JAS 1 - Lala NT

¹ Likarkar wa fiɗa neme a Yakubu ni, hoora Kaa ra ma Ankundi yaande Yeso Krisiti. Nǝn nyor me nǝ too tuwa pu a nhaa raɓ u Isra'ila ɓǝ nweesǝsǝ a put ntaandi wa ɓa nsaad.

² Ɓaata ɓǝna, sǝ hur kuɗa me hana kasǝ taa kamǝra kongsa na ra,

³ me sǝ maan pǝtara ɓongtǝra nwaago ǝn sokǝ sǝmo.

⁴ Pa me sǝkǝ tom ɓaa ɓǝ kinisǝ ɓa a ɓǝɗ Yeso Krisiti wa, ɗǝm sǝ ntaa pǝr mbuka wa ra.

⁵ Me yaake kǝn a ɗaaso waaso yǝ ntaa pǝr mbuka wa a tinima Kaa ma, yǝ kǝna Kaa, yaa yǝn nasǝ mbusa nsaad semma taawo ra ya, ɓaa ka na.

⁶ Pa me yǝ taan, yǝ na ɓongtǝra sem ma pǝno ra, yaa yǝn pǝnsǝ mbuka ya, yǝ nga parparto yoro mbraa yǝn nyaasǝ a aulaara wa.

⁷ Yaa yǝn pǝnsǝ sisi, yǝ nkee me ko kiya ta mbuka a Ankundi yaande ni ra,

⁸ yǝn yaa ma senta raɓ ya, yǝ nǝɗ ɗa a mbuka fin a mbu yǝn tomsǝ nsaad ɓa ra.

⁹ Hana yamni me ate nyaange yaa yǝn ɓǝɗsǝ Yeso ya, ɗǝm yǝn hanhan ɗa ya, pam me yǝ huur kuɗa me Kaa yǝ toosǝ.

¹⁰ Pa yaa yǝsǝ ma kǝnaa ya, yǝ kwal ma kǝnaa usu ra, me kiya nhe nga hurta a sanglo.

¹¹ Me osa nwee kwang, yǝn nhe hurta ǝn roo, kwalarito usu a tǝblǝ. Maso ɗǝm, an kǝnaa ya ki ya tom wa, ki ya wod a faaka usu.

¹² Kaa yǝn na saltǝra yaa yǝn sǝmsǝ a fer pǝtara ya, me kiya kon kukǝra huurtu ra, u Kaa yǝ waasǝ me ki yaa na ɓaa ɓǝn yausǝsǝ ɓa wa.

¹³ Me ete taa ee usu a pǝtara, yǝn nkee me, “Kaa yǝ ti nǝ sase ra.” Me yaake ti Kaa a pǝtara ra, ɗǝm Kaa yǝ pǝta yaake ma kwanatiro ra.

¹⁴ Pa ete yǝn kana pǝtara men ɗeura a kuɗa ira kwasǝ siso.

¹⁵ Pa me ɗeura kung kudan, kiya haa tenatenato, tenatenato ɗǝm me yǝ baran, kiya haa woɗɗa.

¹⁶ Ɓaata ɓǝna u nǝ yausǝ kwang wa, yaake yǝsǝ nlaa ra.

¹⁷ Hana kamǝra mbi yǝsǝ yaɓ wa, fiɗ ɓoti a paa nde ni yǝsa a liura ya, ǝn sase yaa yǝ faka ra ya.

¹⁸ Yǝ tau ndǝ yǝ ndǝ na hemǝra nfii ra lau mara ira u ɓong wa, me ndǝ kaɗ nga mbu ntiiri weesǝ a nyaa usu wa.

Kuraa ma sǝk tinima wa

¹⁹ Ɓaata ɓǝna nǝn yausǝ kwang ɓa, sǝ kura mbu ɓa. Hana yamni yǝ tom ma haaɗe a kuraa, yǝ tom nlaa a kanmǝra, ɗǝm yǝ haɗɗa tom nfiima wa ra,

²⁰ me nfiima ete ma yǝ tom maa kaɗo keke a wiiyo a Kaa ni, yǝn taasǝ ɓa ra.

²¹ Me maaso, sǝ yaɓ mbu kwalakwala ɓa ma kwanatiro sǝn tomsǝ ɓa, sǝ yaɓ too ɗuura wa, sǝ naa eewaaso sǝ kon mara Kaa ra, u ɓaa tisǝ a kuɗa saa wa, u kǝsa taa konnkweera wa.

²² Sǝ kura mara Kaa ra maɗ ra, usu sǝn nlaa eewaaso. Sǝ tom mbu yǝ nkeesǝ ɓa.

²³ Pa hana yamni ya yǝ kurasǝ mara ra ya, pa yǝ tom mbu yǝ nkeesǝ ɓa ra ya, yǝ nga yaa yǝn sengesǝ ota ita a huurtumbara ya

²⁴ pa, ndiira yǝ sengǝsǝ ee usu wa, me yǝ faɗɗan, yǝ hura nok ma ota ita.

²⁵ Pa yaa usu yǝn tisǝ senda ira a fǝɗkǝra teno u Kaa wa ya, u ǝn hiksǝ ete a kaɗo tentenato wa, yǝ se wiiyo ma ti senda ira yǝ hura ra, ɗǝm yǝn tom mbu mara Kaa ra nkeesǝ ɓa, me sǝ tom maa son, Kaa kiyǝ sǝ ti saltǝra a mbu sǝn tomsǝ ɓa.

²⁶ Me yaake yǝn sen me yǝn an ɓǝɗ Kaa ya, pa yǝ ma ɗǝlmara ira ra, yǝ nlaa ee usun, ɓǝɗ Kaa usu tomon sal.

²⁷ Pa ɓǝɗ Kaa u Paade yausǝ me ɗekɗek ma u teno nwa, ǝn kwasi emba ɓaa semma paapamse ma mamamse ra ɓa, ma kiu toona ɓa a fer kongsa ɓoso, ɗǝm ete yǝ hik nkweera ira a mbu kwalakwala u a put ntaandi wa ɓa.