Ayyukan 26 - Lala NT

¹ Pa Agaribas yǝ nkee Bulus me, “Ɓaa na ngǝ ɗǝɗan me ngǝ nkee mara nga ma nkweerange.” Pa Bulus yǝ nik neme ɓoti yǝ ntii yǝ nkee me,

² “Kuɓu Agaribas, nǝ ta saltǝran nǝ nǝɗsǝ a wii nwaango naso wa me nǝ hik nkweerane a mbu nsaad Yahudawa ɓǝ ti nǝsǝ kaura a siɓa,

³ pa tomon yaɓ me ngase ngǝ maa mbusan dem a ɗuura mbu Yahudawa ɓǝn tomsǝ ɓan ma mbu tǝn taasǝ renǝta a sǝ ɓan. Me maaso, nǝn kǝna ngǝ a sǝmǝ ngǝnǝ kura yaɓ.

⁴ “Ɓaa Yahudawa ɓa ɓǝ maa mbaro ma kaɗo nwaano a ham ɓa wan tǝng nǝsǝ auwe wan, ɗǝm a ntiiri niiyo nwaano sa nǝ auwe a put nwaano wa, ma ɗǝm Urshalima.

⁵ Ɓǝ maa nǝn sem waso ra ɗǝm ɓǝkǝ nkaa ɓǝ nkee mbuka a ɗuura na mee ɓǝ yawan, me nǝn Ɓafarise, fin a ɗaaso ɓaa Farisiyawa ɓaa ɓǝn ɓǝɗsǝ masaka Yahudawa ɓa.

⁶ Pa wa me nǝ ti kango nwaano a mbu Kaa yǝ tomsǝ waa wiina ɓǝnda wa ǝn siso wa nǝsǝ a kiita naso wa.

⁷ Pa wa ǝn waa tuwa Isra'ila pu aha raɓ ɓǝn tisǝ kango ɓǝn war kungo usu wa, pa ɓǝn nyoo Kaa ma kuɗa fin pǝrta ma kaa wa. Kuɓu, men ti kango siso ɓaa Yahudawa ɓa ɓǝ tinǝsǝ kaura wa.

⁸ Tomtomni sǝn wǝrsǝ nga ma kongsa Kaa yǝ nkaa yǝ nik ete a wodɗa rau?

⁹ “Nase ma nkweerane ka nǝ yauwan me nǝ kǝ nkaa nǝ tom mbu nsaad kǝna tom ɓa me nǝ saa kura ɗǝnda Yeso eɗ Nazarat ya.

¹⁰ Pa wan ǝn siso maɗ mbu nǝ tomsǝ Urshalima ɓa. Ma yawo kuɓsa nek mbusa sa nǝn ti ɓan ɗekɗek ɓa ɓǝ neu a hit pursǝna wa, pa me ɓaa tod ɓǝ ee yaane ǝn tom ɗaan.

¹¹ Kaferaka nǝn ko a hitsa kwau Yahudawa sa ɓolɓol nǝ ti ɓaa ɓǝ na kongsa, nǝn ti ɓǝ me ɓǝ kan mbu kwalakwala ɓa a ɗuura Yeso ra. Nǝn kura nfiima ma ɓosa pa nǝn nkaa nǝɓǝ ɓǝɗ a ura ɓolɓol me nǝɓǝ na kongsa.

¹² “Kakake na siko me nǝ ko Dimaska a mbu nǝ solsǝ ɓa, nǝ ma kwangto ma yauma ɓaa kuɓsa nek mbusa sa ɓaa ɓǝ nanǝsǝ ɗǝɗa wa.

¹³ Si kaa ɗa, yaa kwang ya kuɓu, na ɗǝɗa me nǝ ko Dimaska, pa nǝ wǝr wedwedɗo fiɗ ɓoti a liura, ɗekɗek to usu faɗ osan, nǝ leurǝ ma ɓaa ɓǝn ɓǝɗnǝsǝ ɓa.

¹⁴ Pa tǝ nwii a putu nsaad, pa nǝ kura kwaro yǝn nkee nǝ ma ee Aramaya ya me, ‘Shawulu, Shawulu, ngǝn nanǝ kongsa men mbiu? Ngǝn han ee nwaango ngǝn simɓa nǝsǝ wa.’

¹⁵ “Pa na taa me, ‘Ngǝn yamniu, Ankundi?’ “Pa Ankundi ya kak yaa nkee me, ‘Nǝn Yeso yaa ngǝn nasǝsǝ kongsa ya.

¹⁶ Pa wa a nii a natsa sǝnga. Nǝ wo a ngani me nǝ ngǝ tau me ngǝ tom hoora na ma ɗǝm mbu ngǝ wǝrsǝ a nani ɓa, ma mbu kǝnǝ ngǝn weɗa ɓa.

