Ayyukan 27 - Lala NT

Bulus yǝ tal yǝ ko Roma

¹ Pa ɓaa kansǝ me kǝtǝ nii tǝ ko Italiya wa, Bulus ma ɓaata pursuna ɓa ɓaa lee a neme a kuɓ kwang nsosa Roma ya ǝn yarsǝ me Yuliyas wa, fina a ɗaaso wiina nsosa u Kaisar wa.

² Tǝ kansǝ a kurnyaamo u fiɗsǝ Adiramitiyum wa, u ko a ham kurnyaamo ɓǝn tǝngsǝ ura ɓolɓol pa yǝ kan a Asiya wa, pa tǝ ntii siko a aulaara. Aristarkus eɗ Tasalonika ke u a put Makidoniya wa, yǝ ke ma taase.

³ Handa weesǝ wa tǝ kan Sidon; pa Yuliyas yǝ weɗa yauta Bulus ma lau yǝ leesǝsǝ me yǝ ko a sik ɓisa ni me minda kiya taa mbu kǝsa kwasi ɓa.

⁴ Tǝ niisǝ kǝnso wa tǝ kana kurnyaamo ɗǝm kaaɓisa yoro kwang pa tǝ leurǝ kǝk ma Sayifurus wa han yoro sem kwang ra ɓa.

⁵ Pa tǝ talsǝ aulaara Kilikiya ra ma Bamfiliya tǝ kan Mira a put Likiya wa.

⁶ Pa kǝnso kuɓ kwang nsosa Roma si ya yǝ wǝr kurnyaamo u Alekzandiriya wa yǝ ko Italiya pa yǝtǝ tung a si.

⁷ Tǝ moon nlaa tǝ tǝr dem a ɗǝɗa tǝ wee kongsa pa tǝ kan Kinidus. Pa yoro yautǝsǝ me tǝ faɗ wiiyo ra wa, pa tǝ leurǝ ma kalla tǝ ko kirit a kal Salmoni wa.

⁸ Tǝ tallǝ ham sǝsa ma kongsa pa tǝ kana a hanka ǝn yar me ham ɓan yausǝ me a nfaa ɓa kwang a ur Lasiya wa.

⁹ Me a fersiso ndǝ kirin kwang kǝnso, pa siko a tom ma kongsa, me a fersiso meera tomon mǝbmǝb, a fersiso mbukamsa ɓisi se mbuseya wa wee talon. Pa Bulus yǝ ɓǝ nkee me,

¹⁰ “Ɓeta, nǝ wǝr siko yau wa kǝnɗǝ wo ma kongsa, kurnyaamo ma mbu ɓǝnda kǝ tǝblǝ nsaad ɗǝm huurtu yau kǝ toma kongsa.”

¹¹ Pa kuɓ kwang nsosa Roma siya yǝ yau ma mbu Bulus yǝ nkeesǝ ɓa ra, pa yǝ yau ma mbu an nyaa kurnyaamo ya ma an kurnyaamo ya ɓǝ nkeesǝ wa.

¹² Pa Likiya pam me kurnyaamo ɓǝ fiɗ handa kǝnsora, ɓeta dem a ɗaaso ɓoso ɓǝ nkee me ndǝ kweetǝ ndǝ tallǝ ndǝ kan Finikiya me kǝ tomo ndǝ kaɗ rara kǝnso. Finikiya ǝn ham Kurnyaamo ɓǝn nǝɗsǝ a Kirit u yǝn sengǝsǝ lau yoro yǝn ɓǝɗsǝ ɓa.

¹³ Pa ɓǝ kurasǝ yoro ǝn nyanya fiɗsǝ ma lau kudu ra wa, ɓǝ sen me ɓǝ taa mbu kaɓǝn taasǝ ɓan, pa ɓǝ kee kurnyaamo suwa a mbu kaasǝsǝ ɓa ɓa tal ma lau kal Kirit wa.

