Ayyukan 21 - Lala NT

Ko Bulus Urshalima wa

¹ Ndiira tǝ tisǝ pamra ɓaa Afisa ɓa wa, tǝ kana kurnyaamo tǝ ko Kos, handa weesǝ wa tǝ kan Rods, ndiira usu tǝ ko Fatara.

² Tǝ taa wiine kurnyaamo yǝn kosǝ Finikiya wa, pa tǝ kana tǝ faɗa.

³ Tǝ kansǝ nkwang tǝn wǝr Sayifurus wa, tǝ lee ma nem kwasara ya, tǝ tallǝ tǝ faɗ a put Suriya wa. Pa tǝ ham Taya a han wiine kurnyaamo ya kiya ham mbusa ɓa.

⁴ Tǝ taasǝ ɓan ɓǝɗ Kaa ɓa kǝnso wa, tǝ kaɗ kǝnso ma ɓosa tǝro mbutu. Pa Wis Kaa wa yǝɓǝ weɗa me ɓǝ nkee Bulus yǝ ko Urshalima ra.

⁵ Pa tǝro waato kǝnso feɗsǝ wa, tǝ nii tǝ ntii siko waato. Nsaad ɓan ɓǝɗ Kaa kǝnso ɓa, Parata ma toona ma em ɓosa ɓǝtǝ tung a ɗǝɗa, a kal kira mbraa wa tǝ kwirsǝ kǝnso tǝ tom kǝnara

⁶ Ndiira tǝ tisǝ pamra ɓaatǝ wa, pa tǝ kana kurnyaamo ɓoo ɓǝ kang ɗuuru.

⁷ Tǝ faɗ wiiyo ma siko tǝ ko ma lau Taya wa tǝ kan Tolemayis, a han tǝ toosǝ ɓan ɓǝɗ Kaa ɓa wa, pa tǝ tǝr kǝnso tǝro fin.

⁸ Handa weesǝ wa tǝ kan Kaisariya tǝ tǝr a ɗuur Filibus wa an bishara kǝnso ya, fin a ɗaaso ɓaa mbutu ɓǝn kwasisǝ ɓahona ɓa.

⁹ Yǝma em toona kurun ɓaa ɓǝ nsaa kera ra ɓa. Ɓaa ɓǝn nasǝ wanto ɓa.

¹⁰ Ndiira tǝ tǝrsǝ kǝnso tǝro ngeek wa, an nawanto ke kǝn ǝn yarsǝ me Agabus yǝ fiɗ a put Yahudiya wa.

¹¹ Agabus yǝ wosǝ wa, yǝ too mbu kaa nɗeera u Bulus wa yǝ kaa a nem isi ma natsa isa yǝ nkee me, “Wis Kaa wa yǝ nkee me, ‘Nga nǝ kaasǝ wa, Yahudawa ɓǝsǝ Urshalima ɓa ɓǝkǝ kaa ya ma mbu kaa nɗeera ɓa ya ɓǝ na ɓaa ɓǝn Yahudawa ra ɓa.’ ”

¹² Pa tǝ kurasǝ maaso wa, taasǝ ma ɓan ɓǝɗ Kaa kǝnso ɓa tǝ kǝna Bulus me yǝ ko Urshalima ra.

¹³ Pa Bulus yǝ kak me, “Tomtomni sǝn teesǝ me sǝ nǝn kwit kangou? Niina nǝ yawan sem me nǝ kaa maɗ ra, pa nǝ yawan me nǝ wod Urshalima men ɗǝnda Ankundi Yeso ra.”

¹⁴ Pa tǝ pǝtasǝ tǝ nkaasǝ ra wa, taa lee taa nkee me, “A lee yauta Ankundi ra a tom maaso.”

¹⁵ Ndiira maaso wa, tǝ nii tǝ kwau mbu ɓǝta tǝ faɗ Urshalima.

