Ayyukan 23 - Lala NT

¹ Bulus yǝ nhii ɓǝ nuuwa ɓan kan mara nsaad Yahudawa sǝ ɓa nɗǝn ngǝ yǝ ɓǝ nkee me, “Ɓaata ɓǝna, nǝ kung tinima Kaa ma yaɓ ma kuɗa fin a wo na wa.”

² Pa Hananiya kuɓ kwang nek mbusa ya, yǝ ti ɓaa ɓǝsǝ ngwang ma Bulus ɓa ɓaa hob a ee.

³ Pa Bulus yaa nkee me, “Kaa kiyǝngǝ hob kǝn, ngase ngǝ kurung ɓaa sobsǝ pengpeng wa! Ngǝ kaɗ kǝnso ngǝn sen me ngǝn kankiita ma lau Masaka Musa wa, pa waaso nwa ngǝ ɓisi nga tom mbu Masaka nkeesǝ ɓan, ngǝ tisǝ ɓaa nǝ hob wa!”

⁴ Ɓaa ɓǝ nǝɗsǝ ngwang ma Bulus ɓa ɓǝ nkee me, “Ngǝn maan me ngǝn sǝr kuɓ kwang nek mbusa ya Kaa yau?”

⁵ Bulus yǝ kak yaa nkee me, “Ɓaata ɓǝna, nǝ maa me yǝn kuɓ kwang nek mbusa ya ra; ɓaa nyorsǝ me, ‘Ngǝ kan mbu kwalakwala ɓa a ɗuura kuɓ ɓet ɓǝnga wa ra.’ ”

⁶ Pa Bulus yǝ maasǝ me ɓaata ǝn ɓaa Sadukiyawa ɓa, ɓaata ɗǝm ǝn Farisiyawa wa, pa yǝ nkee wiina ɓan kan mara nsaad Yahudawa sǝɓa me, “Saa ɓaata ɓǝna, nǝ yaa Ɓafarise ya, au Ɓafarise ya. Me nǝ tisǝ kango a niinyo a tina wa ɓan kan nǝsǝ kiita wa.”

⁷ Pa yǝ nkeesǝ mbusa maaso wa, rǝkata a nii a ɗaaso Farisiyawa ma Sadukiyawa, pa ɓan Kan mara Yahudawa sǝɓa ɓǝ ɓaa handa raɓ.

⁸ (Ɓaa Sadukiyawa ɓa ɓǝn nkee me niinyo a tiina wa, hana ɓantimira Kaa ɓa ma wis ko semra, pa ɓaa Farisiyawa ɓa ɓoso ɓǝ yau ma mbusǝsan nsaad.)

⁹ Wiine rǝkata ya a nii, pa ɓaata malǝmma fǝɗkǝra Musa sa ɓaa ɓǝsǝ Farisiyawa ɓa ɓǝ nii ɓǝ nǝɗ dangndang ɓǝn renǝ mara sǝra, ɓǝn nkee me, “Tǝ wǝr mbu eɗ ɗa yǝ tomsǝ ɓa ra, minda wis ko hana an timira Kaa ke yǝ nkeesǝ sase kau?”

¹⁰ Renǝta ka taa a kang rǝkata, pa an wii nsosamse ya yǝ kura kokto me tom ɓǝ nsaatǝ Bulus. Pa yǝ tii nsosamse ɓǝ hamma ɓǝ too Bulus ma kwakwato a ɗaaso ɓoso yaa sa ko a han nsosamse ɓǝn tǝrsǝ ɓa.

¹¹ A pǝrtǝra ira Ankundi yǝ nǝɗ kwang ma Bulus yaa nkee me, “A sǝmǝ! Nga ngǝ nkeesǝ mara kwalari ra a ɗuura na Urshalima wa, maaso ɗǝm tomon ɗaɗ kǝnga nkee a Roma wa.”

Ɓaa sen me kǝ toɗ Bulus

¹² Handa weesǝ wa, ɓaa Yahudawa ɓa ɓǝ tǝmɓa ɗuura ɓǝ tom kwanatiro ɓǝ kuu me ɓǝ se mbuka hana ɓǝ wee mbraa ra ndub me ɓǝ tod Bulus nǝn.

¹³ Ɓaa ɓǝ tǝmɓasǝ kwanatiro sǝɓa, ɓǝ faɗ pwakurun nǝn.

¹⁴ Pa ɓǝ ko a kuɓsa nek mbusa sa ma wiina Yahudawa ɓa, ɓǝ nkee me, “Tǝ tom kuɓ kwang kuuma yan me tǝ se mbuka ra ndub me tǝ tod Bulus nǝn.

¹⁵ Nwa, sase ma wiina ɓan kan mara Yahudawa ɓa, sǝ timi a kǝna an wii nsosamse ya me sǝn taa me a wo ma Bulus a sani, nga me sǝn taa me sǝ ɓaarǝ sǝ kura ɓongtǝra a ɗuura mara ira ra. Pa taase kǝn tǝkǝ war a ɗǝɗa me yǝn wowo tǝ kaa toɗ sa yǝ kana sani ra.”

