Ayyukan 2 - Lala NT

Wis Kaa wa yǝ wo a fer Fentikos wa

¹ A fer Fentikos kansǝ wa, ɓǝ nsaad ɓǝ kwausǝ a han fina.

² Pa sem ma maa ɓoso ra ɓǝ kura nyorko ǝn wowo ma kokrokto fiɗ a liura a ham a han ɓǝ kaɗsǝ ɓa a kung ɗuur ɓǝ kaɗsǝ wa nsaad.

³ Pa ɓǝ wǝr mbuka nga ɗǝlmara ara ra ǝn wo ɓǝ ham a ɗuura hana yamni a ɗaaso ɓoso.

⁴ Nsaad ɓǝ kung ma wis Kaa wa ɓǝ ntii kano ma eeme ɓol ɓol mbu Wis Kaa wa sensǝ ma ɓosa wa.

⁵ Pa waaso ɓa Yahudawa ka ɓaa ɓǝn kurasǝ kokto Kaa wa ɓa a Urshalima, ɓǝ fiɗ a ura ɓol ɓol a put ntaandi wa nsaad.

⁶ Ɓǝ kurasǝ or suwa maaso wa, ɓǝ kwau a han fina dem. Pa ɓǝn kura nhiinyanhiinya to me yase yǝn kura ɓǝn kan ma ee ɓose.

⁷ Ɓǝn kura nhiinyanhiinya to dem, ɓǝ taa me, “Nsaad ɓaa ɓǝn kansǝ ɓa ǝn ɓaa Galili ɓa rau?

⁸ Pa tomtomni ndǝ kurasǝ ɓǝn kan ma ee yaadeu?

⁹ Sii yau ndǝ ɓaa Fartiyawa ɓa ma ɓaa Mediyawa ɓa ma ɓaa Elamawa ma ɓaa Mesofotamiya wa ɓa ma ɓaa Yahudiya ɓa ma ɓaa Kafadokiya ɓa ma ɓaa Fantus ɓa ma ɓaa Asiya ɓa,

¹⁰ ma ɓaa Firigiya ɓa ma ɓaa Bamfiliya ɓa ma ɓaa Masar ɓa ma ɓaa ɓǝ leurǝsǝ Sayirin ma lau put Libiya wa ma waa nsaa ɓǝ fiɗsǝ Roma wa.

¹¹ Pa nsaad waado ndǝ Yahudawa ma ɓaa ɓǝn Yahudawa ra ɓa ɓǝn ɓǝɗsǝ mbu Yahudawa ɓǝn tomsǝ ɓa Kiritawa ma Larabawa nsaad nɗǝn kura ɓǝn kan ma ee yaande a ɗuura mbu nhiinyanhiinya u Kaa yǝ tomsǝ ɓa!”

¹² Hana yamni yǝn kura nhiinyanhiinya to ɗǝm ɗuura ɓǝ nfaa, pa ɓǝ taa ɓaatǝ me, “Mbusa yǝn sen meminiu?”

¹³ Pa ɓaata ɓǝ nhuu ɓǝn nkee ɓǝ me, “Ɓǝ wee mbraa em ngwate inabi man ǝn taa ɓǝn taa.”

Bitrus yǝ nkee mara ɓeta dem

¹⁴ Pa Bitrus yǝ nii kǝɗ ma ɓaa pu nhaa fin sǝɓa, yǝ nik kwaro yǝ nkee ɓaa kwausǝ dem sǝɓa me, “Saa ɓan ɓǝɗ Yahudawa ɓa ma nsaad ɓa sǝsǝ Urshalima ɓa, a lee nǝsǝ nkee mara ra; sǝ kura yaɓ a mbu kǝnǝnsǝn nkee ɓa.

¹⁵ Ɓet ɓa ɓǝ wee ɓallo nga sǝn sensǝnsen wa ra. Waaso naakǝn a ɗenda kweɗ!

¹⁶ Awo, u nwa ǝn mbu an nawanto ya Yowel yǝ nkeesǝ wa me,

¹⁷ Kaa yǝ nkee me, A kaa feɗefeɗe ɓa, Kǝnǝ tung Wis nwaano a ɓetani nsaad. Em ɓǝsa Parata ma toona kǝɓǝ na wanto, emɓǝsa parata ngeek ngeek ɓa ɓǝka wǝr mbu wo sundura ɓa, Sirta ɓǝsa ɓǝkǝ tom rootǝma.

¹⁸ Hana a hoota ɓǝna ni, Parata ma toona, Kǝ nǝ ɓǝ tung Wis nwaano a kaa sǝsa, ɓǝkǝ na wanto.

¹⁹ Kǝnǝ weɗa mbu nhiinyanhiinya ɓa a liura ɓoti ma mbu maa a put ntaadiwa, monma ma ara ma teptepto kino ra.

²⁰ Pa oosa kiya kang yǝ hoo handa teptep ofe ɗǝm kiya kang monma fer ka too ɗǝnda Ankundi ra kawo ɓa.

²¹ Pa hana yamni yaa yǝ yarsǝ ɗǝnda Ankundi ya ra kiya taa kon nkwee ra wa.

²² Waso, sǝ kura ɓaa Isra'ila ɓa mbu kǝnǝsǝn nkee a ɗuura Yeso yaa Nazarat ya. Kaa yǝ weɗa sǝ me yǝ tung Yeso a sani ma lau yǝ yausǝ tom mbu nhiinyanhiinya ɓa ma mbu weɗara ɓa ma mbu yǝ weɗasǝ a sani ɓa. Sase nsaad sǝ maan.

