Ayyukan 4 - Lala NT

Bitrus ma Yohanna a wii Sadukiyawa ɓa

¹ A fer kuɓ nek mbusa wa ɓǝsa kanmǝra ma ɓahona wa, kuɓsa nek mbusa sa ma kuɓ kwang an war hit ɓǝɗ Kaa Urshalima wa ma Sadukiyawa ɓǝ wo a Bitrus ma Yohanna ni.

² Daa ɓǝsǝ dem me ɓahona ɓǝn fǝɗkǝ ɓeta mara me ɓeta ɓǝkǝ nii a tina nga Yeso yǝ niisǝ tina wa kǝn.

³ Pa ɓǝ ma Bitrus ma Yohanna ma ɗikira ɓǝɓǝ neuwe, me handa a wee nhe.

⁴ Ɓeta dem ɓǝ kurasǝ mara sǝra wa ɓǝ na ɓongton, ɓaa sokǝsǝ a ɗuura ɓora ɓa ɓeta kanan pusa pu pu wonon.

⁵ Handa weesǝ wa kuɓsa ma wiina ma malǝmma fǝɗkǝra Musa sa ɓǝ kwau Urshalima.

⁶ Hannana kuɓ kwang nek mbusa ya yǝ kǝnso, ma Kayafa ma Yohanna ma Alekzanda ma ɓaata u ɓǝsa haato kuɓ kwang nek mbusa sa wa.

⁷ Pa ɓǝ ti me a wo ma Bitrus ma Yohanna a wiyo a ɓoni pa ɓǝ ntii taawo “Ma kwangto naa wau, hana ɗǝnda yamnirau sǝn tomsǝ mbu ɓau?”

⁸ Pa Bitrus, yǝ kungsǝ ma Wis Kaa wa yǝɓǝ nkee me, “Kuɓsa ma wiina ɓeta ɓa!

⁹ Me sǝ yartǝ me tǝ nkee mbu tomsǝ naso ɓa me mbu yaɓ tomsǝ pura ra ɓa me tomtomniu yǝ roɓ sǝu,

¹⁰ pa sǝ maa u nwa, sase ma nsaad ɓet Isra'ila ɓa: Ma lau ɗǝnda Yeso Krisiti eɗ Nazarat ya sǝ kwaakǝ sǝsǝ ya, u Kaa yǝ nik sǝsǝ a tina wa, ǝn siso eɗ yǝ nǝɗsǝ a wii waso yǝ roɓsǝ wa.

¹¹ Ndǝ sase “ ‘Ɗungara u saase ɓan mara ɓa sǝ mbisǝsǝ wa, ǝn siso yǝ kangsǝ yaɓ a timra hito ra wa.’

¹² “Kon nkweera wa sem kǝn ka taa a yaake ni wa ra, me ɗǝnda kǝ ra sem kǝn a put ntaadiwa nasǝ ete me kiya taa kon nkweera wa ra.”

¹³ Pa ɓǝ wǝrsǝ kokrokto Bitrus ma Yohanna wa ɓǝ maa me ɓǝ semma maa mbuka wa ra ǝn ɓeta maɗ, ɓǝ tom mbu wedara ɓa ɓǝ too senda ɓǝ maa me ɓet ɓa ɓǝ ke ma Yeso.

¹⁴ Pa ɓǝ wǝrsǝ yaa ɓaa roɓ sǝsǝ siya yǝ kǝɗ a wii ɓoso wa ɓǝ maa mbu kǝ ɓaa nkee ɓa ra.

¹⁵ Pa ɓǝ nkee me ɓǝ fiɗ a ur Sadukiyawa wa pa ɓǝn kan a ɗaaso ɓoso.

¹⁶ Pa ɓǝn taa ɓaatǝ, “Kǝnɗǝ tom mbi ɓet ɓau? Nsaad hana yamni Urshalima yǝ maa mbu nhiinyanhiinya ɓǝ tomsǝ ɓan, ndase ɗǝm ndǝ renǝ ra.

¹⁷ Pa me ndǝ sa mbu ɓa faɗo a wiiyo wa a ɗaaso ɓeta wa, kǝnɗǝ ɓǝ wiin ngwee me ɓǝ nkee yaake mara ma ɗǝnda Yeso ra ɗǝm ra.”

¹⁸ Pa ɓǝ yar Bitrus ma Yohanna ɓǝ nawanto me ɓǝ nkee mara hana ɓǝ tom fǝɗkǝra a ɗǝnda Yeso ra ɗǝm ra.

¹⁹ Pa Bitrus ma Yohanna ɓǝ kak ɓǝ nkee me, “Sǝ kankiita nkweerase wa tomon keke a Kaa ni tǝ ɓǝɗ mbusǝ nkeesǝ ɓa a lee u Kaa wau?

