Ayyukan 7 - Lala NT

Mara Istifanus ra

¹ Pa kuɓ kwang nek mbusa ya yǝ taa Istifanus me, “Mbu ɓǝ nkeesǝ ɓa, ǝn ɓong ngǝu?”

² Pa yǝ kak me, “Ɓaata ɓǝna ma paapamse, sǝnǝ kura! Kaa ma too usu yǝ weɗa ee usu a paade Ibrahim ni fer yǝsǝ nding Mesofotamiya wa, a fersiso yǝ ko Haran sundura.

³ Kaa yǝ nkee me, ‘A lee put nwaango ma ɓet ɓǝnga, ngǝ ko a put kǝ nǝ ngǝ weɗa wa.’

⁴ “Maso yǝ lee put Kaldiyawa wa ya ko Haran. Ndiira woɗɗo papsi wa, Kaa yaa timi a put wa a hansǝ kaɗsǝ ɓa.

⁵ Yǝ nasǝ mee a tom usu parad ra, hana nata fin u putu siso ra. Pa Kaa yǝ nkeesǝ me sase ma haato usu ndiira usu kiya ti a tom usu, hana ka fersiso Ibrahim yǝ sem ma auwe ra wa.

⁶ Kaa yǝ kan ma Ibrahim, yaa nkee me, ‘Tuwa nwaango ɓǝkǝ kang waa a put ko un ɓoso ra wa, pa ɓǝkǝ kang hoota ɗǝm ɓaa kǝ ɓǝ na kongsa meeta pusa pu puu kurun.

⁷ Kǝnǝ na kongsa put ɓǝ tomsǝ hoota kǝnso wa, ɗǝm ndiira maaso wa ɓǝkǝ fiɗ a put siso ɓǝ wo ɓǝnǝ nyoo a ham ɓa.’

⁸ Pa Kaa yǝ na Ibrahim waa firo wa. Pa Ibrahim yǝ haa Ishaku yaa firi a tǝro kurkurun wa. Ndiira usu Ishaku yǝ haa Yakubu, pa Yakubu yǝ haa sirta pu nhaa raɓ u Isra'ila wa.

⁹ Me tii Yusufu ɓa ɓǝ simɓasǝ, ɓaa fang me yǝ tom hoora Masar. Pa Kaa yǝ ke ma sase

¹⁰ yaa hik a mbu nsaad kama kǝsa taa ɓa. Yǝ na Yusufu maa mbuka wa ma taa kano a Firˈauna ni kuɓ Masar wa, yaa ti yǝ kaɗ Ngwamna a put Masar wa ma taanda ira nsaad.

¹¹ “Pa ɗoora a kan a put Masar ma put Kanˈana wa nsaad, maa kongsa a kan pap ɓǝnda ɓǝ taa mbuseya ra.

¹² Pa Yakubu yǝ kurasǝ me ǝn taa koma a put Masar wa, yǝ timi pap ɓǝnda a ntiiri.

¹³ Koo a raɓte ɓoso, Yusufu yǝ nkee ɓaata ɓisa me yǝ yamniu, Firˈauna ɗǝm yǝ kura mara a ɗuura haato Yusufu ra.

¹⁴ Ndiira maaso wa, Yusufu yǝ timi a papisi ni Yakubu ma haato usu pwaˈmbutu a nhaa wonon sǝɓa.

¹⁵ Pa Yakubu yǝ ko Masar, a han sase ma pap ɓǝnda ɓǝ wodsǝ ɓa.

¹⁶ Wote ɓose nsaad ɓa kangsǝ shekem ǝɓǝ hok a tina u Ibrahim kayǝ tirisǝ a au Hamor ya a put shekem wa ma koɓa.

¹⁷ “A fer kansǝ ngwang me Kaa kiya kung waa yǝ nkeesǝ Ibrahim wa, ɓet ɓǝnda ɓǝsa put Masar waɓa ɓǝ toma sooko dem.

¹⁸ Pa kuɓ ko ɓol ya yǝ maa mbuka a ɗuura Yusufu ɓa ra ya, yǝ kaɗ kuɓ Masar wa.

¹⁹ Kuɓ ka wa yǝ pǝk ɓet ɓǝnda yǝ na sirta ɓǝnda kongsa yǝn tiɓǝ ɓǝ mudku welta ndiira me ɓǝ woɗɗo.

²⁰ “A fer ɓaa haasǝ Musa wa ǝn auwe kwalari ɓong. Ɓaa nseesǝ ofe taatǝn a ɗuur papisi wa.

²¹ Ɓaa muɗkǝsǝsǝ ntaandi wa, Au Firˈauna ya au toone yaa too yasa wo ɗuuru yaa nsee nga yǝ haasǝ sase.

²² Pa ɓaa fǝɗkǝ Musa pǝro mbu nsaad Masarawa ɓǝn tomsǝ ɓa, ɗǝm yǝn yaa ma kokrokto ya a nkee mbuka wa ma tomo.