²³ Kaa yǝ wee werkon ɗǝm yǝ maan me Yeso ɓaa ka na a nema sǝsa. Pa sa too sǝ na ɓaa tenatena ɓa, ɓaa kwakǝ a ɓota.

²⁴ Pa Kaa yaa niki a tiina, yǝ hiksǝ kongsa wodɗa ra, me wodɗa yǝ nkaa yaa mara.

²⁵ Dauda yǝ nkee a ɗuura ira me, “ ‘Nǝ wǝr Ankundi nfee a wiyo a nani. Me yaa nem saya yaane, Nǝ kura kokto ra.

²⁶ Me maaso seura na yaa kwalo ɗǝm nǝn hur kuɗa; maabiri yaane ɗǝm kiya kaɗ a waro,

²⁷ me ngǝ nǝ lee a tina ra, ɗǝm ngǝ lee yaa ɗekɗek yaa nge yǝ nhoo ra.

²⁸ Ngǝ nkee nǝ me nǝ maa ɗǝɗa kaɗo huurtu wa; kǝ ngǝ nǝ kung ma kwalo a kaɗo ke ma ngiinga wa.’

²⁹ “Ɓaata ɓǝna, kǝnǝ nkaa nǝsǝ nkee kokto semra me sira Dauda yǝ woɗɗo aa hokko, tina usu nding nawa.

³⁰ Pa Dauda an nawanto ya yǝ maan me Kaa yǝ waasǝ kuun me kiya ti yaake fin a ɗaaso tuwa usu wa yǝ kaɗ kuɓu.

³¹ Dauda yǝ maan me mbu ɓa kǝ tom maaso, pa yǝn ndǝ nkee me Krisiti kiyǝ nii a tina ma huurtu. Yǝ nkee me Kaa yaa lee a tina ra, ɗǝm ngǝ lee yaa ɗekɗek yaa nge yǝ nhoo ra.

³² Kaa yǝ nik Yeso ma huurtu nsaad nɗǝsǝ wa ndǝ wǝr ɓongtǝra a ɗuura iran.

³³ Yeso ɓaa toosǝ me yǝ kaɗ a nem seya Kaa ya, ɗǝm yǝ kon Wis Kaa wa a papani nga tomsǝ waa wa, pa waso yǝ tung huurtu usu a ɗuura nɗaa, ǝn sase wosǝ ma mbu sǝ wǝrsǝ ɓa ma mbu sǝ kurasǝ ɓa

³⁴ Me Dauda yǝ taa ɓoti a liura ra, hana maaso, yǝ nkee me. “Ankundi nkee Ankundi yaane me, ‘A kaɗ a nem seya yaane

³⁵ ndub me nǝ ti ɓaataker ɓǝnga a faɗa natsa sǝngan.’

³⁶ “Me maaso a lee nsaad ɓaa Isra'ila ɓa ɓǝ maa mbu ɓa: Kaa yǝ kang Yeso, u sǝ kwaakǝ sǝsǝ wa, ǝn sase Ankundi ma Almaseho ɗǝm.”

³⁷ Pa ɓeta kurasǝ mbusǝsa maaso wa, seura ɓǝ kwit ɓǝ nkee Bitrus ma ɓaata ɓahona ɓa me, “Ɓaata, kǝtǝ tom mbiu?”

³⁸ Pa Bitrus yaa nkee me, “Sǝ kon nfaata isǝ tom baptisma hana yamni, a ɗǝnda Yeso Krisiti ra ɓaasǝ lee tentenato usu. Pa sǝkǝ kon Wis Kaa wa.

³⁹ Waa wo wa ndǝ waaso ma emɓǝsa. Ən u ɓeta nsaad Ankundi Kaa ɓǝnɗaa kiya tauwa, hana yaase kayina.”

⁴⁰ Ma maatamse ɓolɓol yǝ wiin ɓǝsǝ ngwee wa, pa Bitrus yǝɓǝ kǝna me, “Sǝ kon nkweera eewaaso a put ntaandi tenatena wa.”

⁴¹ Ɓaa ɓǝ yausǝ ma mara sǝra ɓa, ɓaa tomɓǝ baptisma, ɓeta kansǝ pusa pu pu taatǝn u sokǝsǝ a ɗuura ka ɓǝsǝ ra wa.

Kwauwo ɓan na ɓongtǝra ɓa

⁴² Pa ɓǝ ti senda ɓora a fǝɗkǝra ɓahona ra, ɓaa tom siktǝra ke nsaad, ɓǝn se mbuseya ke nsaad Ɓǝn tom kǝnara.

⁴³ Hana yamni yǝ kungsǝ ma kokto ma wedara dem ma nhiinyanhiinyato ma maa mbuka ɓahona ɓǝn weɗasǝ wa.

⁴⁴ Ɓaa ɓǝ nasǝ ɓongtǝra ɓa nsaad ɓǝ ke a han fina, ɓǝn ɓaa mbusa u ɓǝ taasǝ wa nsaad a han fina.

⁴⁵ Ɓǝn fang mbu ɓosa ɓǝsǝ ma siso ɓa, ɓǝ na hana yamni ya pamsǝ me aa kwasi ya

⁴⁶ A han weya ɓǝn pama han fina a taanda hit ɓǝɗ Kaa Urshalima wa. Ɓǝn se mbuseya a ɗuur sa ɓosa ma kuɗa fin ma kwalo,

⁴⁷ ɓǝn nyoo Kaa ɓǝn kura nepto ɓǝ taasǝ a ɓeta niwa. Pa Ankundi yǝ ɓǝ sookǝ ma ɓeta dem nfee ɓa ɓǝ taasǝ kon nkweera wa.