¹⁶ Pa ɓaata ɓan ɓǝɗ Kaa ɓa ɓǝsǝ Kaisariya wa ɓǝtǝ ɓǝɗ ɓǝ tǝn wo a ɗuur Manason wa, a han kǝta tǝr ɓa. Eɗ ka ya ǝn yaa Sayifurus ya sase ɗǝm ka yǝ fin a ɗaaso ɓan ɓǝɗ Kaa u a ntiiri wa.

Bulus yǝ kan Urshalima

¹⁷ Pa tǝ kansǝ Urshalima wa, ɓan ɓǝɗ Kaa ɓa ɓǝ tǝ kon ma hurkuɗa wa dem.

¹⁸ Handa weesǝ Bulus ma taase tǝ ko me kotǝ wǝr Yakubu, ma wiina nsaad ɓǝ kǝnso.

¹⁹ Pa Bulus yǝɓǝ too, yǝ nkee mbu nsaad Kaa yǝ tomsǝ ɓaa ɓǝn Yahudawa ra ɓa a tinima yǝ tomsǝ ma.

²⁰ Pa ɓǝ kurasǝ maaso wa, ɓǝ nyoo Kaa. Pa ɓǝ nkee Bulus me, “A kura ate yaane, ngǝ maan Yahudawa pusa pu puu mininiu ɓǝ nasǝ ɓongtǝra wa, ɗǝm ɓǝsǝ nsaad siso ɓǝ ma seura ɓǝɗ masaka ra.

²¹ Pa ɓaa wee ɓǝ nkeen me ngǝ fǝɗkǝ nsaad ɓa Yahudawa ɓa, ɓaa ɓǝsa ɗaaso ɓaa ɓǝn Yahudawa ra ɓa me ɓǝ yau ma Masaka Musa wa ra, ngǝn nkee ɓǝ me ɓǝ fir emɓosa ra hana ɓǝ tom mbu wiina ɓǝnda nkeesǝ ɓa ra.

²² Pa ya tǝ tomtomniu? Tǝ maan me ɓa kǝ kura me ngǝ won a ham ɓa.

²³ Pa wa a tom mbu kǝtǝngǝn nkee ɓa. Tǝma ɓaataka kǝn kurun a ham ɓa ɓǝ kuusǝ wa.

²⁴ A too ɓet ɓa, ɓaa sǝ sob ɗekɗek a han hono ɓa, ɗǝm ngǝ ɓǝ puu mbu famsǝ me a puu ɓa, me ɓaa ɓǝ nhii ɗuura. Pa me hana yamni yǝ maa me mbu ɓaa nkeesǝ a ɗuura nga ɓa ǝn para, me ngase ngǝn ɓǝɗ mbu masaka nkeesǝ ɓa.

²⁵ Me ɓaa ɓǝn Yahudawa ra ɓa, ɓaa ɓǝ nasǝ ɓongto Kaa ni ɓa, tǝ nyor ɓǝn me ɓǝ lee se mbuseya werkǝsǝ kwandamse ɓa, emnama u monma ɗaan wa ra, ma kǝu auname ɓaa berwensǝsǝ nkweera wa, ɗǝm ma tǝr toona wa ra.”

²⁶ Handa weesǝ wa Bulus yǝ too ɓet ka ɓa ke ma sase ɓaa ɓǝ sob ɗekɗek. Pa ya kan a Hit ɓǝɗ Kaa Urshalima wa me yǝ nkee ɓeta kaa ɓaa kǝɓǝn feɗ soɓɓo ɗekɗek ɓa, ma kaa ka na baiko ɓaa kurun sǝsa ɓa.

Ɓaa ma Bulus

²⁷ Pa tǝro mbutu tomsǝ kwang a feɗ wa, ɓaa Yahudawa ka ɓǝ fiɗ a put Asiya wa ɓǝ wǝr Bulus a hit ɓǝɗ Kaa Urshalima wa. Pa ɓǝ nlaa ɓeta ɓaa kwausǝ dem sǝɓa ɓǝ ma Bulus,

²⁸ ɓǝn yauli me, “Parata Isra'ila ɓa, sǝtǝ kwasi! Eɗ ɗa ǝn sase yǝ fǝɗkǝsǝ ɓeta nsaad mbu kwalakwala ɓa ɗuura nda ma masaka Musa wa ma Hit ɓǝɗ Kaa Urshalima wa. Ndiira maaso wa yǝ wo ma ɓaa ɓǝn Yahudawa ra ɓa a taanda hit Kaa Urshalima wa, pa ɓǝ tǝblǝ han ɗekɗek ɓa.”