²³ “Musa yǝ kansǝ meeta pu kurun wa, yǝ nkee me paman ko yǝ sengge ɓet ɓisa ɓaa Isra'ila ɓa.

²⁴ Pa yǝ wǝr eɗ Masar ke yǝn han yaa Isra'ila ke, pa yǝ ko me ko yaa kwasi, yǝ tod eɗ Masar siya.

²⁵ Musa yǝn sen me ko ɓet ɓisa Isra'ila ɓa ɓǝ kǝ maa me Kaa yǝn yau me yǝ ɓǝ hik ma lau usu, pa ɓǝ maa ra.

²⁶ Handa weesǝ wa Musa yǝ wo yǝ wǝr ɓet Isra'ila ɓa raɓ ɓaa kito. Yǝ ko me koyǝ ɓǝ ɓaa yǝ nkee me, ‘Saase, sǝ ɓet fina; tomtomni sǝn yausǝ me sǝ ti hunde ee wasou?’

²⁷ “Pa eɗ ka yǝn hansǝ ate siya yǝ tǝng Musa a kala yaa nkee me, ‘Yaa ti ngǝ ni me ngǝ tom kuɓu ma an kankiita yaa teu?

²⁸ Ngǝn taa me ngǝ nǝ tod kǝn nga ngǝ todsǝ yaa Masar ura siyau?’

²⁹ Pa Musa yǝ kurasǝ maaso wa, yǝ mon yǝ ko a put Midiya wa, kǝnso yǝ nga wee yǝ haa emba raɓ parata.

³⁰ Ndiira meta pukurun talǝsǝ wa, pa an timira Kaa ya yǝ weɗa ee usu Musa ma lau ɗǝlmara ara ra ǝn masǝ ɓot piti ɓa, a sanglo ngwang ma yol Sinai wa.

³¹ Yǝ wǝrsǝ mbusǝsa maaso wa, nhiinyanhiinya to aa maa a mbu yǝ wǝr sǝsa. Yǝn kosǝn ko me koyǝ sengge ngwang wa, pa yǝ kura kwar Ankundi wa yǝn nkee me,

³² ‘Ən niina Kaa pap ɓǝnga ɓa, Kaa Ibrahim ya, Ishaku ya, ɗǝm Kaa Yakubu ya.’ Musa yǝ maɗki ma kokto yǝ sun yǝ sengge ra.

³³ “Pa Ankundi yaa nkee me, ‘A hik taa sǝnga; me han ngǝ nǝɗsǝ sǝsa ǝn han ɗekɗek ɓa.

³⁴ Nǝ wǝr kongsa ɓet ɓǝna ɓǝn weesǝ Masar ɓan. Nǝ kura taarǝma ɓoman nǝ ham me wonǝ ɓǝ hiki. Nawa ngawo, Kǝnǝ ɓaarǝ nǝgǝ tung Masar.’

³⁵ “Ən sase Musa yaa ɓǝ mbisǝsǝ ma mara ra, ‘Yaa yǝ ti ngǝ ni me ngǝ tom kuɓu ma an kankiita yau?’ Ɓaa timisǝ me yǝ ɓǝ tom an wii yǝ ɓǝ hiki. Kaa yǝ timisǝ sase, ma lau an timira Kaa ya u yǝ weɗa sǝ ee usu a sani a sanglo wa.

³⁶ Ən sase yǝ hik ɓǝsǝ Masar ya, yǝ sǝk mbu nhiinyanhiinya ɓa ma weɗara a put Masar wa, a sen welwel wa, ma ɗǝm meeta pu nhaa kurun ɓǝ tomsǝ a sanglo wa.

³⁷ “U nwa ǝn Musa yaa yǝ nkeesǝ ɓaa Isra'ila ɓa me, ‘Kaa kiyǝ sǝ tung an nawanto ya nga niina a ɗaaso ɓet ɓǝsa wa,’

³⁸ Musa ǝn sase yayǝ kwausǝ ɓaa Isra'ila ɓa a sanglo, ma an timira Kaa ya u yǝ kansǝ ma sase a Yol Sinai wa, ma sirta ɓǝnda; yǝ kon mara huurtu ra yǝnɗǝ nkee wa.

³⁹ Pa pap ɓǝnda ɓǝ ɓisi ɓǝ yau ɓǝ kura ra. Pa ɓǝ ti senda me ɓǝkǝ kang Masar.

⁴⁰ Pa ɓǝ nkee Haruna, ‘Ətǝ wǝrkǝ kaa kǝ kiyǝtǝn ma wiiyo ɓa. Me Musa yayǝ hik tǝsǝ Masar ya tǝ maa mbu tomsǝsǝ ɓa ra!’

⁴¹ A fersiso ɓǝ marsǝ mbuka ke nga kwanda naa ra. Ɓaa wo ma haɗaya a sani ɓǝ werkǝ hira ɓǝn nasǝsǝ mbrata me mbu ɓǝ marsǝ ma nem ɓose ɓa.