²⁰ Me taasǝ tǝ nkaa tǝ roo seu a mbu tǝ wǝrsǝ tǝ kura ɓa ra.”

²¹ Ndiira ɓǝ naɓǝsǝ kokto wa ɓǝ lee ɓǝ faɗa. Ɓǝ maa mbu kǝɓa tom ɓǝ maa ɓǝ na kongsa ɓa ra, me ɓeta nsaad ɓǝn nyoo Kaa a mbu tomsǝ ɓa.

²² Me yaa ɓaa roɓ sǝsǝ ma nhiinyanhiinyato siya yǝ faɗ meta pwakurun nǝn.

Kǝnara ɓan ɓǝɗ Kaa ɓa

²³ Bitrus ma Yohanna lee ɓǝsǝ wa, ɓǝ kang a ɓet ɓosa ni ɓǝ nkee mbu nsaad kuɓsa nek mbusa sa ma wiina a hit Kaa wa ɓa ɓǝ nkee ɓǝsǝ wa.

²⁴ Pa ɓǝ kurasǝ maaso wa, ɓǝ nik kwar ɓoso ɓǝn kǝna Kaa me, “Ya kwangya Ankundi, ngǝ marsǝ liura ma putu ma aulaara ma mbu ɗaan ɓa nsaad.

²⁵ Ngǝ kan ma Wis Kaa wa ma lau ee hoora nga wa pate Dauda wa yǝ nkee me, “ ‘Me mbi ɓaa ɓǝn Yahudawa ra ɓa ɓǝn nfiisǝu haato ɗǝm ɓǝn sen mbu sal ɓau?

²⁶ Kuɓsa a put ntaandi wa ɓa ɓǝn tomo a waro ma kito, ɓandawiiya ɓosa ɓǝ kwau a han fina ɓǝ yauma Ankundi ra ma ɗǝm Almaseho isi ra.’

²⁷ Ɓongtǝra, kuɓu Hiridus ma Buntus Bilatus ɓǝ kwau ke ma ɓaa ɓǝn Yahudawa ra ɓa ma ɓet Isra'ila ɓa ɓǝ yauma hoora ira Yeso yaa ɗekɗek ya ra, u ngǝ ti sǝsǝ Almaseho wa.

²⁸ Ɓǝ tom mbu kwangto nwaango ma mbu tǝngǝsǝ me a tom ɓa.

²⁹ Ankundi a sengge waso ɓǝ kwetǝ me ɓǝ na kokto hoota nga ɓǝ nkee mara nga ra, A yau hoota nga ɓǝ nkee mara nga kokto semra.

³⁰ A mel nem yaange, u roɓ ɓeta wa ngǝ ɗǝm weɗa mbu nhiinyanhiinya ma weɗara ɓa ma lau ɗǝnda hoora nga ɗekɗek Yeso wa.”

³¹ Ndiira ɓǝ tomsǝ kǝnara wa, a han ɓǝ kwausǝ ɓa a nya. Pa nsaad ɓaa ɓǝ kung ma Wis Kaa wa ɓǝ tomma nkee mara Kaa ra wa kokto semra.

Ɓan ɓǝɗa ɓǝ ma senda fin

³² Nsaad ɓaa ɓǝ nasǝ ɓongto ɓa ɓǝma kuɗa fin ma senda fin, yaake yǝ senaa me mbu yǝ sǝ ɓa sem usu fin ɓǝsa ra, ɓǝn ɓaa mbusa nsaad a han fina.

³³ Ma kwangto ɓahona wa ɓǝ faɗ wiiyo ma na ee a ɗuura Ankundi Yeso ra niinyo a tiina wa, kwasira Kaa ra kwang a ɗuura ɓora nsaad.

³⁴ Yaake sem kǝn yǝn taasǝ mbuka a ɗaaso ɓoso wa ra. Me ɓaa ɓǝsǝ ma nyanya hana ɗuur sa ɓa ɓǝn fang ɓaa wo ma koɓa ɓǝ taasǝsa

³⁵ ɓǝ ti a wiiyo a ɓahona ni ɓǝn ɓaa hana yamni ya pamsǝ me aa kwasi ya.

³⁶ Yusufu eɗ Balawe ya yǝ fiɗ Sayifurus u ɓahona ɓǝn yarsǝsǝ me Barnaba (u ǝn sen me Au naˈnkwiiti ya).

³⁷ Yǝ fang peekǝra mbu yǝsǝ ɓa yaa wo ma koɓa isa nsaad yǝ nhii a wii ɓahona wa.