¹⁴ Tom kwaɗ ɗa pa kuɓ kwang yoro kokrokto ke yǝ fiɗ ma lau kwasa ra ma han kaa yǝn fiɗsǝ ɓa, yǝn tǝng tǝ kurnyaamo waato tǝ kang a aulaara.

¹⁵ Pa yoro ka wa yǝ wosǝ maaso wa kurnyaamo waato yǝ nkaa yǝ loo ra pa ta lee yor ka wa yǝn tǝng tǝ tǝn ɓǝɗsǝ.

¹⁶ Tǝ leurǝsǝ ma tsibiri ke ngeek u ǝn yarsǝ me Kauda wa, pa tǝ kweetǝ ma kongsa tǝ wiin kurnyaamo ngeek wa ta kan ɗaan a u kwang wa.

¹⁷ Pa ɓǝ tisǝ au kurnyaamo ya ɗaan a u kwang wa wa pa ɓǝ kaa ma kurti ɓaa leurǝ kuɓ kwang kurnyaamo sisi me ɓǝn kura kokto me tom ɓǝ naa a nsera a kunda aulaara Sirtis yara, pa ɓǝ ke kurti masǝ kurnyaamo ra ɓǝ lee kurnyaamo suwa yǝ ɓǝɗ ma lau yoro ǝn kosǝ wa.

¹⁸ Handa weesǝ wa yor ka wa yǝ nyaa kwang ɓǝ haa mbusa pera a kurnyaamo ka ɓa ɓǝ yaɓ a mbraa.

¹⁹ Tǝrsǝ taatǝn wa, ma nema ɓosa ɓǝ nhaa mbu tinima kurnyaamo ka ɓa ɓǝ yaɓ a mbraa.

²⁰ Pa tǝ tǝrsǝ dem wa, tǝ wǝra osa hana seklǝmeta ra me yoro kokrok siso yǝn faɗ wiiyo ma nyaa. Pa tǝ ti senda me tǝ noo ra.

²¹ Ndiira tǝrsǝ kwang mbuseya semra wa, Bulus yǝ nii kǝɗ yǝɓǝ nkee me, “Parata, kama sǝ kuranǝ nǝ nkeesǝsǝ me ndǝ tǝng kirit. Pa kama kama sǝ kana kongsa sa ra ɗǝm kama mbusǝsa tǝblǝra.

²² Pa waso nǝn nkeesǝ hana yamni yǝ tom ma naˈnkwiiti wa me yaake yǝ wodɗa a ɗaaso waso ra kurnyaamo kiya tǝblǝ sase seɗe.

²³ Ura a pǝrtǝra an timira Kaa ya yaa nǝsǝ usu ya, ɗǝm yaa nǝn nyoo sǝsǝ ya yǝ nǝɗ a kala a nani

²⁴ yǝnǝ nkee me, ‘A kura kokto ra, Bulus. Kǝ ngǝ nǝɗ a kiita a wiiyo a Kaisar ni, ɗǝm me ngase Kaa yǝ yau ngǝsǝ kon nkweera nsaad ɓaa ɓǝsa a kurnyaamo siso ɓa.’

²⁵ Saa ɓeta, me maaso sǝ tom naˈnkwiiti wa ɓaatǝ, me nǝ ma ɓongtǝra a Kaa ni kiya tom nga yǝ nkeenǝsǝn wa.

²⁶ Pa tomon ɗat yoro nɗǝn mudkǝ a nsera tsibiri ra.”

Kurnyaamo yǝ ookǝ

²⁷ A pǝrtǝra puu nhaa kurun nda, yoro yǝn tǝngtǝng nding a aulaara Adiriya ra. Pa a pam pǝrte ɓan tinima a kurnyaamo sǝsa ɓǝ wǝr nga ɓǝ kǝk ma putu.

²⁸ Pa ɓǝ pǝtasǝ mbraa kama wa, ɓǝ wǝr kututub usu kansǝ naata pusa puu a nhaa puusa. Tomsǝ singǝ wa ɓǝ ɓaarǝ ɓǝ mǝdkǝ kututub to usu kangan nata puu wanakurun.