⁴² Pa tomsǝ maaso wa Kaa yǝɓǝ kǝrtǝ ndiira yǝ ɓǝ ti nyoo seklǝmeta wa ma mbu a liuta ɓa nsaad. Usu tom keke nga mbu ɓaa nyorsǝ a likarkar ɓan nawanto ɓa me, “ ‘Saa ɓaa Isra'ila ɓǝ sǝ wonǝ ma tǝmnka sǝnǝ na haɗaya meta pukurun a han mbraa semra ɓau, Saa ɓaa Isra'ila?

⁴³ Ngǝ nik hit siya Molek wa ɓoti ma seklǝmera u siya Rifan wa, ǝn ɓosa siyamse u sǝ mar sǝ me kǝsa nyoo wa. Me maaso kǝ nǝsǝ tung a kongsa a put Babila wa.’

⁴⁴ “Sirta ɓǝnda ɓǝma pilanga u ɓǝn nyoosǝ Kaa a sanglo wa. Pilanga werkǝ a ɗǝɗa Kaa yǝ nkeesǝ Musa ra, keke nga yǝ wǝrsǝ ma nuuwa isa wa.

⁴⁵ Ndiira ɓǝ konsǝ pillang siso wa, sirta ɓǝnda ɓǝsa kunda Joshuwa rawa ɓaa wo ke ma ɓosa a fer ɓǝ konsǝ put siso u Kaa yǝ pǝsǝ ɓeta me ɓosa wa. Ɓǝ kaɗ a Pillang siso awo fer Dauda wa,

⁴⁶ yaa yǝ taa sǝ yauma Kaa wa ya, pa yǝ tom kǝnara me yǝ mar han nyoo Kaa u sirsi Yakubu wa.

⁴⁷ Pa ǝn Sulemanu ya yǝ marsǝsǝ hit Kaa wa ya.

⁴⁸ “Hana maaso Yaa Kwang Ɓoti ya yǝ kaɗaa a hitsa ɓeta marsǝ ma neme yara. Nga an nawanto ya yǝ nkeesǝ wa me,

⁴⁹ “ ‘Liura ǝn han kuɓsutu ɓǝna ɓa, pa putu ǝn han nhii faɗa natsa sǝna ɓa. Ən kamǝra hitsa ɓi kǝsǝnǝn maarau? Ankundi nkeesǝ wa. Yaa hana han kaɗ ɓǝna kǝ tom nau?

⁵⁰ Semma nema sǝna nǝ werkǝsǝ mbusǝsa nsaad warau?’

⁵¹ “Saa ɓaa ma ngweeme ɗotsǝ ɓa, ma ɓa senta kwakwa ɓa, sǝnga pap ɓǝsaa. Sǝn ɓisi Wis Kaa wa!

⁵² An nawanto ke kǝneu u pap ɓǝsa ɓǝ nasǝsǝ kongsa ra wau? Ɓǝ tod ɓaa ɓǝ nkeesǝ me yaa ɗekɗek ya kiya woya. Pawa sǝ bisisǝn saa todɗon

⁵³ saase sǝ konsǝ masaka u ɓa nasǝsǝ ma lau ɓantimira Kaa ɓa pa sǝ yau sǝ ɓǝɗ ɗa.”

Ɓaa muɗko Istifanus

⁵⁴ Pa ɓan kan mara sǝɓa ɓǝ kurasǝ mbusǝsa maaso wa, ɓǝ ɗaa dem ɓǝn kǝu ɗǝmta meen sase.

⁵⁵ Pa Istifanus yǝ kungsǝ ma Wis Kaa wa, yǝ sengge liura ɓoti yǝ wǝr kwangto Kaa wa, ma Yeso yǝ nǝɗsǝ a kal nem seya Kaa ya.

⁵⁶ Yǝ nkee me, Sǝ seng. “Nǝ wǝr liura wilsǝ nǝ wǝr Au Ete ya nǝɗsǝ a kal nem seya Kaa ya.”

⁵⁷ Ma mbusǝsa ɓǝ ɗot ngweeme ɓose ɓǝ yauli kwang, ɓǝ moon ɓǝ ko a sani,

⁵⁸ koɓaa wiin ɓaa sa ko ndiira uru wa ɓaa ntii mudko ma ɗungate. Ɓaa ɓǝn wǝrsǝn wǝr ɓa ɓǝ lee lukta ɓosa a nema a aukeni ǝn yarsǝ me Shawulu.

⁵⁹ A fer ɓǝn muɗkǝsǝsǝ wa, Istifanus yǝ tom kǝnara yǝ nkee me, “Ankundi Yeso, a kon huurtu nwaano,”

⁶⁰ Paya kwirsǝ yǝ nik kwaro ma kwakwato, “Ankundi ngǝ ma tentenato ɓoso a senda nga ra.” Yǝ nkeesǝ maaso wa, pa yǝ lee huurtu usu.