¹⁶ Pa au ɓone Bulus ya yǝ kurasǝ mbu kwalakwala ɓǝn taasǝ me ɓǝkǝ tom Bulus wa, yǝ ko a han Bulus yǝsǝ ɓa a nsosamse ni ko yaa nkee.

¹⁷ Pa Bulus yǝ yar fin a ɗaaso kuɓ kwang nsosa ya yaa nkee me, “Ngosǝ ma au ya a an wii nsosamse yani; yǝma mbu kiya sa nkee ɓa.”

¹⁸ Pa yǝ too yaa sa ko a an wii nsosamse siya ni. Yaa nkee me, “Bulus yaa ɓa neu sǝsǝ siya yǝ kǝna nǝ me na wo ma au ya a ngani yǝma mbu kiyǝ ngǝn nkee ɓa.”

¹⁹ Pa an wii nsosamse siya yǝ ma nem au kaya ya yaa wiin a kala ya taa me, “Ngǝn taa me ngǝnǝ nkee mbiu?”

²⁰ Yaa nkee me, “Ɓaa Yahudawa ɓa ɓǝ kan me ɓǝkǝ timi ɓǝ ngǝ kǝna, me ngǝ tung Bulus a wiiyo a wiina ɓan kan mara Yahudawa ɓa ɗene, nga ɓǝn taa me ɓǝ ɓaarǝ ɓǝ kura ɓongtǝra mara ra a sani.

²¹ Ngǝ yau nga tung ra, me ɓaataka ɓǝ faɗ pwakurun ɓǝ faan a ɗǝɗa ɓǝn war wa ra. Me ɓǝ kuun ɓǝ se mbuseya hana ɓǝ wee mbraa ra ndub me ɓǝ toɗ Bulus nǝn. Ɓǝn war yauma nga a kǝnara ɓora maɗ.”

²² Pa an wii nsosamse siya yǝ nkee au kaya me yǝ kang mbusa, pa yaa wiin ngwe me, “Ngǝ nkee yaake me ngǝ nkeenǝ mara sǝran nɗa.”

Ɓaa kosǝ ma Bulus a gwamnani

²³ Pa an wii nsosamse siya yǝ yar raɓ a wiina nsosamse Roma sǝɓa yǝɓǝ nkee me, “Sǝ nii sǝ tau nsosamse pusa pu raɓ, ɓan taa pira ɓa puumbutu, ɓan kong kito ma kǝɗame ɓa pusa pu raɓ sǝ ko Kaisariya a pǝrtǝra ra karfe wanakurun.

²⁴ A sǝk piro u Bulus kiya taa wa me sǝsa ko a ngwamna Felis ni kwakwa.”

²⁵ An wii nsosamse siya yǝ nyor likarkar yǝ nkee me.

²⁶ Tooma fiɗaa Kalaudiyus Lisiyas ni. A wo a nga ni Ya kwangya, Ngwamna Felis.

²⁷ Eɗ ɗa ɓaa Yahudawa ɓa ɓǝ masǝ ɓǝn taa me ɓǝka todɗo, pa nǝ ko ma nsosamse yaane konaa kono, me nǝ kura me yǝ yaa Roma ya.

²⁸ Kanǝn taa me nǝ maa me mbu kwa mbi ɓǝ masǝsǝ sǝu, pa nǝsa ko a wiina ɓan kan mara Yahudawa ɓa ni.

²⁹ Pa nǝ kura me ɓǝ masǝ men taa mbuka wa ma renǝta a ɗuura masaka ɓora, mara sǝra pam ma mbu kasa toɗ hana a neu ɓa ra.

³⁰ Pa nǝ kurasǝ kwanatiro a ɗuura ira wa, pa nǝ nkee me pam me natsa wo a nga ni, nǝ nkee ɓaa ɓǝ tisǝsǝ kaura sǝɓa me ɓǝ wo ma mara kara a ngani.

³¹ Pa nsosamse siya ɓǝ tom mbu ɓaa nkee ɓǝsǝ ɓa, ɓǝ too Bulus a pǝrtǝra ɓaa saa ko Antifatiris.

³² Handa weesǝ wa pa ɓǝ lee nsosamse ɓan taa pira sǝɓa me ɓǝ faɗ ma sase, pa nsosamse a putu ya ɓoso ɓǝ kang a hantǝr ɓobɓǝsa.

³³ Pa nsosamse ɓan taa pira sǝɓa ɓǝ kansǝ Kaisariya wa, ɓǝ na likarkar suwa ngwamna ɓaa na Bulus a neme ɗǝm.

³⁴ Pa ngwamna yǝ kau likarkar kawa, pa yǝ taa me yǝ fiɗ a ur nawau, pa yǝ kura me yǝ fiɗ Kilikiya,

³⁵ yǝ nkee me, “Kǝnǝ kura mbu ngǝ tomsǝ ɓa mee ɓaa ɓǝ tingǝsǝ kaura ɓa ɓǝ wonǝn.” Pa yǝ ti me ɓaa war Bulus a tanda kuɓu Hiridus ra.