²⁹ Ɓǝ nkee maaso me ka ɓǝ pǝta ɓǝ wǝr Bulus ma Turofimus ya Afisa ya a ɗaaso uru wan ɓǝn nkee me ko ka ɓǝ kan ke a taanda hit ɓǝɗ Kaa Urshalima wa.

³⁰ Uru nsaad a ruukǝ, ɓeta ɓǝn fiɗ hana ma lau na wa a ur siso ma moone. Ɓǝ ma Bulus, ɓaa wiin yǝ fiɗ a taanda hit ɓǝɗ Kaa Urshalima wa, nok kǝnso ɓǝ liki inntii.

³¹ Pa ɓǝn taasǝ me ɓǝka tod wa, an wii nsosa Rom ya yǝ kura me ur Urshalima wa nsaad nii kiton.

³² Pa an wii nsosamse ya yǝ haa nsosamse ɓǝ moon ɓǝ wo a han ɓeta kwausǝ dem sǝsa. Pa ɓǝ wǝrsǝ an wii nsosamse ma nsosamese wa, pa ɓǝ lee hob Bulus wa.

³³ Pa an wii nsosamse siya yǝ ma Bulus yǝ nkee me a kaa ma sakla raɓ. Pa yǝ taa ɓa kwausǝ ɓa me ko yǝ yamniu, ɗǝm yǝ tom mbiu.

³⁴ Pa ɓaata a ɗaaso ɓaa ɓǝ kwausǝ dem ɓa ɓǝn yauli ɓǝn nkee mbusa ɓol ɓol, pa an wii nsosamse siya yǝ maasǝ ɓongtǝra ra wa me yaulira ɓeta ra kwang, yǝ nkee me a ko ma Bulus a han nsosamse ɓǝn tǝrsǝ ɓa.

³⁵ Pa Bulus yǝ kansǝ a han ǝn taasǝ a kana hit ɓoti wa, ɓeta ɓǝn ɓǝɗsǝ kwang kwang ma rǝkata pa nsosamse ɓaa too ɓoti ɓa faɗa.

³⁶ Ɓaa ɓǝ kwausǝ dem sǝɓa ɓǝn ɓǝɗsǝ ndiira ɓǝn yaulin yauli kwasa me, “Sa todɗo, Saa todɗo!”

Bulus yǝ kan ma ɓaa kwausǝ ɓa

³⁷ Pa nsosamse ɓǝn taasǝ me ɓǝkǝ too Bulus ɓaa saa ko a han nsosamse ɓǝn tǝrsǝ ɓa wa, yǝ taa an wii nsosamse ya me, “Kǝnǝ nkaa nǝ ngǝ nkee mbu kau? Pa an wii nsosamse siya ya kak me, Ngǝn kura ee Helenawa ya nkaau?

³⁸ Sem ngase ya Masar ngǝ niksǝ kito a ferko ngǝ kwasǝ ɓaa ɓǝn todsǝ ɓeta ɓa pusa pu pu kurun ɓǝ yaasǝ a sanglo wa rau?”

³⁹ Bulus yǝ kak me, “Nǝn Bayahude nǝ fiɗ Tarsus, ur ɓaa maasǝ dem wa a put Kilikiya wa. Nǝn kǝna ngǝ a lee nǝ kan ma ɓet ɓa.”

⁴⁰ Pa yǝ han ǝn taasǝ a kana hit ɓoti wa yaa sa wo a nwii nsosamse ni wa, pa Bulus yǝ nii kǝɗ a han yǝsǝ ɓa a wiiyo a ɓa kwausǝ sǝɓa yǝɓǝ weɗa ma neme me ɓǝ roo seu. Ɓǝ roosǝ seu wa pa yǝ ɓǝ ntii kanoo ma ee Aramaya ya.