²⁹ Pa kokto me tom kurnyaamo ɓoso yǝ kǝu kundate ra, pa ɓǝ mudkǝ anka kurun u nɗiira kurnyaamo wa me tom kurnyaamo yǝ faɗ ɗa. Pa ɓǝ tom kǝnara me handa a wee naakǝn.

³⁰ Pa ɓan nyaa kurnyaamo sǝɓa ɓǝn taa me ɓǝ mono pa ɓǝ ham ma kurnyaamo ngeek wa ɓǝn weɗa nga ɓǝn kwaakǝ anka ma lau wiiyo kurnyaamo wa.

³¹ Pa Bulus yǝ nkee kuɓ kwang nsosa Roma siya ma ɓaata nsosamse ɓa me, “Mee ɓet ɓa ɓǝ nǝɗ ɗaan a kurnyaamo ra sǝ noo ra.”

³² Pa nsosamse siya ɓǝ ɗǝm kurti kasǝ kurnyaamo ngeek suwa wa ya lee yǝ ɓǝɗ mbraa.

³³ Handa tomsǝ ngwang me kǝ wee wa Bulus yǝɓǝ kǝna nsaad me ɓǝ se mbuseya, “Waso tǝro puu nhaa kurun sa taarǝma sǝ se mbuseya ra.

³⁴ Wa nǝn kǝna sǝ, sǝ se mbuseya me sǝ ɗanyǝ. Me yaa ke sem kǝn a ɗaaso waaso kiya nfaa hana nhiinyo fin a ɗuura ira wa ra.”

³⁵ Ndiira Bulus yǝ nkeesǝ mbusa maaso wa, yǝ too nkaadǝng yǝ na himara Kaa, pa yǝ ɓaa a nuuwa ɓosa yǝ ntii kǝuwǝ.

³⁶ Ɓǝ taa naaˈnkwiiti wan hana yamni yǝ nkaa yǝ se mbuseya.

³⁷ Ɓaa ɓǝsa a kurnyaamo sǝsa nsaad ɓǝ kansǝ 276.

³⁸ Pa ɓǝ sesǝ ɓǝ kwee wa ɓǝ haa muuma ɓǝ yaɓ a mbraa me kurnyaamo yǝ tom fekfek.

³⁹ Handa weesǝ wa ɓǝ maa put siso ra, pa ɓǝ wǝr hanka a ɗaaso nseera kwausǝ ɓǝ taa me ɓǝkǝ ko ma kurnyaamo ɓoso kǝnso mee kǝ tomo.

⁴⁰ Pa ɓǝ ɗǝm anka ɓǝ yaɓ a mbraa. A fersiso ɗǝm ɓǝ ke kurti masǝ ɓot nyaa kurnyaamo ya. Pa ɓǝ nik pilang kurnyaamo ka wa men yoro yǝɓǝ tǝng ɓa ko a han ɓǝ wǝrsǝ ma nseera sǝɓa.

⁴¹ Pa kurnyaamo ka wa yǝ timbi nseera ma wiiyo yǝ naa rang yǝ nkaa yǝ moon ɗǝm ra, pa kurnyaamo ka wa yǝ ntii kawo ma ndiira yǝn yaasǝn yaasǝ meen parparto mbraa wa.

⁴² Pa nsosamse siya ɓǝn sen me ɓǝkǝ tod pursuna sǝɓǝ me tom yaake yǝ moon yǝ ham a mbraa yǝ noo ra.

⁴³ Pa kuɓ kwang nsosa Roma siya yǝn taa me kiya kwasi Bulus me ɓaa ǝn todɗa, pa yǝ yau ma mbu nsosamse ɓǝn sensǝ ɓa ra. Yǝ ti ɓeta nsaad yayǝ maasǝ me kiya nkaa yǝ ham a mbraa yǝ fiɗ ya, yǝ ham yǝ fiɗi yǝ ko a kira.

⁴⁴ Ɓaata ɓǝ laɓ kataka ma pepere kurnyaamo okǝsǝ ya ɓaa ɓǝɗ mbraa. Maso nsaad ɓaa tal a kira kwakwa.