¹⁷ Kǝnǝ ngǝ hik a ɗaaso ɓǝ ɓǝnga Yahudawa ma ɓaa ɓǝn Yahudawa ra ɓa. Ɗǝm Nǝn timi ngǝ a ɓoni

¹⁸ me ngǝ ɓǝ wil nuuwa ɓosa ɗǝm ngǝ ɓǝ kǝrtǝ me ɓǝ lee han tebteb ɓa ɓǝ kang a ham ɗekɗek ɓa, ɗǝm ɓǝ ɓaa ma kaɗo a Kwangto kuɓsutu Nsaa wa ɓǝ wo a Kaa ni, me ɓǝ taa lee a senda tentenato ɓoso wa, ɗǝm ɓaa ɓǝ ti a ɗaaso ɓaa ɗekɗek ɓa lau na ɓongto a nani ɓa.’

¹⁹ “Me maaso, Kuɓu Agaribas, nǝ rǝnǝ ma rotǝma nǝ wǝrsǝ a liura ɓa ra.

²⁰ Nǝ ntii nkee mara Kaa ra wa Dimaska, pa nǝ ko Urshalima ma nsaad put Yahudiya wa ma ɗǝm ɓaa ɓǝn Yahudawa ra ɓa, nǝ nkee ɓǝ mara Kaa ra me ɓǝ kon nfaata ɓǝ kǝrtǝ a Kaa ni, pa ɓǝ weɗa kon nfaata ɓosa ma lau tinima ɓǝn tomsǝ ma.

²¹ Pa ǝn siso Yahudawa ɓǝ manǝsǝ a taanda Hit ɓǝɗ Kaa Urshalima wa ɓǝn taa me ɓǝnǝ todɗo.

²² Pa nǝ taa kwasira a Kaa ni a wo nding naso wa, pa wa nǝn nǝɗ a wiiyo a ɓaa kwang kwang ni ma ɓaa ngeek ngeek ɓa me nǝ sǝ nkee. Nǝ fǝɗkǝ mbuka ɓol a faɗ mbu ɓan nawanto ɓa ma mbu Musa yǝ nkeesǝ me kǝ tom ɓa ra,

²³ me Almaseho kiya wee kongsa, kiyǝ tom yaa a ntiiri kiyaa nii a wodɗa wa, kiya weɗa ɗekɗek to ɓet ɓǝsa ma ɓaa ɓǝn Yahudawa ra ɓa.”

²⁴ A ɗaaso siso Festus yǝ tung ee isi yǝ yauli yǝ nkee Bulus me, “Ngǝn parpara, Bulus! Maa nyorma nwaango kwang wa kǝrtǝngǝ ɗuuran.”

²⁵ Bulus yaa kak yǝ nkee me, “Ɗuura na kǝrtǝ ra, yaa kwangya Festus, mbu nǝ nkeesǝ sǝsa ǝn ɓongtǝra keke.

²⁶ Kuɓu yǝ maa mbu nǝn kansǝ a si ɓan, kǝ nǝ nkaa nǝ kan ma sase a talte kokto sem ra. Nǝ maan me mbu nǝn nkee sǝ sǝsa nsaad yǝ hura ra, me ɓaa tom a nhuukǝra ra.

²⁷ Kuɓu Agaribas, ngǝ yau ma ɓan nawanto ɓa nǝu? Nǝ maan ngǝ yawan.”

²⁸ Pa kuɓu Agaribas yǝ nkee Bulus me, “Ngǝn sen me kǝ ngǝ nǝ kǝrtǝ ɗuura waso waso nǝ kang Krisitau?”

²⁹ Pa Bulus yaa kak me, “Hana ka waso waso hana sem waso waso ra nǝn kǝna Kaa me sem ngiinga seɗera, pa nsaad ma ɓaa ɓǝn kuranǝsǝ waso ɓa ɓǝ kang nga nǝsǝ wa, pa sem ma sakla sa ra.”

³⁰ Pa kuɓu yǝ nii kǝɗ, ma sase ma Ngwamna ma Banis ma ɓaa nsaad ɓǝ kaɗsǝ ɓa.

³¹ Ɓǝ lee hit ka wa, pa ɓǝsa kano a ɗaaso ɓoso wa, ɓǝ nkee me, “Eɗ ɗa yǝ tom mbu u ka sa a toɗ ɓa hana aa neu ɓa ra.”

³² Kuɓu Agaribas yǝ nkee Festus me, “Eɗ ɗa kama kǝ nda lee mee kayǝ too kaura ira yaa ko a Kaisar nira.”