Ayyukan 22 - Lala NT

¹ “Ɓaatǝ ɓǝna ma papamse, sǝ kura ma mbu nǝn nkeesǝsǝ ɓa.”

² Pa ɓǝ kurasǝ Bulus yǝn kan ɓǝ ma ee Aramaya ya wa, ɓǝ roo ma seu. Pa Bulus yǝ nkee me,

³ “Nǝn Bayahude, ɓaa haanǝ Tarsus a put Kilikiya wa, pa nǝ mbar a ham ɓa Urshalima, fǝɗkǝnǝ masaka pap ɓǝnda wa a Gamaliyel ni, nǝ ma seura me nǝ tom tinima Kaa ma nga sǝn tomsǝ wa waso wa.

⁴ Kanǝn na kongsa ɓaa ɓǝn ɓǝɗsǝ ɗǝɗa Ankundi ra ɓa, a tod ɓaata. Nǝn ma parata ma toona ɓaa ɓǝ neuwe,

⁵ ɗǝm kuɓ kwang nek mbusa ya ma wiina kan mara Yahudawa ɓa ɓǝkǝ nkaa ɓǝsǝ nkee me mbu nǝn nkeesǝ ɓa ǝn ɓong. Nǝ kon likarkar a ɓoni me na ko a ɓet ɓosa ni wiina Yahudawa ɓǝsǝ Dimaska wa me nǝ ɓǝn wo nga pursuna a ɓoni Urshalima me ɓaa ɓǝ na kongsa.

⁶ “Ma kaa ɗa nǝn kansǝn kan Dimaska wa, sema maa nwaano ra wedwedɗo a fiɗ ɓoti a liura a wed ǝnǝ leurǝ.

⁷ Pa nǝ nwii a putu nǝ kura kwaro ǝn nkee nǝ me, ‘Shawulu, Shawulu, ngǝn nanǝ kongsa men mbiu?’

⁸ “Nǝ taa nǝ nkee me, ‘Ngǝn yamniu Ankundi?’ “Yǝ kak yaa nkee me, ‘Nǝn Yeso yaa Nazarat ya, yaa ngǝn nasǝsǝ kongsa ya.’

⁹ Ɓaa tǝsǝ ke ɓa ɓǝ wǝr weɗweɗɗo ka wan, pa ɓǝ maa kwar ya yǝn kansǝn kan ma niina ya ra.

¹⁰ “Nǝ taa me, ‘Kǝnǝ tom mbiu, Ankundi?’ “Pa Ankundi yǝ nkee me, ‘A nii ngǝ ko Dimaska. Kǝnso ɓaa kǝ ngǝ nkee mbu kǝ nga tom ɓa nsaad.’

¹¹ Pa ɓaa tǝsǝ ke ɓa ɓǝ nǝ ma neme ɓǝnǝ ko Dimaska, me ɗekɗek to weɗweɗɗo suwa ntaa nǝ nuuˈnwan nǝ wǝrra ra.

¹² “Yaake ǝn yarsǝ me Hananiya yǝ wo me yǝnǝ wǝrǝ. Yǝn eɗ nyoo Kaa ya, ɗǝm yǝn ɓǝɗ masaka Musa wa ɗǝm ɓaa Yahudawa ɓǝsǝ kǝnso ɓa ɓǝn nasǝ mbarta.

¹³ Yǝ nǝɗ a kal nwaano yǝnǝ nkee me, ‘Ate yaane Shawulu, a lee nuuwa sǝnga a wili!’ Nok kǝnso nǝ nkaa naa wǝrǝ.

¹⁴ “Pa yǝ nkee me, ‘Kaa pap ɓǝnda ya yǝ tau ngǝ me ngǝ maa senda ira, ɗǝm ngǝ wǝr Yaa Ɗekɗek ya, ɗǝm ngǝ kura mara ira.

¹⁵ Pa kǝ ngǝ tom yaa kiya nkee ɓeta mbu ngǝ wǝrsǝ ngǝ kura a ɗuura ira ɓa.

¹⁶ Pa wa ngǝn war mbiu? A nii kǝɗ, me ngǝ tom baptisma, ngǝ sob tentenato nwaango, ma lau yar ɗǝnda Ankundi ra wa.’

