Ayyukan 20 - Lala NT

Bulus Yǝ kang Makidoniya ma Hellas

¹ Ndiira nik kito ka wa loosǝ wa, Bulus yǝ timi me a yar ɓan ɓǝɗ Kaa ɓa, yǝ nkee mbu kǝ ɓǝn naˈnkwiiti ɓa, pa yǝ ɓǝ ti pamra pa yǝ faɗ a put Makidoniya wa.

² Pa yǝ siki a ura sǝsa, yǝn nkee mara ka naˈnkwiiti ɓan ɓǝɗ Kaa ɓa, a feɗefeɗe pa yǝ kang Hellas,

³ a han yǝ kaɗsǝ ofe taatǝn ɓa. Me ɓa Yahudawa ɓa ɓǝ tǝrasǝ wiito a fer yǝ taasǝ me kiya ko Suriya wa, pa yǝ sen yǝ kang Makidoniya.

⁴ Ɓeta ɗǝm ɓǝ siki ke ma sase nga Sufata au Farus yǝ fiɗ Biriya, ke ma Aristarkus ma Sakundus ɓet Tasalonika, ɓa ma Gayus yǝ fiɗ Darbe, ma Timatawus ɗǝm, ma Tikikus ma Tarofimus ɓet Asiya ɓa, ɓǝ tungsǝ.

⁵ Ɓet sǝsa ɓǝ nkaa ko a wiiyo ko ɓǝ war Toruwas.

⁶ Pa waato tǝ nii Filibi ndiira tǝ tomsǝ Mbukamsa Nkaadǝng u yisti semra wa, pa ndiira tǝro wonon wa, tǝ ko kotǝ wo ɓaata Toruwas, kǝnso tǝ tǝr mbutu.

Yatikus ɓaa niksǝ a wodɗa Toruwas

⁷ A kaa tǝro a ntiiri lumu ɓa tǝ kwau a ham fina me tǝ ɓaa nkaadǝng. Pa Bulus yǝ kan ma ɓeta pa me yǝn taa me kiya faɗa me handa ween, pa yǝ toma kanmǝra ya faɗ handa.

⁸ Arkumta dem a hit ɓoti wa tǝ kwausǝ wa.

⁹ Bulus yǝsaa kanmǝra wa, au parara ke kǝn ǝn yarsǝ me Yutikus yǝ kaɗ a inntii ngeek ya ɓoti. Pa munda masǝsǝ wa, yǝ wii ɓoti a han yǝ kaɗsǝ sǝsa a putu ko a too yǝ wodɗa.

¹⁰ Bulus yǝ hamma, koyǝ kwirsǝ a sani, yaa too a nema isa, yǝ nkee me, “Sǝ taarǝ ra, yǝ ma huurtu!”

¹¹ Pa yǝ ɓaarǝ yǝ taa a hit ɓoti wa ɗǝm yǝ ɓaa kǝ nkaadǝng tǝ kǝuwǝ. Ndiira usu yǝ toma kanmǝra handa a wee, pa yǝ faɗa.

¹² Pa ɓet ka ɓa ɓǝ too au kaya ma huurtu ɓa faɗ ɗur ɓǝn hur kuɗa.

Bulus yǝ lee Toruwas yǝ ko Militus

¹³ Tǝ faɗ wiiyo kotǝ kana kurnyaamo tǝ tal tǝ faɗ Asus me ko tǝ too Bulus kǝnso. Me kayǝ nkee sase me usu kiya siki ma nata yǝ ko.

¹⁴ Pa Bulus yǝ nteetǝsǝ Asus wa, taa too a kurnyaamo waato tǝ faɗ Mitilin.

¹⁵ Handa weesǝ wa tǝ nii tǝ Kan Kiyos, handa weesǝ usu ɗǝm tǝ tal tǝ ko Samos, handa weesǝ usu ɗǝm pa tǝ kan Militus.

¹⁶ Bulus yǝn sen me yǝ talǝ yǝ ko Afisa, yǝ yauwa me yǝ kir kwang Asiya ra. Yǝn haɗ me yǝ kan Urshalima pa fer Fentikos wa a kana.

¹⁷ Pa ɓǝsǝ Militus wa Bulus yǝ timi me ko a yar wiina ɓan ɓǝɗ Kaa Afisa ɓa ɓǝ wo a sa ni.

¹⁸ Pa ɓǝ wosǝ wa, yǝ ɓǝ nkee me, “Sǝ maa kaɗo ndǝ kansǝ ma saase wan tǝng kaa nǝ wosǝ a put Asiya wa.

