Ayyukan 6 - Lala NT

Ɓaa tau ɓeta mbutu

¹ A tǝrma sǝma emfǝɗkaa ɓaa sooko, pa Yahudawa ɓaa ɓǝn kansǝ ee Helenawa ɓa ɓaa nhurunhuru a ɗuura Yahudawa ra ɓaa ɓǝn kansǝ ee Aramaya ɓa. Yahudawa ɓǝn kansǝ ee Helenawa ɓa, ɓaa nhurunhuru me ɓaa senga toona ɓosa ra, a kwasira u nfee ɓan tomsǝ toona u ker ɓosa wodsǝ wa.

² Pa ɓa pu nhaa raɓ sǝɓa ɓǝ kwau nsaad emfǝɗkaa a han fina ɓǝɓǝ nkee me, “A tom keke ndǝ lee nkee mara Kaa ra ndǝ kang a mara mbuseya wa ra.

³ Ɓaata ɓǝna, sǝ tau ɓeta mbutu a ɗaaso waaso usu maasǝ me ɓǝ kungsǝ ma Wis Kaa wa ma pǝr mbuka wa. Tǝkǝ ɓǝ na tinima ma a nem ɓose

⁴ wato tǝkǝ ti ɗuura a kǝna Kaa wa ma nkee mara ira wa.”

⁵ Mbu ɓǝ nkeesǝ sǝsa tom ɓeta nsaad kwalari. Pa ɓǝ tau Istifanus, ya yǝsǝ ma ɓongtǝra ya yǝ kungsǝ ma Wis Kaa wa; ma ɗǝm Filibus ma Burokoras ma Nikano ma Timon ma Barminas ma Nikolas eɗ Antakiya ya u yǝ sǝn Bayahude ra wa, pa yǝ kana ɓǝɗɗo ee Yahudawa wa.

⁶ Pa ɓaa wo ma ɓet sǝsa a wiiyo a ɓahona ni, ǝɓǝ tom kǝnara ǝɓǝ ti nema a ɗuura ɓora a weɗa me ɓaa tau ɓǝn me ɓǝ tom tinima sǝma.

⁷ Maso mara Kaa ra a faɗ wiiyo. Emfǝɗkaa ɓǝsǝ Urshalima ɓa ɓǝ toma sooko dem, kuɓsa nek mbusa sa a hit Kaa wa ɓa dem ɓǝ na ɓongtǝra a Ankundi Yeso ni.

Ɓaa ma Istifanus

⁸ Pa Istifanus, yǝ kungsǝ ma kwasira ma kwangto Kaa wa, yǝ tom mbu nhiinyanhiinya ɓa ma mbu weɗara ɓa a ɗaaso ɓeta wa.

⁹ Pa renǝta a ni a hit kwau Yahudawa a ɗaaso ɓaa ɓǝn yarsǝ ɗuura ɓora me, Yantattu wa, ɓǝn ɓaa Yahudawa ma Sayirin ma Alekzandiriya ma ɗǝm ɓaa ɓǝsa put Kilikiya wa ma Asiya. Ɓet sǝsa ɓǝ ntii ɓǝ na renǝta ma Istifanus,

¹⁰ pa ɓǝ nkaa ɓǝ nǝɗ a maa mbukato usu ra hana ma wis yǝn kansǝ wara.

¹¹ Pa ɓǝ tom ma nhuukǝra ɓǝn nlaa ɓaata me ɓǝ nkee me, “Tǝ kura Istifanus yǝn kan mbu kwalakwala ɓa a ɗuura Musa ra ma ɗuura Kaa ra.”

¹² Pa ɓǝ nik senta ɓet sǝsa ma wiina ma malǝmma fǝɗkǝra Musa sa. Ɓǝ ma Istifanus ɓaasa wo a wiiyo a wiina Sandikiya ɓan kan mara ɓa ni.

¹³ Pa ɓa wo ma ɓan papara sǝɓa, ɓǝ nkee me, “Eɗ ɗa yǝ lee kano mbu kwalakwala ɓa a ɗuura han ɗekɗek ɓa hana a ɗuura Masaka ndaara.

¹⁴ Me tǝ kurasǝ yǝn nkee me eɗ ǝn yarsǝsǝ me Yeso eɗ Nazarat ya kiya ookǝ ham ɗekɗek ɓa yǝ paaki mbu tangtang Musa yǝ nyorsǝ yǝ ndǝ na ɓa.”

¹⁵ Nsaad wiina ɓan kan mara ɓa ɓǝ kaɗsǝ kǝnso ɓa, ɓǝ nhii nuuwa Istifanus, pa ɓǝ wǝr oota ita nga u an timira Kaa ya wa.