¹⁷ “Pa nǝ kangsǝ Urshalima wa nǝ kana hit ɓǝɗ Kaa Urshalima wa naa kǝnara pa nǝ kura mara a rotǝma

¹⁸ nǝ wǝr Ankundi yǝn kan mara. Yǝ nkeenǝ me, ‘Lee Urshalima nakǝn me ɓǝ yau ma mara kǝ ngǝ ɓǝn nkee a ɗuura na ɓa ra.’

¹⁹ Nǝ kak me, ‘Ankundi, ɓet ɓa ɓǝ maan me nǝn ko a hit kwau Yahudawa ɓa ɓolɓol, me nǝ ɓǝ neuwe ɗǝm nǝ hob ɓaa ɓǝ nasǝ ɓongto ma ngiinga ɓa.

²⁰ Fer ɓaa todsǝ Istifanus yaa yǝn nkeesǝ mara nga ya, niina nǝ kǝnso nǝ sutsǝ ya ɗǝm nǝ war lukta ɓaa ɓǝ todsǝsǝ ɓa.’

²¹ “Pa Ankundi yǝnǝ nkee me, ‘Ngo; kǝnǝ ngǝ tung mǝbmǝb a ɓaa ɓǝn Yahudawa ra ɓa.’ ”

²² Ɓaa kwausǝ dem sǝɓǝ ɓǝn kurasǝn kura, ndub fer Bulus yǝ nkeesǝ me yǝ ko a ɓaa ɓǝn Yahudawa ra ɓa wa. Pa ɓǝ nik kwaro ɓǝ yauli me, “Saa todɗo! Pamme aa lee ma huurtu a put ntaandi wa ra!”

²³ Pa ɓǝn yaulisǝn yauli wa ɓǝn hik lukta ɓosa ɓaa nik tulla ɓoti,

²⁴ an wii nsosamse ya yǝ nkee me a too Bulus ko a han nsosamse ɓǝn tǝrsǝ ɓa, pa ya ti me ɓaa hobɓo a taa me yǝ nkee mbu kwasǝ ɓeta ɓǝn yaulisǝ a ɗuura ira wa.

²⁵ Pa ɓǝ kaasǝsǝ me ɓǝkaa hoɓ wa, Bulus yǝ nkee kuɓ kwang nsosamse yǝsǝ kwang ma sase ya me, “Ko tomon keke a masaka Roma wa ngǝ hob yaa Roma ya sǝ ngǝ kansǝ kiita a ɗuura ira rau?”

²⁶ Pa nsosa Roma suwa yǝ kurasǝ maaso wa, yǝ ko a an wii nsosamse ya koya nkee. Pa ya taa me, “Ya wa kǝngǝ tomtomniu? Eɗ ɗa ǝn yaa Roma ya.”

²⁷ An wii nsosamse siya yǝ ko a Bulus ni koya taa, “Nǝn nkee, ngǝ yaa Roma yau?” Yaa kak me, “Ee nwa.”

²⁸ Pa an wii nsosamse siya yǝ nkee me, “Nwaano nǝ kwan koɓa dem pa nǝ tom yaa Roma ya.” Pa Bulus yǝ nkee me, “Nwaano ɓaa haanǝ Rom.”

²⁹ Pa Nsosamse kaɓǝn taasǝ me kama ɓǝka hob sǝɓa, ɓǝ kang ma ndiira nok kǝnso. An wii nsosamse siya kango aa paa me yǝ tii ɓaa ma Bulus yaa Roma ya aa kaa.

Bulus ya wiiyo a wiina ɓan kan mara Yahudawa ɓa

³⁰ Handa weesǝ wa, an wii nsosamse siya yǝn taa me yǝ maa mbu kwasǝ ɓaa Yahudawa ɓa ɓǝn yaulisǝ a sani wa, pa yǝ hik Bulus yǝ yar kuɓsa nek mbusa sa ma wiina ɓan kan mara nsaad Yahudawa ɓa ɓǝ kwau a han fina pa ya wo ma Bulus yaa nǝɗ a wii ɓoso.