¹⁹ Nǝ tom tinima Ankundi sem ma too ɗuura wa ra ma kǝlkǝlta kwang. Nǝ simǝn ma pǝtǝra ma tǝra wiita ɓa Yahudawa ɓa ɓǝ tomnǝsǝ wan.

²⁰ Nǝ fǝtasǝ lee nkee mara u kǝsǝn kwasisǝ wara. Nǝn fǝɗkǝsǝ mara Kaa ra a talte, ɗǝm ɗuur sa ɗuur sa.

²¹ Nǝ nkee nsaad ɓaa Yahudawa ɓa ma ɓaa ɓǝn Yahudawa ra ɓa me tomon ɗat ɓǝ kǝrtǝ ɓǝ kang a Kaa ni ɓǝ kon nfaata ɓǝ na ɓongto a Ankundi Yeso ni.

²² “Pa nga waso, Wis Kaa wa yǝ nkeenǝ mǝ nǝ ko Urshalima, wa nǝkǝ ko nǝ maa mbu kǝnǝn taa kǝnso ɓa ra.

²³ Nǝ maan me hana ur nawa me nǝ kanan Wis Kaa wa yǝn nkee nǝ me kongsa ma hit neu ɓeta wa ǝn war nǝn wara.

²⁴ Pa me nǝ maan me huurtu nwaano ǝn mbuka ra, mee kǝnǝ feɗ tinima Ankundi Yeso yǝ nanǝsǝ wa, me nǝ nkee mara kwalari a ɗuura Kwasira Kaa yǝ tomsǝ ɓa.

²⁵ “Nǝ siki ura ura, nǝn nkee mara a ɗuura kuɓsutu Kaa ra, pa waaso nǝ maan me yaake sem a ɗaaso waso kiyǝ nǝn ɓaarǝ wǝro ɗǝm ra.

²⁶ Me maaso, nǝn nkee sǝ naso wa me nǝ sem ma monma yaa ke ra a ɗuura na ra.

²⁷ Me nǝ weesǝ nkeen nsaad mbu Kaa yǝn taasǝ me sǝ maa ɓan.

²⁸ Sǝ sengge nkweera se ma kur Wis Kaa wa yǝ tisǝ a nema sǝsa wa, Sǝ tom nga ɓan war ɓan ɓǝɗ Kaa ɓa u yǝ tirisǝ ma lau monma Au isi yǝ wodsǝ meen ndase wa.

²⁹ Nǝ maan ndiira kǝnǝ faɗ wa, malǝmma fǝɗkǝra paara sa nga kurkuta ɓǝkǝ wo ɗaaso waaso, ɓǝ lee kur siso ra.

³⁰ Hana a ɗaaso waaso ɓaata ɓǝkǝ nii ɓǝ kan para me ɓǝ wiin ɓaata ɓan ɓǝɗ Kaa ɓa me ɓǝɓǝ ɓǝɗǝ.

³¹ Sǝ kaɗ ma waro! Sǝ ɗimi naso meeta taatǝn nǝ leesǝ hob wanto wa ra pǝrtǝra ma kaa ma kǝlkǝlta.

³² “Nwa nǝ tisǝ a neme a Kaa ni. Sǝ ɗimma mara ɗuura u kwasira kwang Kaa wa. Mara sǝra kǝsǝ kwasǝ ɗǝm sǝ naa kolkol ke ma ɓaa ɗekɗek ɓa.

³³ “Nǝ kura ɗeura koɓa hana lukta yaake ko ra.

³⁴ Saase sǝ maan ma neme sǝna nǝn kǝrsǝ mbu nǝn taasǝ ɓa ma ɗǝm na kwasi ɓaa tǝsǝ ke ma niina ɓa.

³⁵ A mbu nsaad nǝ tomsǝ ɓa, nǝn weɗa me ma tinima sǝma kǝ nɗa kwasi ɓaa sem kwakwa ra ɓa. Sǝ ɗimsǝ mara Ankundi Yeso ma nkweera ira yǝ nkeesǝ wa me, ‘Ya yǝn nasǝ ya, kiya kon Saltǝra yǝ faɗ ya yǝn konsǝ ya.’ ”

³⁶ Ndiira Bulus nkeesǝ mbusa maaso wa, yǝ kwirsǝ ɓǝ tom kǝnara ke ma ɓosa.

³⁷ Pa ɓǝ tee nsaad ɓǝn masǝ nkoote Bulus.

³⁸ Mbu ɗaa ɓǝsǝ kwang ɓa ǝn mbu Bulus yǝ nkeesǝ me ɓǝ ɓaarǝ ɓaa wǝr ɗǝm ra wa. Pa ɓǝ ko ɓa tung a han kiya taa kurnyaamo ɓa.