wa, pa yǝ tomaa tinimsa ma siso ra? Kamǝra na ɓongtǝra sǝra ka konnkwee rau?

¹⁵ Pa me a nkee me, ate yaange toone hana parara yǝ semma lukta hana mbuseya u nfee wa ra.

¹⁶ Me yaake fin a ɗaaso waaso yǝ nkeesǝ me, “So kwakwa, Kaa yǝsǝ na mbuseya ma lukta.” Pa yǝ naɓǝ kwasira kǝra ra, pa ǝn mbi yǝ tomsǝ yaɓ ɓǝu?

¹⁷ Maso ɗǝm, na ɓongtǝra wa ma nkweera ira, me yǝ semma tinimsa ra, ǝn woɗɗa.

¹⁸ Pa ate ke kiya nkee me, “Ngǝ ma na ɓongtǝra wa, pa nwaano nǝn tom tinimsa u yaɓ wa.” Ngǝnǝ weɗa ɓongtǝra nga u semma tinimsa ra wa, pa waano kǝ nǝ ngǝ weɗa ɓongtǝra na ma lau tinimsa yaɓ nǝn tomsǝ ɓa.

¹⁹ Ngǝ yauwan me Kaa fin. Yaɓ! Hana nsaamse ɓǝ yauwan, ɓǝn maɗki me kokto.

²⁰ Ngase haura, ngǝn taa me nǝ ngǝ weɗa na ɓongtǝra wa u semma tinimsa yaɓ ra wa salǝu?

²¹ Sem sirande Ibrahim ɓaa toosǝsǝ me yǝma ɓongtǝra to, me mbu yǝ tomsǝ ɓa, yǝ toosǝ auwesi Ishaku yǝn taa me yaa haa nkweera a bagadi me yǝ na Kaa wa rau?

²² Ngǝ wǝrǝn me na ɓongto usu ma tinimsa yǝ tomsǝ ma ɓǝ kon keke, ɗǝm na ɓongtǝra usu weɗan me kungun lau mbu yǝ tomsǝ ɓa.

²³ Pa Likarkar Kaa wa yǝ kungun yǝ nkeesǝ me, “Ibrahim na ɓongto ma Kaan, pa me maaso, Kaa yǝ wǝr Ibrahim me yǝn yaa ma ɓongtǝrato a wii usu ya.” Ɗǝm ɓaa yarsǝ me sik Kaa ya.

²⁴ Sǝ wǝrǝ Kaa yǝn maa ete ma tinimsa keke yǝn tomsǝ ma, pa semma na ɓongtǝra wa seɗe ra.

²⁵ Maso ɗǝm, ma tulara toone ra Rahab, yǝ nhuukǝsǝ ɓet Isra'ila ɓa ɓǝ wosǝ me ɓǝ sengge ur siso ɓa, pa yǝɓǝ kwasi yǝɓǝ weɗa ɗǝɗa kǝra ɓol, ɓaa noo wa. Sem Kaa yǝ wǝr Rahab me yǝn yaa keke ya a wii usu, ma mbu yǝ tomsǝ ɓa rau?

²⁶ Nga me maabiri semma huurtu ra ǝn woɗɗa, maaso ɗǝm na ɓongtǝra wa, semma tinimsa yaɓ ma ra, ǝn woɗɗa.