Ayyukan 24 - Lala NT

Yahudawa ɓǝ ti kaura Bulus

¹ Tǝrsǝ wonon wa kuɓ kwang nek mbusa ya ǝn yarsǝ me Hananiya, yǝ wo Kaisariya ke ma wiina ma an pǝr mara ya ǝn yarsǝ me Tartulus, ɓǝ wo me ɓǝkǝ ti kaura Bulus a Gwamnani.

² Pa ɓǝ yar Bulus ɗaan, pa Tartulus yǝ wo ma mara a ngwamna Felis yaa nkee me, “Tǝ kura nepto kaɗo hurhur wa a kunda kuɓsutu nwaango ran, ɗǝm maa mbuka nwaango ti tǝ se wiiyo wa a put wan.

³ Ɓet ɓǝta nsaad yaa kwangya Felis, tǝ himangǝn kwang ma mbu ngǝ tomsǝ ɓa.

⁴ Pa tom tǝ ngǝ rǝka ma kan mbusa wa ra, Nǝn taa me nǝ ngǝ kǝna a kwalarito nwaango ngǝ kura mbuka ngeek.

⁵ “Tǝ ma eɗ ɗa yǝn kǝr kito ya, yǝn nik kito a ɗaaso ɓa Yahudawa ɓa a put ntaandi wa nsaad. Yǝ andiwi ɓaa Nazarat ɓa

^6-8 Pa yǝn taa me yǝ ti Hit ɓǝɗ Kaa Urshalima wa a ɗuura nwa ra; pa taa ma me ngǝ taasǝ ma nkweera nge, ngǝ kura ɓongtǝra a sani me mara tǝn nkee ngǝsǝ ra ǝn ɓongto.”

⁹ Pa ɓaa Yahudawa ɓa ɓǝ yau ɓǝ nkee me mbusǝsa ǝn ɓong maaso.

¹⁰ Pa Ngwamna yǝ weɗa neme Bulus me yǝ kakka, pa yǝ kak me, “Nǝ maan me meeta dem ngǝn kan kiita a put wa wa, pa ma hur kuɗa wa nǝn taa me nǝ hik nkweerane.

¹¹ Kǝ ngǝ nkaa ngǝ taa me talǝ tǝro pu a nhaa raɓ ra nǝ ko Urshalima me konǝ nyoo Kaa.

¹² Pa ɓaa ɓǝ tinǝsǝ kaura ɓa ɓǝ pǝtanǝ kura na rǝnǝta ma ate ke a Hit ɓǝɗ Kaa Urshalima wa ra, hana nǝ nik kito a hitsa kwau Yahudawa ɓa ra hana na a ur wa ra.

¹³ Pa mbu ɓǝ tinǝsǝ kaura a siɓa ɓǝ nkaa ɓǝ ngǝ weɗa mbuka u ka nkee me ee ndǝ ɓong wa ra.

¹⁴ Hana maaso, Nǝ yawan me nǝn nyoo Kaa u sirta ɓǝnda wa. Ɗǝm nǝn an ɓǝɗ Ɗǝɗa ya, u ɓǝn yarsǝ me sem keke ra wa. Nǝ yau ma mbu nsaad Masaka Musa yǝ nkeesǝ ɓan ma mbu ɓaa nyorsǝ a Likarkar Ɓan nawanto ɓa wa,

¹⁵ pa niina kǝn nǝ ti kango a Kaa ni nga ɓet ɓa wa, me ɓaa kǝ tom niinyo a tina wa nsaad ɓa ma ɓongtǝra ɓa ma ɓaa kwalakwala ɓa.

¹⁶ Ən siso nfee nǝn kweetǝ me nǝ kaɗ ma kuɗa fin a wiiyo a Kaa ni ma ɓeta.

¹⁷ “Ndiira tǝrsǝ meeta dem wa, nǝ ko Urshalima a ɓet ɓǝna me nǝ na hanhanta kwasira na, ɗǝm nǝ na baiko.

¹⁸ Fer ɓǝ wosǝ wo ɓǝnǝ wo a taanda hit ɓǝɗ Kaa Urshalima wa nǝ sobsǝ ɗekɗek, nǝ sem ma ɓeta dem ra, ɗǝm nǝ nik senta yaake ra.

¹⁹ Pa ɓaa Yahudawa ka kǝn ɓǝ fiɗsǝ a put Asiya wa ǝn ɓosa pamsǝ me kama ɓaa ham ɓa a wii wango wa, ɓaa wo ma kaura sǝsa me nǝ tom mbukan u kwalakwala wan.

²⁰ A taa ɓet ɓa ɓǝ nkee ko ǝn mbi kwalakwala ɓa maanǝsǝ ma siso a fer nǝ nǝɗsǝ a wiiyo a wiina ɓan kan mara Yahudawa ɓa,

²¹ nǝna nǝ maa mbuka fin maɗ u nǝ yaulisǝ a wiiyo a ɓoni wa nǝ nkee me, ‘Nǝ na ɓongto a niinyo a tina wa ǝn siso nǝ nǝɗsǝ a wii kiita wa naso wa.’ ”

²² Pa Ngwamna Felis, yǝ maa mbukan dem a mara Ɗǝɗa sǝran. Pa yǝ nik mara sǝra yǝ tung a wiiyo, yaa nkee me, “mee Lisiyas an wii nsosamse ya yǝ won, kǝnǝ sǝ nǝng kiita.”

²³ Yǝ ti kuɓ kwang nsosa Roma ya ɓǝ ma Bulus me ɓaa sengge pa ɓǝn na kongsa ra, ɓǝ yau sik ɓisa ɓǝ wo ɓaa kwasǝ ma mbu yǝn taasǝ ɓa nsaad.

²⁴ Ndiira tǝro dem wa Ngwamna Felis yǝ wo ma toonesi Durusila, u yǝsǝ Bayahude wa. Yǝ timi me a wo ma Bulus me ya kura kanmǝra a ɗuura na ɓongtǝra a Krisiti Yeso nira.

²⁵ Pa Bulus yǝ kan mara a ɗuura tom mbu ɗekɗek ɓa wa, ma ɗuura wa, ma kankiita a feɗefeɗe ka wo a wiiyo ya wa, Felis kokto aa ma pa yǝ nkee me, “maan maaso naso wa! Ngo ma nga. Mee nǝ taa ɗǝɗa ka fin pa kǝnǝ ngǝ yara,”

²⁶ Kayǝn ti senda me ko Bulus kiya na koɓa, pa yǝ ɓaarǝ yaa yar dem me yǝ kan ma sase.

²⁷ Pa meeta raɓ talǝsǝ wa, Fokiyus Festus yǝ kaɗ ngwamna ndiira Felis wa. Pa me Felis ka yǝn kǝr minira a ɓaa Yahudawa ɓa ni, pa yǝ lee Bulus a hit pursuna.